МУ ПРАЗДНИК ЛУН

„Ж-ж-р-р-р“... — жургӧ, сикт пасьтала кылӧ.

Мый нӧ тайӧ?! Йӧзыс сиктын шызьӧма. Быдӧн котӧрӧн локтӧны Епӧ лавка дорӧ. А, талун ӧд видз-му уджалан праздник, мулӧн нимлуныс! Со тай, машинаӧн чуксалӧ-чукӧртӧ сӧвет власьтыд видз-му уджалысь йӧзӧс мулысь нимлунъя пирӧгсӧ сёйны.

— Талун пӧ во пом праздник со! А тайӧ нӧ мый?

— Тайӧ вартан машина. Видзӧд мый вӧчӧ! Не вартаныд.

Пытшкас идзас кольта сюйласны да, сӧмын бон петас, кудель кодь.

— Да мый нӧ тайӧ куш идзастӧ жбонкъянныд? Вайӧ тыра кольта! — кодкӧ, кылӧ, горзӧ.

Кодъяскӧ котӧртісны тыра кольтаясла рыныш дорӧ. Вайисны. Кольтатӧ сюясны да сӧмын шарсвартас-шырзьыштас, быттьӧ абу вӧвлӧма. Идзасыс петас жуг кодь небыд.

— Мӧсъясыдлы оз ков та вывті турун, шӧвк кодь небыд. Няръялӧма тай.

— Кӧйдысыс (тусьыс) сӧмын шаргӧ. А кӧн нӧ шептыс? Весиг ӧти шептор абу?

— Вот тайӧ и бур, — шуӧ Конӧ Степан.

— Оз ков бара рынышын косьтыны.

— Пес оз ков ни, рынышыс оз ков ни.

— Кӧть сэсся сёрӧмад эн тэчлы. Вайин да додьсьыд вартін дай, сӧмын тусьсӧ да идзассӧ курав.

— Дона-ӧ нӧ ачыс сулалӧ? Эськӧ ньӧбны да?

— Ещӧ ньӧбны дай. Кӧн нӧ деньгаыд?

— Он ӧд ӧтикӧн, артельӧн, морт вит-квайт.

— Тайӧ ӧд став сиктсаыслысь лун-мӧдӧн вартас.

Дыр на сідз сёрнитісны мужикъяс машина дорын, сэсся сёрнитігтырйи жӧ пырисны лыддьысян керкаӧ висьталӧм кывзыны.

_______________

Эм-абу тіян грездын вартан машинаыс? Дона-ӧ сулалӧ? Морт вит-ӧ-квайтлы кӧ, либӧ даслы кымын ньӧбны, донӧн-ӧ воас?

Эм-абу тіян грездын агроном? Абу кӧ, волывлӧ оз кыськӧ?

Кутшӧм машинаяс нӧшта эмӧсь тіян грездын: вартан, ытшкан, вундан, тӧлӧдчан, кӧйдыс весалан? Ветлӧй машина уджалігас да видзӧдлӧй: код ногыс ӧдйӧджык уджыс мунӧ — машинаӧн уджалӧмӧн али киӧн?