ТӦВ

Кӧдзыд лунӧ восьтӧй ывлаӧ петан ӧдзӧс. Порог дорас кутӧй ӧзъялан сись. Кодарӧ пӧлыньтчас биыс? Лэптӧ сисьсӧ матич бердлань. Кодарӧ пӧлыньтчас ӧні биыс?

Сиськыдлӧн биыс петкӧдлӧ, кодарӧ тӧлыс пӧльтӧ. Мыйла, кӧдзыд дырйи кӧ восьтан ӧдзӧстӧ, медвойдӧр кок кынмӧ?

Кытчӧ воӧ кӧдзыд сынӧдыс, тӧлын кӧ восьтан форточка?

Пывсянын улыс джоджас али вылыс джоджас жарджык?

Кутшӧм сынӧд кокниджык — шоныд али кӧдзыд? Мый лоӧ кӧдзыд сынӧдысь шоныд пач дорын? Кытчӧ мунӧ шоналӧм сынӧдыс? Кутшӧм сынӧд локтӧ сы пыдди? Ӧти местаын-ӧ олӧ керкапытшса сынӧд? Ӧтведайтӧй, кыдзи классын, перемена дырйи, ӧшинь восьтӧм бӧрын вежсӧ сынӧдыс.

Сідзи жӧ вежласьӧ сынӧдыд ывлавылын, став му вылас. Кор ӧтиклаын кӧдзыд, а мӧдлаын жар, кыпӧдчӧ тӧв. Жар местаын шоналӧм сынӧдыс кокняммӧ, кыпӧдчӧ вылӧ: сэки орчча местаяссьыс пондас пӧльтны ыркыдджык сынӧдыс. А шоныд сынӧдыс, кайӧм бӧрас, пондас мунны кӧдзыдджыкинӧ. Сійӧн частӧ позьӧ казявлыны, кыдзи му вылын тӧлыс ӧтарӧ пӧльтӧ, а кымӧръяс мӧдарӧ шлывгӧны.