«ДЯДЕНЬКА МИША» ЙЫЛЫСЬ МОЙДАНКЫВ
(Ответ на стихотворение «Вокруг Коми Республики»)
Буржуйяслӧн важ культура
Коньӧръяслы вӧлі «дура».
Выль культура йӧзлы вӧчны колӧ —
Морт сяма мед вӧлі гӧльлӧн олӧм.
Ӧтчыд, коркӧ тайӧ лун-войӧ, Сыктывкарті важ гимназия дорті мунӧ вӧлӧм «Дядя Миша». Ыджыд тулупасьӧма да оз тэрмась, ньӧжйӧникӧн тшапа зэв тувччалӧ и думайтӧ ас йывсьыс:
«...Мы воспитаны культурой русской (а она была не дурой)!»
Сэки друг сылы паныдасис ӧти коми морт (миян грездысь Семӧ Педӧр). Сійӧ аддзас: «дядя Миша»-лӧн тулуп бӧжыс лым вывті кыссьӧ, и «гаркнитіс»: «Мишӧ, бӧжыд вазьӧ!» «Дядя Миша» чур-чермуні повзис, тӧкӧтьӧ эз усь моски вылас. Да кыдзи нӧ он повзьы сэтшӧм мортысь, коді кар шӧр карын «гаркнитіс» комиӧн да ещӧ «Дядя Мишалы»? А «Дядя Мишӧ» коминас дас во нин оз куж. Кор садь вылӧ воис «Дядя Миша», скӧрмис, коми мортӧс сувтӧдіс дай шуис:
«Шовинист ты!..
Разве можно гаркать “вазьӧ”?
Ты б сказал, что “мокнет”,
Так-то ведь своя культура будет! —
Коми русское забудет...»
— Чӧв, другӧ, миян деревняын толькӧ нёльӧн и кужӧны роч нигаястӧ лыддьыны: поп, дякӧн, учитель да ещӧ Мишӧ Вавил, кӧнкӧ Сибирын нэм чӧжыс шышкаліс. Менам баба роч молитваястӧ ставсӧ жӧ тӧдӧ — «Отче наш» и «Спаси Господи» и. Сійӧ бара оз вунӧд, кӧть чер тышкӧн юрас кучкав, — шуӧ коми морт.
«Дядя Миша» мӧдіс водзӧ. Видзӧдӧ да синмыслы оз верит: Каланча весьтын, туй шӧрын вӧчӧны караб (со ӧд сё дивӧыд!) Зільӧны уджалӧны, мӧда-мӧдсӧ шуӧны «Гришук», «Васьӧ». «Дядя Миша» думайтӧ: тані бара шовинистъяс, лёк пеж коми кывнад сёрнитӧны, со ӧтилӧн зептас коми буквар и, дзик шовинистъяс. Ӧти морт «Дядя Миша» дінӧ локтіс, шуӧ:
Мый нӧ шензян, Дядя Миша!
Тайӧ караб вӧчам сылы,
Коді пыжӧн вуджны полӧ
Мӧдлапӧлӧ дидъяс дорӧ,
Коді пӧрысьмӧма, выжыв,
Ичӧт сьӧлӧма и шуӧ:
«В бороде моей седина,
А в башке не мозг, а глина —
Я от бережка отстану,
А к другому не пристану...»
Мед оз кылав, караб вӧчам.
Кылалас кӧ, пыжыс жаль...
«Дядя Миша» ӧдйӧнджыка пышъяс караб вӧчысьяс дінысь. Воис клуб дорӧ. Сэні митинг. «Часлы пырала!» Пырис. Буретш висьталӧ оратор:
«...Коми мортӧй!
Ты забит — переродися,
Перерӧдитчыны верман
Сӧмын аслад кывнад,
Циркуляръяс и декретъяс,
Ставсӧ коді власьтсянь петас
Коми кывйӧн гижны понды!..»
Чушис «Дядя Миша»-лы. Скӧрмис. Сьӧвзис. «Тьпу! перерӧдитчыны тшӧктӧны коми йӧзӧс!» Петіс клубысь. Гортас мунӧ. Бӧрсьыс тьӧтка локтӧ, горзӧ: «Эй, дядьӧ, тулуп бӧжыд вазьӧ!» Тьӧтка вылӧ видзӧдліс, матын сёйны вӧлі. Гортӧ воис. Инас оз ӧшйы. Кольмӧм кань моз пельӧсысь пельӧсӧ ветлӧ. Вомгорулас ропкӧ: «Пета местаысь (сійӧ вӧлӧм кӧнкӧ служитӧ), ог жӧ кут коми йӧзлы служитны.
Нас пӧ лучше уж увольте,
Коми-рочем быть дозвольте!»
Меным зэв жаль лои «Дядя Миша»-ыд, синва петмӧн жаль. Ӧд кӧсйӧ петны местасьыс! Сійӧ чайтӧ коми йӧз кутасны уджавны сы ногӧн жӧ, кыдзи сійӧ важӧн сар дырйи вӧчлывліс, вӧлі быд коми кывйысь гӧтов ныр-вомад сетны. «Ӧні оз ло сідзи. Некод оз кут, кӧть тэ сёрнит китай ногӧн, толькӧ местасьыд эн пет, дзоньвидза кӧ да гырк пытшкӧсыд здоров: вунӧдін ӧмӧй нин, дяденька Миша, не важ пӧраыд ӧд, ӧні эм Ч. К., сійӧ саботажникъястӧ страсьт оз радейт!» — ме Мишалы вашниті пель водзас.
«Миша» лӧгасис ме вылӧ —
Керка-сь горзӧм... равзӧм кылӧ
(Плачет... скачет... воет).
Стенысь бердӧ пемыд войӧдз
Ветліс «Миша» пиньсӧ сёйиг...
Визь.
