ВАЙӦ ЛӦСЬӦДАМӦЙ АС КОСТЫН ЫВЛАВЫВ ТӦДМАЛАН ЧУКӦР ТАЙӦ УСТАВ СЕРТИЫС

І. Миян кӧсйӧм.

1. Ми кӧсъям тӧдӧдны (велӧдны) ассьыным оланіннымӧс, мунымӧс. Мый понда кӧсъям ми сійӧ велӧднысӧ да тӧднысӧ? Сы понда, мед мортлӧн олӧмыс му вылас лоӧ кокньыдджык, долыдджык.

2. Медвойдӧр тӧдӧмсӧ сійӧ кӧсъям босьтны ывласӧ велӧдӧмӧн.

ІІ. Миян уджъяс лоӧны.

1. Ми быдтор приметиталам ывлавылысь. Сы кузя: а) ми ветлӧдлам экскурсияӧн велӧдыськӧд и ас кежаным; б) ми тӧдмалам пемӧсъясӧс и быдманторъясӧс асланым оланін гӧгӧрысь, ас вӧр-ва вылысь; в) ми быдтор гижалам, пасъялам быдлунся тетрадяным ассьыным тӧдмалӧмнымӧс.

2. Ми ставным отсасям мӧда-мӧднымлы: кодъяс миян костысь велӧдӧны пӧткаясӧс, налы ми отсалам, кӧть асьным и чериясӧс тӧдмалам-а; кодъяс тӧдмалӧны быдманторъясӧс, ми сідзжӧ отсалам, кӧть асьным гагъяслысь олӧмсӧ велӧдам-а.

3. Ывлавыв велӧдігмоз ми кутам ӧтпырйӧн корсьысьны нигаясысь тӧдмаланторъяснымӧс, мед нигатӧ восьтан да гӧгӧрвоан.

Миян законъяс.

1. Миян чукӧрӧ шленӧ вермас пырны быдӧн, коді сы вылын кутас уджавны да уджсӧ бура керны.

2. Быд вежон пиын ӧтчыд ми чукӧртчылам ӧтлаӧ да лыддялам быдсӧн ассьыным гижӧм-пасъялӧмнымӧс став дырйиыс.

3. Кутшӧм шлен мый кӧсйысяс вӧчны, сійӧ ставсӧ помасӧдз вӧчӧ, оз эновтчы эштытӧдз.

4. Ми чорыда кӧсйысям ывлавывлысь озырлунсӧ да мичлунсӧ тшыкӧдӧмысь видзны: лёк ногӧн вӧр пу кералӧмысь, пӧтка позъяс косявлӧмысь, посни чериӧс изведитӧмысь да мукӧдторйысь.

5. Став тайӧ шуӧм сертиыс кӧсйысям вӧчны ми — Сӧветса Коми мулӧн пионеръяс.