* * *

Шонді югӧрыс водз асыв чеччӧдіс,
Визув ю дорӧ надзӧник лэччӧдіс,
Небыд тӧвруыс бандзибӧс окыштіс,
Быттьӧ сьӧлӧмӧс виччысьтӧг сотыштіс,
Еджыд кыдз пуыс лапъяснас сывйыштіс,
Вежа лысваӧн кӧтӧдіс-пызйыштіс.

Гажа ягвылыс кыпыда горалӧ,
Мыла сьылӧмӧн вӧр-ваыс лолалӧ,
Асъя кыаыс ӧзйӧма — нюмъялӧ,
Эзысь тӧлысьыс шудлун мен пудъялӧ,
Вӧсни пелысьыс томмӧма-вӧччӧма,
Чим гӧрд тугъяса кӧсаяс лэдзӧма.

Пашкыр баддьыс со ю дорын полькӧдчӧ,
Быгзьӧм гыясӧн ышмӧма — ворсӧдчӧ,
Видз выв дзоридзыс лысваӧн мыссьӧма,
Кодлы муслунсӧ козьнавны сызьсьӧма?
Лӧз-лӧз синъяссӧ шензьӧмӧн восьтӧма,
Бара кодлыськӧ сьӧлӧмсӧ косьтӧма.

Сьӧд-сьӧд синъяссӧ льӧм пу со вералӧ,
Гашкӧ, ме вылын жальпырысь сералӧ.
Садьмӧм кыддзыслы восьті ме сьӧлӧмӧс,
Сылы восьті ӧд ме олӧм-вылӧмӧс,
Лои кыпыдджык меным да долыдджык,
Кыкӧн кокниджык овлӧ тай лолыдлы.