МЫЙЯС ПРИМЕТИТАВНЫ АРЫН

(сентябр, октябр да ноябрын)

Ывлавылысь.

1. Пасйӧй: шонді лэччӧм быд дас лун бӧрын (сы серти сэсся и вӧчалӧй диаграмманытӧ).

2. Кор вӧлі медводдза пуж.

3. Кор кынмисны тыяс, гӧпъяс.

4. Кор уси медводдза лым. (Водзӧ лым усьӧм-содӧм йылысь колӧ пасъявны тӧвбыд ӧтчыд вежон пиын кӧть, мед быд здукӧ кужан шуны — джуджыда-ӧ нин лым усьӧма. Куш мусяньыс на колӧ лӧсьӧдны ӧти метр кузя бедь, юклыны сійӧс тшуплӧмӧн ли, краситӧмӧн ли сантиметръяс вылӧ да сувтӧдны сійӧ бедьсӧ школа керка дорад кытчӧкӧ лӧнинӧ).

5. Кор кынмисны юяс (быд ю аслас нимӧн).

6. Кор сувтіс тӧвся туй. (Кор кутісны вуджавлыны ю вомӧн йи вывті. Мерайтӧй йиыслысь кызасӧ.)

Татшӧм юасянъяссӧ пасъялӧй ывлавыв календараныд торъя графаас, либӧ лӧсьӧдӧй асланыд быдлунся тетрадяныд торъя лист бок да сэтчӧ вочасӧн и пасъялӧй, шуам кӧть, со кыдзи:

1929-во

1.	Уси медводдза лым	28/Х
2.	Кынмис Эжва ю	30/Х

Быдманторъяс (пуяс, турунъяс, няньяс, пуктасъяс).

Бара лист бок лӧсьӧдӧй быдлунся тетрадяныд быдманторъяс йылысь пасъявны. Пасйӧй:

1. Кодыр гылалісны коръяс: пипулӧн, бадь пулӧн, льӧм пулӧн, кыдз пулӧн, нинпулӧн, сӧспулӧн, ниалӧн (лыс).

Вӧчӧй со кутшӧм таблицатор:

Дорвывног	Кутшӧм пулӧн.	Кодыр (тӧлысь, лун)
1.	Льӧм пулӧн	ІХ/10
2.	Кыдз пулӧн	ІХ/14

Рисуйтӧй краскаӧн пуяссӧ, кутшӧм рӧмаӧсь найӧ вӧліны коръясыс гылалігӧн.

2. Кутшӧм арся кӧдзаяс тіянладорын эмӧсь? Кодыр кӧдзлісны? Кутшӧмӧсь петасъясыс?

3. Кутшӧма таво кисьмис пув, чӧд, пелысь, льӧм. Уна-ӧ вотісны.

Пӧткаяс, пемӧсъяс, гагъяс.

Пасйӧй:

1. Кодыр лэбзисны ва пӧткаяс (уткаяс, дзодзӧгъяс, юсьяс).

2. Важӧн-ӧ лэбисны жаворонъяс, чикышъяс, сырчикъяс.

3. Приметиталӧй видзан пӧткаясӧс (курӧгъясӧс), кыдз найӧ аръявыв олӧны. Кор дугдісны пуксьывны (колькъявны).

4. Видзӧдалӧй, кыдзи-мый олӧны видзан пемӧсъяс (вӧвъяс, мӧсъяс, ыжъяс). Кодыр йӧртісны найӧс гид-картаӧ.

5. Пасйӧй, кор бырины гутъяс, номыръяс. Корсьӧй, кытчӧ найӧ дзебсьӧмаӧсь.

6. Кор казялінныд сикт гӧгӧрысь джиянъясӧс, пинькайясӧс.

Вӧчӧй календар пӧтка лэбзьӧм йылысь, шуам кӧть, со кыдзи:

Дорвывног	Пӧтка нимъяс	Кодыр
1.	Лэбзисны сырчикъяс	ІХ/3
2.	„ юсьяс	ІХ/9