ВИДЗЧЫСЬӦЙ! ПЕЛЬКӦДЧӦЙ! ЛОКТӦ БИА ВИСЬӦМ!

Ставным на ми помнитам, мыйта шог колян тӧв вӧчис биа висьӧмыд. Мыйта йӧзӧс сійӧ шырзис!

Ӧні бара кывсьыны кутіс. Бара мӧдӧдчӧма йӧзӧс шырны.

Талунъя газетын эм нин юӧр: Абъячойын биа висьӧмӧн кулӧма пельшӧр.

Колӧ водзвыв видзчысьны! Оз ков сибӧдны матӧ сьӧд висьӧм! Оз ков лэдзны разӧдчыны сылы!

Биа висьӧм паськалӧ тойяс пыр. Колӧ пелькӧдчыны, весасьны, частӧджык паськӧмъяс вежлавны!

Миянӧ биа висьӧм вермас воны гортӧ локталысь салдатъяскӧд. Колӧ на вӧсна ёнджыка тӧждысьны! Колӧ найӧӧс бурджыка дӧзьӧритны: пывсьӧдны, дӧрӧм-гач выльӧс (выль мыськӧмӧс) сетны, бурджыка вердны, шоныда пасьтӧдны, пелькинын шойччӧдны.

Кор паськалас биа висьӧм, сэки делӧ лоӧ сійӧс лӧньӧдны. Колӧ ӧнісянь видзчысьны, вотӧдзыс.

Коми йӧз! Видзчысьӧй, пелькӧдчӧй, пыркӧдӧй-весалӧй тойяс! Локтӧ биа висьӧм!

Энӧ лэдзӧй, энӧ сибӧдӧй сійӧс! Мед некытчӧ эз вермы сійӧ крукасьны няйт вӧсна!

Тӧдӧй ставныд, тӧждысьӧй, думайтӧй, полӧй: биа висьӧм кыптӧма!

Видзчысьӧй сыысь!

Агас