МЫЙ КОЛӦ БЫДМАНТОР КӦЙДЫСЛЫ ЧУЖИГАС?

1. Пуктӧй ӧти дозйӧ му, мӧд дозйӧ пильнӧй пызь, коймӧдӧ — стеклӧ пызь, нёльӧдӧ — дӧра тор да пуктӧй сэтчӧ нёль пӧлӧс сю кӧйдыс кымынкӧ тусьӧн. Став дозсӧ киськалӧй ӧтмоза ваӧн.

Вежон бӧрын видлӧй — быд дозйын чужӧма кӧйдысыс али абу.

Висьталӧй: колӧ оз кӧйдыслы сёяныс чужигас?

Кытысь нӧ сёянсӧ сійӧ босьтӧ?

2. Босьтӧй кык бутылка (паськыдджык вомасаӧс). Пыдӧсас пуктӧй кӧтӧдӧм вататор вылӧ сю кӧйдыс.

Лун 4–5 бӧрын ӧти бутылкасӧ тупкӧй пробкаӧн топыда. Бара лун 4 бӧрын видзӧдлӧй — мый лоӧма.

Мый вӧсна сідз лои колӧ кӧ тӧдны, сюйлӧй сійӧ бутылка пытшкас сартаса би. Сюйлӧй сэсся восьса вома бутылкаас.

Артыштӧй кыкнансӧ.

3. Пуктӧй кык дозйӧ чужтӧм вылӧ сю кӧйдыс. Ӧти дозсӧ сувтӧдӧй пач дорӧ матӧджык, шоныдінӧ. Мӧдсӧ — кӧдзыдджыкинӧ.

Приметитӧй: кодар дозъяс чужас водзджык. Мыйла?

4. Пуктӧй бара жӧ сідз кык дозйӧ сю кӧйдыс. Ӧти дозсӧ сувтӧдӧй югыдінӧ, мӧдсӧ — кытчӧкӧ пемыдінӧ. Дас лун бӧрын пасйӧй: а) кутшӧм петасыс лоӧма югыдінын, б) кутшӧм — пемыдінын.

Тайӧ нёль пӧлӧс видлӧгъяс сертиыс тӧдӧдӧй да шуӧй:

Мыйяс колӧ быдманторъяслы чужиганыс; мыйтӧг оз вермыны найӧ овны.

Сэсся водзӧсӧ быдмигас мый ещӧ колӧ быдманторъяслы тайӧяс кындзи?