МЫЙ ВЫЯ НӦ КУТАМ ВЕЛӦДНЫ ЫВЛАВЫВСӦ

Мусяр пасьтала уна пӧлӧс местаыс эм: кытікӧ шоныд, кытікӧ кӧдзыд, кытікӧ шӧркоддьӧм, кытікӧ вӧра, кытікӧ туруна, мукӧдлаын куш лыа.

Быдлаті абу на и му серыс ӧткодь: кытікӧ вевтас (вылын), кытікӧ увтас (улын), кытікӧ тшӧтшкӧс, кытікӧ мылькйӧсь да гӧраӧсь.

Мукӧдлаас уна юяс, тыяс, шоръяс...

Абу на и му эжыс (мусиныс) ӧткодь: лыаа, сёйӧд, изъя, сьӧд муа...

Абу быдлаын ӧткодь быдманторъясыс, пӧткаясыс, пемӧсъясыс...

Став мусяр пасьталаыд зэв уна пӧлӧс местаыд эм. ССРС пасьтала весигтӧ абу ӧткодь.

Велӧданторйыс нӧ, тӧдмаланторйыс таво кежлӧ миян лоӧ ас му, асланым оланінным — Коми обласьт.

Дерт, ми огӧ вермӧй став Коми му пасьталаыс экскурсияӧн ветлӧдлыны-велӧдны. Ми кутам войдӧр асланым сикт гӧгӧр видлавны, сэсся сы серти и мукӧдласьыс кутам гижӧдъяс серти да юасьӧм да орччӧн ӧтлаавлыны да артавны.