СИР
І.
Луныс нин талун Тималӧн сэтшӧм лёк.
Кык лун чӧж Тима вӧчис пыж. Чагторъяс пуртӧн шыльӧдіс, кытчӧ колӧ кӧрт тувйӧн тувъявліс. Дзик пыж кодь и лои.
Кӧбрӧгысь корсис сир чуман, пыжсӧ сираліс, мед ва оз пыр.
Лэччӧдіс шор дорӧ, лэдзис — кывтӧ лӧсьыда. Весиг ӧд ваыс оз пыр.
Вайис гортас, пуктіс паччӧр вылӧ косьтыны. А сэні мамыслӧн дудникыс.
Асывнас водз мамыс петіс мӧсъяссӧ лысьтыны. Чеччис и Тима, кайис паччӧрӧ, — пыжыс абу.
Пырӧ мамыс, нинӧм шутӧг Тимаӧс юрсиӧдыс.
Тима синъяссӧ паськӧдіс.
— Нэмӧн мынтӧмторъяс! — горзӧ мамыс. — Ме тэд сир петкӧдла. Дудниктӧ тшыкӧдӧма. Пачӧ регыд шыбита пыжтӧ.
Сэсянь луныс и босьтчис.
Мӧдӧдчис Тима школаӧ, нянь босьтӧ. Видзӧдліс сы вылӧ мамыс:
— Ноко петкӧдлы, петкӧдлы. Тэ и гачтӧ сиралӧмыд? Выльсӧ?
Скӧрмис мам важ дорсьыс ёнджыка.
— А мый нӧ эськӧ кӧть гачыд и сирӧссис? Дӧрӧмнад сайӧдан да, оз и тыдав. Ыджыда-ӧ и сирӧссьӧма, ки пыдӧс ыджда сӧмын и эм-а.
Мунӧ Тима, ачыс пыж йылысь думайтӧ. Кытчӧ бара мамыс шыбитіс-а, колӧ корсьлыны. Мед эськӧ эз жӧ жугӧд.
ІІ.
Школаын видзӧдліс Зоя Тима ки вылӧ, шуӧ:
— Колӧ мыськыны, ставыс сир.
Лёкмис Тима.
— Ачыд тэ сир. Менам киясыд тэлӧн дорысь мичаджык.
Зоя оз лэдзчысь — мыськы да мыськы. Став комиссиясӧ чуксалӧ.
— Бӧрйӧмаӧсь жӧ ӧд тай найӧс мыйлакӧ!
Ставныс видзӧдлісны, шуисны: колӧ кияссӧ мыськыны, да ӧдйӧджык.
— Став классыс виччысьӧ — колӧ экскурсия вылӧ мунны.
Муніс Тима стӧрӧжика ордӧ майтӧгла. Колляліс (вӧтліс) сійӧс стӧрӧжика.
А майтӧгтӧгыд сиртӧ он мыськы. Лоӧ Тималы гортас ветлыны.
Петіс Тима, видзӧдӧ — кодкӧ змей качӧдӧма. Зэв ыджыд, да и сяркӧдчӧ ӧд ещӧ. Сунис сертиыс синнас туяліс — ыб вывсянь лэдзӧмаӧсь.
— Лоӧ тӧдмавны, кыдзи сяркӧдчансӧ вӧчӧмаӧсь, — думыштіс Тима. Кайис ыб вылӧ. Вӧлӧмакӧ, поплӧн Геннадейыс качӧдӧма.
Лэдзис змейсӧ Геннадей, жбонысь содтіс бӧжсӧ. Тима вӧзйысис кутлыны качӧдігас. Кутӧ, ачыс сяркӧдчансӧ видлалӧ: кыдзи вӧчӧма.
Муртса на змей качны пондіс, Тималӧн батьыс воис. Сувтӧдіс вӧвсӧ, юалӧ Тималысь:
— Мыйла пӧ тэ абу школаын, пиӧ? Оз ӧмӧй талун велӧдны?
Вӧлисти Тималӧн сирыд дум вылас уси.
— Ме... ме, батьӧ... Ме, батьӧ... Ки мыськыны.
