КОМИ ИНСТИТУТ
«Сӧветскӧй власьт кӧ ӧтлаалан электрификациякӧд (быд удж нуӧдӧм электричество вынӧн) — сійӧ и лоӧ коммунизм», — шуис миян Ленин. Велӧдчытӧг некор оз ло сійӧ.
Мывкыда коми йӧз, долыда гажӧдчӧй,
Сьӧлӧм мед ӧзйӧ пыр, весасьӧ син!
Бур кӧйдыс кӧдзысьяс, Комиӧд разӧдчӧй,
Югдӧдӧй, шонді моз, сьӧд пемыдін!
Уджалӧй сьӧлӧмысь, бур мывкыд сетысьяс,
Велӧдӧй, некор мед вынъяс оз быр!
Кыланныд: локтӧны югыдлань петысьяс,
Кыланныд: «аттьӧ!» нин кайтӧны пыр.
Бур нимӧн кыпӧдчы, ёнмӧдчы, паськӧдчы,
Ыджыд мед лоан тэ, Коми Институт!
Югыд гӧрд кодзулӧн Коми му пасьтала
Куслытӧг дзирдавны, зарниӧй, кут!
Тӧрыт, январ 20-ӧд лунӧ, Сыктывкарын воссис Ыджыд велӧданін Коми муын — Коми Институт (
Войдӧр, саръяс дырйи, уджалысь йӧзлы велӧдчанінъяс вӧлі иганаӧсь. Уна-ӧ коми пӧвстын эм велӧдчӧм йӧз? Зэв этша, вит-квайт морт. Ӧні Сӧветскӧй власьт тшӧктӧ ставыслы велӧдчыны, восьталӧ вочасӧн школа вылӧ школа.
Вель уна нин и миян Коми муын воссис выль школаясыд.
Велӧдны колӧ ёна, ставным на ми этша тӧдам.
Коми челядьӧс велӧдны колӧ комиӧн, сідзи шуӧ ӧнія власьт, да сідзи и колӧ вӧлі важысянь: тӧдтӧм кывйӧн, тӧдтӧм сёрниӧн посньыдик коми челядьыд оз гӧгӧрвоны.
Кытысь нӧ босьтан велӧдысьяссӧ?
Ӧти велӧдысь вылӧ ӧнія ногӧн колӧ сетны сӧмын кызь вит велӧдчысьӧс, а миянын ӧти вылас усьӧ, гашкӧ, сё.
Кыдз колӧ, коми челядьыд оз и велавны.
Ӧні велӧдысьяс кутасны петны выльысь воссьӧм Коми Институтысь.
Коми йӧзлы колӧ шуны Сӧветскӧй власьтлы зэв ыджыд «аттьӧ!» тайӧ ыджыд велӧдчӧм-велӧданін лӧсьӧдӧм вылас.
Мед жӧ югдӧ Коми му!
