ТАЙӦ ВӦЛІ ПЕРКОЯГЫН

КОР ГАЖТӦМ

1

Дзик на неважӧн Перкояг сиктын, коді дзебсьӧма Кай вӧлӧкдорса пармаӧ, челядьлӧн горзӧмысь вӧлі пельыд чуналӧ. Ӧні петан гортсьыд — гӧгӧр шынитӧв, сӧмын кылан, кыдзи ыркыдінын дзизгӧны номъяс да пывсянъяссайса неыджыд расын асланыс позъясын негораа чипсӧны бордъясьтӧм на лэбачпиян. И котравны ӧні некодкӧд. И ворсны некодкӧд.

Перкоягса школаын тӧлысь сайын нин помассис велӧдчан во. Ӧтияс мунісны пионерскӧй лагерӧ, мӧдъяс — карӧ экскурсияӧн либӧ прӧста тӧдсаяс да рӧдняяс ордӧ. Гортаныс колины сӧмын Витя да Серёжа. Некытчӧ жӧ абу мунӧма и Маша Модянова, но мый сыысь? Нывкаыд нывка и эм, — тӧлкуйтӧны детинкаяс: — Вуграсьны сыкӧд он мун, ни мач чужъявны он понды. Гажтӧм лоис, веськыд мат.

Витя шӧрыштіс тупӧсь да шӧрӧм сорнас юис ыджыд кружка тыр кӧдзыд йӧв — и пӧт. А ӧні мый? Гашкӧ, сунгысьны кытчӧкӧ ыркыдінӧ да ойбыртлыны недыр? Пӧжалуй, ойбыртлан тані. Витялӧн бабыс асывсянь рытӧдзыс век кок йылын жӧдзӧ, пыр мыйкӧ вӧчӧ и внукыслы спокой оз сетлы: то картупель тшӧктӧ мудйыны, то градъяс весавны. А сійӧ ӧмӧй детинкалӧн удж?

Ӧшинь улын котсӧны курӧгъяс, петук кавшасьӧма потшӧс вылӧ да ливкйӧдлӧ-чуксасьӧ, сикт сайын — трактор мургӧ, коськӧм гӧрӧ, а кӧнкӧ кылӧ нывъяс сьылӧны. Найӧ колхознӧй град йӧрын капуста кисьталӧны. Нинӧм интереснӧйыс абу, ставыс сійӧ, мый вӧлі тӧрыт, войдӧрлун. Ставыс сійӧ, мый кывлісны пельяс, аддзылісны синъяс.

А кӧні талун Серёжа? Тӧрыт сійӧ тайӧ кадас Шерва дорын нин вӧлі пукалӧ да вуграсьӧ — ёсъясӧс кыйӧ, а талун некӧн оз тыдав. Гашкӧ, бать-мамыскӧд видз вылӧ муніс? Витя дрӧгмуні, быттьӧкӧ кодкӧ емӧн чуткис. Муніс кӧ другыс видз вылӧ, делӧыс лёк лоас. Сэки и кувны гажтӧмысла верман! И мыйла сійӧ. Витя, эз мун карӧ экскурсияӧн? Ветлӧдліс эськӧ ӧні карын музейясӧд, кинояс эськӧ видзӧдіс, спектакльяс...

Эк, мыйла ме сэки кывзыси Сергейлысь! Ылӧдліс, мутиыд!..

Детинка сьӧвзис, чеччыштіс кильчӧ пос вывсянь муас, сэсся босьтіс бедь да мый вынсьыс шеныштіс-лыйис потшӧслань, мед вӧтлыны потшӧс вывсьыс петукӧс: эн пӧ косявлы горштӧ, кор мортлы гажтӧм. Но беддьыс буткысис-усис петшӧр пытшкӧ, эз во петук дорӧдзыс. «Паськыд горш» — думыштіс детинка да мӧдӧдчис сиктаныс. Колӧ пышйыны, пышйыны ылӧджык... Ӧгрӧпена баб пӧди бара нин думайтӧ кытчӧкӧ удж вылӧ индыны — то ли град йӧрӧ, то ли джоджъяс чышкавны. Вермас ещӧ кутшӧмкӧ удж аддзыны. Сійӧ сэтшӧм.

Гажтӧма шутьлялігтыр Витя ньӧжйӧник восьлаліс улич шӧрӧд. Сійӧ видзӧдіс кок улас, бокъясӧ эз дзоръяв. Да и мый дзоръявны гӧгӧр, кор тӧдан, мый сиктын пӧчьяс да ичӧт кагаяс кындзи некод абу.

— Виталь! Вить! Пырав миянӧ, ме мыйкӧ петкӧдла! — друг кыліс детинка.

Маша Модянова. Дерт, сійӧ.

Витя дышпырысь бергӧдчис восьса ӧшиньлань, кияссӧ сюйис зепъясас.

— Мый?

— Лок пырав! Ме мыйкӧ петкӧдла. Менам ловъя кӧчпи эм. Дедӧй кутӧма видз вылысь.

Ловъя кӧчпи! Витя радпырысь уськӧдчис кильчӧлань, медым ӧдйӧджык пырны Маша дінӧ, но первойя пос тшупӧд кайӧм бӧрын зӧм сувтіс. «Вот ещӧ! Кагаӧс моз кӧсйис ылӧдны кӧчпиӧн. Тьпу!»

Витя скӧрмис ас вылас, а ещӧ ёнджыка скӧрмис Маша вылӧ. Ылӧдлӧ кутшӧмкӧ тамыш синма кӧчпиӧн! Да сійӧ ачыс, гашкӧ, тысячаысь унджыкӧс нин аддзыліс и чӧв олӧ... Чудо аддзӧма!

— Мый нӧ он пыр? — зонкалысь падмӧмсӧ казяліс Маша.

— «Мый, мый!» — Витя нерис сійӧс. — Аддзӧмыд тай кӧчпи! Менам, гашкӧ, ошпи эм, и ог ошйысь!

— Йӧйӧ! Некутшӧм ошпи тэнад абу... Да и тэ ачыд... ошпи.

— Но и мед. А тэ — шырпи. Косаыд — шыр бӧж кодь!

— А тэ йӧй! Да ещӧ трус!.. Тэ пӧ век на бабыдкӧд узьлан. Нёльӧд класс помалін, а век на...

Витялы тайӧ чушис. Бара трусӧн нимтісны. А мыйла?

Витя бугжыльӧн видзӧдліс Гӧрба крут чой йылӧ, сэсся пинь пырыс чилснитіс-сьӧлыштіс кок улас. «О, пеж чой, тэ вӧсна тайӧ ставыс! Кор тэ аслад местаысь нюрас тюван?!»

Эз прӧста лӧгав Витя крут чой вылас. Таво тӧвнас сійӧ другъясыскӧд ислаліс сэні лызьӧн. Ставыс вӧлі лючки-ладнӧ, кытчӧдз сійӧ эз кай лыжинас сійӧ крут нӧрыс йылас. А Гӧрба нӧрыс-чойыс сэтшӧм крут, сэтшӧм джуджыд, мый видзӧдлан кӧ уліас, сьӧлӧмыд коклябӧрӧдзыд лэччӧ. И Витя, дерт, эз лысьт исковтнысӧ сэті. Ставӧн исковтісны-чишнитісны, весиг Маша Модянова лэбис, а сійӧ эз лысьт. Сэсянь и лоис трусӧн, нывкаяс водзын воштіс ассьыс авторитетсӧ. Кыдз эськӧ тайӧс терпитан?

Витя вермис сӧмын петкӧдлыны Машалы кулаксӧ да бара чилснитны-сьӧлыштны кок улас. А Маша сылы мыччыліс кывсӧ да шмонитіс:

— Гажтӧм лоис? Тӧда, гажтӧм! Мӧдысь кежлӧ аслад юрӧн кутан овны, а не кывзысьны кодлыськӧ... Висьтав ноко: мыйла карас эн мун? Ме кӧть горт овны кольччи, а тэ мыйла? Кодӧс видзан? Вольпасьтӧ? Чорыда бӧбйӧдліс тэнӧ Сергей другыд...

— Кыдзи бӧбйӧдліс?

— А сідзи. Тӧвбыд лӧсьӧдчис мунны карӧ экскурсияӧн, а сэсся мыйлакӧ друг эз мун. А мыйла? Сы вӧсна, мый учительницаыд старӧстаавны пуктіс Катя Петроваӧс, а эз сійӧс. Сергей та вӧсна ачыс эз мун и тэнӧ тшӧтш ас дорас сираліс, медым кодкӧдкӧ гортас позис гыбавны. Эк тэ, нёнь пом кукань!

А збыль ӧд, кукань и эм! Кыдзи нӧ Витя тайӧс водзджык эз гӧгӧрво? Серёжаыс ӧд збыльысь тӧвбыд лӧсьӧдчис карӧ мунны, весиг выль рюкзак мамыслы тшӧктіс ньӧбны, а бӧръя луннас ӧткажитчис муннысӧ. Кор Катяӧс старӧстаӧн индісны. И Витялы эз тшӧкты мунны. Вай, шуӧ, огӧ мунӧй. Мый нӧ карсьыс эн аддзыв: сэні буса, лолавныд нинӧмӧн... А тані, аддзан, кутшӧм гажа, мича!.. Вуграсьны кутам, гожъявны...

И Витя сӧгласитчис.

А збыльысьсӧ со мый вӧлӧма!

2

Витя бура нин тӧдӧ: сьӧкыд овны свет вылас, кор тэнад аслад характерыд абу. Он на удит ӧтарӧ воськовтны, а тэнӧ нин трусӧн, куканьӧн нимтӧны. Кор тэнад аслад характерыд абу, сэки и тышкасьны некодкӧд он лысьт. Видлы, шуам, тышкасьны сійӧ жӧ Сергейкӧд. Тэ ачыд не рад лоан. Серёжа тушанас Витяысь ыджыдджык, кулакъясыс кукань юр кодьӧсь. Сӧтас кӧ пель бокад, лунтыр пеляд музыка кутас ворсны. Ёна тай колӧ...

Да и мыжа ӧмӧй Серёжаыс? Тӧвбыд кӧсйис кӧть недыр лоны старӧстаӧн, а сэки бокӧдыс вильскӧбтіс: пуктісны эз сійӧс, а кутшӧмкӧ Катя Петроваӧс, кодлӧн сы мында и тӧлкыс, мый велӧдчӧ отлично вылӧ да кытчӧ колӧ и оз ков сюйӧ нырсӧ. Тадзитӧ кӧть коді лӧгасяс. Витя эськӧ скӧрмис жӧ. Но старӧстаӧн сійӧ эз кӧсйы лоны. Кутшӧм нӧ сійӧ старӧста, кор характерыс абу?

Вот Серёжа — сійӧ да! Мый шуас — всё равно вӧчас. Кӧть сійӧ и абу прав, а всё равно ас мозыс кусыньтас. Характер, нем он шу...

Кодлы нӧ эськӧ абу окота сыкӧд другасьны?

И мый лёкыс сэні, мый Серёжа корис кольччыны буретш сійӧс, Витяӧс, а эз кодӧскӧ мӧдӧс?

Вензьыны да видчыны ӧмӧй сэтшӧм мортыскӧд позьӧ? Быдӧн шуасны — оз позь.

Дерт, ӧбиднӧ, кор Маша Модянова быд пӧрйӧ шуӧ тэнӧ трусӧн да куканьӧн. Но и мед шуӧ. Воас кад, и Витя петкӧдлас на, кутшӧм сійӧ трус да кукань! Витя вӧчас сэтшӧм подвиг, мый Маша садьсӧ воштас завидьтӧмысла!

Эк, регыдджык эськӧ вӧчны татшӧм подвигсӧ!

Но кыдзи? Кӧні?

Тадзи думайтігтыр Витя мӧдӧдчис Серёжа ордӧ, но туй вылас сійӧ ачыс паныдасис. Абу мунӧма видз вылас. Тайӧ бур. Талун сійӧ вӧлі гӧлубӧй майкаа, гач кокъяссӧ пидзӧсъясӧдзыс пуджӧма, пельпом вылас сылӧн кузь вугыршатин. Тайӧ и колӧ вӧлі Витялы. Кыкӧныдлы оз ло гажтӧм.

— Но и мастер жӧ тэ узьнытӧ! — нюмъялігтыр ёртыслы шуис Витя. — Виччыси, виччыси тэнӧ, став терпенньӧӧй быри...

— Тэ ӧд быдлаӧ удитан-а, — вочавидзис Серёжа. — Кысь нин тэ бӧрся вӧтчынысӧ...

Ок-ок-ок! Кутшӧм сьӧкыд му вылас овны!

Серёжалӧн талун настроениеыс лёк жӧ вӧлӧма. Аддзан, пыр и лӧгасис. А мыйла?

Витя, дерт, эз тӧд, мый Серёжалы тӧрыт рытнас сюрыштіс жӧ. Мамыс тшӧктыліс мудйыны картупель му вылысь кык рад, а сійӧ ӧти радсӧ эз мудйы. Талун бара сетӧмаӧсь удж: мудйыны не кык, а нёль рад нин. И мамыс чорыда ӧлӧдӧма: оз кӧ пӧ мудйы нёль рад, мед рыт кежлас вит ньӧр лӧсьӧдас небзьӧдыштны бекъяссӧ. Серёжа кӧсйысис мудйыны не нёль, а вит рад. Сійӧ талун чеччис водз, помаліс сійӧ радсӧ, кодӧс заводитіс мудйыны тӧрыт на. А сэсся юрас друг кучкис мӧвп: ӧні, пӧди, Шерваын чериясыс понъяс кодь тшыгӧсь, и найӧ кутасны босьтны весиг кулӧм нидзувъяс вылӧ. «Мун, другӧ, мун вуграсьны, — кодкӧ шӧпкӧдіс сылы пеляс. — Ӧні ёдіяс шедасны». Ёдіяс кӧ и мед ёдіяс. Детинка шыбитіс кокансӧ да кватитіс вугыршать. И со сійӧ ӧні мунӧ.

Витя эз тӧд тайӧс. Тӧдіс кӧ, дерт, эськӧ эз пан татшӧм сёрнисӧ ылісянь. Лӧгасяс ещӧ да ӧтнасӧн мунас вуграсьнысӧ.

— Серёжа, ме талун банка тыр пучӧйяс ӧкті. Батьӧ пес поткӧдліс, а кырсьяс костсьыс пев гырся пучӧйяс гылалісны, — тэрыба заводитіс Витя, медым бурӧдны другсӧ. — Он верит? Сё збыль. Ӧти сэтшӧм тшӧг, дзик порсь кодь. Ме сійӧс тэныд сета...

Бӧръя кывъяссӧ Витя шуис негораа, думайтіс, мый Серёжа оз кыв, но сійӧ кыліс. Зэв ещӧ бура кыліс! Кыдзи тай сэки сійӧ видзӧдліс Витя вылӧ! Радсьыс рад лои, настроениеыс син водзын вежсис. И картупель град йывсьыс сэки жӧ вунӧдіс. Ӧні позяс сёр рытӧдз вуграсьны.

— А менам ещӧ нидзувъяс эмӧсь. Кольӧм вося куйӧд чукӧр улысь аддзи, — ошйысис Витя. — Тӧдан, кыдзи веглясьӧны? Пастук Ӧльӧш моз жӧ, кор сійӧс дедыс тасмаӧн шлёпӧдӧ...

Витя котӧртліс гортас, гусьӧник, мед эз кыв бабыс, судзӧдіс слега костысь вугыршатьсӧ, и кык друг, быттьӧ нинӧм эз вӧвлы, котӧртісны ю дорӧ.

Оз ӧд прӧста йӧзыс шулыны: кыдзи луныс заводитчӧ, сідзи и помассьӧ.

Панласигтыр найӧ локтісны берег дорӧ, но сэтӧн, кӧні медъёна босьтіс чериыс, кымыньтӧм пыж вылын пукаліс кутшӧмкӧ тӧдтӧм пӧч. Кыкнанныс друг сувтісны — стоп! Видзӧдлісны ӧта-мӧд вылас «Коді тайӧ?» — юалісны Витялӧн лӧзоват синъясыс. «Ог тӧд!» — пыркнитіс шырӧм юрнас Серёжа.

Тӧдтӧм пӧчыс, тыдалӧ, вӧлі зэв ёна мудзӧма: вӧрзьӧдчывтӧг пукаліс юрсӧ ӧшӧдӧмӧн. Ӧти киас сійӧ кутіс кузь бедь, мӧднас пыкӧма тшӧкасӧ. Кӧть вӧлі и жар, сійӧ пасьталӧма фуфайка, чышъянасьӧма. И чышъян увсьыс на чибльӧг тыдаліс. Тешкодь пӧч! Коді тайӧ? Кытысь?

Кык друг эз тӧдны, мый вӧчны. Матыстчыны пӧч дорӧ полісны, а бӧр гортӧ мунны — ӧні нинӧмла. Неужели тадзи и ковмас сулавны ӧти местаын? А мый, пӧчыс кӧ оз мун татысь рытӧдзыс?

Первой Витя, сэсся Серёжа гораа ышловзисны, ӧшӧдісны юрнысӧ. Но и лун пуксис...

3

Детинаяс вель дыр сулалісны бадь кустъяс сайын, век виччысисны, кор баб мӧдӧдчас аслас туйӧд. А сійӧ век пукаліс и пукаліс сюзь моз, весиг эз лэптыв юрсӧ.

— Ылісянь, тыдалӧ, локтӧма, — шӧпнитіс Витя. — Кӧнкӧ, ветлӧдлӧ да корӧ?

— Хыы... Корӧ? Коді нӧ ӧні вермас корны? Няньыд тай ӧні быдӧнлӧн мыйта колӧ. А локтӧма збыльысь ылісянь. Аддзан, кутшӧма мудзӧма. Леспромхозсянь кӧнкӧ. Сэтысянь — дас вит километрысь унджык. Могӧн, кӧнкӧ, локтіс.

Могӧн ли не могӧн локтіс пӧчыс Перкоягӧ, Витялы дзик веськодь. Сылы окота вӧлі ӧдйӧджык самавны вугырас ниглясьысь нидзув да кыйны пач пӧдан кодь ёді. А пӧча пукаліс, и эз и думайт вӧрзьыны. Ок, пӧрысь вужля, аддзӧма жӧ места, кытчӧ пуксьыны. Тьпу!

Вот и пӧрысь пӧч кык-ӧ-куимысь суныштліс юрнас, сэсся тільыштіс синъяссӧ да чеччис. Но мунны эз тэрмась. Сійӧ воськовтіс ю дорас, копыртчис, гумовтіс содзнас ва да сёлькнитіс чужӧмас. Сэсся бара гумовтіс да юис. Сэсся лӧсьӧдыштіс юрсьыс чибльӧгсӧ да ӧшйис бедь вылас. И колӧ жӧ вӧлі Витялы сэки несйыны?! Вель дыр найӧ сулалісны, нырсӧ ньӧти эз гильӧд, и друг — апчхи! Да несйис сэтшӧм гораа, мый пельтӧм морт эськӧ весиг кыліс. А пӧчыс пеля вӧлӧма. Сійӧ сэк жӧ бергӧдчис челядьлань да аддзис кыкнаннысӧ. Серёжа, дерт, удитіс кулакнас лӧсыштны другыслы гӧрбас, да мый сыысь? Пӧчӧ казяліс найӧс.

— Господьӧй-енмӧй! Тані тай йӧз вӧлӧмаӧсь! — шензигтыр шуыштіс баб да паськыда нюммуніс.

Нюмыс сылӧн вӧлі мелі, гӧлӧсыс небыд, рам. И синъясыс сылӧн вӧліны меліӧсь, ньӧти эз мунны сюзь синъяс вылӧ. И Витялы кыдзкӧ эз ло лӧсьыд, мый думсьыс шуис сійӧс пӧрысь вужляӧн.

Серёжа гӧгӧрвоис, мый пӧчыс, коді нюмъялӧ сэтшӧм меліа, оз вермы вӧчны лёксӧ.

— А ме вот тані шойччигмоз вугралышті неуна, — быттьӧ мыжапырысь шуис пӧрысь морт. — Пукси шойччыны и вугыртчӧма. Висьталӧй жӧ, сырчикъяс, кӧні тані олӧ Селиверст Гаврилович Пономарев? Сы дорӧ могӧн локті.

Витя видзӧдліс Серёжа вылӧ, Серёжа — Витя вылӧ. Пӧчӧ гӧгӧрвоис, мый детинкаяс ӧдвакӧ тӧдӧны сійӧ мортсӧ. И збыльысь, Селиверст Гаврилович йылысь найӧ кылӧны первойысь.

— Сорси ӧмӧй нӧ? Гашкӧ, тіян сиктыд абу Перкояг да? — повзьыштіскодь пӧчыс.

— Да, миян сиктным Перкояг, — шуис Серёжа.

— Тэ бабӧ, эн сорсьы. Миян сиктным збыльысь Перкояг! — шуис тшӧтш Витя.

— Мый нӧ сідзкӧ? Мыйла сідзкӧ абу Селиверст Гавриловичыс?

— Абу сэтшӧмыс...

И Витя друг зымкнитіс аслыс кымӧсас:

— Эм! Да ӧд сійӧ пастук Ӧльӧшлӧн дедыс... Мися, кутшӧм нӧ Селиверст, а сійӧ со коді вӧлӧма! Пельтӧм Селько.

— Сійӧ и эм, — серӧктіс пӧчӧ. — Селькоӧн шуӧны.

Челядь сэки жӧ кӧсйысисны петкӧдлыны Пельтӧм Сельколысь керкасӧ. Ӧні найӧ тшапа восьлалісны пӧрысь морткӧд орччӧн, мунісны тыртӧм улича шӧрӧд. Маша Модянова чургӧдліс юрсӧ ӧшиньӧдыс, но Витя гусьӧн петкӧдліс сылы кулаксӧ да сэтшӧм скӧрысь видзӧдліс сы вылӧ, мый нывка бӧр саяліс.

— Ылісянь локтін бабӧ? — юаліс Серёжа.

Пӧчӧ гогнитіс юрнас, но дыр эз шыась. Детинка удитіс казявны, кыдзи пӧчлӧн дзугыльмыштіс чужӧмыс.

— Ылісянь, сырчикъяс, ылісянь. Кокъясӧй лигышмунісны.

— Леспромхозсянь?

Пӧчӧ чӧв оліс, быттьӧкӧ нинӧм эз кывлы. Серёжалы тайӧ эз кажитчы. Мортлы бур вӧчӧны, а сійӧ аттьӧалӧм пыдди весиг оз сёрнит. Но да ладнӧ, чӧрт сыкӧд. Он кӧ сёрнит — и эн, тэтӧг кыдзкӧ-мыйкӧ...

Сикт мӧдар помын челядь петкӧдлісны пӧчӧлы, кӧні олӧ Пельтӧм Селько, сэсся бӧр котӧртісны берег дорӧ. Сэні найӧ ёна ваксисны-сералісны. «Кӧні нӧ Селиверст Гаврилович олӧ?» Ха-ха-ха!! Эсійӧ Пельтӧмыс? Да сійӧс, кӧлдунӧс, том и пӧрысь сӧмын Пельтӧм Селькоӧн и тӧдӧны. Аддзӧма, кодӧс Гавриловичӧн шуны?!.

4

Пучӧй, кодӧс Витя сетіс Серёжалы, збыль вӧлі ыджыд, тшӧг. Татшӧм пучӧй дорад любӧй ёді тшыг пон моз уськӧдчас. Серёжа самаліс сійӧс вугырас, и кыдзи вӧчӧ быд настӧящӧй чери кыйысь, куимысь сьӧвзис сы вылӧ. И сӧмын сэки вугырсӧ чӧвтіс ваас.

Витя перйис аслас банкаысь нидзув. Вӧлі сійӧ пемыдгӧрд и, кыдзи шулӧны прамӧй чери кыйысьяс, зэв визув, коді ачыс вӧзйысьӧ черилы вомас. Нидзулыс веглясис, зілис мездысьны Витя киысь. Но детинка зіля самаліс сійӧс вугырас, сідз жӧ куимысь сьӧвзис да чӧвтіс ваас.

А ваыс талун юас сэтшӧм сӧдз, мый пыдӧсас не сӧмын галькаыс тыдаліс, но и тыдаліс, кыдз ниглясис-педзласис, гартчис нидзулыс.

Витя синсӧ вештывтӧг синва петмӧныс видзӧдіс сы вылӧ, небыд гӧгрӧс чужӧмыс гӧрдӧдіс, а сьӧлӧмыс сідзи и чеччаліс-йӧктіс. Вот-вот медыджыд ёдіыс сапкысяс-кутчысяс вугырас, сӧмын лэпты сумкаад. Сэки видзӧдлам, мый кутас сьывны Ӧгрӧпена-бабыс, коді медся ёна радейтӧ сёйны пӧсь черинянь. Сэки небось оз кут Витяӧс быдлаӧ нарадитны, а ачыс мӧдас ыстыны вуграсьны.

Да, тадзи кӧ эськӧ вӧлі!..

Но видлы! Мыйта эз нюглясь-вежнясь нидзулыс, а ёділӧн и дукыс абу. Ӧні нин детинка видзӧдіс табйыс вылӧ пыр гажтӧмджыка и гажтӧмджыка. Весиг сьӧлӧмыс заводитіс гудрасьны. Эз нимкодь вӧв и Серёжалы. Сійӧ сідз жӧ пукаліс чӧла, юрсӧ ӧшӧдӧмӧн. Мыйлакӧ талун чериыс ньӧти оз сёй. Ставныс найӧ, тыдалӧ, талун вӧліны пӧтӧсь, весиг тшӧг пучӧй да йӧктысь нидзув вылӧ эз видзӧдлыны.

— Ставыс тайӧ эсійӧ пӧрысь пӧч вӧснаыс, — ва вылас видзӧдігмоз шуис Серёжа.

— Сы вӧсна, дерт, — сӧгласитчис Витя. — Со мыйта кадсӧ воштім. А век жӧ, мыйла сійӧ локтіс? Гашкӧ, важнӧй юӧр вайис?

— Дерт, кӧнкӧ, сідзи. Аддзан, оз висьтась. Весиг эз висьтав, кытысь.

Татшӧм сёрниысь неуна лоис гажаджык. Кыкнанныслы зэв окота вӧлі тӧдны, мыйла локтіс пӧчыс Пельтӧм Селько ордӧ, кутшӧм могӧн. Сиктын олысьяс пиысь сы ордӧ некод эз пыравлы, мыйлакӧ эз радейтны сійӧс. Весиг понъяс эз пыравлыны сы ограда сайӧ. Страшнӧй старик. Юрсиыс гӧрд, тошкыс гӧгйӧдзыс. Би кыв кодь жӧ гӧрд. Но медся страшнӧйыс сылӧн синъясыс. Скӧрӧсь, кор видзӧдлас тэ вылӧ, быттьӧ пыридзӧн сьӧлӧмад бытшкӧны. Оз ӧд прӧста Ӧгрӧпена баб Селькосӧ кӧлдунӧн шу. Сӧмын кӧлдунъяслӧн да лешакъяслӧн пӧ овлӧны татшӧм синъясыс.

Абу бур морт Селькоыс, абу. А кыдзи сійӧ мукӧд дырйи ассьыс внуксӧ, Ӧльӧшсӧ, нӧйтлывлӧ!.. Ӧтчыд Витя да Серёжа аддзылісны, гусьӧн видзӧдісны забор костӧд. Бурджык вӧлі не видзӧдны! Тасмаӧн сійӧ лупйис да лупйис, сэсся шойччыштіс да бара заводитіс, а бӧрыннас сідз сетӧбтіс кулакнас Ӧльӧшлы гӧрбас, мый сійӧ, коньӧрӧй, муртса мудӧд керсӧ эз люкав. Витя да Серёжа эськӧ эз вермыны терпитны, пыр жӧ эськӧ и кулісны, но Ӧльӧшлы нинӧм. Велалӧма нин.

Некымын во сайын Пельтӧм Селько бригадалысь видзис ылыс муяс да видзьяс, сиктын шоча мыччысьлывліс. А мӧйму петіс пенсия вылӧ да некӧн эз уджав. Сиктын сідз некор эз шатлась, век кытӧнкӧ вӧрын «лешачитіс», кыдзи шуӧ Ӧгрӧпена баб. А тайӧ, пӧжалуй, бурджык, мед лешачитӧ. Кӧть сиктса челядьӧс аслас тошкӧн да синъяснас оз повзьӧдлы.

Мый кӧть эн думайт, а оз вермы татшӧм морт дінӧ кодкӧ бур могӧн локны. А век жӧ кутшӧм могӧн локтіс пӧчыс Селько дінӧ?

— Колӧ видзӧдлыны, мый найӧ вӧчӧны, — шуис Серёжа да чеччис места вывсьыс.

— Кыдзи нӧ тэ видзӧдлан? Найӧ, пӧди, керкаас пукалӧны...

— Но и мый? Локтам ӧшинь дорас да и видзӧдлам.

— Кокни шуны: локтам да видзӧдлам! А друг кутас кӧлдуныс?

Но видлы ӧні венны Серёжаӧс. Сылы кӧ нин юрас пырис, тэ кӧть нӧшкав юрас, всё равно бӧрсӧ оз пет. И Витя сӧмын и шуыштіс:

— А друг кутас?

Серёжа бугжыльнас видзӧдліс другыс вылӧ, быттьӧкӧ шуис: кутшӧм тэ век жӧ трус, и сӧмын ӧвтыштіс кинас. Тадзи видзӧдлӧмыс да сідзи кинас ӧвтыштӧмыс кырыштісны Витялысь сьӧлӧмсӧ. Тайӧ ӧд дас пӧв на лёкджык лоӧ сыысь, кор Маша Модянова нимтіс сійӧс трусӧн да мыччыліс кывсӧ. Детинка тэрыба сувтіс кок йылас да чорыда шуис:

— Ме первой матыстча ӧшинь дорас да видзӧдла керка пытшкас!

— Первой?

— Первой!

— Он, первойсӧ ме муна. Ме тэысь ыджыдджык да унджык верма аддзывны. Да и тэ бара верман несйыны.

Первой кӧ и первой. Витя вензьыны эз кут. И найӧ кыкнанныс уськӧдчисны котӧртны. Весиг вунӧдісны вугыр шатинъяссӧ. Вунӧдісны и нидзув банкаяссӧ.

Пельтӧм Сельколӧн батьыс коркӧ вӧлӧма Перкоягын медся озырӧн, кулакӧн. Суседъяссӧ сійӧ абу радейтлӧма, и ассьыс керкасӧ стрӧитӧма сикт помас, мукӧд керкаяссяньыс бокынджык, дзик сён дорӧ.

Кор заводитчисны котыртчавны колхозъяс, пӧрысь Габӧ сэки кытчӧкӧ пышйӧма, и ыджыд керкаын ӧні пиыс оліс ӧтнасӧн, не лыддьыны кӧ Ӧльӧшӧс. А кыдзи сійӧс лыддян? Детинка гожӧмбыд оз волы гортас: важ мельнича сайын видзӧ куканьясӧс. Пельтӧм Сельколӧн гӧтырыс важӧн нин кувсьылӧма. Пиыс, Ӧльӧшлӧн батьыс, ӧтчыд код юрӧн лэччас пывсьыны да сэні и жарас пӧдас. И моньыс Сельколӧн абу. Дас во сайын нин сійӧ вӧлі кайӧма вӧрӧ тшак вотны, а сэтысь абу и волӧма — шуӧны, быттьӧкӧ пӧ ош чашйӧма.

Тадзи оліс Селько ӧтнасӧн. Скӧтӧс сійӧ эз видз, кӧть крепыд забор сайын тыдалӧны сылӧн гидъяс, амбаръяс да ещӧ кутшӧмсюрӧ стрӧйбаяс.

Ӧшинь улас пуритіс ыджыд сад: шевкнитчӧмаӧсь сэні льӧм пуяс, пелысь пуяс, сэтӧр да ӧмидз кустъяс. Кольӧм во, кор Селько «лешачитіс» вӧрын, Витя да Серёжа гоз-мӧдысь пыравлісны татчӧ. Нинӧм он шу — чӧскыд ӧмидзыс! Да и пырнысӧ садас абу сьӧкыд. Колӧ сӧмын мунны сён пӧлӧныс забор дорӧд, и сэк аддзан ичӧтик ӧдзӧс, кыті Селько катӧдлӧ сёнсьыс ва да лэччывлӧ пывсянӧ пывсьыны.

Но пырны талун тайӧ ӧдзӧсӧдыс полісны: друг да паныдасясны Селькокӧд?

Первой ковмис мунны йӧръяс костті да пырны град йӧрӧ, сэсся карта сайӧдыс мунны кутшӧмкӧ чом дінӧ да сэні нин водны да кыссьыны ӧшиньяс дорӧдз. Водзын ниглясис-кыссис Серёжа, бӧрвылас — Витя. Кыссясны неуна, кывзысьыштасны и — бара водзӧ. Серёжа кыссигас веськаліс ёсь из вылӧ да парсалыштіс кынӧмсӧ. Витя гирснитіс кисӧ, и ӧні чӧсӧдіс, быттьӧ пӧсь ваӧн сотіс.

Керка дінас матыстчигӧн найӧ бара кывзысьыштісны, шойччыштісны. Серёжа бергӧдліс ёртыслань юрсӧ да индіс ныр вылас: смотри, эн несйы! — и бара заводитіс кыссьыны водзӧ.

Со и воисны стен дорӧдз. Ӧні колӧ неуна кыссьыштны канаваӧд, сэсся кайны мудӧд вылас да видзӧдлыны керка пытшкас. Кыдзи и сёрнитчылісны, мудӧд вылӧ первой кайис Серёжа. Сійӧ ляскысис керка стен бердас, сувтіс кок чуньяс йылас да кань моз кыссис ӧшиньлань. Витя куйліс кулӧм нисьӧ ловъя. Плешкас сылӧн чепӧсйӧмаӧсь гырысь ньылӧм войтъяс, вом доръясыс тіралісны, и, быттьӧ нарошнӧ, кутіс гилявны пыр пытшкыс. И колӧкӧ эськӧ и несйис, но тайӧ пӧрйӧ ёна завидьтіс другыслы. Кутшӧм характер! Кутшӧм сійӧ смел! Аддзан, кыдзи видзӧдӧ ӧшиняс! Мый аддзӧ?

— Некод сэні абу! — мудӧд вывсьыс лэччигмоз шуис Серёжа. — Кӧнкӧ керка саяс варовитӧны. Садас, кӧнкӧ.

Детинкаяс стен пӧлӧныс вешйисны карталань. Тэрыба бӧр петісны йӧр коластӧд да котӧртісны сёнбокса ичӧтик ӧдзӧс дорӧ.

— Льӧм пу уланыс найӧ. Сэні скамья эм, — шуис Витя.

— Ачым тӧда, — вочавидзис ёртыс. — Пырам ӧмидз кустъяс саяс да кывзысьыштам, мый сӧрӧны.

Сідзи и вӧчисны. Кынӧмъяс выланыс кыссисны ӧмидз кустъяс дорӧдз да ляскысисны пес чипас бердӧ, кодӧс Селько тэчӧма забор да кутшӧмкӧ важ сюръя костӧ. Витя тані эз пов. Селько кӧ казялас, сэки котӧрт ичӧтик ӧдзӧсӧдыс сёнӧ, некутшӧм потшӧс вуджны оз ков. А пес чипас сайсяньыс не сӧмын ставыс кылӧ, но и тыдалӧ. Тайӧ зэв бур.

Пельтӧм Селько да тӧдтӧм пӧч пукалісны неыджыд пызан сайын. Найӧ сёрнитігтыр юисны чай. Детинкаяс кыкнанныс чуймисны, кор аддзисны, мый найӧ вӧчӧны. Ӧні чай юны?! Лун шӧра лунӧ, кор шондіыс пӧжӧ да лолавныс немӧн?! Тешкодь йӧз. Водзаныс сувтӧдӧмаӧсь самӧвар, кружкаяс вайӧмаӧсь, кутшӧмкӧ туис — и пируйтӧны. Селько разялӧма дӧрӧм кизьяссӧ, ставнас пӧсялӧма. Чужӧмыс гӧрдӧдӧма, и ӧні ставыс — и юрсиыс, и тошкыс, и плешыс, и чужӧмыс — ставнас вӧліны чим гӧрдӧсь. Сыкӧд орччӧн сулалысь ыргӧн самӧварыс кажитчис чугун кодь сьӧдӧн.

— Сідзкӧ, висьӧ батюшкоыс? — жугыля шуыштіс Селько. — Жаль.

— Висьӧ, сват, — вочавидзис пӧчӧ. Сійӧ вӧлі пӧрччӧма фуфайкасӧ, и ӧні пукаліс ӧтпӧлӧсӧн. Чышъянсӧ пӧрччӧма жӧ, сӧмын чибльӧга кольӧма. Пӧчыс пӧсялӧма жӧ. Но чайсӧ юис и юис. Кӧтӧдас кружкаас еджыд кӧлач, ичӧтика курччыштас сійӧс и ичӧтикаӧн гулькйӧдлӧ-юӧ, вомсӧ тяпкӧдӧ.

— Матушкаыс висьӧдчыны жӧ пондіс, — шуис Селько. — Ог тӧд, мый и вӧчны.

— Бурдӧд сійӧс, батюшко. Енмыс оз вунӧд, — шуис пӧч да зепсьыс перйис кутшӧмкӧ банка. — Со вайи.

— Мый верма, вӧча. Вайӧда гортӧ. Мый ещӧ батюшкоыс висьталіс?

— Нинӧм сэсся эз висьтав торъясӧ. Висьтав пӧ ещӧ: кӧинъяс пӧ мездмисны. И — ставыс. Селиверст Гаврилович, шуӧ, тӧлка мужик, ачыс ставсӧ гӧгӧрвоас...

Селько дӧвӧльпырысь шпыньмуні, кинас малыштіс тошсӧ. Челядь удитісны казявны, мый сылӧн киыс вӧлӧма гӧрд, быттьӧкӧ ыргӧнысь.

— Гӧгӧрвоас пӧ? Дерт жӧ, гӧгӧрвоа, — ошйысьыштігмоз шуис Селько. — Абу первойысь. Кольӧм во мездмылісны жӧ, да ыліті миянӧс ордйӧдісны. Висьтав сылы: ставыс лоӧ бур, мед ёнасӧ оз тӧждысь. Ме найӧс ачым паныдала и ачым колльӧда. Ставсӧ вӧча сідзи, кыдзи тшӧктіс.

Витя кывзысис, зілис гӧгӧрвоны, мый йылысь сёрнитӧны пӧрысь йӧз, но некыдзи эз гӧгӧрво. Нинӧм эз гӧгӧрво и Серёжа. Тешкодя кыдзкӧ варовитӧны. Пӧчыс вайӧма кутшӧмкӧ юӧр, но кутшӧмӧс — коді тӧдас.

А Селько да пӧчӧ век на чай юисны. Неуна сёрнитісны поводдя йылысь, казьтыштісны кутшӧмкӧ святӧйлысь гусӧ. Селько сӧмын шуис:

— Унджык, унджык, сваття, масӧ пукты. Эн жалит — аслам.

Сэсся гогнитіс юрнас:

— Эк, косьмыны таво ставыс кутіс. Гожӧмыс жар, тулыссяньыс на зэрыс эз вӧв. И прудсӧ лэдзисны. Загреки, веськаласны кӧ крепыдджыкинӧ, пузувтасны святӧй местасӧ.

— Оз жӧ лэдз кристосыс. Регыд зэрны пондас, — шуис пӧчӧ. Сійӧ тэчис аслас кружкаӧ туисысь ма, самӧварысь кисьтіс пӧсь ва да бара заводитіс юны.

«И кытчӧ сӧмын сы мында ваыс тӧрӧ», — шензисны челядь. И мыйла видзӧдны чай юӧмсӧ, кутшӧм тӧлк сыысь?

Кык друг лӧсьӧдчисны мунны. Кывзысьыштісны — и тырмас. Сэки пӧчыс друг лэптіс юрсӧ, тури моз нюжӧдіс голясӧ да чирӧстіс:

— От-от-тот!

Быттьӧкӧ курӧг котсіс. «Фу, сутшиктӧдны кутіс», — гӧгӧрвоисны челядь.

Пӧчӧ тэрыба чеччис места вывсьыс, уськӧдчис керкалань:

— Кӧдзыд ва петкӧда да юышта — пыр жӧ дугдас, — мунігмозыс шуис сійӧ.

Челядь гусьӧник мунісны забор ӧдзӧс дорас, кӧсйисны петны. И колӧ жӧ вӧлі Витялы сэки бара несйыны! Апчхи да апчхи! Пӧчӧ бергӧдчис и... аддзис найӧс.

Кык друг уськӧдчисны ӧдзӧс дорас. Котӧртісны кӧ бокӧ, дерт, пышйыны вермисны ылӧджык. Котӧртігас Витя друг конйыштчис Серёжа кокъясӧ, и детинка дзик ӧдзӧс дорас нин пласькысис-уси. Витя ачыс эз и казявлы, кыдзи сійӧ ӧшйис куричас. Вӧлӧмкӧ усигас сылӧн дӧрӧмыс крукасьӧма ён пиня тувйӧ, кодӧс Селько тувъялӧма ӧдзӧс кӧсякас. Витялӧн дӧрӧмыс вӧлі выль да ён. Мыйта кӧть эз пессьы детинка, а дӧрӧмыс сідзи и эз косясь. Серёжа кӧ эз вӧв. Витя, дерт, сэки веськалі Селько киясӧ.

Серёжа мездіс другсӧ, кыдзи вугырысь чериӧс, небыдика тувкыштіс сылы пидзӧснас, сэсся бергӧдчис пӧчӧлань да жугыля шуис:

— Бабӧ, ми мачӧн ворсім, да сійӧ кытчӧкӧ усис сэтчӧ льӧм пуяс дорас. Ми со сэні ворсім, а мачыс лэбис татчӧ... Тэ эн аддзыв?

— От-от тот! Эг, челядь, эг аддзыв. Со, гашкӧ, сэтчӧ, петшӧр пиас уси?

— Коді нӧ сэні, сваття? Кодкӧд сёрнитан? — кыліс Сельколӧн кыз гӧлӧсыс.

— Да, челядь тай татчӧ мачсӧ воштӧмаӧсь. Корсьӧны.

— Челядь?! — равӧстіс Селько. — Вот ме босьта кузь шать да петкӧдла налы мач. Бара, пӧди, пырисны йӧрас сэтӧр сёйны...

Кор Селько босьтас шатьсӧ да локтас на дінӧ, челядь виччысьны, дерт, эз кутны. Найӧ уськӧдчисны котӧртны. Кут найӧс ӧні!..

ВЫЛЬ ТӦДСАЯС

1

Водзті Витялӧн узьсьыліс лёка. Муртса вӧлі куняс синъяссӧ, а вӧтасьӧ нин. Мыйсӧ сӧмын войбыдӧн эз вӧтавлы! Мый луннас дум вылас, сійӧс и войнас вӧтасьӧ. Неважӧн вӧталіс, да быттьӧкӧ Шерваысь сійӧ кутіс кык аршин кузя сирӧс.

Чериыс вӧлі сэтшӧм сьӧкыд, мый некыдзи оз вермы лэптыны пельпом вылас да ковмис отсӧг вылӧ корны Серёжаӧс. Кыкӧн и вайисны черисӧ гортас. Серёжа нуис юрсӧ, а Витя — бӧжсӧ. Зэв сьӧкыд вӧлі, быттьӧ кыдз краж.

А талун сійӧ нинӧм эз вӧтась. Кыдзи водіс, пыр жӧ унмовсис, быттьӧ кулӧма. Тайӧ вӧлі сылы гӧгӧрвоана. Век жӧ сюрис Витялы другсяньыс. Сыысь, мыйла сійӧ кыкысь несйис, сыысь, мыйла сійӧ конйыштіс другсӧ, Серёжа кыкысь чорыда сетӧбтіс другыслы гӧрбас да тшӧктіс отсавны мудйыны картупель мусӧ.

— Неуна уджыштан, и он кут несъявны! — велӧдіс Серёжа.

И нинӧм он вӧч — ковмис заводитны уджавны. Уджалісны пажунсянь рытӧдзыс. Коньӧрлӧн киясыс лигышмунісны, мый некор на эз вӧвлы. Чужӧм вывсяньыс шорӧн визувтіс ньылӧмыс. Бусыс пырис вомас, синъясас, пидзӧсъясыс тіралісны.

Витя сэтшӧма мудзис сэки, мый муртса вермис локны гортӧдзыс. Локтіс, водіс сараяс турун вылӧ, весиг эз ужнайт. Узис сідз, мый некутшӧм вӧт эз аддзыв.

Садьмис сёрӧн нин, и, дерт, эз ачыс.

— Тэ дыр на кутан узьны, дыш поз? — тракйис сійӧс бабыс.

Дыш поз тай! Аддзыліс эськӧ мед бабыс, кыдзи Витя тӧрыт уджаліс другыс град йӧрын.

— Бать-мамыд важӧн нин видз вылынӧсь, кӧнкӧ, пӧсявтӧдзыс нин ытшкисны, а тэ век на стынитан... Яндзимыд абу...

Витя быттьӧ нинӧм эз и кывлы. Сійӧ весиг синъяссӧ эз восьтыв. Мӧдарӧ, сійӧ сэтшӧма кутіс корсйӧдлыны, мый бабыс тупкис пельяссӧ. И сэки бабыс думыштіс мудеритны:

— Витюк! А мый ме тэныд висьтала? Кывзы вай: талун ме лэччи ю дорӧ, а сэні вугыр шатинъяс туплясьӧны. Лэпті ӧтисӧ, босьті вугырсӧ, а вугырас...

— Мый шедӧма? — чеччыштіс Витя.

— Да налим! Да сэтшӧм кыз! Дзик порсьпи кодь...

Витя лэччис сарайысь, мыськис кӧдзыд ваӧн чужӧмсӧ. И сӧмын сэки гӧгӧрвоис: налимыс гожӧмнас некор вугырӧ оз шедлы. Ок и ылӧдліс сійӧс бабыс. Ылӧдліс и сэк жӧ удж аддзис.

— Ветлы, дитя, Петрӧван дед ордӧ, висьӧ пӧ сійӧ. Со туисас ма тэчышті, ну сійӧс, пиук. Мед дедыс манас чӧсмасьыштас, гашкӧ, кокньыдджык лоас сылы.

Ветлыны Петрӧван дед ордӧ? Сэтчӧ позьӧ. Петрӧван дедыс зэв шань морт, абу сійӧ Пельтӧм Селькоыд. Мый кӧть сылысь он кор, сійӧ век нин сетас. Неважӧн сійӧ пыж сетліс Шерва сайӧ вуджавны, сэсся чипсанъяс вӧчавліс. Ветлыны сы дінӧ позьӧ эськӧ. Но ӧд Петрованыс — Маша Модяновалӧн дед. Машаыс бара вермас трусӧн шуны, лунтыр кежлӧ тшыкӧдас настроение. Да и Серёжа ныв пастукӧн вермас шуны...

Но и мед. Мый сылы колӧ, мед сійӧс и сӧрӧ. Витя шуис мунны. Серёжа вылӧ сійӧ тӧрыт ёна лӧгасис. Сэтшӧм ёна лӧгасис, мый сетіс аслыс кыв не другасьны сэсся сыкӧд. Тырмас. Другӧн ещӧ шусьӧ... Карӧ эз лэдз мунны, тӧрыт Селько керка дорӧ кыскис, гӧрбӧ сеталіс да ещӧ и мудйысьны тшӧктіс.

— Кӧні туисыд? Вай котӧртла, — бабыслы шуис Витя.

Ӧшинь улын, кыдзи и тӧрыт, курӧгъяс котсӧны, потшӧс вылын петук горшсӧ косявлӧ-сьылӧ. Сідз жӧ, кыдзи и тӧрыт, енэжас шонді дзирдалӧ. Лӧзоват сынӧдыс вералӧ рас весьтын. Кӧнкӧ ылын-ылын, буракӧ, важ мельнича сайын, горзӧны турияс. Ылын сэтчӧдз, гашкӧ, куим верст лоас, а налӧн горзӧмыс татчӧдз кылӧ.

— Витя! Витя! Тэ кытчӧ мунан? — друг кыліс Серёжалысь гӧлӧссӧ.

Кӧть мыйта горзы, Витялы тэ дорӧдз некутшӧм мог абу.

Витя, дерт, эз кӧсйы шыасьны, но Серёжа локтӧ сылы паныд, киас сылӧн ичӧтик пӧрт.

— Петрӧван дед ордӧ муна, — шуис сійӧ. — Батьлы тӧрыт кык ёді шедӧма. Дедлы тшӧктіс нуны. Сійӧ пӧ висьӧ.

— А ме сылы ма нуа. Во! — горӧдіс Витя. Горӧдіс и сэк жӧ повзис. Сійӧ аддзис тӧрытъя тӧдтӧм пӧчӧсӧ. Муніс туй. шӧрӧдыс леспромхозлань. Тыдалӧ, бӧр гортас. Медым не паныдасьны сыкӧд, челядь котӧрӧн кежисны Петрӧван ӧшинь улӧ.

2

Петрӧван дед куйліс посводзын, ыркыдінын. Вольпась весьтас сійӧ ӧшӧдӧма вон, медым войнас эз дӧзмӧдчыны номъяс. Ӧні воныслысь боксӧ дед лэптӧма, и кор дзуркнитіс посводз ӧдзӧсыс, сійӧ пыр жӧ казяліс челядьӧс. Дед нюммуныштіс да заводитліс чеччыны, но гусьӧник ойкнитіс да бӧр лэдзис юрсӧ.

— Локтӧй, локтӧй, видлӧй дедтӧ, лечитӧй, — надзӧник шуыштіс сійӧ. Воссис керка ӧдзӧс, и посводзӧ петіс Маша. Нывка чуймис, кор аддзис гӧстьясӧс, весиг, буракӧ, повзьыштіс. Мед эськӧ Маша эз удит шуны трусӧн, Витя тэрыба шуис:

— Дедӧ, ме тэныд ма вайи. Баб тшӧктіс.

— А ме свежӧй чери вайи, — шуис тшӧтш Серёжа.

— Со мый вӧлӧма! Аттьӧ! — нюмъялігтыр шуис дед, да бара заводитліс чеччыны, но бара нинӧм эз артмы.

Маша стрӧга видзӧдліс дедыс вылӧ да шуис:

— Тэ, дедӧ, эн вӧр! Колӧ спокойнӧя куйлыны. Тэнад коскыд висьӧ.

— Коскӧй, дитя, коскӧй... Кынмысьӧма менам кӧнкӧ, — шӧпкӧдіс старик. Сійӧ недыр кежлӧ куньліс синъяссӧ, кывнас нюлыштіс кос вом доръяссӧ, сьӧкыда лолаліс. Сійӧс кутіс кызӧдны, лолалігас морӧсас киргис.

Маша шыасис челядь дорӧ:

— Тайӧ бур, мый масӧ вайинныд. Мамӧ асывнас ыстыліс Пельтӧм Селько ордӧ, но сійӧ эз сет. Абу пӧ ӧти войт.

Витя да Серёжа видзӧдлісны ӧта-мӧд вылас.

— Абу пӧ? — чуймис Витя. — Да кыдз нӧ абу. Ми ӧд...

Витя кӧсйис нин висьтавны, мый найӧ тӧрыт аддзылісны, кыдзи Пельтӧм Селько гӧститӧдіс манас кутшӧмкӧ тӧдтӧм пӧчӧс, но эз удит: Серёжа сідз бытшкис сылы синъяснас, мый мӧдыс гӧгӧрвоис — висьтавны сы йылысь оз ков.

— Горш да скуп Селькоыс, — шуис Маша. — Но и мед. Час ме пырта чаг моздор да ичӧт пач вылын йӧв пузьӧдышта. Мед дедӧ юас манас пӧсь йӧвсӧ да бурдас.

— А черисӧ? — юаліс Серёжа.

— А сыысь ми юква пуам. Панялыштас свежӧй чери юквасӧ и бур лоас, — шуаліс Маша. — Юквасӧ сійӧ зэв ёна радейтӧ. Тэ, пӧди, черисӧ ачыд кыйин, Серёжа?

Серёжалы окота вӧлі не янӧдны асьсӧ нывка водзын, окота вӧлі висьтавны, мый черисӧ кыйис ачыс, но эз лысьт:

— Эг. Тӧрыт бать кыйӧма...

Маша нинӧм эз шу. А вермис эськӧ нюмыртны вом доръяссӧ да шуны мыйкӧ сэтшӧмӧс... Ок эськӧ, кутшӧм яндзим вӧлі Серёжалы.

Нывка босьтіс кастрюля, лэччыліс гӧбӧчас йӧвла. А Витя да Серёжа чукӧртісны чаг. Сэсся ломтісны ичӧт пач, биыс гажаа йӧктіс пачас. Маша пуктіс пуны юква.

— Кӧні нӧ кӧчпиыд? — юаліс Витя.

— Тэ нӧ мый, синтӧм? Со лабич улас...

Збыль, лабич улын куйліс руд тупыль. Сійӧ вӧлі ичӧтик, гӧгрӧс гӧрд синъяса. Кӧчпи куйліс турун вылын да пошкис, кычипи моз. Сійӧ, тыдалӧ, ёна поліс, тіраліс ставнас.

— Ме сійӧс быдта да школаӧ живӧй уголокӧ нуа, — шуис Маша.

— Хны, живӧй уголокӧ! Да сійӧ арӧдзыс кӧин ыджда быдмас да пышъяс.

— А вот и оз!

— Ме шуи — пышъяс, — эз лэдзчысь Серёжа. — Вай юав дедыдлысь. Сійӧ сідз жӧ шуас.

Петавлісны посводзӧ да юалісны Петрӧван дедлысь, пышъяс оз кӧчыс вӧрӧ, кор сійӧ кӧин ыджда быдмас?

— Кор сійӧ быдмас страшнӧй зверь ыдждаыс, сэки, дерт, пышъяс, но мед. Ми выльӧс кутам, — нюммуніс дед.

Юкваыс пузис ӧдйӧ. Детинкаяс отсалісны пуксьыны дедыслы вольпась вылас, Маша вайис сылы бекар тыр юква. Дед шпыньмуніс, но сёйны эз вермы: сылӧн тіралісны киясыс.

— Вай, дедӧ, ме тэныд отсышта, — шуис Маша. — Вай паньӧдышта...

— Ичӧт кагаӧс моз? Оз артмы. Ме ачым... Вот тадз...

Дед пуктіс паньсӧ, кыкнан кинас босьтіс пӧсь бекарсӧ и заводитіс... юны. Юыштас да шуас:

— Ме омӧлик салдат кодь жӧ. Омӧлик салдатлӧн некор паньыс абу... А сёйны колӧ... А мыйӧн? Чӧвтасны сылы пӧртъяс шыд, и сійӧ ме моз жӧ...

— Дед, а тэ салдатнас вӧлін? — юаліс Витя.

— Кык война вылын вӧлі... Германскӧй — раз, Колчаклы паныд мӧдысь... Да и колхозъяс котырталігӧн лыйсьыны ковмис.

Тадз ньӧжйӧник сёрнитігӧн дед — бульк, бульк, бульк-юис бекарсьыс став юквасӧ.

— Аттьӧ тіянлы, бур пиян, — шуис челядьлы, — вӧлисти сьӧлӧмӧй бурмис.

А Маша вайис сылы пӧсь йӧв. Да эз прӧстӧйӧс, а ма сорӧн. Дед и йӧвсӧ юис быдса кружка. Челядь аддзисны, кыдз сылӧн плешсьыс чепӧсйисны гырысь ньылӧм войтъяс.

— Но вот и бур. Пӧсялі. Ӧні став висьӧмыс пӧсьнас петас. Рытнас ещӧ пывсянӧ ветла. И бара — топ-топ! — мусӧ тальны пондам.

Дед бӧр водіс, шебрасис тулупӧн. Детинкаяс лӧсьӧдчисны мунны. И сэки Витя бара несйис: апчхи!

— Э-э, тэ тай, другӧ, несъялан? — юаліс дед. — Тэ, тыдалӧ, кынмӧмыд жӧ да ме моз жӧ висян?

— Оз, сійӧ оз вись, — вочавидзис другыс пыдди Серёжа. — Сійӧ, дедӧ, пыр несъялӧ. А ёнджыкасӧ сэки, кор мыйыськӧ полӧ...

— Вот дивӧыд... Первойысь кыла, — шензис дед.

3

Маша босьтіс ведра да чеччалігтыр котӧртіс Пельтӧм Селько керка сайӧ гумовтны сёнсьыс ключ ва. Витя да Серёжа пукалісны кильчӧ вылын да кыдзи век, пинясисны.

— Тэнад, зон, кывйыд сажень кузьта, сідзи и ӧвтчӧ ӧтарӧ-мӧдарӧ, — кӧритіс другсӧ Серёжа.

— Тайӧс кыдзи колӧ гӧгӧрвоны? — юаліс Витя.

— Кыдзи колӧ, сідзи и гӧгӧрво, эстӧн кӧ мыйкӧ уджалӧ, — Серёжа чуньнас чутӧдыштіс другыслы юрас. — Муртса-муртса эн висьтав, мый тӧрыт йӧзлысь сёрни кывзім.

— Но и мый?

— А вот сійӧ и эм! Тэныд окота, мед миянӧс кузь пельясӧн нимтісны? Висьтав — окота?

— Некод нинӧм оз шу. Ме чайта, Петрӧван дедлы быдтор позьӧ висьтавны...

— Да тэ мый? Юрыд мыйкӧ мында уджалӧ оз? И мыйла ме тэ дінӧ кӧвъяси...

Он гӧгӧрво Серёжаӧс, некыдз он гӧгӧрво. Мукӧд дырйи морт — морт и эм, мый йылысь колӧ, сы йылысь и сёрнит, а мукӧд дырйиыс кыв джын он куж шуны. И мыйла сійӧ быдторйысь лӧгасьӧ? Ӧнӧдз, тыдалӧ, оз вермы вунӧдны ӧбидасӧ? Шутка-ӧ, кӧсйис лоны старӧстаӧн, и со тэныд: пуктісны кутшӧмкӧ Катяӧс... Сысянь на век, тыдалӧ... Аддзӧма, мыйысь скӧравны... Витя эськӧ важӧн нин вунӧдіс.

— Серёжа, вай сэсся некор огӧ кутӧй пинясьны. Тайӧ некытчӧ оз туй, — миритчӧм могысь шуис Витя. — Оз кӧ туй, эн и понды!

— Серёжа, тэ мыйла сэтшӧм?

— Кутшӧм сэтшӧм?

Код тӧдас, мыйӧн эськӧ помасис тайӧ сёрниыс, Витя кӧ эз гӧгӧрво другыслысь мӧвпсӧ: сійӧ нарошнӧ пондӧ, мед первой гымгыны сылы кулакӧн гӧрбас, сэсся киас сюйыштны сылы тяпки. Со мый вӧлӧма.

Витя чеччис места вывсьыс да пӧлнясигтыр мӧдӧдчис гортас. И муніс эськӧ, эз кӧ казяв Машаӧс. Нывка мый вынсьыс котӧртіс Селько керка дорсянь.

— Ой, ой, ой...

Первой Серёжа, сэсся Витя уськӧдчисны Машалы паныд.

— Мый лоис? — ӧтпырйӧ юалісны кыкнанныс.

Ой, Пельтӧмыс бара нин Ӧльӧшсӧ нӧйтӧ! Муна ӧграда пӧлӧныс, нинӧм ог думайт и друг кыла, кыдзи Ӧльӧшыс чилзӧ. Дзик порсь моз, кор сійӧс бӧръя кокъясӧдыс кыскӧны...

Челядь котӧртісны Пельтӧм Селько керка дінӧ, ляскысисны забор бердас. И некод на пиысь эз думайт, бур али лёк видзӧдны забор костӧд йӧз йӧрӧ. Синъяснас сатшкысисны щеляс, весиг лолавнысӧ дугдісны. Мый сэні вӧчисны — ставыс тыдаліс.

Пельтӧм Селько кутӧма внуксӧ морӧсӧдыс да личкӧма муас. Ӧльӧш эз вӧр, тасмаыс куйліс бокын, эз жӧ ӧні вӧр, тыдалӧ, шойччис. Шойччис, тыдалӧ, и тасмаыслӧн кӧзяиныс. Селько скӧрысь видзӧдіс внукыс вылӧ да лыддьӧдліс:

— Куим ош аслам нэмын велӧді, учёнӧйӧн вӧчи, а тэнӧ, понпиӧс, велӧда жӧ. Ме тэнӧ мортӧн вӧча. Да, гӧгӧрво тэ, зырым бедь: ме ог ас вӧсна тӧждысь, а тэ вӧсна. Кывзысьны кутан, енмыс шуд сетас, мывкыдтӧ содтас.

— Нинӧм меным оз ков, — сыркъяліс Ӧльӧш.

— Мый? Кыдзи нӧ тэныд оз ков? Мыйла нӧ тэ му вылас инӧ олан? Висьтав — мыйла?

— Ог тӧд...

— Вот кутан тӧдны...

Селько копыртчыліс, киас босьтіс тасма.

Ӧльӧш мӧдіс вежнясьны, мынтӧдчыны.

— Оз ков, дед! Тырмас! — чирзіс сійӧ.

— А-а, сідзкӧ, оз ков! Сідзкӧ висьтав, мыйла чужин му вылас? Висьтав регыдджык, а то вурышта!..

— Тэнӧ кывзыны, дедӧ, а ещӧ енлысь кывзысьны... — кевмысис детинка.

— Но и кывзысь! А то — ог, ог... Ме тэныд сета — ог! Вӧчан сідзи, кыдзи ме тшӧкті. Да эн аснырав. Кӧсъян овны — кывзысь... Он кӧ кут кывзысьны, босьта чер да петуклысь моз юртӧ керала... Сы мында и аддзылан.

Ӧльӧш нинӧм эз шу. Сійӧ сӧмын чурскис нырнас да лӧвтіс. Челядьлы вӧлі жаль детинкаыс. Быдмис сійӧ лёка. Дедыс пыр сійӧс видіс, нӧйтіс, детинка бур кыв эз кывлы, и не кӧ бур йӧзыс, гашкӧ, важӧн нин куліс тшыгысла. Перкоягын войтырыс бурӧсь: коді йӧлӧн гӧститӧдас детинкасӧ, коді нянь тор сетас. Ачыс Селько быдса недельясӧн эз волывлы гортас, шӧйтӧ кӧнкӧ вӧрын.

Челядьлы окота вӧлі кыдзкӧ отсавны Ӧльӧшлы, но кыдзи? Гортынӧсь кӧ вӧліны гырысьяс, шум эськӧ кыпӧдісны, повзьӧдісны эськӧ Пельтӧмсӧ милицияӧн да судӧн. Но ӧні верстьӧ войтырыс сиктын некод эз вӧв, не лыддьыны кӧ кымынкӧ пӧчӧс да висьысь Петрӧван дедӧс. Пельтӧм Селько тӧдӧ, кор «велӧдны» внуксӧ. «Мыйла сійӧ оз норась милиционерлы? Мыйла сійӧ оз пышйы? Ме эськӧ важӧн нин пышйи» — думайтіс Витя.

Но Ӧльӧш эз и думайт пышйыны. Сійӧ сулаліс скӧр дедыс водзын копыртчӧмӧн да сыркъяліс. Кор сійӧ шуис, мый кутас кывзысьны дедыслысь да енлысь, мый ставсӧ кутас вӧчны, мый тшӧктас дедыс, Селько перйис зепсьыс мыйкӧ дзирдаланаӧс да Ӧльӧшлы вайӧдіс вом дорас.

— Окав, понпи, да сет клятва. Он кӧ вӧч, мый ме тшӧкті, сразу юртӧ воштан. Гӧгӧрвоин?

— Гӧгӧрвои, дедӧ, — шуис Ӧльӧш да окыштіс дзирдаланторсӧ. Сійӧ вӧлӧма ичӧтик ӧбраз.

— Но вот тадзи... Ӧні мун да видз куканьястӧ, — горӧдіс Селько да чужйис сылы бекъяс.

Челядь уськӧдчисны котӧртны.

4

Витя муніс гортас, а Серёжа мӧдӧдчис пывсянъяс сайӧ кыддза раскӧ. Сылысь морӧссӧ гыжъялісны каньяс, сьӧлӧмсӧ йирис-сотіс, мый сылы колӧ вӧлі кытчӧкӧ мунны да думайтыштны ӧтнасыслы.

А кытчӧ нӧ мунан, он кӧ раскӧ? Серёжа важӧн нин казяліс: кор тэныд лоӧ сьӧкыд, сӧмын тані верман шогтӧ пальӧдны. Видас мыйыськӧ мамыс — Серёжа локтӧ нин раскӧ да думайтӧ, мыйла сійӧс видіс мамыс. Овлывлӧ: школаысь двойка ваяс, бара сэтчӧ мунӧ. Ветлӧдлыштас сэні пуяс костӧд, шутьлялыштас — видзӧдан да, настроениеыс вежсьӧма нин, став лёкыс да сьӧлӧм вывсьыс сьӧкыдыс бырӧма, ру моз разалӧма.

А талун мыйлакӧ торъя сьӧкыд вӧлі. И Серёжа пырис раскӧ.

Збыльысь, тані лӧсьыд, местаыс мича. Видзӧдан да, сэні кыдз пуяс вашкӧдчӧны, пипуяс шӧпкӧны, паныдасьлӧны и небыдик лыска ньыв пуяс. Сынӧдыс сӧстӧм, небыд, кок улад кольӧм вося коръясыс шаракылӧны. А главнӧйыс — лэбачьяс. Быд пу вылын найӧ зёльзьӧны-сьылӧны. Лӧсьыд. Сӧмын талун сылы абу лӧсьыд.

Серёжа пырис пипуяс костӧ, морӧс тырнас лолаліс сӧстӧм сынӧдсӧ, а мыйлакӧ оз кокньӧд.

Ӧбӧдитісны детинкаӧс, ёна ӧбӧдитісны.

Мӧйму гожӧмнас школьникъяс ветлісны экскурсияӧн Ниндуль ты дорӧ. Старӧстанас группаас вӧлі Серёжа. Тӧвся каникулъяс дырйи ветлісны леспромхозӧ видзӧдлыны выль машинаяс. Коді старӧстанас вӧлі? Бара Серёжа. А ӧні? А ӧні индісны Катя Петроваӧс... А мыйла?

Быдлаын вӧлі Серёжа, и друг Катя?!.

И мый артмӧ? Мун тэ карӧ, эн ыръянит, кывзысь нывкалысь. Мый сійӧ тшӧктас, сійӧс и вӧч. Тшӧктас Катя дежуритны — дежурит. Быдтор кывзысь. Пыран столӧвӧйӧ сёйыштны, Катя командуйтӧ: «Серёжа, вай пызан вылӧ нянь, паньяс!» Тэныд лоӧ вайны.

Аттьӧ, оз ло сідз! Серёжа сэки висьталіс, мый сылӧн висьмис кынӧмыс и карӧ мунны оз вермы.

Аттьӧ!

И вот ӧні думайт!.. Мыйла сідз артмис? Мыйла эз сійӧс старӧстанас пуктыны? Гашкӧ, учительницасӧ мыйӧнкӧ скӧрмӧдіс? Гашкӧ, норасис кодкӧ сы вылӧ? И коді вермис норасьны?

Гашкӧ, Вася Порсев? Сямыс аслас абу, а век сюйсьӧ, Серёжаӧс кыкысь нин баквалӧн шуліс. Порсь дак порсь и эм.

А, гашкӧ, Петя Пунегов? Вермас и сійӧ. Ме вылӧ кӧсӧя жӧ видзӧдӧ, век пиньсӧ йирӧ, и мыйлакӧ генералӧн шуӧ да ещӧ сы вылӧ карикатураяс рисуйталӧ. Ӧтчыд вӧлі сідз рисуйтӧма, мый сьӧласьны окота лолі. Морт не морт, и петук не петук. Карикатура улас кӧть и нинӧм абу вӧлі гижӧма, а мыйлакӧ быдӧн нюмъялігтыр видзӧдлывлісны Серёжа вылӧ.

Да мый сэн юрсӧ жуглыны. Тӧдан ӧмӧй, коді вермис норасьны? Некор он тӧд.

Но да мед! Мед, колӧкӧ, пуктӧны старӧстанас кӧть Маша Модяноваӧс, кӧть Вася Порсевӧс, кӧть Катя Петроваӧс! Мед сералӧны. Серёжа петкӧдлас на асьсӧ. Да, да, петкӧдлас! Быдӧн завидьтыны кутасны. Вот талун жӧ вӧчас Серёжа мыйкӧ сэтшӧмӧс, мый Серёжаӧс ки выланыс кутасны новлӧдлыны. Быдӧн кутасны сёрнитны: «Со сійӧ кутшӧм вӧлӧма. А ми эгӧ и тӧдлӧй? А мыйла сійӧс старӧстанас эз пуктыны?..»

Сэки видзӧдлам, мый сьывны понданныд! Сэки ме петкӧдла. И ещӧ ӧтитор Серёжалы дум вылас уси, и сійӧ кутіс нюмъявны...

Кутшӧм век жӧ лӧсьыд тані вӧлӧма! Сразу кокньыдджык лоис сьӧлӧм вылас, вежӧрыс сӧдзмис, чужины выль думъяс.

Аттьӧ тэныд, мича рас!

Дыр ветлӧдліс Серёжа расӧдыс, кывзіс пуяслысь шӧпкӧдчӧмсӧ. Ветлӧдліс и думайтіс. Сійӧ думайтіс сы йылысь, мый сійӧ вӧчас ӧбидчикъясыскӧд, кор сійӧс сиктын кутасны новлӧдлыны ки выланыс. Перво-наперво вештысяс Катякӧд, мыйла сійӧ эз ӧткажитчы старӧстаалӧмсьыс, сэсся быдӧнлы ӧти-мӧд бӧрся сеталас гӧрбаныс да тшӧктас бугритны картупель град.

А мый? Геройлы быдтор позьӧ вӧчны.

Тадзи думайтіс Серёжа, и сылы лои нимкодь. И расӧд ветлӧдлыны эз ло окота, и думайтны эз ло окота. Сійӧ петіс расысь. Мед ӧні сэні мӧд ветлӧдлас, а Серёжалы мӧд удж сюрӧ. Шуам, сылы ӧні купайтчыны колӧ.

Серёжа петіс расысь и сэк жӧ аддзис Витяӧс. Сійӧ пукаліс берег дорын да мыйкӧ думайтіс. Серёжалы ещӧ на гажаджык лоис. Друг! Кӧть ӧти, а друг эм! Сійӧ ӧд карас эз жӧ мун. Кӧть сы вылын позьӧ командуйтыштны!..

— Вить! А, Вить!

Витя быттьӧ эз и кыв. Весиг эз видзӧдлы сылань.

— Витя, тэ лӧгасин али мый?

Витя чатӧртліс юрсӧ, видзӧдліс Серёжалы синъясас.

— Ог, ме ог лӧгав.

Вот тайӧ друг. Некор оз лӧгав!

— А мый нӧ сідзкӧ?

— Ме думайта. Ме думайта сы йылысь, мыйла Пельтӧм Селькоыс сэтшӧма Ӧльӧшкасӧ нӧйтіс, мый сылы тшӧктіс вӧчны? А кутшӧм кӧинъяс йылысь тӧрыт пӧчыс сёрнитіс?

— О, аддзӧма мый йылысь думайтны. Сӧрисны, и мед сӧрисны. Кутшӧм миянлы сэтчӧдз мог? Вай лучшӧ купайтчам.

Витялы аслыс окота вӧлі купайтчыны, и сійӧ сӧгласитчис. Витя ӧні казяліс, мый Серёжа абу важкодьыс, а вежсьӧма, и сыкӧд ӧні позьӧ мунны кӧть кытчӧ. А ӧд эз нин кӧсйыв сёрнитны сыкӧд, думайтіс пыр кежлӧ лӧгасьны. Ок-ок-ок...

Сӧмын шуис, но эз нин сэтшӧм долыда:

— Ладнӧ, мунам купайтчам.

5

Найӧ купайтчисны час джын кымын, резсисны ванас, вӧтлысисны ӧта-мӧд бӧрсяыс. Сэсся ветлісны парникъяс дорӧ, кӧсйисны видзӧдлыны, кыдзи уджалӧны нывъяс да сьылӧны.

Веськыда кӧ шуны, налӧн вӧлі и мӧд мог: видзӧднытӧ видзӧдны, а тӧлк кӧ сюрас, сӧтыштны некымын ӧгуреч. Но нинӧм налӧн эз артмы. Парникъяс дорын бригадирнас уджалӧ коктӧм Ӧльӧксан. Сійӧ нин сэтшӧм морт, мый сы син улӧ эн веськав.

Кольӧм во арся войӧ Черанёв деревняысь вӧлі пыралӧмаӧсь куим детинка. Пырнысӧ пырӧмаӧсь, а петны абу вермӧмаӧсь, Ӧльӧксан куимнаннысӧ кутӧма да кыскӧма сельсӧветӧ. Вот тэныд и коктӧм!

А талун, кор аддзис кык другӧс, уськӧдчис на вылӧ:

— А ті мыйла татчӧ локтінныд? Ӧгуречьяс гусявны, колхоз рӧзӧритны? Ноко, марш татысь!

Сы мында и вӧлі. Весиг Серёжа нинӧм эз шу. Люньгӧдіс бӧжсӧ да петіс ворота сайӧ. Витя юрсӧ ӧшӧдӧмӧн шлёнгис сы бӧрся. Кыкнанныс ӧбидитчасны. Эз на удитны пырны, и пыр жӧ бӧр лоис мунны.

Но найӧ гӧгӧрвоисны, мый скӧравны оз позь. Коктӧм Ӧльӧксан, тыдалӧ, тӧдіс налысь лёк думъяссӧ. Видлы тэ сійӧс ылӧдны! Война вылын сійӧ разведчикӧн вӧлӧма, не ӧтчыд ветлӧма фашистъяс тылӧ, не ӧти фрицӧс сэтысь вайӧдлӧма штабас. Эз кӧ ранитчы, гашкӧ, не ӧти фашистӧс на кутіс. Эз ӧд прӧста сылӧн морӧсас дзирдавны куим орден да нёль медаль. Герой, ӧбидитчыны татшӧм морт вылас оз позь. Раз лёк думӧн локтін, сідзи и бӧр мун! А мый сэсся?

Серёжа да Витя бӧр локтісны сиктӧ, лэччисны берег дорӧ, асланыс радейтана местаӧ, пуксисны пӧрӧдӧм пыж вылӧ да ӧшӧдісны юрнысӧ. Вӧчны вӧлі нинӧм.

— Лёка ми, другӧ, кадсӧ коллялам, — дыр думайтӧм бӧрын шуис Витя.

Серёжа ыпнитіс:

— Чудак! А коді тэныд шуис, мый бура? Дерт, лёка. Но эн пов. Час, мыйкӧ думыштлам. Оз вермы лоны, мый юрӧ нинӧм оз во. Сэки аддзам, мый вӧчны.

Витя водіс гатшӧн да, енэжас видзӧдігтыр, друг шуис:

— Волшебнӧй кыв кӧ эськӧ тӧдны. Сэтшӧмӧс... Мед эськӧ сійӧс шуан и сразу став кӧсйӧмыд збыльмӧ. Ме эськӧ сэки шуи: «Ракета, ракета! Пуксьы ми дорӧ!» Пуксис эськӧ татчӧ ракета, ми тэкӧд, дерт, сэтчӧ пырим, пуксим да лэбим тӧлысь вылӧ. Но тадзсӧ овлӧ сӧмын мойдын. Волшебнӧй кывйыс абу.

— Кӧть коді шуас — абу, — горӧдіс Серёжа. — А вот ӧтитор эм. Дзик волшебнӧй...

Витя ырскӧбтіс-чеччис да пуксис орччӧн Серёжакӧд.

— Мый нӧ сэтшӧмыс?

— Волшебнӧй, мися... Талисманӧн шусьӧ. Кывлін сы йылысь? Но дак кывзы. Кодлӧн эм сійӧ, сыкӧд некутшӧм лёктор оз вермы лоны. Мый кӧсъян вӧчны, сійӧ и артмӧ. Менам дедлӧн вӧлӧма талисманыс.

— Дедыдлӧн?

— Ага. Кулігас бабӧ меным ставсӧ висьталіс. Кыкысь, шуӧ, дедыд ветліс война вылӧ, и бӧр воліс гортӧ. Гортын, шуӧ, бандитъяскӧд тышкасис, и бара эз вины. И мый кӧть эз вӧчлы, сылы быдлаын везитіс. Мунас вӧрӧ ош кыйны — виас. Лэччас мужикъяскӧд чери кыйны, некодлы оз шед, а сійӧ помся кыскалӧ сиръяс да ёдіяс.

— Вот тай! А кутшӧм нӧ сійӧ талисманыс?

— Кутшӧм? Каллян! Прӧстӧй каллян. Ачыс вӧчлӧма. Дедӧс, тӧдан, кӧлдунӧн коркӧ шулӧмаӧсь. А калляныс абу прӧстӧй вӧлӧма.

— Первойысь кыла. Видзӧдлыны эськӧ... Тэ петкӧдлан?

— Верма петкӧдлыны. Тӧрыт ме сійӧс чуланысь аддзи. Дженьыдик. Кыдз пуысь вӧчӧма. Ӧти помас — мундштук, а мӧдас, кытчӧ табаксӧ пуктӧны — чӧрт, сюра, тошка. Ме чайта, сійӧ чӧртас и став волшебнӧй выныс.

Витя, дерт, эз верит некутшӧм чӧртлы, но век жӧ... Мыйыс му вылас оз овлы да? Хо-хо...

— Лок мунам, видзӧдлам...

Серёжа нинӧм эз шу. Сійӧ прӧста нинӧм эз удит шуны. Детинкаяслӧн пельясыс друг кылісны кутшӧмкӧ тӧдтӧм шыяс. Шыыс кыліс Шерва кывтыдладорсянь: мыйкӧ тэрыба шпоткӧдіс: шпот-шпот-шпот! Тӧдтӧм шыыс матысмис и матысмис.

— Мотоцикл локтӧ, — шуис Витя.

— Х-ы, мотоцикл! — серӧктіс Серёжа. — Ва кузяыс? Ок тэ... Моторнӧй пыж!..

— Да, сійӧ и эм. Со талань тӧвзьӧ...

Моторнӧй пыжъяс бӧръя кадас шлывъялісны частӧкодь. То вотчысьяс кытчӧкӧ катӧны, то турунла, а корсюрӧ и вӧралысьяс катлісны. Но найӧ мунлісны сиктӧ сувтлытӧг, бокыті, рытнас сёрӧн, а то и войнас, мед этшаджык син аддзылас.

А талун моторка сувтіс буретш сэтчӧ, кӧні кык друг век вуграсьлісны, пӧрӧдӧм пыж дорӧ. Моторка ньӧжйӧник матыстчис берег дорӧ. Пыжысь чеччисны кыкӧн. Ӧтиыс вӧлі ыджыд тушаа, сьӧд уска ён морт, а мӧдыс — Витялӧн кодь небыдик гӧгрӧс чужӧма морт. Кыкнанныс выль комбинезонаӧсь, брезент курткааӧсь, кузь гӧлена сапӧгаӧсь. А пыжас! Челядь аддзисны сэтысь кык ружье, ыджыд рюкзак да кутшӧмкӧ ящикъяс.

— Здорово, друг! — Витялысь кутліс кисӧ томджыкыс. — Вайлы меным водзӧсӧн кымынкӧ берин чут, — гораа серӧктіс.

Сьӧд ускаыс чолӧмасис Серёжакӧд.

— Кыдзи тэнӧ шуӧны, багатыр? — юаліс сійӧ.

— Серёжаӧн.

— О! Вот тайӧ да! Эг на удит чеччыны пыжысь, а тьӧзаӧс нин аддзи. Менӧ ӧд Сергейӧн жӧ шуӧны. Да-да! Сергей Петровичӧн! Вот и ми тӧдмасим.

Витя да том мортыс тӧдмасисны жӧ. Томсӧ шуисны Володяӧн, Владимир Васильевичӧн.

— Вай, вокъяс, висьтасьӧй, кыдзи оланныд, кадсӧ колляланныд? — юаліс Сергей Петрович.

Сійӧ пуксис берег дорас, заводитіс куритчыны. Владимир Васильевич водіс кымыньӧн сы дінӧ. Сійӧ, буракӧ, эз куритчы: босьтіс турун за да няклявны кутіс вомас.

Витя кыдзкӧ гусьӧн тувкыштіс Серёжалы бокас да шӧпнитіс:

— Вот тэныд и удача! Каллянтӧ казьтыштім, и — сразу.

— Ме жӧ шуи тэныд — волшебнӧй сійӧ, — мигнитіс Серёжа.

Найӧ пуксисны воысьяскӧд орччӧн да висьталісны, мый кык друг олӧны лёка, гажтӧма, мый вӧчны нинӧм, а сэсся заводитісны юасьны налысь:

— Ті геологъяс?

— Абу. Ми изыскательяс, — вочавидзис Владимир Васильевич. — Миянлы колӧ, кӧть кыдзи, а пыравны Пыдӧстӧм нюр сайӧ, тӧдмавны, позяс-ӧ сэтчӧ восьтыны выль леспромхоз.

— И туй колӧ корсьны, медым вӧрсӧ петкӧдны Шерва дорӧ, — содтіс Сергей Петрович.

Витя тэрыба видзӧдліс другыс вылӧ, а Серёжа вомсӧ восьтӧмӧн видзӧдіс Витя вылӧ. Кыкнанныслӧн синъясыс югъялісны. Найӧ первойсӧ нем эз гӧгӧрвоны. Выль леспромхоз йылысь сёрнитӧны важӧн нин, и со вӧлись локтісны!

— Дядь, а сэні посёлок лоас? — юаліс Витя.

— Да, выль посёлок лоас. Вой и лун кутасны жургыны машинаяс, дзижгыны электропилаяс, мургыны тракторъяс, — куритчигкостіыс висьтасис Сергей Петрович.

— А миян бӧрысь геологъяс локтасны. Найӧ кӧ, шуам, аддзасны нефть, а мукӧд геологъяс, шуам, руда, со сэки татчӧ стрӧитасны кар, и тіянлы сэки оз ло гажтӧм, — шуис Владимир Васильевич.

Челядьлы тайӧ кажитчис. Кажитчисны и асьныс изыскательяс. Шань йӧз, весёлӧсь. Вот эськӧ мунны накӧд Пыдӧстӧм нюр сайӧ. Мый сӧмын эз аддзывны эськӧ!

Каллян, каллян, отсав!

— А он-ӧ кӧ вермӧ пырны нюр саяс, сэки и посёлоксӧ оз стрӧитны? — юаліс Витя аслас тӧдсалысь.

— Мыйла огӧ вермӧ пырны?

— Да, пӧрысь йӧз шуӧны, мый он пӧ вермы сэтчӧ муннысӧ, зыбучыс пӧ кӧть кодӧс ньылыштас...

Владимир Васильевич мудера нюммуніс, шыбитіс вомсьыс турунсісӧ.

— Ӧбязательнӧ мунам. Абу сэтшӧм местаыс, кытчӧ эськӧ морт эз вермы письтны. Страналы колӧ вӧр. А сійӧ со, аддзан, тыдалӧ. Думайтан, огӧ босьтӧй? Ӧбязательнӧ босьтам.

Сергей Петрович нюммуніс да шуис тшӧтш:

— Ӧбязательнӧ босьтам. Сӧмын первой колӧ тӧдмавны ставсӧ, кыдзи да мый. Сэки ставыс лоас бур.

6

Перкояг сиктын сӧмын ӧти улича. Сикт шӧрас мыльк йылын тӧв и гожӧм шувгӧны кыдзьяс да сус пуяс. Тайӧ нэмӧвӧйся пуяс улас сулалӧ пӧвъясысь вӧчӧм пирамида. Кор матыстчан сы дорӧ, ӧти бокӧ тувъялӧма нёль пельӧса ыргӧн пӧв. Сы вылӧ мичаа гижӧма:

А. П. САЛЬНИКОВ

1910–1934

Сергей Петрович да Владимир Васильевич локтісны пирамидаыс дінӧ, пӧрччисны юр вывсьыныс кепкаяссӧ, сулалыштісны сы водзын, сэсся надзӧник кытшовтісны гусӧ. Сергей Петрович ещӧ ӧтчыд видзӧдліс гижӧд вылас да ньӧжйӧник шуис:

— Буракӧ и тані, пармаас, классӧвӧй тыш мунӧма. Кодӧскӧ томӧн виӧмаӧсь. Буракӧ шань морт вӧлӧма.

— Тані, дядя, миян колхозысь медводдза председательыс узьӧ. Андрей Павлович Сальников. Сійӧс бандитъяс виӧмаӧсь, — висьталіс Витя.

Да. Врагъяс эз этша вирсӧ кисьтны бур йӧзлысь. Сьӧкыд тышыс вӧлі.

Изыскательяс ветлӧдлыштісны гу дортіыс, видзӧдісны ён сус пуяс вылӧ, тыдалӧ, любуйтчисны наӧн. Витя да Серёжа бура тӧдісны, коді вӧлі первойя председательыс, Петрӧван дед не ӧтчыд висьтавліс налы Андрей Павлович йылысь, и ӧні кык друг висьталісны выль тӧдсаясыслы сы йылысь, кыдзи бандитъяс виисны Сальниковӧс. Висьталісны эськӧ и унатор на, но друг, виччысьтӧг, быттьӧ му пытшсьыс петіс, на дорӧ сувтіс Пельтӧм Селько. Матыстчис и аслас кыз гӧлӧсӧн горӧдіс:

— Бур лун тіянлы, шань войтыр!

Серёжа да Витя весиг дрӧгнитісны. Вот кутас сійӧ найӧс да пывсьӧдны мӧдас тасманас, Ӧльӧшсӧ моз. Но Селько на вылӧ весиг эз и видзӧдлы. Сійӧ топыда кутліс изыскательяслысь кинысӧ да нюмъяліс. Ой, кыдзи сійӧ нюмъяліс. Но пон — пон и эм, кор кӧзяиныс меліалӧ сійӧс.

— Мый, бара нин нефть корсянныд? — гораа юаліс сійӧ.

— Ог. Миян мӧд мог. Миянлы колӧ вӧр, — вочавидзис Сергей Петрович.

— Сідз. А ме думайті — нефть. Мӧйму татчӧ волісны геологъяс, лун-мӧд ветлӧдлісны...

— Но и мый?

— А мунісны бӧр. Кӧсйисны нюр сайӧ вышка сувтӧдны. Да кысь нин. Видзӧдісны-видзӧдісны да ӧвтыштісны кинас: он пӧ вермы вуджны нюрсӧ.

Селько висьталіс тайӧс тэрмасьтӧг. Изыскательяс кывзісны и жугыльмисны.

— Сідзкӧ, нюр саяс он вермы веськавны?

— Ӧдвакӧ. Зыбуч нюр сэні. Гашкӧ, Кайскӧй вӧлӧкті... Кодкӧ воӧ волісны учёнӧй нывбабаяс, лекарственнӧй турунъяс корсисны, да и найӧ смелӧсь вӧліны... Дыр ветлӧдлісны нюрас, да век жӧ муртса лёкыс эз ло... Мӧдӧдчӧмаӧсь веськыда мунны и веськалӧмаӧсь самӧй лёкинас. Муртса удитӧмаӧсь кутчысьны бадь кустӧ. А ме буретш сэки вӧлі нюр дорас ытшка. Кыла, лёкгоршӧн горзӧны. Босьті потш да кысси кынӧм вылын. Муртса мезді кыкнаннысӧ. А то эськӧ ӧні на сэнӧсь... Дас шайт меным сетісны.

Челядь сюся кывзісны Сельколысь висьтсӧ. Изыскательяс довкйӧдлісны юрнаныс.

— Лёк, сідзкӧ, — шуис Сергей Петрович. — Збыль ӧмӧй сэтшӧм зыбуч?

— Видзӧднысӧ полан, непӧштӧ..., — водзӧ сёрнитіс Селько. — Весиг тӧвнас оз кынмывлы.

— Колӧма вертолёт корны, — шуис Сергей Петрович.

Пельтӧм Селько друг швач-кучкис бокъясас да быттьӧкӧ тӧд вылас уськӧдіс:

— Да мый ми тані пукалам? Мудзинныд кӧнкӧ, кынӧмныд сюмалӧ? Локтӧ пырамӧй керкаӧ, сэн сёрнитам. И сідз ме век ӧтнамӧн, мыр моз, войтырсӧ шоча аддзывла. Локтӧй пырамӧй. Со менам керкаӧй...

И Селько кыкнаннысӧ нуӧдіс гортас. Вот кӧиныд! Челядь эз на и удитны сёрнитны... А кутшӧм окота вӧлі тшӧтш ветлыны нюр саяс. И кытысь чӧртъясыс Селькосӧ вайисны татчӧ?..

ВАЖ МЕЛЬНИЧА САЙЫН

І

Аскинас кык друг лунтыр ветлӧдлісны юрнысӧ ӧшӧдӧмӧн, эз тӧдны, кытчӧ воштысьны. Мый вӧчны? Гоз-мӧдысь найӧ лэччылісны берег дорӧ вуграсьны, но весиг ӧти кельчипи налы эз шед, и вугыр шатинъяссӧ найӧ брун-шыбитлісны берегӧ. Пыравлісны Шерваӧ купайтчыны, но талун и купайтчынысӧ эз вӧв окота. Колӧ жӧ сідз лоны?! Изыскательяс талун асывнас водз мунӧмаӧсь корсьны Пыдӧстӧм нюр сайӧ туй, а найӧ, Витя да Серёжа, бара колины ас кежаныс. Тайӧ мед на! Но ӧд изыскательясыс мунӧмаӧсь абу кодкӧдкӧ мӧдкӧд, а Пельтӧм Селькокӧд. Войдӧр Селькоыс вӧрас пыр ветлывліс ӧтнасӧн, а талун ачыс вӧзйысьӧма нуӧдны найӧс.

— Пӧтлытӧм горш тайӧ Селькоыс. Тыдалӧ, деньгатор кӧсйӧ нажӧвитыштны, — не ӧтчыд нин шуис Витя.

— Гашкӧ и сідз...

Ӧні кык друг гатшӧн куйлісны берег дорын, видзӧдісны кельыдлӧз небесаас да думайтісны. А юраныс налы, быттьӧкӧ нарошнӧ, сӧмын Пельтӧм Селько и пырӧ. Ставсӧ торкис сійӧ. Не сійӧ кӧ, изыскательяс тӧндзи кӧсйысьлісны нин босьтны найӧс сьӧрсьыс. Вайӧдіс сійӧс кутшӧмкӧ сюра чӧрт берег дорас, сэсся мыйлакӧ найӧс гортас нуӧдіс...

А мыйла налы волшебнӧй трубкаыс оз отсав? Мыйла сійӧ эз торйӧд Пельтӧмсӧ?

— Абу, тыдалӧ, сылӧн выныс, — жугыля ышловзис Витя.

— Кыдзи абу? Эм! Сӧмын колӧ думайтны. Кутан кӧ сы йылысь дырджык думайтны, быть лоас. Сӧмын, буракӧ, сылӧн мыйкӧ гусятор эм! Ӧтчыд отсалӧ, мӧдысь, оз, сэсся бара отсалӧ. И ещӧ ӧтитор бабӧсянь кывлі: кор пӧ отсалас, некор шензьыны оз ков. А тӧндзи тэ, йӧюк, мый дыра шензин...

Серёжа тайӧс висьталіс сідзи, мый позис думыштны — збыльысь эскӧ трубкаыслы.

А код тӧдас, гашкӧ и збыльысь пондіс веритны. Ого! Кор окота тэныд вӧчны подвиг, сэки быдторлы эскан, вӧрсаыслы и васаыслы...

Сикт сайын дугдывтӧг шпотӧдчис движок, качайтіс колхоз град йӧрӧ ва. Гӧра мыльк сайын жургис трактор — лэптіс коськӧм. А Шерва берег дорын, сикт весьтын, бовъяліс изыскательяслӧн моторнӧй пыжныс. Сергей Петрович да Владимир Васильевич кольӧмаӧсь пыжсӧ, асьныс подӧн мунӧмаӧсь Манастыр яг сайӧ, Кайскӧй вӧлӧкӧ.

И век жӧ кутшӧм гажтӧм!

— Тӧдан мый, — друг шуис Витя. — Ме думысь, тані мыйкӧ абу ставыс лючки... Ме сідз чайта: тӧндзи эсійӧ пӧчыс эз прӧста кӧинъяс йылысь сёрнит. Селькоыс ӧд мый сэки шуис: «Ачым ме найӧс встретита, ачым и колльӧда...» Кодъясӧс сійӧ встретитас да колльӧдас? Кӧинъясӧс?..

— Ок и юр тэнад!.. Ӧні и ме казялі, мыйкӧ тані абу ставыс лючки-ладнӧ, — шыасис Серёжа. — Тан мыйкӧ эм... Кутшӧмкӧ важнӧй юӧр батюшкоыс ыстӧма, а кутшӧмӧс — ог вермы гӧгӧрвоны.

— А кутшӧм йӧз йылысь найӧ казьтылісны? Кутшӧмкӧ маткаӧс пӧчыс тшӧктіс гортас катӧдны?

— Кутшӧм, кутшӧм? А ме ӧмӧй тӧда? — скӧрмис Серёжа, кодлӧн, буракӧ, уна думайтӧмсьыс юрыс нин висьмис. — Вӧрас сылӧн, пӧди, мазі позъяс эмӧсь, кодъясӧс оз кӧсйы петкӧдлыны йӧзыслы. Аддзылін, кыдзи сійӧ манас гӧститӧдіс? Сёй пӧ, эн жалит, аслам маыс. А Сельколӧн ӧшинь улас сӧмын ӧти мазі поз.

— Збыль ӧд! — шемӧсмис Витя. — Гашкӧ, вӧрас Селькоыслӧн быдса пасека эм? Сійӧн и полӧ, мед эськӧ изыскательяс эз аддзыны. Сы вӧсна ачыс вӧзйысис нуӧдны найӧс... И нуӧдас кытчӧкӧ ылӧджык бокӧ.

Кык друг дыр на сёрнитісны Селько йылысь, тадзи и этадзи бергӧдлісны-гадайтісны, но немтор эз вермыны думыштны. Сӧмын рытнас нин налы уси дум вылас Петрӧван дед да шуисны висьтавны сылы ставсӧ, мый кывлісны Селько ӧшинь улын.

Петрӧван дед пукаліс посводзас. Тыдалӧ, сійӧ абу на дзикӧдз бурдӧма, чужӧмыс блед да ачыс слаб на, но ветлӧма нин удж вылӧ: лэччылӧма важ мельнича сайӧ чери кыйны да ӧні шойччигмозыс керис кельчияс.

— Юи тӧрыт маа йӧвтӧ, рытнас пывсьыны ветлі, со и бурді. Ӧні бара позьӧ чатрасьны. Талун, аддзанныд, неуна чери кыйышті, вӧрас вотӧс сёйышті. Висьтала ме тіянлы, бур пиян, гӧрд сэтӧрыс воӧма нин.

Оз — пев пом кодь гырысь, гӧрд. Кежалі Манастыр ягӧ, а сэні кутшӧмкӧ бабаяс да пӧчьяс павъялӧны, вотчӧны.

Бӧръя воясӧ Манастыр ягас гожӧмбыд вотчывлісны карса да леспромхозса бабаяс. Локтасны сэтчӧ машинаясӧн, горзӧны вӧр тырыс, шырзьӧны сэтӧр да чӧд...

— Ми аски дедкӧд ветлам жӧ, а то ставсӧ вотасны, нинӧмыс оз коль, — шыасис Маша.

Витя лӧгысь видзӧдліс сы вылӧ. Серёжа мыйкӧ чушнитіс жӧ. Колӧ делӧ йылысь сёрнитны, а сійӧ сюйсьӧ нинӧмабунас. Маша дырйи он жӧ кут висьтасьны, кыдз найӧ кывзысисны Пельтӧм Селько ӧшинь улын? И колӧ-ӧ висьтавны сы йылысь? Гашкӧ, Петрӧван дед кутас видчыны?

Но век жӧ висьталісны. Кор Маша мыйлакӧ пырис керкаӧ, Витя висьталіс. Петрӧван сэк шуис:

— Пельтӧм Селько том дырсяньыс кутшӧмкӧ пӧчьяскӧд да пӧльяскӧд ноксьыліс. Код тӧдас, мый йылысь найӧ сёрнитісны.

— А мыйла изыскательясыскӧд муніс?

— Но, муніс кӧ, и мед муніс. Гашкӧ, корисны сійӧс, деньга кӧсйысисны сетны. Вот и муніс.

Дедлӧн чериыс керсис, и сійӧ мӧдӧдчис пырны керкаас.

— Мунанныд аски мекӧд? Вотӧс вотыштам неуна, чери бара кыйыштам.

— Дерт жӧ, мунам. Гашкӧ, изыскательясӧс аддзылам. Найӧ ӧд сэтчӧ жӧ мунісны, — шуисны кыкнанныс.

2

Ӧгрепена баб паныдасис внукыскӧд посводзас.

— Тэ дыр на ыръянитны кутан, а? Вот босьта карнансӧ да шонтышта бокъястӧ. Оз и волы, лун-лун кӧнкӧ шӧйтӧ. А картупельсӧ коді кутас мудйыны?

Ок! Бара картупель! Да кор нин сійӧ помасяс?

— Тэ, баб, сӧмын картупель тӧдан, а менам важнӧйджык делаяс эмӧсь.

— Кутшӧм ещӧ делӧ? Мыйла ещӧ важнӧй?

— Кутшӧм да мыйла! Шуӧны кӧ важнӧй, сідзкӧ, важнӧй!..

Ӧгрепена баб здук мында шензьӧмӧн видзӧдіс сы вылӧ да довкйӧдліс юрнас, мыйкӧ кӧсйис шуны, но сідзи и нинӧм эз вермы шуны.

— Аски менӧ, бабӧ, водз садьмӧд, — корис Витя. — Петрӧван дедкӧд кӧсъям вотчыны ветлыны...

— Вӧлись гӧгӧрвоин! — нимкодь лоис бабыслы. — А то лун-лун тӧвсӧ чужъялан... Яндзимыд абу.

Колӧ шуны, Витялӧн бабыс радейтіс чӧсмасьны не сӧмын чериняньӧн, но и варенньӧӧн. Тӧвнас чай юигӧн вӧвлі пуктас чашкаас пань тыр да сідз чӧсмасяс, мый лунтыр сэсся вомас нинӧм оз босьтлы, мед эськӧ не чӧскыдтӧмтны вомсӧ. Со мый вӧсна бабыс вӧлі юӧрнас зэв дӧвӧль.

— Мун сёй да вод. А то аски он чуксав тэнӧ...

Витя эз сёй, кайис сарайӧ.

А Петрӧван дед ордын сійӧ кадас пукаліс выль гӧсть. Челядь муртса на мунісны, кыдзи сы ордӧ пырис Пельтӧм Сельколӧн внукыс, Ӧльӧш. Пыравліс сійӧ Петрӧван ордӧ и водзті: мукӧд дырйиыс прӧста пукавліс да кывзыліс дедлысь сёрни-баснисӧ, а корсюрӧ пыравліс корны няньтор, сы вӧсна мый аслас «дедыс» кытчӧкӧ мунліс да эз кольлы сылы ни ӧти крӧшки. Петрӧван дедлы жаль вӧлі детинкаыс, шуліс «коньӧр сирӧтаӧн» да мыйсюрӧӧн отсавліс сылы.

А талун Ӧльӧш эз кор нинӧм. Чужӧмыс детинкалӧн кельдӧдӧма, киясыс да тушаыс ставнас тіралісны.

— Мый тэкӧд, пиук, лоис? Он-ӧ нин вись? — юаліс дед.

— Висьми, буракӧ, — мыкталігтыр шуис детинка. — Юрӧй потӧ-висьӧ, сёйны нинӧм ог вермы, узьны... Кык вой нин синмӧс ньӧти эг куньлы... Сӧмын ланьтӧдча, сідзи и быттьӧ кодкӧ бокӧ тувкӧдӧ. Инӧ ог ӧшйы...

— Со мый! Да тэныд, другӧ, ӧні жӧ колӧ больничаӧ мунны... Тадзитӧ кувны верман...

— Кула кӧ, мед...

Ӧльӧш вӧлі жугыль, мыйыськӧ, тыдалӧ, поліс. Сэсся друг сійӧ ляскысис дед бердӧ. Детинка полӧмӧн видзӧдлывліс Петрӧван вылӧ, некымынысь нин восьтыліс вомсӧ, кӧсйис мыйкӧ висьтавны, но, буракӧ, эз лысьт.

— Вай аски жӧ больничаӧ котӧрт. Чорыда висьмӧмыд, — шуис дед.

— Куканьяссӧ некодкӧд кольны.

— Нинӧм накӧд оз ло, — шуис старик. — Лун-мӧдтӧ ме верма видзыштны... А тэ бурдӧдчы... Кылан?

Ӧльӧш гогнитіс юрнас, кыскыштіс нырнас. Сійӧ дыр чӧв оліс, пукаліс юрсӧ ӧшӧдӧмӧн.

— Дед... а, дед... Мый ме кӧсъя висьтавны...

— Мый нин сэтшӧмсӧ?... Тэнад, пӧди, кынӧмыд сюмалӧ... Ок тэ, коньӧрӧй тэ менам... Час мыйкӧ вайышта... Со чери кыйышті... Юква пуыштам...

— Оз ков, дедӧ... Ог вермы сёйнысӧ...

— Да-а... Мый нӧ кӧсйин висьтавны?

Ӧльӧш видзӧдліс кытчӧкӧ бокӧ, ыджыда ышловзис, но нинӧм эз шу. Старик гӧгӧрвоис, мый детина ёна висьӧ да ещӧ тшӧктіс аски мунны больничаӧ.

— Сэні тэнӧ ӧдйӧ лечитасны. Молодеч лоан.

— Кула, буракӧ... — жугыля шуис детинка.

Но сійӧ аски жӧ кӧсйысис мунны больничаӧ, и дед такалыштіс.

— Меным эськӧ армияӧ регыдджык мунны, — петігас шуис детинка. — Сэні эськӧ бур вӧлі... Дед... кыдзи тэ чайтан?

Петрӧван сувтовкерліс, лӧсьӧдчис кывзыны. Но детинка бара ышловзис да муніс гортас. Сідзи и сійӧ нинӧм эз висьтав, кӧть, тыдалӧ, сьӧлӧмсӧ кырліс ыджыд шог. Кор нин водіс аслас вольпасьӧ, Петрӧван дыр бергаліс бок вылас, зілис унмовсьыны. Но унмыс кытчӧкӧ воши. Сы син водзын пыр на сулаліс кельыд чужӧма Ӧлексей, кутшӧмкӧ надеяӧн видзӧдлывліс сы вылӧ, мыйкӧ, буракӧ, кӧсйис висьтавны. А мый? Код тӧдас...

Старик унмовсис сӧмын югдан дорыс нин, и то кутшӧмкӧ шуштӧм унмӧн.

3

Мед эськӧ не кольны тӧвнас варенньӧтӧг, Витяӧс бабыс садьмӧдіс шонді петан дорыс. Детинка сэк жӧ котӧртіс Серёжа ордӧ да садьмӧдіс сійӧс. Вӧлисти сэки кыкнанныс локтісны Петрӧван ордӧ.

Дед да внучкаыс вӧлі кок йылынӧсь нин. Найӧ вердісны кык другӧс юкваӧн, сёйисны тшӧтш и асьныс.

Кор шондіыс калькалыштіс вӧртас весьтысь, нёльнанныс мӧдӧдчисны Шерва дорса раскӧд Важ мельничалань, кӧні Ӧлексей пастук видзис куканьясӧс. Шерва весьтын ӧшаліс кыз еджыд ру, ыркнитлывліс берегланьыс кӧдзыдӧн. Быд турун за вылын дзирдалісны гырысь лысва войтъяс. Вӧрын быд куст сайын сьылісны лэбачьяс. Асылыс вӧлі гажа, мича, гора. Челядьлы вӧлі нимкодь, найӧ котӧртісны водзын, горзісны, ӧвтчисны туисъяснас. А найӧ куимнанныс босьтӧмаӧсь гырысь туисъяс, мед эськӧ став вотӧссӧ вотны, не кольны карса нывбабаяслы.

Важ мельнича дорын бузгис ва. Мельничаыс важӧн нин эз уджав, — вӧлі пӧлыньтчӧма. Плӧтинасӧ кутшӧмкӧ во тувсов ванас кырӧдліс, ӧні прудас ваыс вӧлі этша. Мельнича сайын, кыр йылас, лэб улын баксісны куканьяс. Ӧлексей, тыдалӧ, мунӧма больничаас, куканьяссӧ абу лэдзӧма йӧрсьыс.

— Но вот, — шуис дед. — Лэдзам найӧс йӧрсьыс, нуӧдам манастыр видз вылӧ. Сэні, нюр дорас, туруныс небыд. Сэні жӧ вӧрас и сэтӧр вотны позяс. Тыртанныд туисъяснытӧ. А ме Ӧлексей пыддис куканьяссӧ видзышта, детинкаыс висьмӧма. Колӧ отсыштны...

— Сійӧс дедыс бара тасмаӧн нӧйтіс, — шуис Витя.

— Тасмаӧн! Мыйла?

— Дедыс мыйкӧ тшӧктіс вӧчны, а сійӧ, буракӧ, ыръянитіс.

Ӧні Витя да Серёжа висьталісны ставсӧ, мый аддзылісны.

Старик кывзіс челядьӧс да сэтшӧма видіс Селькоӧс — мыйнас сӧмын сійӧс эз шуав.

— Сійӧс, лешакӧс, важӧн нин эськӧ казеннӧй керка виччысьӧ да. Кутшӧм вӧлі том дырйиыс, сэтшӧм и ӧні... Батьыс зверь кодь вӧлі, дзик сэтшӧм жӧ и пиыс...

— А коді батьыс вӧлі?

— Селькоыслӧн? Кӧин вӧлі... Тайӧ мельничаас уджавліс. Юис пемыд войтырыслысь вирсӧ. Ӧтлаын ноксис манакъяскӧд да попъяскӧд.

Петрӧван пӧль восьтіс йӧрсьыс завор, лэдзис куканьяссӧ. Дзизӧдісны-петісны ӧдйӧ, тыдалӧ, тшыгӧсь. Комынысь унджык кукань гӧнитісны манастыр видзлань, тэрмасисны йирсьыны. Медводзын чеччаліс-дзизӧдіс сьӧд сера ӧшпи.

— Збой бычӧыс, визув, — ошкис сійӧс дед.

— А Пыдӧстӧм нюрас найӧ оз пырны? — юаліс Витя.

— Оз. Сэті потшӧма...

Витялы зэв вӧлі окота тӧдны манакъяс йылысь и юаліс дедлысь:

— А мый тані манакъясыс вӧчисны?

— Йӧзсӧ ылӧдлісны, — шуис дед. — Манастырас найӧ вӧліны кыксёысь унджык морт, юрбитісны, корисны енлысь бур олӧм. А главнӧй манакыс, налӧн командирыс, вӧлі отеч Исидор, настӧящӧй святӧйӧн лыддьысис. Мый сійӧ тшӧктас вӧчны, манакъяс сійӧс и вӧчӧны. Тшӧктас лунтыр юрбитны, найӧ юрбитӧны, тшӧктас муяс вылын уджавны — уджалӧны. Ставыс тані — и вӧрыс, и муясыс, и юыс — вӧлі сылӧн. Медозыр мортӧн тані вӧлі... Да сэтшӧм скӧр — дзик вӧрса... Манакъясӧс, кодъяс эз кывзысьлыны, отеч Исидор ёна и нӧйтліс, тшыгйӧн видзліс да вичкоын пидзӧсъяс вылас сулӧдіс.

А манастырас вичкоыс вӧлі ыджыд, зарни купола. Вӧвлі, кыдзи тай заводитасны бовгыны, звӧн шыыс гыясӧн ветлӧдлӧ, перкоягсаяслысь пельяссӧ чунӧдӧ. А йӧзыс татчӧ быдласянь волывлісны. Коді грекъяс вӧтлыны, коді висьӧ — бурдӧдчыны, енмыслысь здоровье корны. И быдӧн сьӧрсьыс деньга вайӧ, нянь, яй, кольк, чери. А отеч Исидорлы сійӧ и колӧ. Висьталӧны вӧлі, мый зарниыс пӧ сылӧн быдса ящик вӧлӧма.

— Ад горш! — шензис Маша. — Мыйла нӧ сылы сы мында зарниыс?

— Пон тӧдӧ, — вочавидзис дедыс. — Сёрнитлісны тай войдӧр: кодлӧн пӧ унджык деньга, сылы ещӧ на унджык колӧ. Сідзи и отеч Исидорыс. Воысь-во пыр озырмис, кызіс черань моз, пыкис манастырсӧ: кирпич вичко стрӧитӧдіс, выль муяс весӧдіс, уна-уна скӧт видзис. Манакъяс да ми вок кодь гӧль йӧзыс уджалісны сылы нянь кусӧк вӧсна. И Сельколӧн батьыс, Гаврил, уджаліс отеч Исидорлы, мельникӧн вӧлі. Кӧть ачыс и эз вӧв манакӧн, а асьсӧ святӧйӧн жӧ лыддис, мыйысь и озырмис ӧдйӧ. И кыдз он озырмы? Локтас мужикыс мельничаад няньтор изыштны, а сійӧ, чераньыд, изӧмсьыс джынсӧ мырддьӧ да ещӧ и деньга корӧ...

А кор нин озырмис, заводитіс гӧль йӧзлысь муяссӧ мырддявны. Кодлӧн бурджык муыс, сылысь и мырддьӧ, аслыс уджӧдӧ. Озыр кулакӧн лоис... А кулак да поп век ӧтитор сьывлісны. Воча налы эн шыась — ульӧн йирасны.

Селькоыссӧ мунӧма бать кок туйӧдыс. Сійӧ ӧд томнас манакъяскӧд дружитіс, манастырас и узьліс корсюрӧ. Сэки вӧлі и кутшӧмкӧ код манак курччӧма сылысь пельсӧ... Ок-ок, мыйыс эз вӧвлы.

— А кытчӧ нӧ манакъясыс воштысисны? — юасисны челядь.

— Хо, вот сійӧ и эм! — гажаа шуис дед. — Нырыштім налысь позсӧ, сы мында и вӧлі. Войтырыс терпитіс-терпитіс, терпениеыс бырис, да вӧчис революция, Кывлінныд та йылысь? Вот и бур, кывлінныд кӧ. Ленин шуис: вӧтлӧй понъяссӧ да озыр йӧзсӧ, вӧчӧй аслыныд шуда олӧм, лоӧй асьныд кӧзяеваӧн. Ми сідзи и вӧчим. Первой царӧс вӧтлім, а сэсся озыръясӧс. И манакъяслы олӧмыс эз ло...

4

Важ мельнича сайын, Пыдӧстӧм нюр дорын, пласьтвидзис ыджыд рас. Сӧмын пытшкас кӧнсюрӧ вӧліны неыджыд кушинъяс: тайӧ манакъяс войдӧр весавлӧмаӧсь вӧрсӧ, кӧдзлӧмаӧсь сэтчӧ анькытш да зӧр.

Бӧрынджык сійӧ муяссӧ гӧрліс Перкоягса колхоз. А ӧні, кор колхозыс ӧтлаасис мӧд колхозкӧд, ставсӧ пондісны гӧрны сӧмын тракторъясӧн, вӧрса мусӧ эновтісны: мыйла пырны ки пыдӧс пасьта му вылӧ тракторӧн, кор некӧн весиг бергӧдчыны тракторыслы. Но мусӧ эз видзны весь сідзи. Колхоз сэтчӧ лӧсьӧдіс пӧскӧтина: лӧсьӧдісны лэбув, лэптісны пывсян кодь керка. Куканьяс гожӧмбыд тані и овлісны. Туруныс тані быдмӧ небыдик да чӧскыд, буретш куканьяслы и эм.

Петрӧван дед нуӧдіс челядьӧс сэтӧраинӧ, ачыс пуксис керка дорас да заводитіс вӧчны выль туис. Ӧти синнас туис вылас видзӧдӧ, мӧднас — куканьяс вылӧ.

А челядь горзісны вӧрас, сералісны. Гӧрд сэтӧрыс вӧлі сы мында, мый кӧть содзнад вот. Тӧндзия пӧчьясыд татчӧ абу на веськавлӧмаӧсь. Некод на тані абу вотчылӧма. Кустъясыс вӧрзьӧдлытӧмӧсь. Витя регыдӧн тыртіс ассьыс ыджыд туиссӧ да ӧні сэтӧрсӧ чӧвталіс вомас. Серёжалӧн туисыс тыри жӧ — сійӧ вӧлі дӧвӧль: талун, кӧнкӧ, мамыс оз нин кут видны. Варенньӧтӧ сійӧ радейтӧ жӧ. А Маша век на вотчис. Туисыс сылӧн ещӧ на ыджыд, гашкӧ, быдса ведра тӧрас.

— Кыдзи нӧ тэ сы ыдждасӧ гортад нуан?

— Ме ӧд ён, — вочавидзис Маша. — Ме татшӧмтӧ кык туис на верма кыскыны.

Витя да Серёжа сӧмын ӧвтыштісны кинас. Эн кӧвъясь сы дінӧ, не татшӧмтор на сысянь кылан. Вот эськӧ сійӧс кольны татчӧ ӧтнассӧ, небось регыд льӧбсӧ нюжӧдас. Мый кӧть эн шу, а вӧр — вӧр и эм. Пуясыс джуджыдӧсь, дзорӧсь. Гашкӧ, татшӧм пуяс костӧдыс и ош ветлӧдлӧ. Ӧткӧннад полан пырны вӧрас. Изыскательяс, буракӧ, сы ради и босьтісны Пельтӧм Селькоӧс: полӧны жӧ... Интереснӧ, кӧнӧсь ӧні найӧ, мый керӧны? Пӧди, нюрсӧ вуджисны нин, ветлӧдлӧны ягті, видзӧдӧны вӧрсӧ. Сӧмын жаль, мый эз босьтны детинкаясӧс сьӧрсьыс.

Маша тэрыба вотчис, зілис тыртны туиссӧ. Сэки Серёжа и Витя лэччылісны нюр дорас, корсисны ключ, мед эськӧ юыштны кӧдзыд ключ васӧ. Корсисны дыр, видзӧдлісны не ӧти бадь куст улӧ, а ваыс некӧн эз вӧв: весиг гӧпъяс косьмӧмаӧсь. Жар таво гожӧмыс, тӧлысь чӧж нин ӧти зэр тусь эз усьлы... Сӧмын Пыдӧстӧм нюрын оз косьмыв ваыс. И друг Витя зургис чуньнас аслыс плешкас.

— Серёжа, а кутшӧм палестина йылысь Селькоыс тӧндзи висьталіс пӧчыслы? — юаліс сійӧ. — Эз-ӧ тайӧ нюр йывсьыс?

— Збыль ӧд! Да, тайӧ нюр йылысь... Дзикӧдз, шуӧ, косьмыны пондіс...

Кык друг дыр видзӧдісны нюрас, мыйкӧ думайтісны.

— Ветлыны эськӧ сэтчӧ, — шуис Серёжа. — Изыскательяс, пӧди, сэнӧсь...

— Вӧям. Кывлін, мый Селькоыс шуліс? «Ӧшиньяс» пӧ эмӧсь...

— Найӧс позяс кытшовтны. А зыбун местаяссӧ ми лыжи вылын вуджам. Миян гортын эмӧсь паськыд лямпаяс, кысаӧсь. Сэтшӧм паськыдӧсь, кӧть ю вылын ислав — он вӧй... Дедӧ на коркӧ вӧчлӧма.

Лямпаяс! Вот тайӧ да! Да ӧд сійӧ, Витя, кытыськӧ лыддьыліс, кыдзи детинкаяс зыбунсӧ вуджлӧмаӧсь лямпаясӧн. И мыйла сылы тайӧ водзджык юрас эз во? Эк, йӧй... Бара Серёжа первойӧн думыштіс. Ӧні бара нырсӧ кымӧрӧдзыс нюжӧдас...

Но Серёжа юрын чужис нин мӧд мӧвп, и нырсӧ эз нюжӧд.

— Тӧдан мый? Вай пыралам нюрас... Видлам зыбунсӧ — лыбӧдас оз?

Витя, дерт жӧ, сӧгласитчис. Кык друг чеччыштісны ӧти вутш вывсянь мӧд вылӧ. Сэсся сувтісны виж нитшкӧн тупкысьӧм эжа вылӧ. Нинӧм страшнӧйыс абу. Лэптӧ. Сӧмын люллясьӧ неуна, но да мед — муыс крепыд, лыбӧдас. Детинкаяс бара неуна муныштісны водзлань, сувтісны, кывзысисны. И кыдзкӧ друг казявтӧг веськалісны эжӧр пиӧ. Кокъяс уланыс булькакыліс ва. И Витя гораа чилӧстіс, кутіс петитчыны бӧрлань.

— Мый лои? — повзис тшӧтш Сергей.

— Котӧрт бӧр! Со эстӧн куст улас, ваас — змей, — горӧдіс Витя да уськӧдчис котӧртны. Серёжа кашкигтыр чеччаліс сы бӧрся...

— Матыстчи бадь куст дорас, а сійӧ тай кыдз нюжӧдас голясӧ, — Машалы висьтасис Витя.

— Он пӧръясь?

— Ещӧ мый?! Кыдз тай чушиктас! Шш-ш-ш... Но, думайта, ӧні жӧ чушкас менӧ... Вот пежыд... Баб, тыдалӧ, абу прӧста шулӧма — нюрас пӧ змейяс эмӧсь.

— И ме кывлі, эмӧсь пӧ, — шыасис Серёжа.

Машалӧн туисыс вӧлі тырӧма нин, и челядь котӧртісны Петрӧван дінӧ. Пӧрысь дед кывзіс Витялысь висьтсӧ да мудера, синсӧ читкыраліг, нюмъяліс.

— Первойысь кыла, мый тайӧ нюрын змейяс олӧны, — шуис дед.

— Тэ нӧ, дед, он верит али мый? Ме жӧ сійӧс аслам синъясӧн аддзылі, — дорйысис Витя.

— Тані, другӧ, змейясыс абуӧсь, — зэв збыльысь шуис дед. — Видзӧдтӧ, тэнӧ повзьӧдіс...

— Коді?..

— А вот час видзӧдлам...

Ставныс мӧдӧдчисны Витя бӧрся, зілисны не шумитны. Витя мышкыртчис, чужӧмыс гӧрдӧдыштіс. А мый, бара кӧ нинӧмсьыс повзис? Бара кутасны серавны сы вылын, бара кутасны тешитчыны сы вылын?..

Бадь куст дорӧ локтісны надзӧник, сайласьӧмӧн. Петрӧван кинас ӧлӧдіс челядьӧс: эн пӧ шумитӧ, эн чушкӧ нырнаныд. Сэки Витялы, быттьӧ нарошнӧ, окота лои несйыны да нырсӧ тупкис ки пыдӧснас. И кыдз эз кутчысь, век жӧ... несйис! Апчхи! И куст улас кодкӧ чушнитіс. Сэки Петрӧван неуна бӧрыньтчыштіс.

— Сідз и эм, — нюмъёвтіс дед. — Вӧр утка тані пӧжсьӧма. Пияныс ичӧтӧсь на, оз на лэбавны. Со и мамыс повзьӧдлӧ ті коддьӧмсӧ. Локтӧ мунам татысь, эн повзьӧдӧй. Кӧнкӧ, буракӧ, матын гы эм. Водзӧ энӧ мунӧ, вӧянныд...

Яндзимысла Витя эз тӧд, кытчӧ воштысьны. Сійӧ некымынысь гусьӧн видзӧдліс Маша вылӧ, поліс паныдасьны синъяснас Серёжакӧд. Серёжалы, буракӧ, и аслыс вӧлі неуна яндзим. Сійӧ эз серав, эз нюмъяв, весиг Витялы гӧрбас эз мыськышт.

— Дед, сідзкӧ, збыльысь тані абу змейыс? — сӧмын юаліс сійӧ.

— Некор эг аддзыв. Миянладорын найӧ некор эз вӧвлыны...

Маша нюмыртіс вомсӧ, тупкис ки пыдӧснас да прысьнитіс-серӧктіс:

— Геройяс! Но и геройяс! Кодысь нӧ повзинныд?

— А тэ эськӧ эн повзьы? — скӧрысь юаліс Серёжа.

— Аддзӧма, кодысь повзьыны!..

— Вай висьтав веськыда: эн эськӧ повзьы?

Маша нинӧм эз шу, сӧмын дугдіс серавнысӧ. Сійӧ таво первойысь воліс вотчыны, вотіс ыджыд туис тыр сэтӧр, утка аддзыліс — мый ещӧ колӧ? Бурджык не кӧвъясьны детинкаяс дорас.

И мед эськӧ сёрнисӧ вуджӧдны мӧдтор вылӧ, сійӧ юаліс дедыслысь:

— А Пельтӧм Селькоыс, дедӧ, кулак жӧ вӧлі?

— Озыра овліс коркӧ... Но шензянаыс вӧлі сійӧ, мый первойӧн пырис колхозӧ. Батьыслы паныд сувтіс. Колхозӧ нёль вӧв вайис, куим мӧс. Батьыс нӧйтӧма беддьӧн, ёрӧма, ачыс кытчӧкӧ муніс манакъяскӧд. Колхозсӧ синнас эз вермы аддзыны. А манакъяс, кор кывласны, мый тані лоас колхоз, асьныс разӧдчасны; быдӧн тай кытчӧкӧ воши-а. А манастырыс сотчис. Кывсьыліс, бандитъяс пӧ ӧзтӧмаӧсь, а, пӧди, асьныс, манакъяс, ӧзтісны. Коді тӧдас. Важӧн нин тайӧ вӧлі. Не ӧти дас во нин колис. Манастыр местаас петшӧр быдмӧ, сэсся нинӧм абу...

— А зарнисӧ нӧ кытчӧ главнӧй манакыс воштіс? — юаліс Серёжа.

— Код тӧдас... Гашкӧ, дзебисны кытчӧкӧ. Аддзанныд, гӧгӧр вӧр. Видлы, корсь. Манастырсӧ бандитъясыс сы вӧсна и сотӧмаӧсь, мый зарнисӧ абу аддзӧмаӧсь... И асьсӧ Исидорсӧ важӧн нин некод абу аддзывлӧма. Пӧрысь вӧлі. Куліс, пӧди, кытӧнкӧ.

Петрӧван малыштіс кизьӧриник тошсӧ, сэсся ӧвтыштіс кинас:

— Но, тырмас на йылысь... Мунам да вай пажнайтам, бурджык лоас...

5

Кор бӧр локтісны куканьяс дорӧ, Петрӧван пыр жӧ казяліс, мый чукӧрас эз вӧв сьӧд сера ӧшпиыс. Уськӧдчис ӧтилаӧ — абу, муніс мӧдлаӧ — абу. Сэсся тапиктіс нюр дорӧ да падмис: куканьыс петӧма йӧрсьыс, чеччыштӧма потшӧс вомӧныс.

— Вот мутиыд, — скӧрмис дед, нюрас, буракӧ, пырӧма... Вӧяс ещӧ...

Дед тэрыба вуджис йӧр саяс, корис ас дорас Витяӧс да Серёжаӧс.

— Босьтӧй кузьджык бедьяс да пановтӧй сійӧс. Тэ, Витюк, веськыдвылӧ котӧрт, а ми Серёжакӧд шуйгаладорӧдыс пановтам, — тшӧктіс дед. — Сӧмын видзчысьӧмӧн, энӧ вӧйӧ нюрас.

Ачыс мӧдіс варгыльтны-котӧртны кустъяс костӧд, чеччаліс вутшъяс вывті. Сыысь неуна бокытіджык котӧртіс Витя. Киас сылӧн вӧлі кузь бедь, кодӧс кыскис потшӧс костсьыс. Бедьнас корсюрӧ сутшкыліс муас — видлаліс, чорыд-ӧ. Эжаыс быдлаын вӧлі зумыд, беддьыс некытчӧ эз вӧйлы. Сэк жӧ сійӧ думыштіс: «Калляныс кӧ волшебнӧй, то ог вӧй!»

Найӧ аддзисны куканьсӧ. Кор сійӧ казяліс, мый сійӧс кӧсйӧны пановтны, уськӧдчис водзлань. Дед ёна повзис: вермас веськавны зыбунӧ, и сэк жӧ пом — вӧяс нюр пыдӧсас. Но Витя да Серёжа вӧлӧмаӧсь чожджыкӧсь куканьсьыс. Найӧ тэрыба ордйисны сійӧс, да, бедьнас ӧвтчигтыр, паныдалісны да бӧр вӧтлісны манастыр яглань. И, колӧ шуны, кык друг тшӧтшмоз казялісны ӧтитор: нюрыс найӧс кутӧ, терпитӧ. Не сӧмын найӧс, но и куканьӧс. Тайӧ и колӧ налы. Сідзкӧ, нюрӧд позьӧ ветлӧдлыны. Пельтӧм Селько, дерт, палестинанас шуис тайӧ нюрсӧ. Мыйла сійӧ поліс, мый косьмас нюрыс?

Кустъяс сайысь неылысь найӧ аддзисны ичӧтик ты. Сійӧ тыдаліс дзик матын, пӧшти сэні жӧ, кӧні пӧжсис уткаыс. Буракӧ, уткаыс сійӧ тыас и уялӧ. Кутшӧм сійӧ ты? Гашкӧ, чериыс сэні пуӧмӧн-пуӧ, а найӧ нинӧм оз тӧдны. Мый кӧть эн шу, а нюрыс интереснӧй. А, гашкӧ, волшебнӧй жӧ? Колӧ сійӧс бурджыка видлавны, пока оз зэр, ветлӧдлыштны сэті.

— Аддзылін, позьӧ, — шуис Витя, кор найӧ куканьсӧ бӧр вайӧдісны йӧрас. — Лэптӧ нюрыс!

— И ты эм! Сэні, пӧди, чериыс мыйта? Гашкӧ, Селькоыс черисӧ сэтысь оз кӧсйы петкӧдлыны некодлы да? Тайӧ тысӧ кӧ ми восьтам, то Катя Петровалӧн овсис, — радліс Серёжа.

Петрӧван дед эз нин вӧв на дінын. Сійӧ кераліс потшъяс, медым содтыны потшӧслысь судтасӧ. Маша пукаліс керка дорын да нимкодясис выль туиснас. Мича туисыс, лӧсьыд. Вот эськӧ тшӧтш сэтчӧ сэтӧрсӧ вотны. Рытнас эськӧ мамыс локтас гортас да кутшӧма ошкас сійӧс. Да и варенньӧыс мый дыра тырмас. Но ягас мунны сійӧ ӧтнасӧн поліс. Мед эськӧ тшӧтш корны детинкаясӧс, Маша думыштіс найӧс неуна ошкыштны.

— А ті збыльысь смелӧсь вӧлӧмныд, — шуис сійӧ. — Пыдӧстӧм нюрӧ лысьтінныд пырны.

— Не тайӧс на аддзылан, — шуис Витя.

— Абу лӧсьыд туиссӧ тырттӧг гортӧ нуны, — эз лэдзчысь Маша. — Локтӧ, мунам вотыштам ещӧ неуна ягӧдсӧ.

— Тэныд кӧ колӧ, тэ и вот. Зэв нин тай горшасян, верман кулакӧ пӧрны.

Маша скӧрмис, юмыртіс вом дорсӧ:

— А коді сійӧ кулакыс? Тэ тӧдан? — уськӧдчис Витя вылӧ.

— Тӧда, дерт. Сійӧ сэтшӧм морт, коді йӧз киӧн нажӧвитчӧ. Тайӧ сэтшӧм морт, коді ачыс оз уджав, а мукӧдъяслы тшӧктӧ.

Витя тшӧкмуніс. Сыкӧд орччӧн ӧд пукаліс Серёжа. Вермас сійӧ бара лӧгасьны, либӧ гӧрбад зымгыны. А ӧні, кор найӧ тӧдмалісны, мый Пыдӧстӧм нюрын некутшӧм змей оз ов, мый нюрыс лыбӧдӧ не сӧмын мортӧс, но и куканьясӧс, лӧгасьны некыдз оз позь.

И найӧ эз лӧгасьны. Гортаныс мунігӧн кык друг сёрнитчисны аски жӧ мунны нюрас, корсьны изыскательясӧс да ветлӧдлыштны накӧд ӧтлаын.

— Кор челядь локтасны карысь, ёна шензясны, — шуис Серёжа.

— Сэки видзӧдлам, кутшӧм карикатура рисуйтас Петя Пунегов. О-о!!!

ПЫДӦСТӦМ НЮРӦД

1

Кор каян Гӧрба керӧс вылӧ да видзӧдлан ӧтарӧ-мӧдарӧ, то первойсӧ нинӧм быттьӧ он и казяв — сӧмын гӧгӧр помтӧм вӧр да вӧр. Видзӧдлан шуйгавыв, кыті визувтӧ Шерва, — сулалӧны ёсь йывъяса коз пуяс — козъя вӧр. Видзӧдлан веськыдвылӧ — сэтшӧм жӧ козъя вӧр, а видзӧдлан войвывлань — сэні помтӧм парма, веж море.

Парма. Быдлаын вӧр.

Сӧмын сикт дорын эмӧсь неыджыд му эрдъяс. Вӧрас жӧ шочиника тӧдчӧны кушинъясыс. Тайӧ тыяс да нюръяс, кӧні оз быдмы вӧрыс. Кор сюсьджыка видзӧдлан, то неылысь аддзан Пыдӧстӧм нюр. Чукыля визьӧн сійӧ кыссьӧ кытчӧкӧ водзӧ, Кайскӧй вӧлӧклань. Перкоягын олысьяс, шуӧны, ньӧтчыд абу пыравлӧмаӧсь тайӧ нюрас, абу вуджлӧмаӧсь сійӧс. Оз пӧ позь. Коркӧ, зэв нин важӧн, манакъяс висьтавлӧмаӧсь, быттьӧкӧ войяснас нюрсьыс пӧ тыдалӧ кутшӧмкӧ би, а мукӧд дырйи равзӧ пӧ мутиыс, дугдывтӧг мыйкӧ булькакылӧ. Коркӧ ӧти манак мунӧма корсьны лекарственнӧй турун, а бӧрсӧ абу локтӧма. Война воясӧ том кыйсьысь Ӧжын Митрей мунас йӧра вины, бӧрсӧ оз жӧ лок.

Воысь-во, поколениеысь поколениеӧ вуджліс легенда: коді вуджас нюрсӧ, сійӧс мутиыс джагӧдас либӧ змей ньылыштас. Сэтшӧм нин тайӧ проклятӧй местаыс — Пыдӧстӧм нюр. Перкоягсаяс пыр ӧлӧдлісны ассьыныс челядьсӧ: энӧ мунӧй нюрас. Мый сэні корсьны? Шома турун колӧ — видзьясыс орччӧнӧсь. Вотӧс колӧ — пет пывсянъяс сайӧ, вотӧсыс и сэні эм. А Пыдӧстӧм нюр сайын вӧчны нинӧм.

И челядь эз ветлывлыны.

Витя да Серёжа эськӧ эз жӧ мунны, эз кӧ сиктас вӧв гажтӧм, эз кӧ мунны нюр саяс изыскательяс. А лысьтісны ӧмӧй эськӧ пырны нюрас, найӧ кӧ эз тӧдны, мый змейяс сэні абуӧсь, и некор абу вӧлӧмаӧсь? О-о, некор эськӧ эз пырны. Дерт, нюрас эмӧсь нюйт гӧпъяс, восьсаинъяс, но ӧд найӧс позяс и кытшовтны: найӧ абу слепӧкуръяс, казяласны зыбунсӧ. Да и найӧ сьӧрсьыс босьтасны паськыд лямпаяс. Серёжа гусьӧн лэдзис найӧс сарайысь, слегаяс костысь; лямпаясыс вӧліны паськыдӧсь. Найӧс дедыс вӧчлӧма коркӧ, тыдалӧ, пипуысь: кокниӧсь, кӧть и кышӧма йӧра куӧн. Сэтшӧм жӧ лямпаыс и Витялӧн. И сылӧн дедыс вӧлӧма кыйсьысь, тӧвъяснас сідз жӧ вӧр-васӧ ӧтарӧ-мӧдарӧ гежмавлӧма. Не ӧтчыд, пӧди, Пыдӧстӧм нюр саяс пыравліс. «Интереснӧ, вӧлі сылӧн талисманыс али эз?».

Важ мельнича дорӧдз артавсис верст куим кымын. Абу ылын. А детинкаяс мунісны сэтчӧдз часысь дырджык. Мунны ковмис кималасӧн. Вӧрас ӧшаліс сэтшӧм сук ру, мый нюжӧдан кӧ китӧ — и чуньтӧ он аддзы. А мӧдӧдчисны асывнас водз. Вӧрын вӧлі чӧв-лӧнь. Тайӧ чӧв-лӧньсӧ корсюрӧ торклісны лысва войтъяс. Пуяс вылысь гырысь войтъяс корсюрӧ шнёпкысьлісны кольӧм вося кос коръяс вылӧ, кышӧдчисны кос турун пиын, дӧрӧм юрйыв костӧд веськавлісны сьыліӧ да быттьӧкӧ куш яйсӧ бытшйӧдлісны емӧн.

— Луныс талун бара жар лоас, — шуис Серёжа. Кор асывнас руыс дыр оз разав, сэки луныс век жар овлӧ.

— А ӧні кӧдзыд. Бр-р-р!..

Посньыдик ва бус, черань вез моз, лясіс чужӧм бердӧ. Серёжа восьлаліс водзын, частӧ сувтлывліс, медым вежӧртны, правильнӧ-ӧ мунӧны. Тані туй вожыс уна, он и тӧдлы кежсяс бокӧ.

— Водз петсьӧма... Колӧма нӧрӧвитыштны, — шыасис Витя.

— Тэ эськӧ мед узьыштін-стынитін, водз кӧ, — вочавидзис Серёжа.

Челядьлӧн кепкаясыс да пинжакъясыс дзикӧдз кӧтасисны.

Важ мельнича дорын детинкаяс дзебисны лямпаяснысӧ понӧльяс улӧ, а асьныс мунісны кук йӧрӧ. Петрӧван дед эз узь. Сійӧ лэдзалӧма куканьяссӧ йирсьыны, а ачыс ӧні бипур вылын мыйкӧ пуис.

— Ті нӧ кытчӧ та водзаыс? — детинкаясӧс казялӧм бӧрын юаліс сійӧ.

— Чери кыйны мӧдӧдчим, — вочавидзис Серёжа.

Петрӧван дед малыштіс тошсӧ, и челядь гӧгӧрвоисны, мый сійӧ налӧн водз локтӧмысь эз дӧзмы. Кор дед мыйӧнкӧ дӧвӧльнӧй, век тошсӧ малалӧ.

— Ӧлексейсӧ, буракӧ, водтӧдісны больничаас. Эз на волы детинкаыс, — шуис сійӧ. — Загреки дыр кӧ кутас куйлыны, ковмас меным видзны куканьяссӧ.

— Ми тэныд кутам отсасьны, дедӧ, — тэрыба шуис Серёжа. — Мыйла нӧ прӧста овны. Тэ сӧмын мамӧлы висьтав, мед менӧ картупель мудйыны оз тшӧкты.

Дед кӧсйысис висьтавны Серёжа мамлы, мый картупель мудйыны пиыслы ӧні лоӧ некор, и Серёжалы лои нимкодь.

2

Руыс разаліс. Кӧнкӧ матын, Пыдӧстӧм нюр саяс, горӧн кривзісны турияс. Нюрас шыасьлісны кутшӧмкӧ лэбачьяс, чивӧстлывліс тупъюр варыш. Мыйӧн сӧмын разаліс руыс, нюрсьыс ватагаӧн петісны номъяс. Кымӧр пласт моз найӧ кытшлалісны чукӧрӧн, тіньгисны пель водзын, сатшкысьлісны чужӧмӧ, сьыліӧ, киясӧ, курччасисны тшыг понъяс моз, и ковмис дугдывтӧг ӧвтчыны небыдик кыдз пу увъясӧн, вӧтлавны найӧс.

Кӧнкӧ ылын, сиктладорын, мургис трактор. А тані, чом дорын, кос турун заяс вывті чеччалісны чиркъяс, жбыръялісны-лэбалісны юрсигусьяс.

Заводитчис гожся лун, мича да гажа. Татшӧм лунӧ сьӧлӧм вылын пыр овлӧ кыпыд, мед сӧмын номъяс эз торкны.

Кор Петрӧван дед муніс куканьяс дінӧ, Витя да Серёжа недыр пукыштісны, сэсся друг ӧтпырйӧ кыкнанныс видзӧдлісны нюрлань. Сэні, кыдзи век, стенаӧн сулаліс пемыд вӧр. Вӧр весьтын сынӧдыс вераліс, быттьӧкӧ сэні гӧвкъяліс кокньыдик кельыдлӧз тшын. Сэтчӧдз абу ылын, а муннысӧ полан.

Серёжа сувтіс, чорыда шуис:

— Шуим кӧ мунны, то колӧ мунны!

— Дерт жӧ, колӧ мунны, — вочавидзис Витя.

Понӧльяс улысь найӧ босьтісны лямпаяснысӧ, лэччисны нюр дорас. Сэні найӧ корсисны кузь бедьяс.

— Мунам веськыда, — шуис Серёжа. — Первой мунам со эсійӧ ыджыд бадь пу дорӧдзыс. Сэсся бӧръям мӧд сэтшӧм пу да бара веськыда мунам.

Витя сӧмын довкнитіс юрнас. «Дерт, колӧ мунны веськыда. Пондан кӧ кытшлавны, ягӧдзыс он и волы. А сідз — сэтчӧдз час, да бӧр локны час, да ещӧ сэні ягас коллям ӧти час. Петрӧван дед оз удит синсӧ лапнитны, кыдзи ми бӧр воам»...

Детинкаяс тэрыба пырисны бадь кустъяс пиӧ. Лысваыс тані абу на косьмӧма. Лысваыс сідзи и койис, а турун вылас колины кок туйясыс. Первойя воськов лои вӧчӧма!

Водзын, кыдзи и колӧ збой командирлы, муніс Серёжа. Сійӧ быд воськов бӧрын бедьнас сутшйӧдліс муас, быд воськов бӧрын сувтлывліс да педзласис кокнас. Витя эз тэрмӧдлы другсӧ, тӧдіс, мый видласьтӧг мунны оз позь: верман пыр жӧ веськавны зыбунӧ, вӧйны юрнад и кокнад.

Мыйтакӧ муныштӧм бӧрын заводитчисны паныдасьны вутшъяс. Найӧ сулалісны орччӧн, чукӧрӧн, быттьӧкӧ мыръяс. Быттьӧкӧ тані неважӧн вӧлӧмаӧсь вӧр лэдзысьяс, пуяссӧ ставсӧ пӧрӧдӧмаӧсь да кыскӧмаӧсь, а мыръясыс кольӧмаӧсь. Ӧні найӧ тырӧмаӧсь небыдик виж нитшкӧн, и кор тальччан татшӧм мыр вылас, сійӧ люллясьӧ-пӧлнясьӧ, сійӧ и видзӧд, мед эськӧ не путкыльтчыны увлань юрӧн.

Вутшъяс костын сулаліс сьӧд ва, а мукӧдлаас вӧлі дзик кос. Косджыкинас и мунісны кык друг. Кыкнанныс пӧсялісны. Ӧд найӧ чеччалісны вутш вывсянь вутш вылӧ, киняуланыс вӧліны лямпаяс, мышкас — пестеръяс, а пестеръясас — нянь, колькъяс, сов, лук. Код тӧдӧ, мый ещӧ вӧлі налӧн пестеръясас.

Витя маитчис, мыйлакӧ зэв ёна пессис сьӧлӧмыс.

Тӧрыт рытнас, кор лӧсьӧдчисны мунны, быттьӧкӧ ставыс вӧлі бур.

И сьӧлӧмыс радліс, и юрас мӧвпъясыс жуисны, а талун мый лоис? Вильдас кокыс вутш костӧ, а сьӧлӧмыс коклябӧрӧдзыс лэччылӧ.

И мыйла сэтшӧма пӧсялӧ? Оз на помав чышкыштны кымӧссӧ, а сійӧ бара нин ва. «Пӧсяла, буракӧ, сы вӧсна, мый пола, — думыштіс детинка. — Оз эськӧ ков повны»...

А номъясыс! Витя аслас нэмын некор на сы мында номсӧ эз аддзыв. Чукӧрӧн-чукӧрӧн найӧ лэбалісны, пырисны синмад, пеляд, нырад, курччасисны, курччасисны... Детинкаяс дугдывтӧг ӧвтчисны кияснас, кучкалісны аслыныс то кымӧсас, то чужӧмас. Налы кажитчис, мый виисны нин миллион кымын ном, а найӧ ньӧти эз чинны, а мӧдарӧ, кажитчис, ещӧ на содісны.

— Ой, Витя, найӧ миянӧс ульӧн сёясны, — шыасис Серёжа. — И мыйла найӧ сэтшӧм скӧрӧсь?

— Тшыгӧсь. Тайӧ нюрӧдыс некод оз ветлӧдлы, налы некодӧс сёйнысӧ. Вильӧдасны миянӧс неуна и пӧтасны. Да и со кушин тыдалӧ. А бабӧ шуӧ, мый кытчӧ пӧ шонді югӧр веськалӧ, сэні номъясыс абуӧсь, полӧны пӧ, мед госыс оз сыв, — тэрыба сёрнитіс Витя. Кор сёрнитан, то омӧльджыка полан.

Кыдзи и сёрнитчисны, детинкаяс мунісны веськыда. Найӧ тэрмасьӧмӧн петісны сійӧ ыджыд бадь пу дорас, неуна шойччыштісны, сэсся корсисны выль пас-ориентир — пӧлыньтчӧм коз пу да мӧдӧдчисны водзлань. И сэки тай кодкӧ друг кыдз гетшнитас! Серёжа муртса гатш эз усь, а Витяӧс пыр жӧ несйӧдіс... Недыр мысти кыкнанныс гораа ваксисны-сералісны. Найӧс, вӧлӧмкӧ, повзьӧдӧма лягуша.

3

Детинкаяс тэрыба петісны бадь кустъяс сайысь и шуйгавылысь казялісны сійӧ тысӧ, кодӧс аддзылісны тӧндзи. Сійӧ эз вӧв сэтшӧм паськыд, дзирдаліс сьӧд рӧмӧн. А кор челядь матыстчисны сылань, ныраныс чамгис лёк дук, а кок улас булякывны кутіс ва. Зыбун. Матыстчыны ты дорас — нинӧм и думайтны, он и тӧдлы, горшӧдзыд вӧян, а то и юрнад пырны верман. И кутчысьны некытчӧ. Сэні эз вӧв ни ӧти куст, ни турун за, а вежӧдіс небыдик нитш.

— Сісь тані местаыс, — бедьнас муас сутшкалігтыр шуис Серёжа.

— Не сӧмын муыс, но и ваыс сісь, — содтіс Витя. — Кылан, кутшӧм дукыс?..

— Тайӧ газ...

Кык друг казялісны, мый сэні, кӧні вӧліны бадь кустъяс да быдмис эжӧр, муыс вӧлі чорыдджык, да и сэні нитшкыс дзик мӧд: чорыд да кузь, быттьӧ сімӧм сутуга. Ӧні найӧ кутісны корсьны буретш татшӧм местаяссӧ, кӧть и мунігас ёнасӧ эз чукльӧдлыны.

Мунісны ещӧ мыйкӧ мында, а асьныс пошкисны мудзӧм вӧвъяс моз. Бергалісны ӧтарӧ-мӧдарӧ, но видзӧднысӧ вӧлі нинӧм, гӧгӧр вутшъяс да нитш, чорыд да дженьыдик эжӧр да ляпкыдик бадь пуяс. А водзын, неылын, тыдаліс яг. Дзик нин матын, но он ӧд котӧрт.

— Мунам веськыда! Мый лоан — ло!

— Мунам!

Муныштісны водзӧ, бара кокъяснаныс люлльӧдчисны, сутшйӧдлісны нюрас кузь бедьнас. Вутшъясыс кутісны быравны. Паныдасьлӧны сӧмын ӧтка-ӧткаяс, да и то вӧліны ляпкыдикӧсь. А сэсся дзикӧдз вошины, эз лоны. Детинкаяс кок улын легис-вӧрис зыбун, болскис ва. Водзын шыльыд кушин. Буракӧ, Селькоыс тайӧс и шуис палестинанас.

Серёжа зургис бедьсӧ, а сійӧ пурс! — пырис метрысь пыдӧджык. Тальччис нитш вылас, а сійӧ вӧйис, былькнитіс сім ва.

— Лямпаась, — тшӧктіс Серёжа.

Витя лямпаасис, бура кӧрталіс кок бердас кӧвъясӧн. Дзик тӧлын моз, кӧть ӧні чой йылӧ кай. Серёжа сувтіс лямпа вылас жӧ, пувки-павки вӧчис кымынкӧ воськов, сэсся лэптіс лямпаа кок пӧвсӧ да кыдз зымнитас зыбучас! — сӧмын ваыс резӧбтіс ӧтарӧ-мӧдарӧ.

— Терпитӧ! Лэптӧ! — нимкодя шуис сійӧ.

— Вот и бур! — горӧдіс тшӧтш Витя.

Сійӧ вӧлі рад: ачыс первойӧн думыштіс лямпа йывсьыс. Кор сійӧ вӧчас кутшӧмкӧ подвиг, та йылысь оз жӧ вунӧд. О-о! Кутасны сёрнитны сэки: кутшӧм пӧ сійӧ вежӧра-тӧлка, но и юр пӧ сылӧн! Сэки...

Кыссисны надзӧник водзлань, шыннялісны. Дивӧ: гожӧм шӧр, а найӧ со мунӧны лямпаясӧн. Быттьӧкӧ тӧлын — кокньыда, веськыда. Вӧлӧмкӧ, ва нитш вывтіыс лямпаыс исковтӧ зэв бура. Недыр мысти кык друг шай-паймуніны:водзын тыдовтчис сьӧд ва, а сэні уялісны уткаяс. Кыдз тайӧс кытшовтны?

Кык друг видзӧдлісны водзлань, чушкисны ныръяснас. Ягыс вӧлі матын нин, сійӧ корис ас дінас. Кӧнкӧ сыланьын кривзісны турияс, кӧкис кӧк. Неылын китшкис катша. А катшаыд ӧд пыр сэтӧні, кӧні морт бергалӧ. Лэбзяс кысянькӧ, шпорӧдчыштас бордъяснас да заводитас сизьдыны-китшкыны, быттьӧ сералӧ йӧз вылас.

А ягыс, тӧдтӧм пемыд ягыс, вӧлі збыльысь матын. Детинкаяс син водзын сулалісны кузь пожӧмъяс, козъяс. Мукӧдыс сэтшӧма нин пӧрысьмӧмаӧсь, мый кок йылас абу вермӧмаӧсь сулавны да пӧлыньтчӧмаӧсь ӧта-мӧд вылас. Но тадзисӧ сӧмын нюр дорас. А водзынджык тыдаліс сьӧд парма. И сійӧ пармаӧдыс, кӧнкӧ, ветлӧдлӧны изыскательяс, вӧчалӧны визиркаяс, корсьӧны Шерва дорӧ туй писькӧдан места. Вот найӧ чуймасны, кор аддзасны детинкаясӧс!

— Мунам! Аддзан, матын нин ягыс. Кыдзкӧ вуджам, — шуис Серёжа.

И сэк жӧ мӧдӧдчис валань. А лямпаяс шливгисны, эз и думайтны вӧйны. Детинкаяс локтісны дзик ва дорӧдзыс, повзьӧдісны зэв ыджыд лягушкаӧс. Шлёп-шлёп-шлёп! — чеччаліс лягушкаыс эжӧр пиӧ. Буль! — суніс ваӧ.

А Витя думайтіс сы йылысь, мыйла сійӧ оз вермы чеччавны да уявны лягушкаыс моз. Вермис кӧ, эськӧ важӧн нин чеччыштіс да уйис веськыда ягӧдзыс. Код тӧдас, Серёжа, гашкӧ, тадзи жӧ думайтіс.

4

Первой ӧтиыс, сэсся мӧдыс бедьнас мерайтісны васӧ. Беддьыс эз судз, быттьӧкӧ тыыслӧн пыдӧсыс эз вӧв. Абу ӧд прӧста нюрсӧ шулӧмаӧсь Пыдӧстӧмӧн. Сюян бедьтӧ, а сійӧ кытчӧкӧ пырӧ и пырӧ. Васьыс петӧны гырысь больяс, сэсся шлопйӧдлӧны-потласьӧны. Газ али мый?

Мый вӧчны?

— Веськыда ӧні огӧ вермӧй. Ковмас кытшовтны тысӧ, — жугыля шуис Серёжа.

— Вай кытшовтам. Сӧмын ме сьӧлӧмӧн кыла: рытӧдзыс ковмас ноксьыны миянлы.

— Но и мый? Ковмас кӧ, и рытӧдзыс. Мамӧ пывсьӧдыштас ньӧрйӧн, сы мында и эм. Зато нюрсӧ аддзылам.

Ещӧ неуна сёрнитыштісны кык друг, сэсся мӧдӧдчисны ты пӧлӧныс. Сӧмын удитісны вӧчны кымынкӧ воськов, друг найӧ кылісны Петрӧван дедлысь повзьӧм гӧлӧссӧ:

— Витя! Сергей! Да мый нӧ тайӧ татшӧмыс?! Ӧні жӧ бергӧдчӧй! Час ме тіянлы...

Нинӧм он гӧгӧрво. Кыдзи татчӧ Петрӧван дедыс веськаліс? Мыйла сійӧ кватитчис вӧтчыны? Со мый ылнаӧ нин мунісны, а дедлӧн гӧлӧсыс дзик матын, чунӧдӧ пельястӧ, быттьӧкӧ орччӧн сулалӧ. Кык друг видзӧдлісны бӧрвыв, а дедныс сэні и вӧлӧма. Петіс сійӧ кустъяс пиысь да мӧдіс восьлавны вутш вывсянь вутш вылӧ, кок улас пӧвъяс ли мый ли чӧвталӧ.

Кык друг падмыштісныкодь, оз тӧдны, мый вӧчны. Вот тэныд и изыскательяс, вот тэныд и государственнӧй делӧ... Вӧтӧдас найӧс Петрӧван, скӧр йывсьыс сеталас кыкнанныслы гӧрбъясас да ичӧтъясӧс моз нуӧдас гортаныс. А гортын, нем и думайтны, прамӧя дӧнзяс.

— Котӧртам ӧдйӧджык, суӧдас! — шӧпнитіс Серёжа.

Витя тэрыба уськӧдчис другыс бӧрся. Лямпаыс сідзи и шливгӧ ва нитш вывтіыс. Ньылӧмыс визувтӧ шорӧн, пырӧ синмӧ и вомӧ. Ы-х, ы-х — пошкӧны кыкнанныс.

— Виталей! Сергей! — горзіс Петрӧван. Сійӧ ещӧ на шуаліс кутшӧмкӧ кывъяс, но челядь эз нин гӧгӧрвоны мый.

Регыд мысти найӧ аддзисны кузь эжӧр чукӧр. Уськӧдчисны сылань. Кор локтісны сэтчӧ, найӧ бара аддзисны векньыдик ты. Сійӧ вӧлі кык кымын воськов пасьта, но век жӧ ты. Детинкаяс сувтісны, арыштісны синъяссӧ. Воштысьны ӧні вӧлі некытчӧ. Бӧр ӧмӧй ковмас бергӧдчыны?

— Э-э! Оз вӧт! Аддзан бадьяссӧ? — кинас индіс Серёжа. — Сэні берег. Сэні и тыыс помасьӧ. Вай чеччыштам канава вомӧныс...

— Кыдзи?

— Кыдзи, кыдзи!.. А вот тадзи!

Серёжа тэрыба пӧрччис лямпасӧ, ӧтисӧ удитіс нин шыбитны канава саяс. Сійӧ кӧсйис чеччыштны бедь вылӧ мыджсьӧмӧн. Но сэк жӧ друг катовтчыліс ӧтарладорӧ, сэсся — мӧдарӧ, шевкнитіс кияссӧ, но ньӧжйӧник кутіс пырны муас. Повзьӧмысла горӧдіс мый вынсьыс:

— Витя-а-а!

Витя ачыс муртса эз чермун. Сійӧ первойсӧ весиг эз гӧгӧрво, мый колӧ вӧчны. Сӧмын кор гораа несйӧдіс сійӧс, нюжӧдіс другыслы ассьыс бедьсӧ. Серёжа кутчысис сы бердӧ, зілис петны няйтсьыс, тракйысис. А зыбуныс кыскис сійӧс пыдіӧ, эз лэдз кыпӧдчыны. Сэки Витя локтіс матӧджык, мед эськӧ Серёжа вермис кутчысьны сы лямпа бердӧ.

А Петрӧван дед век на чуксасис. Сійӧ вӧлі дзик нин матын. Стариклӧн тӧдчис сямыс. Шыбитас ӧти пӧв, мунас сы кузя, сэсся шыбитас мӧдсӧ, вуджас сы вылӧ, судзӧдас первойясӧ да бара водзӧ. Мукӧдлатіыс кыссис кынӧм вылас, мукӧдлатіыс — бауӧн, но век — водзӧ и водзӧ...

— Вӧянныд! Вӧянныд, кычипиян! — горӧдлывліс дед.

Гашкӧ, вӧйисны эськӧ кыкнанныс, но дед удитіс локны на дінӧ. Локтіс на дінӧ, лягушкаӧс моз кыскис зыбунсьыс Серёжаӧс и... заводитіс несъявны! На дінын оз позь вӧлі сулавны. Насянь ӧвтіс сэтшӧм клящӧй дук, мый кӧрис ныртӧ, гудыртіс сьӧлӧмтӧ. Сійӧ восьсаинсьыс, кытчӧ вӧйлі Серёжа, петіс юр кольмӧдан газ.

— Тьпу! Тьпу! — сьӧласис дед. — Ой, шогӧдӧ! А синъясыс сылӧн гусьӧн сералісны. И кыдзи век, старик малалыштіс тошсӧ. Сідзкӧ, сійӧ эз скӧрав.

5

Туйӧ петісны кыкӧн, а Пыдӧстӧм нюр сайӧ воисны куимӧн. Оз ӧд прӧста йӧзыс сёрнитны: пӧрысь да челядь пӧ ӧткодьӧсь, найӧ ӧдйӧ сёрнитчасны ас костаныс.

Сідз тайӧ и вӧлӧма.

Кор Серёжа да Витя воисны ас садяныс, найӧ первой видзӧдлісны тӧдтӧм яглань. Со сійӧ, дзик орчча. Сэсся детинкаяс видзӧдлісны Петрӧван дедлы синмас и гӧгӧрвоисны, мый сысянь пужйыс талун оз ло. Дед нюмъяліс. Сылы вӧлі нимкодь, мый вӧтӧдіс челядьӧс, мый мездіс бедаысь. А пужсӧ эз и кӧсйы петкӧдлыны. Бур сьӧлӧма дед нетшкис эжӧр, сійӧн заводитіс зыртны Серёжа вылысь дука няйтсӧ да нюркйӧдлӧмӧн ньӧжйӧник шуаліс:

— Вот та-адз. Вот, вот... Ӧні тэ порсьяс пиын первойӧн лоан... Миян сиктысь зыбунас ни ӧти порсь на эз купайтчыв, а тэ со сяммин... Молодеч... Вот тадз...

— Дедӧ, — сюйсис сёрниас Витя. — Дедӧ, а? Кылан? Пемыд ягыс, аддзан, дзик матын... Вай ветлам...

— Ветлам, дедӧ! — корис тшӧтш Серёжа.

— О-ко-ко! — ышловзис дед. — Нэм чӧж кӧсйылі сэтчӧ вуджавны, да сідзи эг лысьтлы вӧрзьывны... А ӧні, чайтан, муна? Да ӧд катша-рака менӧ, пӧрысьӧс, серамвыв лэптасны.

— Дедӧ, а ми некодлы огӧ висьталӧй... Сӧмын ветлам — и бӧр. Видзӧдлам, мый сэні изыскательяс вӧчӧны, и пыр жӧ бӧр гортӧ. Ми, дедӧ, век кутам кывзысьны тэнсьыд... Да и окота тӧдны, мый Пельтӧм Селькоыс дзеблалӧ... Ми чайтам, сылӧн кутшӧмкӧ гусятор эм. И видзӧ сійӧс нюр саяс.

Дед дыр видзӧдіс ягланьыс, мыйкӧ думайтіс. Сэсся шуис:

— Интереснӧ, мый сэні, а?

— Лок ветлам, видзӧдлам... Пӧвнад посъям канавасӧ и вуджам. А сэні со бадьяс, тыдалӧ, чорыд му нин. Огӧ ӧд вӧйӧ...

Старик ӧвтыштіс кинас.

— Ладнӧ, мути пиян. Ветлам...

Сы мында и вӧлі. Сы мында и колӧ вӧлі бур сьӧлӧма дедлы.

Старик шлапкис-пуктіс пӧвъяссӧ канава вомӧн, вуджис мӧдарладорас да ӧти кокнас сувтліс му вылас. Муыс лыбӧдіс сійӧс, ньӧти эз люлькъяв, верзьӧмӧн кӧть гӧнит.

— Локтӧ вуджӧй! Тані чорыд му, — старик корис челядьӧс.

И со найӧ пукалӧны Пемыд яг дорын, шойччӧны. Муыс гӧгӧр вольсассьӧма сук веж турунӧн, кӧнсюрӧ чукӧрӧн быдмӧны кузь гумъяс, шомкоръяс. Мельничадорса луд вылын моз жӧ чирскигтыр чеччалӧны чиркъяс, вӧрас сьылӧны посни лэбачьяс. Нинӧм торъяыс быттьӧ и абу.

Сӧмын, гашкӧ, сійӧ, мый тані быдмӧ сук вӧр — ӧта-мӧд дорас топӧдчӧмаӧсь джуджыд пожӧмъяс.

Чатӧртчылан йывланьыс — шапкаыд усьӧ. Пожӧмъяс да козъяс костын шӧпкӧдчӧны веж коръя еджыд кыдз пуяс. Татчӧ вӧр лэдзысьяс абу на веськавлӧмаӧсь, ставыс на вӧрзьӧдлытӧм.

А кӧнӧсь век жӧ изыскательясыс? Кытчӧ найӧс нуӧдіс Пельтӧм Селько? Челядьлы окота вӧлі ӧдйӧджык пырны вӧрас, горӧдны гораа, корсьны найӧс, но дед ӧлӧдіс челядьӧс: энӧ тэрмасьӧ. Тӧдтӧм вӧрын быдтор вермас лоны: колӧ видзчысьӧмӧн, тэрмасьтӧг, надзӧник.

— Первой сёйыштам да шойччыштам, сэки вӧлись видзӧдлам берег дорсӧ.

Збыль ӧд, первой колӧ сёйыштны, кынӧмъясныс важӧн нин сюмалісны. Талун ӧд найӧ нинӧм на эз сёйлыны.

— Висьталӧй аттьӧ, мый манастыр прудсӧ лэдзисны да таво жар гожӧмыс лои: шуралыштӧма нюрыс. А ӧд сэні ставыс ва вӧлі. Прудса ваыс тайӧ нюрӧдзыс кайліс, — висьтасис старик. — Зэра гожӧмӧ татчӧ нинӧмысь он пыр.

— Дед, а кыдзи тэ гӧгӧрвоин, мый ми нюрас пырим? — юаліс Серёжа.

— А лысваыс кутшӧм вӧлі!.. Локті бипур дорӧ, видзӧда: ті абуӧсь. Мися, кытчӧ найӧ вермисны мунны?.. Видзӧдлі кустъяс костӧ, а сэті быттьӧ пыжӧн кывтӧмаӧсь — сы пасьта туйыс кольӧма. Но ме сэки и гӧгӧрвои: мыйкӧ абу лючки-ладнӧ тані. Вежӧмаясыд, думайта, нюрас пырисны... Эн жӧ прӧста тӧнлун видласьӧ сэні. А талун шуинныд, мый локтінныд вуграсьны, а вугыр шатинъясыд эз вӧвны. Ме сэки и казялі. Вот сідз...

Дед перйис Витя пестерысь нянь, лук, тшӧктіс челядьлы сёйны.

— А мыйла не менсьым? — юаліс Серёжа.

Дед малалыштіс тошсӧ, мудера нюммуніс да гогнитіс юрнас пестерланьыс:

— А ноко видзӧдлы, мый тэнад пестерад...

Серёжа восьтіс пестерсӧ, а сэтысь няйт киссьӧ, клящӧй дук нырад чамгӧ.

— Тьпу! Няньыс мекӧд тшӧтш купайтчӧма.

Серёжа сьӧласис-чилсйӧдліс пинь пырыс, нюмъяліс, быттьӧ сёрниыс эз сёян йылысь мун, а дзик мӧдтор йылысь. Сійӧ вӧлі рад, мый сэтшӧм кокниа веськалісны нюр саяс, рад сыысь, мый накӧд тшӧтш Петрӧван дед, ыджыд вежӧра шань морт. Сы дырйи повны нинӧмысь. Няньтӧг позяс олыштны, ёна тай колӧ. Он на кув... Зато вӧчам подвиг!

— Сідзкӧ, вот, казялі ме, мый ті пырӧмныд нюрӧ, садь быртӧдз повзи... Мися, вӧясны ещӧ, беда лоас... Киняулӧ босьті кык кузьджык пӧв и ті бӧрся. Бур, мый ас кадӧ суӧді.

Кыдзи и челядьлы, дедлы вӧлі нимкодь. Перкоягысь тані некод на эз вӧв, а вот сійӧ, Петрӧван, пӧрысьӧ-нэмӧ веськаліс Пыдӧстӧм нюр сайӧ, первойӧн веськаліс, позьӧ шуны, выль му восьтіс.

Кутшӧм сійӧ, тайӧ выль муыс?

А Витя йылысь и сёрнитны нинӧм. Сійӧ вом тырнас мутшкӧдіс нянь (о, кутшӧм чӧскыд вӧлӧма!) да думайтіс: «Вот эськӧ, аддзыліс кӧ Маша Модянова, кыдзи ме нюрӧдыс смела восьлалі, сэк эськӧ кывсӧ топыда курччис, некор сэсся эськӧ эз шу менӧ трусӧн. Во!»

ВА УЛЫН ПОС

1

Ичӧтик руд кай пукаліс льӧм пу ув вылын да, юрсӧ довкйӧдлігтыр, дугдывтӧг юасис: чив-чив? Кодъяс пӧ ті? Кулак кодь гӧрд комӧк шур-шур кайис джуджыд пожӧм йылӧ, ляскысис ув бердас да ичӧтик сьӧд синъяснас кутіс видзӧдны увлань... Кур-р-р!.. — бордъяснас сьӧкыда жборӧдіс сьӧд тар, повзьӧдіс мунысьясӧс. Тук-тук-тук! — тотшкӧдчис кос пу вылын сизь, корсис аслыс сёян.

Тӧдтӧм Пемыд вӧр оліс аслас олӧмӧн. Дышпырысь шушкисны лыска сьӧкыд увъяс, кышӧдчисны-варовитісны ас костаныс пипуяс да кыдзьяс. Быд боксянь нырад чамгис сир дук. Пуяс костын ворсісны вуджӧръяс, быдлаын мыйкӧ кышакыліс, быттьӧ кӧнкӧ матын вӧлі ловъя лов. Шуны кӧ, шуштӧмкодь.

— Эстӧн, гашкӧ, ошъяс олӧны, — шӧпнитіс Витя.

— Гашкӧ и олӧны, — сӧмын и вочавидзис дед.

Серёжа думайтіс изыскательяс йылысь. Кӧнӧсь найӧ ӧні? Кӧнкӧ тані, колӧ лоны, матынӧсь. Гашкӧ, аддзисны нин вӧр кыскалан туй местасӧ да ӧні бӧр нин мунісны гортас. Вот эськӧ горӧдны-чукӧстны, гашкӧ, шыасясны воча? Но дед шуис, мый тӧдтӧм вӧрын горзыны оз позь. Код тӧдас, коді эм вӧрас. Вермас страшнӧй зверь паныдасьны, вермас ещӧ мыйкӧ лоны. Вӧрын пыр колӧ овны видзчысьӧмӧн, а тані ещӧ нин. Со мыйла найӧ мунісны гусьӧникӧн, зілисны не трачкӧдчыны увъяснас, не ызгыны.

Вӧрті ветлӧдлісны найӧ вель дыр нин. Первой пырисны вӧрас, кежисны шуйгавыв да мыйкӧ дыра мунісны нюрыскӧд орччӧн. И ни ӧти трӧпа, ни ӧти морт кок туй эз паныдась. Некод на татчӧ абу пыравлӧма, некод на абу талявлӧмӧ вӧр турунсӧ.

Вӧр... Сук, пемыд. Еджыд тошка коз увъяс ӧшйӧмаӧсь муӧдзыс, а вылысджык увъясыс сідзи гартчӧмаӧсь мукӧд пуяслӧн увъяскӧд, мый весиг на пыр шондіыс оз тыдав. Веськыд пожӧмъяс пыкӧны енэжсӧ. Некод на тані вӧрсӧ абу пӧрӧдлӧма, абу дойдалӧма чер-пилаӧн.

Парма — парма и эм.

Но со Петрӧван дед друг лэптіс веськыд кисӧ, ӧлӧдіс: ш-ш-ш!

— Кыланныд? — шӧпнитіс сійӧ:

Челядь нинӧм эз кывны.

— Кӧнкӧ матын шор дзольгӧ...

Дед кежыштіс бокӧ, муныштіс тілляинӧд. Детинкаяс вӧтчисны сы бӧрся. Сэсся налы паныдасис кыддза рас. Еджыд паськӧма пуясыс вӧліны кызӧсь да веськыдӧсь. Кор ыркнитліс тӧвру, коръясыс меліа кышакылісны. Нырад чамгис пӧжӧм корӧсь дук, сынӧдыс небыд, чӧскыд кӧра. Кок улын пуриктіс кузь турун.

Турун увтіыс дзольгис ичӧтик сӧстӧм шор. Сійӧ вӧлі сӧмын воськов пасьта. Пӧжалуй, сійӧ визувтіс кутшӧмкӧ ключсянь. Ӧти местаын шорсӧ потшӧма сісь колода, и сійӧс вуджигӧн ваыс бузгис...

— Со тані позяс и мыссьыштны. Серёжа, мыськы ас вывсьыд нюйтсӧ, — тшӧктіс Петрӧван дед.

И друг сійӧ чашкӧдіс синъяссӧ, быттьӧ мыйыськӧ повзис... Витялы весиг кажитчис, мый старик ас тӧдлытӧг чӧвтіс пернапас, а вом доръясыс вӧрисны, быттьӧ лыддьӧдліс молитва. Мый сійӧ аддзис?

— Чибльӧг?.. Аддзанныд, со чибльӧг ӧшалӧ...

Збыль, шор саяс, неыджыд кыдз пу ув вылын ӧшаліс чибльӧг, кодӧн позьӧ юны ва. Со мый вӧлӧма!.. Сідзкӧ, тайӧ ягас кодкӧ вӧлӧма нин, и кодкӧ юӧма тані шорсьыс ва. А чибльӧгыс вӧлі нач выль, абу корсьӧма, абу сьӧдасьӧма. Вӧчӧмаӧсь неважӧн на, нето тӧрыт, нето войдӧрлун. Сідзкӧ, сійӧ, коді вӧчис тайӧс, ветлӧдліс тані дзик на неважӧн. Коді сійӧ?

— Изыскательяс! Видзӧдтӧ, кӧні вӧлӧмаӧсь, — нюмъялігтыр, шуис Серёжа.

— Ми регыд накӧд паныдасям, — содтіс Витя. — Кутшӧма чуймасны...

Куимнаныс колода вывті вуджисны шорсӧ, матыстчисны чибльӧгыс дорӧ. Шор дорас туруныс таляссьӧма.

— Дед, мунам водзӧ кок туй кузяыс, — корисны челядь. — Гашкӧ, паныдасям...

Недыр муныштісны шор пӧлӧныс, бӧр петісны тілля вӧрӧ, вуджисны неыджыд лог и друг петісны кушинӧ. И бара найӧ аддзисны сэтшӧмтор, мый дедлӧн синъясыс чашкалісны. Кушинсӧ вӧлі ытшкӧма. Дорас, кык коз костын, сулаліс ичӧтик зорӧд.

— Вот тэныд и на! — шензис дед. — Да тані неважӧн быдса артель вӧлӧма.

Челядь чӧвусины. Да и мый найӧ вермисны шуны? Ытшкисны вӧр видзсӧ изыскательяс? Оз вермы лоны... Налӧн косаыс эз вӧв. Да и мыйла налы туруныс?..

Вуджисны кушинсӧ, пыралісны расӧ, сэсся бара петісны кушинӧ. И бара сэті вӧлі ытшкӧма. И бара козъяс костын сулаліс ичӧтик зорӧд. Да мый нӧ тайӧ сэтшӧмыс? Неужели Кайскӧй вӧлӧкысь кодкӧ татчӧ волывлӧ пуктысьны? Сы ылна?

Дед видзӧдліс ӧтарӧ-мӧдарӧ, быттьӧкӧ кодӧскӧ казяліс, сэсся мӧдӧдчис зорӧдлань. И друг тан сувтіс, сэсся бӧр кутіс петитчыны. Кымӧсас чепӧсйисны гырысь ньылӧм войтъяс... Зорӧд дорас куйліс морт.

2

Зорӧд улын узис морт. Куйліс кымыньӧн, юрсӧ пуктӧма кияс вылас, шебрасьӧма дукӧсӧн. Кажитчӧ, мый тані сэтшӧмыс? Морт уджаліс, мудзис и водіс шойччыны. Оз ӧмӧй тадзи овлы? Но дед гусьӧн видзӧдіс зорӧдлань, и нинӧм эз вермы шуны. Дерт жӧ. Кузь нэм оліс, пыр думайтіс, мый Пыдӧстӧм нюр сайӧ ни ӧти морт эз веськавлы, а тані, вӧлӧмкӧ, со мый артмӧ!.. Тешкодь..

— Дед, мунам сы дінӧ, садьмӧдам, — шӧпкӧдіс Витя.

— Кыдз садьмӧдан? А друг да сылӧн бокас пищаль?

— А мыйла пищальыс сылы?

— Быдтор вермас лоны. Код тӧдӧ, кыдзи сійӧ татчӧ веськаліс. Локтӧ мунам саймӧдчылам...

Найӧ мунісны неуна бокӧ, коз пуяс сайӧ. Куимнанныс шензисны, — окота вӧлі тӧдны, кыдзи татчӧ веськалі мортыс, коді сійӧ? Ставныс ас кежысь думайтісны, мый водзӧ вӧчны. Кыдзи овлӧ повзьӧм йылысь, Витялӧн бара кутіс нырыс гилявны. «Несйӧдас, буракӧ», — повзис сійӧ. И кыдзи кӧть эз кутчысь, збыльысь кесйӧдіс. Да сэтшӧм гораа, быттьӧ вӧв корснитіс. Повзьӧмысла Серёжа чеччыштіс бокӧ, дед паськӧдіс вомсӧ. А сійӧ, коді узис зорӧд бокас, буракӧ, садьмис, ырскӧбтіс-чеччис кок йылас, но бӧр уси, пондыліс ещӧ сувтны, но эз вермы да кутіс бауӧн котӧртны. Мортыс, буракӧ, ачыс зэв ёна повзис: сійӧ эз пышйы йӧзысь, а локтіс веськыда на вылӧ, мыйысь бара чуймисны куимнанныс. Найӧ лӧсьӧдчисны жӧ пышйыны. И пышйисны эськӧ, эз кӧ друг тӧдтӧм мортыс кут мыйвынсьыс горзыны.

— Ма-ам! Ма-ам! — кага моз горзіс сійӧ.

И Петрӧван дедлӧн бара паськалісны синъясыс. И бара вӧлі мыйысь: тӧдтӧм мортлӧн гӧлӧсыс вӧлі тӧдса.

— Да тайӧ жӧ Ӧльӧш! — чилӧстіс Витя.

— Збыль ӧд, сійӧ и эм! — горӧдіс тшӧтш Серёжа.

Дед лэптіс веськыд кисӧ, мед пернапасасьны, кӧть ачыс быдлаын ошйысьліс, мый енмыслы ньӧти оз верит.

«Но и но, но и но», — шӧпкӧдісны вом доръясыс.

А Ӧльӧш, кор кыліс челядьлысь сёрнисӧ, сідзи и из моз шлёпкысис муас: ӧти воськов эз вермы вӧчны.

Кор найӧ матыстчисны сы дінӧ, детинкаыс кажитчис кулӧмаӧн. Ӧльӧшӧс муртса позис тӧдны: чужӧмыс сьӧд, пыктӧма, синъясыс кылалӧмаӧсь и мый самӧй страшнӧйыс — сійӧ вӧлі дзор! Да, юрсиыс вӧлі дзор, быттьӧ сё арӧса пӧльлӧн. А ӧд сылы вӧлі сӧмын дас сизим арӧс.

«Тешкодьторъяс артмӧны, — мӧвпаліс Витя. — Зэв тешкодьторъяс... Кутшӧм бур, мый дед вӧтӧдіс миянӧс да татчӧ тшӧтш локтіс...» Серёжа тувкыштіс сылы бокас, ньӧжйӧник шуис:

— Молодеч! Бура несйин. Ас кадӧ.

Ӧльӧш тіраліс ставнас, пиньяссӧ мурч курччӧма, корсюрӧ йирыштліс. Дед сувтіс сы весьтӧ, копыртчис да малыштіс чужӧмсӧ.

— Ӧльӧксей, пиук, кыдзи тэ татчӧ веськалін?

Детинка чеччыштіс кок йылас, тыдалӧ, кӧсйис пышйыны, да бара шлёпкысис муас. Буракӧ, вӧлі садьтӧм. А кор паляліс да гӧгӧрвоис, мый пышйыны оз удайтчы, уськӧдчис дедлы кок улас.

— Ви менӧ, дед! Ви! Кӧртав голяӧ из да шыбит зыбунас. Ме ачым кӧсйи уськӧдчыны нюрас, но ог вермы. Дедӧ, мезды менӧ, шыбит увлань юрӧн нюрас, — сыркъялӧмӧн бӧрдігтыр лыддьӧдліс детинка, а няйт чужӧмӧдыс шорӧн визувтіс синваыс. Дед малаліс юрӧдыс, кыдз вермис бурӧдіс, такӧдіс:

— Дугды, шань пи, мыйла сідз сёрнитан... Ми тэныд нинӧм омӧльсӧ огӧ вӧчӧй. Тэ жӧ тӧдан, ме радейта тэнӧ... Дугды, эн бӧрд.

— Ви, дедӧ! Ог вермы сэсся! Эбӧсысь уси, — ымзіс Ӧльӧш.

Недыр мысти гӧлӧсыс лӧнис, лои спокойнӧджык, и дед гӧгӧрвоис, мый детинкалы лоис лӧсьыдджык.

— Виталей, — корис старик. — Вайлы, ноко, пестертӧ! Вердам Ӧльӧксейсӧ колькйӧн да няньӧн. Тэнад, буракӧ, рыська нянь на кольліс.

Сэсся дед малыштіс детинкалысь дзор юрсисӧ, пуксис сыкӧд орччӧн.

— Кынӧмыд сюмалӧ? Коньӧрӧй тэ, коньӧрӧй... Час, ми тэнӧ гӧститӧдам, вердыштам, юкталам, и ставыс бур лоӧ.

Витя восьтіс пестерсӧ, перйис сэтысь ставсӧ, мый вӧлі. Ӧльӧш кыдзкӧ тешкодя видзӧдліс сёяныс вылӧ да тшыг пон моз уськӧдчис сёйны. Сійӧ, буракӧ уна лун нин абу сёйлӧма. Дед кулис пуӧм кольк, мыччис сылы:

— Сёй, сёй, дона пи! Ёна тшыгъялӧмыд. А ті, — тшӧктіс челядьлы, — чукӧртӧ кос увъяс, сюмӧд. Би пестам, чай пузьӧдам...

Ӧльӧш ӧвтыштіс кинас.

— Оз ков, биыс оз ков! Виасны... Дедӧ сідзи и шуис: ӧзтан би — начка.

— Видзӧдтӧ, кытчӧдз тэнӧ воштӧма... Дзормӧмыд...

Ӧльӧш сыркъяліс... Сійӧ ньылаліс небыд няньсӧ пӧшти курччавтӧг, полӧмӧн видзӧдлывліс ӧтарӧ-мӧдарӧ, вирскис нырнас. Челядь видзӧдісны сы вылӧ покойник вылӧ моз да эз лысьтны кыв шуны.

«Вот кытчӧ ыстӧма сійӧс Пельтӧм Селькоыс, — думайтіс Витя. — Но кыдзи сійӧ татчӧ веськаліс? Мыйла локтіс?»

Та йылысь жӧ думайтісны и Петрӧван дед и Серёжа... А Ӧльӧш век на сёйис... Но вот няньыс быри, водзсьыс ӧктіс крӧшкияссӧ да шыбитіс вомас.

— Ог вермы сэсся... Мед кӧть мый лоӧ, а пышъя татысь. Ме и гортысь пышъя, дед...

Сійӧ бергӧдчыліс вӧрлань, дрӧгмуніс тушанас да чеччыштіс кок йылас.

— Со сійӧ... Со... Со...

Старик да челядь нинӧм эз аддзыны. Водзын вӧлі парма, кышакылісны пулӧн коръясыс, кӧнкӧ кӧкис кӧк, пуяс вылын сьылісны лэбачьяс. Шондіыс ӧшаліс самӧй юр весьтын, нем жалиттӧг кисьтіс югӧрсӧ му вылӧ. Вӧрас, пуяс костын, гӧвкъяліс кельыдлӧз тшын — вераліс сынӧдыс. Кодӧс сэтысь аддзыліс Ӧльӧш?

— Кык вой узи тані... Сэсся ог вермы, тырмас! Дедӧ, лок мунам гортӧ... Дедӧ, отсав меным! — тэрыба сёрнитіс сійӧ.

— Мунам и эм, дед, — шуис Витя. — Ме пола... У-у...

— Ладнӧ, мунам, — сӧгласитчис дед.

3

Медводзын муніс Ӧльӧш. Позьӧ шуны, эз мун, а лэбис тӧвныр моз. Старик ӧдва вермис вӧтчыны. Котӧртісны Витя и Серёжа. Найӧ полісны видзӧдлыны бӧрвыв; кажитчис, мый быттьӧкӧ вот-вот кодкӧ шашаритчас пельпомъясас, тракнитас да кыскас вӧрас.

Ӧльӧш петіс векньыдик трӧпа вылӧ да котӧртны заводитіс ещӧ на тэрыбджыка. «Видзӧдтӧ, трӧпа, — думайтіс дед. — Ватагаӧн ветлӧдлӧмаӧсь... Кодъяс эськӧ?..»

Петрӧван юрын мӧвпъясыс жуисны. Первой колӧ эськӧ тӧдмавны, мыйла Пельтӧм Селько вайӧдіс татчӧ внуксӧ, кыдзи сійӧ вуджис нюрсӧ, кӧнӧсь изыскательяс. Унатор колӧ вӧлі юавны, но старик нинӧм эз кут юасьны. Воас кад, и Ӧльӧшка ачыс ставсӧ висьталас.

Трӧпаыс вӧрӧдыс лэччис нюрлань, чукльӧдліс кытсюрӧ. Петрӧван гӧгӧрвоис, мый детинкаыс таті локтӧма, гашкӧ и эз ӧтчыд нин волы. «Нюрас, тыдалӧ, туй жӧ эм. Вот тэныд и на!»

— Да ньӧжйӧнджык тэ мун, жуялі, — шуис Петрӧван. Сідзи лэбан, мый...

Старик ёнджыка сёрнитіс сы вӧсна, медым венны, ӧдӧлитны быд пӧлӧс думъяссӧ.

— Мунам ӧдйӧнджык, мунам, тэрмӧдліс Ӧльӧш. — Друг сійӧ чеччас да вӧтас миянӧс. Виас... Вермас и дед локны. Сійӧ талун кӧсйысис. Виас ставнымӧс. Сідзи и тӧд — виас!

— А кӧні нӧ дедыд?

— Да накӧд муніс, антихристъясыскӧд... Но накӧд, кодъяс туйсӧ корсьӧны.

— Изыскательяскӧд, — гӧгӧрвоис Серёжа. — Кӧнӧсь найӧ, тэ он тӧд?

— Ог тӧд. Дед тай шуис: петкӧдла ме налы туй, кыті дявӧлыс оз ветлӧдлы, пырта пӧ кытчӧкӧ да мед джагаласны.

— Мый нӧ тайӧ сэтшӧмыс? повзис Витя.

— Нинӧм ог гӧгӧрво, — шуис Серёжа. — Ме чайта: тані Селькоыслӧн збыль мыйкӧ гусятор эм... Сылы, тыдалӧ, колӧ, мед эськӧ татчӧ, нюр саяс, некод эз пыр. Гӧгӧрвоин?

— Дерт жӧ!

Трӧпаыс сэк костті кежис веськыдвылӧ, пырис кустъяс костӧ. Вӧлі кӧть лун шӧр кад, а кустъяс вылас век на ӧшаліс лысва, кок улын ва жӧ вӧлі.

Недыр мысти тыдовтчис Пыдӧстӧм нюр. Ӧльӧш тран сувтіс, быльӧдіс синъяссӧ. Петрӧван дед муртса эз зурась.

— Тэ мый?

— Виас ӧд... Сідзи и тӧд — виас... Ме ӧд сылы клятва сеті туйсӧ не петкӧдлыны. И ӧбраз окалі...

Петрӧван скӧрмыштіскодь. Сійӧ крепыда кутіс Ӧльӧшкаӧс пельпомӧдыс, тракнитіс, видзӧдліс веськыда синмас:

— Вот мый, йӧюк! Тырмас тэныд бӧбъявны! Висьтав, мыйла больничаас эн мун, а татчӧ локтін? Мыйла пышъялан?

Повзьӧм Ӧльӧш пласьт уськӧдчис муас, кутіс вартны кияснас и кокъяснас. Петрӧванлы ковмис воштыны не этша кад, мед эськӧ сійӧс бурӧдны. И сӧмын сэки, кор Петрӧван шуис, мый Ӧльӧш регыд мунас армияӧ, велӧдчас да лоас генералӧн, сэки сійӧс дедыс и чальнас оз вӧрзьӧд — детинка лӧнис, кыдзкӧ тешкодя куткыртчис.

— Но, мыйысь повзин, йӧюк! такӧдіс дед. — «Виас, виас...» Да кыдзи сійӧ тэнӧ лысьтас вины? Сійӧс ӧд асьсӧ виасны жӧ сэки. Чеччы, лок мунам сиктӧ. Дзеба ме тэнӧ амбарӧ, томнала. Некод тэнӧ сэтысь оз аддзы... Гӧгӧрвоин? Сэсся сельсӧветӧ ветла, милиционерӧс вайӧда... Петкӧдлас сійӧ дедыдлы пуж, пуксьӧдас тюрьмаӧ. Важӧн нин сылӧн сэні местаыс. Вот мый выйӧдз тэнӧ вайӧдӧма. Позьӧ ӧмӧй челядьӧс мучитны? Таысь тюрьма...

Сьӧкыд вӧлі гӧгӧрвоны, мый вӧчсис Ӧльӧшкӧд. Детинка тіраліс, ӧдва сулаліс кок йылас, киясыс лётмунӧмаӧсь плеть моз. Ёна повзьӧдӧма дедыс, вежӧрыс, буракӧ, вошласьӧ.

— Ой, мый меным лоас? Мый лоас? — бӧрдіс Ӧльӧш, но век жӧ мӧдӧдчис водзлань.

Нюрас эз вӧв некутшӧм туй ни трӧпа, сӧмын кӧнсюрӧ паныдасьлісны мортлӧн кок туйяс, но Ӧльӧш муніс збоя. Кустъяс костӧд, ичӧтик тыяс бокті сійӧ петкӧдіс куимнансӧ паськыд ты дінӧ, повтӧг пырис няйт ваас.

Дед бӧр бӧрыньтчис, сувтіс, быттьӧ кынмис места вылас. А Ӧльӧш муніс и муніс водзӧ, вылӧ лэпталіс кокъяссӧ. И вот старик тшӧтш пырис ваас да сӧмын сэні сійӧ гӧгӧрвоис, мый детинкаыс мунӧ кутшӧмкӧ тӧдтӧм туй кузя. Беддьӧн маласигтыр, синтӧм морт моз, ньӧжйӧник муніс водзӧ. Кокъясыс оз вӧйны. Кокъяс улас вӧлі мыйкӧ чорыд... «Да, тані керйысь пос вӧчӧма! — гӧгӧрвоис сійӧ. — Ваас кодкӧ бона моз лэдзӧма пос!»

4

Кор тайӧ вӧлі? Важӧн нин, ёна важӧн. Комын во коли сысянь, гашкӧ, унджык. Да, комын воысь унджык. А став событиеясыс Петрӧван син водзын тыдалісны сэтшӧм ясыда, быттьӧкӧ вӧліны дзик на неважӧн, тӧнлун либӧ войдӧрлун.

Ставыс заводитчис сысянь, кор Перкоягӧ Краснӧй Армияысь локтіс томиник салдат-комсомолец Андрей Сальников. Локтіс сійӧ тӧвнас, крещение гӧгӧр. Ветлӧдліс лун-мӧд сиктӧд. Паськӧмыс сылӧн вӧлі шнич выль, — выль хромӧвӧй сапӧг, кузь руд шынель. Лабутнӧя сёрнитіс йӧзыскӧд олӧм-вылӧм йылысь, висьтавліс, кыдзи служитіс армияас, кӧні вӧлі, мый аддзыліс.

— Уналаын вӧлі, унатор аддзылі — бурсӧ и омӧльсӧ. А татчӧскодь оласногсӧ некытысь на эг аддзыв. Омӧля ті оланныд, лёка... Век на сідзи, кыдзи царь дырйи, мырсянныд да пессянныд. Гӧль йӧз век на уджалӧны озыръяслы, лун и вой клёнганныд-юрбитанныд енлы, манастыр туй таляланныд.

Красноармеец сьӧласьліс, видіс манакъясӧс, а енсӧ, кодлы перкоягчи копрасисны лун и вой, шуис сюра мутиӧн, а попӧс — йӧзӧс ылӧдлысьӧн. Коньӧр нывбабаяс, кодъяс нинӧм эз тӧдны, сӧмын пернапасасьлісны, а мужикъяс гусьӧн видзӧдлывлісны ӧбразъяс вылӧ. «Господи, господи, ӧні жӧ енмыс накажитас!» Но енмыс некодӧс эз накажитлы, красноармеец век вӧлі ловъя, ветлӧдліс керкаысь керкаӧ. Регыд мысти сиктын кывсис, мый Сальников, аслас пӧрысь мамлысь, дӧва Марьялысь, петкӧдӧма ӧбразъяссӧ ывлаӧ да ставсӧ торпыригӧдз жуглӧма.

— Но, ӧні енмыс накажитас нин сійӧс, антихристӧс, — шулывлісны енлы веритысьяс.

А Сальниковӧс не сӧмын енмыс, но и уна сюра мутиыс чуньнас эз вӧрзьӧд. Ветлӧдліс сійӧ сиктӧд, пыркӧдіс кудрияснас, дзуркӧдіс выль кромӧвӧй сапӧгъяснас.

— Лёка оланныд, бур войтыр, — шулывліс сійӧ сиктса йӧзлы. — Пемыд гуын моз... Быттьӧ тані революцияыс абу и вӧлӧма... Да-а... А вот йӧзыс олӧны бурджыка...

— А кыдзи нӧ сэні олӧны, — юасьлісны смелджык йӧз.

— Бура олӧны. Йӧзыс важӧн нин ӧтувтчисны колхозъясӧ. Сідз шуны, артельясӧ. Кывлінныд, кӧнкӧ? Но дак вот. Сэні быдтор вӧчӧны ӧтвылысь. Гӧрӧны, кӧдзӧны, турун пуктӧны, нянь идралӧны — ставсӧ ӧтвылысь. И некутшӧм шог оз тӧдны.

Да, Перкоягын сэки кывлісны нин колхозъяс йылысь. Районысь частӧ волывлісны уполномоченнӧйяс, висьтавлісны, кыдзи колӧ вӧчны выль олӧмсӧ, корлісны ӧтувтчыны колхозӧ. Мужикъяс думайтлісны, гыжъявлісны балябӧжнысӧ, мыйкӧ шӧпкӧдчисны ас костаныс, а колхозӧ пырны полісны. «Видзӧдлам, кыдзи йӧзыс...»

Сэк Андрей Сальников босьтчис том йӧз бердӧ. Чукӧртас вӧлі найӧс аслас керкаӧ, лыддяс налы книгаяс да газетъяс. Висьтавліс комсомол йылысь, налӧн удж йылысь, быд ногӧн видліс да ёрліс кулакъясӧс да попъясӧс. Регыд мысти котыртісны комсомольскӧй ячейка, сэні лун и вой сёрнитісны коммуна йылысь.

— Со и Выльгортын котыртчӧма колхоз, и Важгортын, а ті нӧ мый, мужикъяс, думайтанныд? Век важ моз кӧсъянныд овны?

Тайӧ вӧлі збыль. И Выльгортын, и Важгортын, и Перкояг бердса сиктъясын котыртчалӧмаӧсь колхозъяс.

Перкоягысь сэтчӧ ветлісны кымынкӧ мужик, видзӧдлісны, юасисны кыдз да мый — кажитчӧма налы: ӧтлаын уджавны кокньыдджык.

А сэк жӧ Перкоягӧд ветлӧдлісны манакъяс, повзьӧдлісны йӧзсӧ страшнӧй судӧн, ёрисны найӧс, кодъяс тшӧктӧны пырны колхозӧ.

— Колхоз — сійӧ антихристлӧн поз. Коді пырас колхозӧ — сылӧн ӧти туй — веськыда адӧ, — повзьӧдлісны найӧ.

Андрей Сальниковлӧн киыс судзис и манакъяс дорӧдз.

— Ме тіянлы петкӧдла, пӧрысь ракаяслы, ад. Регыд нин бордъясныд чегъясясны. Райисполкомлӧн важӧн эм решение — пазӧдны тіянлысь малязі позтӧ. Вот, регыд...

Перкоягын и тайӧс вӧлі тӧдӧны нин. Збыль, вӧлі примитӧма решение: манастырлысь став эмбурсӧ мырддьыны, видз-мусӧ сетны налы, кодъяс пырасны колхозӧ.

Сійӧ тӧвнас, сюрс ӧкмыссё комын нёльӧд вося тӧвнас, Перкоягын котыртчис колхоз. Первойсӧ пырисны гӧль йӧз, сэсся мӧдӧдчисны шӧркодя олысьяс... Коркӧ сэк жӧ — быттьӧ нинӧм эз ло — Пономарев Гавриллӧн пиыс — Пельтӧм Селько — тшӧтш вайис колхозӧ пырӧм йылысь шыӧдчӧм. А шумыс кутшӧм сэки вӧлі?! Сельколӧн батьыс мый горзіс, кутшӧма нӧйтліс, а мӧдыс всё равно пырис колхозӧ. Андрей Сальников, дерт, вӧлі паныд, кулакъясӧс пӧ огӧ примитӧ, но районысь локтіс бумага: колӧ примитны, мортыс кӧ ачыс вӧзйысьӧ. Сельколӧн батьыс сэки муніс манастырӧ, а пиыс пондіс уджавны сы пыдди мельничаын: мельничасӧ мырддис колхоз.

Тулыснас, кор перкоягчи лӧсьӧдчисны петны кӧдзны, кодъяскӧ ӧзтісны колхозлысь амбарсӧ. Ставыс сотчис кушӧдз — кӧйдыс ни сёян нянь эз коль ӧти тусь. Сэки сиктъясын паськаліс юӧр: локтӧмаӧсь татчӧ бандитъяс. Олӧны пӧ найӧ вӧрын, войяснас петавлӧны сиктъясӧ, соталӧны колхознӧй амбаръяс, виалӧны активистъясӧс.

Андрей Сальников ветліс районӧ, вайис сэтысь кымынкӧ винтовка, а регыд мысти и локтісны милиционеръяс. Сиктын найӧ котыртісны отряд, лӧсьӧдчисны кутны бандитъясӧс. И буретш сійӧ луннас, кор отряд кӧсйис конфискуйтны манастырлысь эмбурсӧ, водз асывнас перкоягчи казялісны манастыр весьтысь ыджыд би югӧр. Уськӧдчисны сэтчӧ, а сэні, манастыр местаын, чусаліс нин сӧмын шом. Коді ӧзтіс? Тайӧс некод эз тӧд. Манакъяс ставыс разӧдчӧмаӧсь кытчӧсюрӧ, некутшӧм след весиг абу кольӧма.

— Мунісны кӧ и мед, чӧрту, — сэки шуис Сальников. — Натӧг бурджык лоас.

Колхозникъяс выльысь чукӧртісны кӧйдыс, мыйтакӧ государство отсаліс. Кӧдзисны бура, ас кадӧ. Мужикъяс уджалісны дружнӧя, пемыдсянь пемыдӧдз, быдӧн гӧгӧрвоисны — аслыныс вылӧ уджалӧны. А сэки бара выль оказия. Ӧтчыд водз асывнас колхозникъяс локтісны председатель ордӧ сёрнитыштны ӧттор-мӧдтор йылысь. Пырисны керкаӧ, а сэні джодж шӧрас кык покойник: Андрейӧс да мамсӧ сутшйӧдлӧмаӧсь пуртъясӧн, мыйӧнкӧ поткӧдлӧмаӧсь юрнысӧ. Андрей морӧс вылӧ кольӧмаӧсь гижӧд: «Коді сувтас миянлы паныд — смерть!»

Колхозникъяс шӧйӧвошины, оз тӧдны, мый керны. Милиционеръяслӧн отряд ветлӧдліс сиктысь сиктӧ, став матігӧгӧр вӧрсӧ пузувтісны, быд вужля улӧ видзӧдлісны, — некӧн некод эз вӧв...

Быдторйыс вӧлі сійӧ гожӧмнас. Вошласисны колхозлӧн мӧсъясыс, сотчис гумлаыс, виисны ещӧ кымынкӧ активистӧс. Милиционеръяс садьсӧ воштісны, лун и вой вӧліны кок йыланыс, но кутны некодӧс эз вермыны. Бандитъяс вӧліны быттьӧ бордъяӧсь. И быттьӧкӧ нарошнӧ, найӧ петавлісны сиктӧ сэки, кор милиционеръяс вӧліны мӧд сиктын. Кодкӧ, дерт, отсасис налы.

Ӧтчыд арнас нин Петрӧван ветліс манастыр ягӧ кульны сюмӧд. Арнас сюмӧдыс бура кульсьӧ, кыдзи и тулысын. Ноксьыны вӧрас ковмис дыр, эз и тӧдлы, кыдзи матыстчис рыт. Сэтчӧ жӧ ещӧ зэрмис, сразу пемдіс, лоис гуын кодь. Кватитіс Петрӧван сюмӧд трубаяссӧ и мӧдӧдчис гортас. Локтіс сійӧ мельнича дорӧдз, аддзис: ӧшиняс дзузвидзӧ би. «Бур, неуна кӧть шойччышта сэні, варовитыштам Селькоыскӧд», — думыштіс Петрӧван. Матыстчис керка ӧшинь дорас, видзӧдліс пытшкас да сідзи и кынмис места вылас: керкаас пукалісны тӧдтӧм йӧз. И быдӧнлӧн — пищаль да винтовка. «Бандитъяс», — гӧгӧрвоис Петрӧван да уськӧдчис котӧртны сиктлань. Муртса удитіс котӧртны неуна, бӧрвывсяньыс кодкӧ горӧдіс: «Стой!» Эз на удит Петрӧван петны туй вылӧ, кыдзи кодкӧ шковгис-лыйис винтовкаысь. Пуляыс дзижнитіс Петрӧван юр весьтті. Тушаыс кӧ вӧлі ыджыдджык, сэки, гашкӧ, сылы пом жӧ лои. Чеччыштіс сійӧ бокӧ да вӧртіыс кытшлавны-чуклявны мӧдіс. А бӧрас лыйисны ещӧ ӧтчыд, мӧдысь, коймӧдысь. Но, дерт, эз веськавны. Кулӧма нисьӧ ловъя сійӧ локтіс гортас, шум кыпӧдіс. Да мый тӧлкыс: сиктын ни ӧти милиционер эз вӧв, ставныс мунӧмаӧсь бандитъясӧс корсьны мӧд сиктӧ. А найӧ татӧн вӧліны. Мужикъяс пуксисны вӧвъяс вылӧ да гӧнитісны мельнича дорӧ. Кытшалісны мельниклысь керкасӧ, кымыныськӧ пищальысь лыйисны ӧшиняс.

— Петӧй ӧружиетӧг! Ӧзтам керкасӧ, — горзісны пемыдас.

— Мунісны, мунісны найӧ, вир юысьяс! Ой, ой, пышйисны, — кыліс Сельколӧн гӧлӧсыс. — Ой-ой.

Колхозникъяс пырисны керкаас, а сэні Селько ӧтнасӧн. Куйліс сійӧ джоджас, кияссӧ кӧрталӧма мышкас вӧжжиӧн, вӧрзьыны оз вермы. Бандитъяс сизьдӧмаӧсь сылы чужӧмас, син ни пель оз тыдав.

— Ок-ок! Муртса эз вины, — лӧвтіс мельник. — Но и ёна жӧ нӧйтісны, мыйла ме колхозас пыри. Батьӧй пӧ тшӧктӧма.

— А кытчӧ мунісны? — юалісны колхозникъяс.

— Вӧрас, вӧрас кытчӧкӧ. Найӧ, сволочьяс, сулик кӧтасьӧмаӧсь... Косьтысьны пыралісны.

Перкоягчи сутки чӧж ветлӧдлісны, весиг дозоръяс сувтӧдалісны. Сэтчӧ тшӧтш милициялӧн отрядыс локтіс. Бара корсьысисны, быд пу улӧ пыралісны, а бандитъяслӧн некӧн дукыс эз вӧв.

— Да мый нӧ тайӧ сэтшӧмыс? — шензисны быдӧн. — Нюр пыдӧсас али мый олӧны?

— Абу ӧд васаяс найӧ...

Милиционеръяс ветлісны и нюр дорӧ, сэні корсьысисны, кытчӧдз эз вӧйлыны зыбунӧ. Но сэтысь бара некодӧс эз аддзыны. И некутшӧм след эз вӧв. Сӧмын ва булькакылӧ быдлаын. Сэтчӧ, другӧ, он пыр.

Арбыд милиционеръяс ветлӧдлісны манастыр гӧгӧр, арбыд мельнича дорын пукаліс засада, но сідзи и некодӧс эз кутны. Быттьӧ му пырыс прӧйдитісны.

Сӧмын комын витӧд воын лои ставыс гӧгӧрвоана: нюр сайын вӧлӧмаӧсь найӧ. Селько налы отсасьысьӧн вӧлӧма. И нӧйтлӧмаӧсь бандитъяс Селькоӧс сӧмын сы ради, мед эськӧ йӧзыс эз гӧгӧрвоны, коді васӧ гудыртӧ...

5

Поскыс вӧлі паськыд, ён. Петрӧван дед сутшкаліс сэтчӧ беддьӧн да сӧмын шензис: татшӧм поскӧдыс быдса полк вермас вуджны строевӧй шагӧн, а бандит чукӧр йылысь и сёрнитны нинӧм. Найӧ, кӧнкӧ, вой шӧра войын ветлӧдлісны сэті и некутшӧм шог эз тӧдлыны.

Ӧльӧш муніс водзын, восьлаліс повтӧг, зумыда. Тӧдчис, мый таті мунӧ оз первойысь. Сьӧд ваыс кӧть вӧлі чуть ли не пидзӧсӧдзыс, детинка эз и сувтлы, пыр муніс водзӧ. Петрӧван дед да челядь мунісны сы бӧрся. Мый вӧчсис челядь сьӧлӧмын, и висьтавны он куж. Налӧн вӧлі сьӧлӧм вылас сэтшӧм кыпыд, быттьӧкӧ найӧ восьтісны выль планета. И не сӧмын восьтісны, но и ветлісны сэтчӧ. А ӧні победаӧн локтӧны гортӧ...

— Дед, а дед!.. — то ӧтиыс, то мӧдыс шыасьлісны сы дорӧ. Но дед муніс чӧв олігтыр, весиг эз видзӧдлы. Сӧмын сэки, кор помассис поскыс да ставӧн петісны нюрӧ, старик негораа шуис:

— Ладнӧ, ладнӧ, бӧрын варовитам...

Зыбуныс, кытчӧ водзті челядь некор эськӧ эз лысьтны пырны, вӧлі ляпкыд: кок улын мыйкӧ бара вӧлі чорыд, лыбӧдіс эськӧ не сӧмын мортӧс, но и вӧлӧс. Но тырмымӧн вӧлі бокӧ вӧчны ӧти воськов и дед вӧйыштліс дука няйтас. Муртса сійӧ петіс чорыд визь вылас.

— Пежъяс! — видчис старик. — Туйсӧ векньыдӧс вӧчӧмаӧсь... Быттьӧкӧ, нарошнӧ...

— Дед, а коді тайӧс вӧчӧма? — юаліс Витя.

— Ладнӧ, бӧрын, бӧрын висьтала...

Но вот кок улын нин люлькъялысь эжа, вот и турун. А туруныс мыйлакӧ талявтӧм, некод эськӧ эз шу, мый таті ветлӧдлӧмаӧсь йӧз. Эз тӧдчы некутшӧм туй визь. Ветлӧдлӧмаӧсь, буракӧ, ёна видзчысьӧмӧн.

Ӧльӧш кытшовтіс сук бадь кустъяс, муныштіс эжӧр пӧвсті, коді веськыда быдмис ваас, и вӧлись сэки петіс чорыд му вылӧ. Петісны буретш сы весьтӧ, кӧні коркӧ сулавлӧма манастырыс. Мыйӧн петісны, Ӧльӧш бара видзӧдліс ӧтарӧ-мӧдарӧ, уськӧдчис дед дорӧ:

— Дедӧ, а дедӧ! Мый лоас?! Ме ӧд клятва сетлі, мый кувтӧдз некодлы ог петкӧдлы тайӧ туйсӧ! Енлы клянитчи!..

— Дугды! Тырмас йӧйтавныд! — горӧдіс дед. — Вай ӧдйӧджык гусьӧн мунам сиктӧ. Сэні ме тэнӧ дзеба... Дедыд оз и кут тӧдны, кытчӧ тэ вошин.

— А енмыс?

— А ми сылы — тьпу! Петкӧдлам пига, и — ставыс! Тэ думайтан, енмыс эм и мыйкӧ аддзӧ? Ок, другӧ, другӧ!.. Сійӧ, пиук, нинӧм оз аддзы, пӧрысьмӧма да синтӧммӧма.

Сиктӧ найӧ кайисны вӧрӧд, весиг куканьяс дінас эз кежавлыны. Пывсянъяс сайті кайисны град йӧрӧ, сэсся копрасигтыр, вӧръяс моз, пырисны льӧм пуяс улӧ, сэсся йӧр пӧлӧныс пырисны Петрӧван ӧшинь улӧ.

— Но вот и ставыс, — ышловзис старик. — Некод эз аддзыв, весиг ӧти син. Вай пыр амбарас.

Ӧльӧш кыв шутӧг пырис амбарӧ, уськӧдчис кымынь. Слабиник пельпомъясыс тіралісны. Детинка, тыдалӧ, бӧрдіс.

— Аддзылінныд, мый вӧчсьӧ му вылас? Ок-ок! — здук мысти варовитіс дед. — Интереснӧй делӧяс артмӧны. И вай, другъяс, катшаяс моз вомтӧ энӧ паськӧдлӧй, чӧв олӧй. Некодлы нинӧм энӧ висьталӧй. А ӧні неуна шойччыштӧй и котӧртӧй веськыда Выльгортӧ, сельсӧветӧ. Сэні висьталӧй Наган Наганычлы, мед ӧдйӧджык татчӧ локтӧ. Сідз и висьталӧй Наган Наганычлы, мый Петрӧван дед ӧні жӧ корис важнӧй делӧ кузя. Но, котӧртӧй. Мунігад кежавлӧй Панько кӧджӧ видз вылӧ, ытшкысьяс дінӧ. Корӧй мужикъяссӧ гортӧ. Мед чожа локтӧны. Аддзанныд, регыд рыт лоас, тэрмасьны колӧ... Марш!

Кор челядь петісны ӧградаысь, Петрӧван чукӧстіс Машаӧс. Нывка петіс керкасьыс, зымнитіс посводз ӧдзӧснас.

— Лӧсьӧд мыйкӧ сёйыштны... Ок и мудзи ме талун.

СТРАШНӦЙ ВИСЬТ

1

Час джын мысти Ӧльӧш пукаліс амбарын улӧс вылын да ырскис-паняліс пӧсь шыд, азыма курччаліс небыд нянь. Детинка сёйис тэрмасьӧмӧн, быттьӧкӧ поліс, мый сылысь мырддясны сёянсӧ, да сійӧ кольӧ бара тшыг. Петрӧван дед пукаліс сыкӧд орччӧн да жальпырысь видзӧдіс сы вылӧ. Сё дивӧ, кыдзи коньӧрӧй тшыгъялӧма!..

— Тэнад ӧмӧй сэні, нюр саяс, няньыс эз вӧв?

— Вӧлі эськӧ да банька дінас коли... Первойя войнас жӧ и коли, — висьтасис Ӧльӧш. — Воді кос турун вылӧ, куни синъясӧс, думайта... А сійӧ петіс вӧрсьыс, локтіс ме дінӧ... Но ме чеччышті и котӧртны...

— Коді петіс?

— А вӧрсаыс! Пуяссяыс ыджыдджык, пельпомъясыс паськыдӧсь и — тошка.

— Но, но, водзӧ висьтав... Да тэ сёй, сёй! Эн жалит няньсӧ. И шыдсӧ паняв. Со кольксӧ сёй... и йӧвнас, йӧвнас кылӧдав.

Ӧльӧшка сёйис и юис, син водзад кынӧмыс польдіс. Дедлӧн мелі сёрни вӧсна детинка такалыштіс, шочджыка пондіс дзоръявны ӧтарӧ-мӧдарӧ. Сёйис-висьтасис:

— Мӧйму дас кымын пӧч волісны гу вылас. Кык недель чӧж юрбитісны да вежа ваӧн коялісны ӧта-мӧдсӧ. Сэсся мунісны.

Мӧдысь старикъяс локтісны, кутшӧмкӧ висьысь детинкаяс. Ӧти детинкалӧн кок нырыс бӧрлань видзӧдӧ, мӧдлӧн — мышкас гӧрб петӧма. Бара гу дорас юрбитісны кык вежон, вежа ваӧн коясисны, бауӧн кысъясисны да енмыслысь шуд да здоровье кевмисны. Сэсся мунісны бӧр. А ӧти старик, ичӧтик тушаа, косіник, еджыд тошка, эз вермы муннысӧ, висьмис. Ставнас пыктіс, лӧзӧдіс, вӧрзьӧдчыны оз вермы. Но сэк дед и шуӧ сылы: «Эн пов, святӧй Еремей, ставыс бур лоас. Нуӧда ме тэнӧ гортӧ, пывсьӧда, молитва лыддьӧда, вежа ваӧн юктӧда — и бӧр бурдан...»

Дедӧ босьтіс сылысь нопсӧ, сетіс меным. Сэсся босьтіс сійӧс моздорас да нуны мӧдіс, кагаӧс моз. Мӧдыс сьӧкыда киргис-лолаліс, зэв нин слаб вӧлі, но аттьӧавны вермис на. Ну, шуӧ, менӧ гортад, сувтӧд кок йылӧ.

Ми мунам, мунам. Дедӧ водзын восьлалӧ, а бӧрвылас ме муна, нопторсӧ кыска. Локтім ты шӧрас. Сэки и дедӧ уськӧдіс стариксӧ ваас. Ме зэв ёна повзи. «Мый водзӧ лоас?» — юалі ме. А дедӧ мудера серӧктіс да вочавидзис меным: «Лолыс сылӧн сӧстӧм вӧлі, югыд — райӧ каяс... А лыясыс и тані вермасны сісьмыны... Важӧн нин кад сылы...» Петім берегӧ, кустъяс костӧ пырим. Сэні дедӧ восьтіс стариклысь нопсӧ да перйис сэтысь кутшӧмкӧ ичӧтик ӧбраз. «Святӧй тайӧ ӧбразыс, доныс сылы абу... Рисуйтӧма божъя матерсӧ ыджыд мастер, а рамкаыс аддзан — чистӧй зарни», — висьталіс дед. Но ме сэки гӧгӧрвои: нарошнӧ стариксӧ уськӧдіс ваас, ловйӧн нюйт пиас вӧйтіс. Ме думайта, тайӧ старикыс и петавліс ме дінӧ войяснас.

— Висьтась, висьтась...

— А таво кыкысь пӧчьяс волісны карсянь. Ставныс тай манашкаяс кодьӧсь-а. Бара юрбитісны, вежа ваӧн киськасисны. Ӧтчыд страшнӧй старука воліс. Карса попыс сылы тшӧктӧма вӧрсьыс гусӧ вежа ваӧн киськавны. А сэтчӧ неважӧн на ещӧ ӧти пӧч воліс, юӧр вайис: вӧрас пӧ антихристъяс локтӧны, нюр сайӧ туй корсьӧны...

— А, тайӧ изыскательясыс? Кывлі ме, пиук, кывлі... но, но, висьтав водзӧ...

А детинка и кортӧгыс ачыс висьтасис. Ӧні, буракӧ, сійӧ и ачыс гӧгӧрвоис, мый ылӧдчыны сэсся оз вермы, и сёрнитіс тэрыба:

— Попыс тшӧктӧма дзебны кевмысьяссӧ, петкӧдны нюр сайысь да мӧдӧдавны гортас. Мед пӧ некод оз тӧдлы... Кор пырасны антихристъясыс нюр саяс, мед нинӧм оз казявны. Сэні, дедӧ, вӧрас кӧнкӧ землянкаяс пӧ эмӧсь, а землянкаясас — манастырлӧн эмбурыс.

Дедӧ войбыд долис сійӧ пӧчыслы, мый землянкасӧ и ачыс лешакыс оз аддзы. Сёрнитісны гусьӧн, но ме ставсӧ кывлі.

— А гуас коді? Абу-ӧ Исидор батюшко?

— Сійӧ пӧ. Кувлӧма коллективизацияӧдз на... Ӧні гусӧ святӧйӧн шуӧны. А сы весьтын весиг крестыс абу, сӧмын пӧрӧм кос пуяс да лӧп. Но вот, ми дедкӧд петкӧдім пӧчьяссӧ, вотчысьясӧс моз, колим вӧрас — мунӧ гортаныд, енмыс отсалас... А ӧти пӧч, медся страшнӧйыс, кодлы тшӧктӧмаӧсь гусӧ киськавны, бара висьмис, мыр моз куйлӧ: тыдалӧ, кынмӧма нюрас.

Дед водтӧдіс сійӧс банькаӧ, кутшӧмкӧ лекарство сетіс да шуис:

«Петкӧда тэнӧ, матушка, войнас гортӧ...» Да эз удит петкӧднысӧ. Рытнас буретш локтісны найӧ, кодъяс туйсӧ корсьӧны. Сэки дедӧ мем шуис: «Ме ылӧда антихристъяссӧ, пыді вӧрӧ пырта, а тэ сэк кості дзеб старукасӧ»... А ме ӧмӧй лысьта? Ме ӧткажитчи: мися, ӧтнам ог мун, кӧть юрӧс керышт.

— Сідз, пиук, сідз... И мый жӧ водзӧ?

— А мый? Нӧйтіс дед, пӧшти лов петтӧдз, вины кӧсйис. Кытчӧ воштысян? Сідзи и тадз кувны...

— Тэ тайӧс и кӧсйин висьтавны тӧндзи, кор пыралін ме ордӧ?

— Мый нӧ? Ме важӧн нин кӧсйи висьтавны да эг лысьт. Эг ӧд ӧтчыд святӧй крестсӧ окавлы...

— Да-а... Эз ков нюжӧдны. Важӧн колі висьтавны. Гашкӧ, сэки и делӧыс мӧд нога вӧлі... Дедтӧ эськӧ важӧн нин кутісны. Ок, Ӧлексеюшко, мыйӧдз тэнӧ вайӧдӧмаӧсь!..

Петрӧван ӧшӧдіс юрсӧ, мыйкӧ дыр думайтіс. Ӧльӧш сёйис ставсӧ, мый вӧлі водзас, да пондіс сійӧс сутшиктӧдны. Сэсся ӧшӧдіс жӧ юрсӧ... Тыдалӧ, унзільыс босьтіс.

Ӧшинь улын ветлӧдліс Маша. Нывкалы зэв вӧлі окота тӧдны, кодкӧд амбарас дедыс сёрнитӧ, но ӧдзӧс дорас эз лысьт матыстчыны.

— Но и мый сэсся? Бурдіс святӧйыс? — кыпӧдіс юрсӧ Петрӧван.

— Ог тӧд. Кор ме лӧсьӧдчи вуджны нюр саяс, дедӧ сетіс со тайӧс, — Ӧльӧш перйис зепсьыс ичӧтик сулея, — да тшӧктіс юктавны висьысьсӧ... А сэні гут кулан тшакысь настойка, настӧящӧй яд. Ачым аддзылі, кыдзи сійӧс дед кольӧм во вӧчис... Юктав, шуӧ, старукасӧ, и сійӧ кокъяссӧ нюжӧдас. Сэки, шуӧ, орӧд сьылісьыс пернасӧ, босьт нопсӧ да дзеб лӧп улӧ... А асьсӧ, шуӧ, старукасӧ кыскы нюрӧ да шыбит зыбунас...

— Со ӧд! А мыйла?

— Пернаыс пӧ сылӧн зарниысь. А нопъяс — святӧй крест, зарни жӧ... Ставыс, шуӧ, миянлы коляс. Ми пӧ медозырӧсь сэки лоам. Кор, шуӧ, антихристъяслӧн вӧляыс оз ло, сэки ми выль манастыр стрӧитам, медыджыднас сэні лоам. А ме эг пырав банькаас старукаыс дінӧ. Некыдз эг вермы. Сӧмын на локта, а сэні старикыс сулалӧ, сразу жӧ синъяс пемдісны... Весьӧпӧри, дед. Садьӧй быри...

— Повзян, дерт, — шуис дед. — Сэтӧн кӧть коді повзяс... Ок и йӧз!.. Отеч Исидор тӧдӧма, кодӧс кольны видзны эмбурсӧ. Бандит — бандит и эм.

2

Петрӧван — пӧрысь морт, важ салдат. Аслас кузь нэмын сійӧ унатор аддзыліс, бурсӧ и лёксӧ. И тайӧ суров мортыс кужис асьсӧ кутны быдлаын, вермис кывзыны любӧйӧс, не торкавны, не скӧравны, не шензьыны. Пукалӧ и кывзӧ. И ставыс.

Но талун, кор кывзіс Ӧльӧшлысь шуштӧм висьтсӧ, дедӧс весиг йирмӧг босьтіс, муртса вермис пукавны места вылас. Сылы ӧні кажитчис, мый веськалі мӧд мирӧ... А ӧд оліс ӧти сиктын... Сійӧ ачыс повзис, мый милиционер Наган Наганыч оз верит челядьыслы, оз лок татчӧ, медым кутны Пельтӧм Селькоӧс, и сійӧ бара коляс ӧтнасӧн тайӧ гӧгӧрвотӧм мирас. Дед муртса вермис кутны асьсӧ. И мед эськӧ такалыштны, сійӧ ӧні тэрмӧдліс Ӧльӧшӧс. А Ӧльӧш кымын унджык висьтасис, гӧлӧсыс сымын лоис чорыдджык. Да синъясыс эз нин югъявны полӧмӧн.

— А поссӧ, поссӧ коді стрӧитлӧма? — юаліс дед.

Ӧльӧш и тайӧс тӧдіс.

— Манакъяс вӧчлӧмаӧсь. Мӧйму миянын узисны кутшӧмкӧ кык старик и найӧ дыр сёрнитісны дедкӧд тайӧ пос йывсьыс. А ме куйлі паччӧрын да ставсӧ кывлі. Манакъяс пӧрӧдӧмаӧсь кыз ниа пуяс, йитӧмаӧсь найӧс кутшӧмкӧ гуся томанӧн и лэдзӧмаӧсь ваас кӧзлаяс вылӧ. Абу ӧти во уджалӧмаӧсь, абу ӧти манак сэтчӧ вӧйӧма. Революцияӧдз на вӧчӧмаӧсь, а пуясыс ӧнӧдз на ёнӧсь. Ваад прӧстӧй пуыс оз сісьмы, непӧштӧ ниа.

— Тайӧс ме тӧда... Ачым тӧда, пиук... Сӧмын некыдз ог гӧгӧрво, мыйла манакъяслы ковмис вӧчны тайӧ страшнӧй уджсӧ! Тыыс ӧд абу векни, гашкӧ, верст джын лоас. Да и ты саяс тина, зыбун. И сэні эз вӧв кокни уджавнысӧ...

— Отеч Исидор поссӧ тшӧктӧма вӧчны. Веруйтысьяслы сійӧ кутшӧмкӧ чудо кӧсйӧма петкӧдлыны. Кыдзи Христосыс море кузя, быттьӧкӧ косінӧд, Иорданьӧ ветлӧма. Ылӧдлӧма йӧзсӧ, медым найӧ унджыкӧн волісны манастырас, чудосӧ видзӧдлыны...

— Аттӧ, аттӧ! Но и шарлатан! — эз вермы кутчысьны старик. — Буракӧ, сідз: отеч Исидор пырас ваас, мунас пос кузя да петкӧдлас веруйтысьяслы чудо... Да, нинӧм он шу!..

— Но петкӧдлынысӧ абу удитӧма, революция суӧма, — водзӧ висьталіс Ӧльӧш. — А поскыс все равно сгӧдитчӧма: поскӧдыс манакъяс вуджӧдӧмаӧсь манастырыслысь став эмбурсӧ нюр саяс да дзебӧмаӧсь гуся местаӧ.

— А асьныс манакъяс бандитъясӧн лоӧмаӧсь. Тайӧс тӧда ме, пиук. И дедыд тэнад служитіс налы, мыйта вирсӧ йӧзыслысь юис.

— Юис, тыдалӧ. Ме чайта, и мамӧс сійӧ виис. Пыр ме та йылысь думайта. Найӧ ӧд, мамӧ да дедӧ, абу лӧсявлӧмаӧсь, пыр пӧ видчылӧмаӧсь, мый менӧ дедӧ вичкоясӧд новлӧдлӧма.

— Сідз тайӧ вӧлі, сідз... Эз лӧсявлыны. Мамыд ирӧдӧн дедтӧ шуліс. А ми та йылысь эг и думыштлӧй. Вермас лоны, сійӧ збыль виис мамтӧ. Гашкӧ, мамыд кутшӧмкӧ гусятор тӧдмаліс да кӧсйис йӧзӧдны, висьтавны йӧзыслы. Ок-ок-ок!.. Вермас лоны... А ми олім сыкӧд орччӧн и ӧнӧдз нинӧм эгӧ тӧдлӧй. Со ӧд, кыдзи артмис. И тэ бур жӧ... Ставсӧ тӧдін и мыйла ӧнӧдз чӧв олін? Мыйла?

— Виис эськӧ сразу... Дед сідзи и шуис: висьталан кӧ кодлыкӧ, юртӧ орӧда. Тайӧ пос йывсьыс тӧдам сӧмын тэ да ме, сэсся некод. Дедӧ и ӧні на енлы кевмысьяссӧ вуджӧдлӧ нюр саяс, сӧмын пемыд войясын, мед не петкӧдлыны, кӧні поскыс. Бӧрсӧ петкӧдӧ войяснас жӧ, кор найӧ окаласны святӧй ӧбраз да сетасны клятва некодлы не висьтавны, кӧні поскыс. Локтасны веруйтысьяс манастыр ягӧ, быттьӧкӧ вотчыны, паныдасясны дедкӧд, сетасны сылы уна деньга, а сійӧ и нуӧдӧ гуыс дорӧ. А вотчысьяссӧ, — найӧс дедӧ мазіясӧн шуӧ, — карысь татчӧ поп мӧдӧдӧ. И мӧдӧдӧсӧ оз быдӧнӧс, а медся вернӧйяссӧ, кодъяс оз кутны висьтасьны.

Ӧльӧш чӧв олыштіс, шойччыштіс.

— И тайӧ поссӧ дедӧ шуӧ ен туйӧн. Сійӧ, шуӧ, вердӧ-юкталӧ миянӧс, деньга сетӧ. Нюр саяс манастырлӧн эмбурыс, гашкӧ и став зарниыс на сэні... А зверь-пӧткаыс мыйта!.. Йӧраяс быдса табунӧн ветлӧдлӧны. Арнас, кор нин кынтӧ, дедӧ виӧ дас кымын йӧра... И ставсӧ тӧдсаясыс пыр вузалӧ карӧ да леспромхозӧ. Тӧвнас йӧраяссӧ сійӧ турунӧн ылӧдлӧ. Ытшкас гожӧмнас, солалас турунсӧ, и йӧраясыс сэтчӧ велалӧны. И мазі позъяс зэв уна. А деньгаыс сылӧн, кӧнкӧ, мешӧк тыр. Меным пыр шуӧ: отсась меным, ло ме кодь жӧ. Кор, шуӧ, кула, ставыс тэныд кольӧ. И ен туйыс тшӧтш. А висьталан кодлыкӧ — смерть.

— Сідз, пиук, сідз... Виис эськӧ, пӧжалуй, тэнӧ... Но ӧні... Ӧні киясыс сылӧн дженьыдӧсь. Регыд локтас Наган Наганыч...

Петрӧван водтӧдіс Ӧльӧшӧс, шебрӧдіс пасьӧн, тшӧктіс узьыштны. Сійӧ лӧня водіс. Висьталіс ставсӧ, мый тӧдіс, и ланьтіс. Быттьӧ сьӧкыд из пельпом вывсьыс шыбитіс.

3

Нюрсьыс петігӧн на Серёжа казяліс, мый сьӧлӧмыс мыйыськӧ заводитіс гудрасьны. Быттьӧ лэчыд ныра кутшӧмкӧ гаг пырис сы морӧсӧ да йирны кутіс сьӧлӧмсӧ. Гагйыс веглясис, чуткасис, юис вирсӧ...

Серёжа, кыдз вермис, кӧсйис мездысьны сыысь, думайтіс кутны сійӧс, талявны кок улас, а сійӧ пыр ёнджыка и ёнджыка ёнтіс да йирис сьӧлӧмсӧ... Мый тайӧ? Первой сьӧлӧмас чуткасис, а сэсся юр вемас кучкис, кутіс розьӧдлыны быттьӧ напаръяӧн.

Веськыда кӧ шуны, Серёжалы друг кутіс кажитчыны, быттьӧкӧ сылысь мыйкӧ гусялісны. Мый гусялісны? Первойсӧ кажитчис, мый гусялісны неуна, а бӧрынджык вошанторйыслӧн ыдждаыс пыр содіс и содіс.

Мый нӧ тайӧ? Коді гусяліс? Витя!

Да, Витя, сылӧн другыс! Буретш сійӧ, кодӧс нуӧдіс тшӧтш Пыдӧстӧм нюр сайӧ.

«Мыйла ме сійӧс босьті? — ассьыс юасис Серёжа. — Мыйла? Ӧні сійӧ быдлаын кутас ошйысьны, мый ставсӧ вӧчис ӧтнасӧн. И сылы веритасны. Дерт жӧ, веритасны. Витяӧс баквалӧн да асьсӧ ошкысьӧн некод на эз шулы, а сійӧс, Серёжаӧс, Порсев Васька гоз-мӧдысь нин шуліс. Кор висьтала, мый Пыдӧстӧм нюр саяс ме лӧсьӧдчи ӧтнамӧн мунны, меным оз веритны, бара шуасны баквалӧн. А Витялы веритасны.

Эк-эк-эк! Кыдзи нӧ та йылысь Серёжа водзвыв эз думышт? Вот сісь юрыд! Сійӧ вермис Витялы сетӧбтны гӧрбас и вермис эськӧ мунны ӧтнасӧн. Сё пӧв бурджык эськӧ вӧлі... Став славаыс сылӧн эськӧ ӧтнаслӧн вӧлі. Сэк эськӧ... Эк?!

Локтігас тадзи думайтіс Серёжа. А Витя, буракӧ, немтор йылысь эз думайт. Ӧні сійӧ котӧртіс туй кузя, тэрмасис ӧдйӧджык воны Панько кӧджӧ. Серёжа, коді радейтліс век мунны водзын, ӧні вермис муртса вӧтчыны Витя бӧрся: тыдалӧ, морӧс пытшкас пырӧм гагйыс торкасис. Сылы окота вӧлі кутны другсӧ, кутны морӧсӧдыс да сідз тракнитны, сэсся лӧсӧбтыны пель бокас, мед эськӧ пеляс музыка кутіс ворсны: эн пӧ вӧтчы ме бӧрся.

И мый чайтан? Клёнӧбтіс эськӧ, эз кӧ Петрӧван дед сет налы важнӧй мог. Могыс збыльысь вӧлі важнӧй, и сійӧс колӧ вӧлі вӧчны.

Мый кӧть эз вӧв, а колӧ вӧчны!

Та вӧсна Серёжа эз кут тышкасьны. Дышпырысь котӧртіс Витя бӧрся.

Панько кӧджӧдз локтісны ӧдйӧ. Найӧ корсисны бригадирӧс, Пиля Степанӧс, да, ӧта-мӧдсӧ торкалігтыр, висьталісны сылы, кутшӧм чушканзі поз аддзисны талун Пыдӧстӧм нюр сайысь. И сёрни-баснинас, дерт, ылалісны, весиг эз и казявлыны, кыдзи на дінӧ кутісны чукӧрмыны ытшкысьяс. Первойӧн локтіс Витялӧн батьыс, сэсся Серёжалӧн мамыс, а на бӧрын и мукӧдъяс.

— Тэ нӧ мый татысь корсян, нем уджтӧм, а? — Серёжа кыліс мамыслысь гӧлӧссӧ. — Бара нин тӧвсӧ чужъялан?

— Тэ нин ланьтлы, Марпа, — ӧлӧдіс сійӧс Пиля Степан. — Детинкаясыс делӧ висьтасьӧны. Но-но, но-но, мый сэсся? — сійӧ бӧр бергӧдчис челядьлань.

— Но ми петім кушинас, а сэні зорӧд... Матыстчим зорӧд дорас, а сэні Ӧльӧш узьӧ, — висьталіс Витя.

— Сійӧ дзормӧма, Степан дядь. Юрыс дзик еджыд, старик кодь лоӧма, — содтіс Серёжа.

Сэки сӧмын найӧ казялісны, мый йӧзыс чукӧрмисны уна, и быдӧн кӧ кутас юасьны, кыдзи да мый вӧлі, кадыс кольӧ. А Петрӧван дед тшӧктіс зіля котӧртлыны...

— Степан дядь, ми ог эштӧ. Ӧдйӧджык колӧ сиктӧ мунны, Петрӧван дед корис. А ми милиционерла котӧртлам. Ми регыд...

Бригадир тшӧктіс кымынкӧ мужиклы верзьӧмӧн гӧнитны сиктӧ, а ачыс уськӧдчис мотоцикл дінӧ.

— Пуксьӧй бӧрладорӧ кыкнанныд! Тэрыбджыка! — горӧдіс детинкаяслы.

Нывбабаяс сулалісны зорӧд дорын да шензисны-юасисны ӧта-мӧдыслысь.

— Мый нӧ лоӧма? Кӧні?

— Пыдӧстӧм нюр сайӧ пӧ ветлӧмаӧсь, а сэтысь пастук Ӧльӧшӧс аддзӧмаӧсь.

— Сё Кристос! Да мый нӧ тайӧ? Пыдӧстӧм нюр сайӧ?..

Мутиыс кӧ нин вӧчис тайӧс-а...

Но кык друг эз нин кывны бабаяслысь шензьӧмсӧ. Найӧ вожасисны седлӧ вылас, а бригадир — раз, раз, раз! — кокнас тракнитіс куимысь, моторыс мӧдіс жургыны сэтшӧм гораа, мый нинӧм эз понды кывны. Бригадир петкӧдіс машинасӧ трӧпа вылӧ, сэсся туй вылӧ, содтіс газсӧ, и машинаыс, кыдзи бура вердӧм вӧв, тӧвзис Выльгортлань.

Эк, аддзыліс кӧ эськӧ ӧні Витяӧс Маша Модянова, синсӧ эськӧ чашкӧдіс, вомсӧ восьтіс... О-о! А Серёжа думайтіс мамыс йылысь. Тӧв пӧ чужъялан! Сідзи кӧ эськӧ вӧлі? Бригадир ачыс мотоцикл гӧняйтӧдӧ. Ӧні, небось, вунӧдан картупель йывсьыд.

Шудаӧсь вӧліны кык друг, зэв шудаӧсь. Сӧмын Наган Наганычысь неуна полыштісны. Шутка ӧмӧй — милиционер дорӧ мунӧны. Кыдзи сійӧ встретитас, мый шуас? Выльгорт сиктсӧвет пасьталаын, быд деревняын, весиг узиганыс быдӧн аддзӧны милиционерӧс, полӧны сыысь. Шедан кӧ сылы, он мын. Оз ӧд прӧста шуны Наган Наганычӧн.

Война водзвылын на Иван Иванович Петухов локтіс районысь Выльгорт сиктӧ участкӧвӧйӧн. Сэки сійӧ вӧлі томиник на, тэрыб вӧраса, мича чужӧмбана. Кытчӧ кӧть эз ветлы, сьӧрас сылӧн век вӧлі наган. Сёрнитлісны сэки, мый сиктъясын пӧ паныдасьлӧны кутшӧмкӧ пышъялысь йӧз — милиционерлы нагантӧгыс некыдз оз позь.

Ӧтчыд коркӧ Иван Иванович кутас код юра хулиганӧс, вайӧдас сельсӧветӧ. Хулиганыд кутас шашаритчыны, горзыны, кулакъяснас ӧвтчыны, а милиционер сылы мыччӧдлас нагансӧ.

— Тайӧс аддзан он? Тӧдан он, мый тайӧ сэтшӧмыс? Тайӧ — на-ган! Гӧгӧрвоин?

Хулиганыд ӧвсяс. Иван Иванович тшӧктас сылы пуксьыны пызан дорӧ, водзас пуктас бумага лист, киас сюйыштас карандаш.

— Гиж вай! Да ӧдйӧджык, мый вугралан? Гиж: на-г-ан. Гижин?

А ӧні лыддьы водзсяньыс и бӧрсяньыс... Но, мый артмис? А? Гӧгӧрвоин, кутшӧм сійӧ чачаыс? И водзсяньыс и бӧрсяньыс — всё равно — наган! А тэ кулакъясӧн шенасян, яндысьтӧм бугыль!

Сэки, не сӧмын хулиганыс, но и ставӧн, кодъяс вӧлӧмаӧсь сельсӧветас, чуймасны. Кыдз нӧ сідз? Водзсянь лыддян — наган, бӧрсянь — бара наган. Збыльысь тешкодь чача. Буракӧ, уважайтны сійӧс колӧ. И мед уважайтны, йӧзыс милиционерлысь ӧружиесӧ кутасны шуны Наган Наганычӧн. Да и аслыс Иван Ивановичлы сибдас тайӧ нимыс. Ӧнӧдз сідз шуӧны, кӧть и сійӧ ёнджыкасӧ ветлӧдлӧ ӧружиетӧг. И некод оз тӧд, коднысӧ сідз ыдждӧдлӧны: то ли ӧружиесӧ, то ли сылысь кӧзяинсӧ. Коркӧ ковмас кӧ, век шуӧны: корӧй пӧ Наган Наганычӧс.

Со кутшӧм Выльгорт сиктын милиционерыс!

Мӧйму Витя, Серёжа да ещӧ кымынкӧ детинка заводитлісны мунны колхознӧй град йӧрӧ гоз-мӧд ӧгуреч гусявны, но дум выланыс уси Наган Наганыч да джын туйсяньыс бӧр бергӧдчисны гортланьыс.

Интереснӧ, мый сійӧ шуас талун?

Милиционер встретитіс найӧс бура. Пукаліс сійӧ кильчӧ вылас да буретш весаліс нагансӧ, чышкаліс рузумӧн да мавтіс мыйӧнкӧ. Бригадир кутліс сылысь кисӧ, мыйкӧ вашнитіс пеляс. Иван Иванович, читкыля уска, паськыд морӧса (дзик багатыр кодь!) сідзи чеччыштіс кок йылас, горӧдіс гӧтырыслы керкаас:

— Наталья! Петкӧд вай тасма да кобура. Да зільджыка тэ!..

Гашкӧ, эз на коль и минута, а Иван Иванович Петухов удитіс нин тасмаасьны. Нагансӧ сюйис кобураас, муніс мотоцикл дорӧ да заведитіс сійӧс.

— Эй, герой! — горӧдіс Витялы. — Пуксьы бӧр вылӧ!

Но вот заводитчӧ!.. Кыдзи думайтіс Серёжа, сідзи и лои. Витяӧс шуисны геройӧн, а сійӧс некод на эз шулы геройӧн. Эк! Кыдзи нӧ тайӧс позьӧ терпитны? Тадз оз артмы! Мыйкӧ колӧ вӧчны...

Сьӧкыд вӧлі Серёжалы. Ой, кутшӧм сьӧкыд!

А Витялы вӧлі нимкодь, вомыс шердын пасьта — нюмъялӧ. Сійӧ ур моз чеччыштіс-пуксис милиционер мотоцикл вылӧ, ляскысис седлӧ бердас...

Но вот кыкнан машинаыс петісны туйӧ. Найӧ лэбисны тӧвныр моз, ӧти здукӧн локтісны Перкоягӧ. Выльгортсянь Перкоягӧдз дас кымын километр, гашкӧ, лоас, а туйсӧ эз и казявлыны.

Ӧти бӧрся мӧд, ыджыд шумӧн журӧдісны Петрӧван керка дорӧ. А сэні найӧс виччысисны нин мужикъяс. Ӧгрӧпена баб мыйкӧ жӧдзӧ места вылас, Петрӧван дед места оз аддзы. И мый главнӧйыс — Маша Модянова сэні жӧ. Кыдзи думайтіс Витя, сідзи и артмис: Маша сулаліс шемӧс, восьтӧма вомсӧ.

Мед, колӧкӧ, шензьӧ! Мед трусыс вылӧ видзӧдӧ!

4

Мужикъяс пырисны керкаӧ, заводитісны сэні мыйкӧ сёрнитны. Наган Наганыч тшӧктіс садьмӧдны Ӧльӧшӧс, коді кулӧм морт моз крепыда узис амбарын. Петрӧван дед поліс, мый детинка повзяс, няргыны кутас. Но детинка садьмис ӧдйӧ, тільыштіс синъяссӧ да юаліс:

— Милиционерыс локтіс нин?

— Локтіс, локтіс, пиук. Тэ эн пов сыысь. Сійӧ шань морт, — меліа сёрнитіс старик. — Тэ ставсӧ сылы бура висьтав. Кылін? Ставсӧ висьтав. Сэки дедтӧ ӧдйӧ кутасны.

— Ставсӧ висьтала. Тырмас сэсся терпитны, — вочавидзис детинка да зумыд воськовъясӧн пырис керкаас. Недыр и быттьӧ узьыштіс, а дзикӧдз вежсьӧма: оз тірав, оз чушкы нырнас, оз няргы.

Кор милиционер да колхозникъяс сёрнитісны керкаын Ӧльӧшкӧд, Витялӧн да Серёжалӧн вӧлі асланыс сёрни. Веськыда шуны, найӧ эз сёрнитны, а вензисны. И кыдзи колӧ вӧлі чайтны, заводитіс, дерт, Серёжа.

— Мый нӧ сідз вашъялан, небесасьыс кодзув али мый судзӧдін?

— Кодзув? Мыйла сійӧ меным?

— Мыйла? Тӧда ме тэнӧ. Ӧні кутан бовгыны ставыслы: «Ме да ме... Ме первойсӧ висьталі, мый Пельтӧм Селькоыс да пӧчыс лёк йӧз... Ме первойсӧ шуи, мый колӧ ветлыны нюр саяс...»

Витя, вежӧра детинка, пыр жӧ гӧгӧрвоис, кытчӧ синӧ сылӧн другыс. Гӧгӧрвоис и шпыннялігтыр шуис:

— Эн пов... Ме некодлы ог висьтав.

— Он, дерт... Тӧда ме тэнӧ... Вай клянитчы!..

— Мыйла клянитча? Раз шуи ог висьтав, сідзкӧ, ог висьтав. Эн пов... Менам ӧд характер жӧ аслам эм!..

Веритӧй кӧть энӧй, а Витя сідзи и крапкис: «Менам ӧд характер жӧ аслам эм!»

И кор крапкис тадзи, пыр жӧ казяліс: збыль сылӧн аслас характер эм. И сылы лои сэтшӧм кокни да лӧсьыд!

Витя нюмъяліс.

Серёжа бытшкаліс сійӧс синъяснас. Первойсӧ эськӧ эз кӧсйы. Весиг эз кӧсйы вензьыны, но кытчӧ воштысян, кор гагйыс йирӧ сьӧлӧмсӧ.

Сійӧ эз ӧшйы инас, колӧ мыйкӧ вӧчны...

Сылы ещӧ на лёкджык лоис, кор на дінӧ локтіс Маша Модянова да висьталіс:

— Серёжа, ме мыськалі тэнсьыд пестертӧ. Няйтыс сэні вӧлі быдса пуд. Тӧдан, мый аддзи няйтсьыс? Трубка, каллян! Тэ нӧ мый, куритчан?

Серёжа ыпнитіс-гӧрдӧдіс, но нинӧм эз шу. Сэки Маша юаліс Витялысь:

— Сійӧ каллянӧн куритчӧ?

— Ещӧ мый? Кыдз нӧ позьӧ куритчыны? Оз, Серёжа оз куритчы. Калляныс нюр сайын сюри. Кодкӧ воштӧма.

— Зэв мича калляныс. Чӧртыс зэв мича и. На, Серёжа, казьтывны коркӧ кутан. Ме сійӧс мыськи жӧ.

Маша сетіс Серёжалы волшебнӧй каллянсӧ. Мӧдыс тэрыба сюйис сійӧс зептас. Код тӧдас, гашкӧ, коркӧ сгӧдитчас на.

Сійӧ скӧрысь видзӧдліс Машалань, но шуны — нинӧм эз шу. А Машалы зэв окота вӧлі панны сёрни да тӧдмавны, мый век жӧ детинкаяс аддзылісны нюр сайысь.

— Мыйла нӧ менӧ колинныд? Ме эськӧ ветлі жӧ, — эз лэдзчысь Маша.

Витя сотыштіс синъяснас, а Серёжа дивитӧмӧн юрсӧ довкйӧдлыштіс, быттьӧкӧ висьталіс: но и но.

— Тэ — нюр сайӧ? — серӧктіс Витя. — Сювйыд зэв на вӧсни.

Дзуркнитіс-воссис ӧдзӧс и посводзӧ петісны мужикъяс. Первойӧн Наган Наганыч, а сы бӧрын и мукӧдыс.

— Кӧин — кӧин и эм. Сыкӧд колӧ збоя... — шуис Наган Наганыч. — Мыйта нин сійӧ менӧ ылӧдліс. Ӧні оз мын. А пӧчсӧ, пӧчсӧ... кыдз нӧ ми сійӧс лэдзим! Кутны эськӧ да юавны сылысь, коді сійӧс татчӧ ыстіс...

Милиционер вӧлі стрӧг. Синъясыс сідзи и югъялісны, чужӧмыс — решительнӧй. Абу ӧд шутка... Ӧнӧдз пыр на воюйтліс сӧмын вӧръяскӧд да хулиганъяскӧд, а тані — настӧящӧй враг, пӧрысь бандит Пельтӧм Селько. Куш киясӧн сійӧс он кут.

Наган Наганыч пыртіс мотоциклсӧ ӧграда сайӧ, мужикъяс лэдзалісны вӧвъяснысӧ йирсьыны. Шуисны мунны подӧн, медым не кыпӧдны лишнӧй шум.

— Но, Алёша, петкӧдлы вай туйсӧ, — корис милиционер.

Ӧльӧш петіс водзӧ, збоя мӧдӧдчис...

— Ме тіянкӧд нинӧмысь ог пов, — сӧмын шуис сійӧ.

Мужикъяс мӧдӧдчисны сы бӧрся.

— А ми? — повзис Витя. — Кольӧны миянӧс али мый?

— Кольӧны миянӧс, челядь. Мудзинныд пӧ ті, шойччыштӧй, — шыасис Петрӧван дед. — Ті ичӧтӧсь на, а ме пӧрысь нин, а врагыс — страшнӧй. Миянӧс эз босьтны боевӧй задание вылӧ. А коркӧ вӧвлі... А коркӧ медводзын ме тӧвзьывлі... Но, да ладнӧ, — помаліс дед.

Вот тэныд и на! Кыдз нӧ сідз артмӧ?

Ӧбидитчӧмысла Витялӧн доршасис синваыс, тіраліны нырбордъясыс. И эз кӧ вӧв на дінын Маша Модянова, гашкӧ эськӧ, сыркъялӧмӧн бӧрддзис. Но Маша сулаліс сэні, и Витя эз лысьт: яндзим вӧлі. Нинӧм эз шу и Серёжа. Мӧдарӧ, сійӧ быттьӧкӧ ӧні радліс. Весиг кыдзкӧ тешкодя нюммуніс, но бара нинӧм эз шу. Витя сэки гӧгӧрвоис, мый другыслӧн юрас чужис кутшӧмкӧ выль мӧвп. Интереснӧ, мый сійӧ думыштіс?

Видз вылысь локтісны нывбабаяс. Вӧрысь локталісны и мӧсъяс. Мӧсъясыс гораа баксісны, корисны ӧдйӧнджык лысьтыны найӧс. А нывбабаяс быттьӧ вунӧдісны на йылысь. Ставӧн чукӧртчисны Петрӧван дед дорӧ да помся юасисны:

— Дед, мый лоис, мый?

— Исус Христос, ставыс-ӧ ладнӧ?

— Ставыс лючки-ладнӧ. Ӧні ставыс лючки-ладнӧ лоас. Кутасны Пельтӧм Селькоӧс — пӧрысь кӧинӧс — и ставыс бур лоас, — тошсӧ малалігтыр шуаліс дед.

Старик дженьыда висьталіс нывбабаяслы, мый аддзылісны вӧрас да нюрас. Нывбабаяс шлапйӧдлісны бокъясас, шензигтыр видзӧдлывлісны ӧта-мӧд вылас.

— Сідзкӧ, Селькоыс бандит вӧлӧма?

— Ок-ок-ок!

— Бандит вӧлӧма! И мудер, дявӧлыд! Нэм чӧж оліс миянкӧд орччӧн, а ми думыштны эгӧ лысьтлӧй та йылысь. Оз ӧд прӧста шуны: мудерыд пӧ нинӧмсьыс гез кыас.

Кытысянь кӧ локтіс Серёжалӧн мамыс, кватитіс детинкаӧс киӧдыс, да пувк-павк кыскис гортас. Ӧгрӧпена баб сы вылӧ видзӧдӧмӧн уськӧдчис варыш моз Витя дорӧ да сідз жӧ нуӧдіс гортас.

А нывбабаяс дыр на эз разӧдчыны, дыр на шензисны. Не ӧти кӧзяйка талун вунӧдліс аслас мӧс йылысь. Кӧть и пемдіс нин, кӧть и Петрӧван дед лэччис нин Важ мельнича дорӧ куканьяс видзны, а найӧ век на сулалісны да бокъясаныс шлапкӧмӧн сёрнитісны лоӧмтор йывсьыс, быд ногыс видісны Пельтӧм Селькоӧс. Ӧні кӧ эськӧ кутісны да вайӧдісны сэтчӧ Селькоӧс, то найӧ дасьӧсь вӧліны кучиксӧ кульны сылысь.

— Да, кӧні нӧ сійӧ вир юысьыс? Кытчӧ воши? Сійӧ ӧд, кӧиныд, вермас вины изыскательяссӧ...

— Ок-ок-ок! Мый нӧ тайӧ сэтшӧмыс?

КЫК КОКА КӦИН

1

Витя войнас узис лёка. Пӧшти вой шӧрӧдз думайтіс, маитчис, мыйла найӧс мужикъяс эз босьтны. Весиг ӧбидитчис та вӧсна. А кор тэ мыйыськӧ ӧбидитчан, сэки ӧмӧй позьӧ бура узьны? Некор он вермы. Кунян синъястӧ, зілян унмовссьыны (весиг сёӧдз кыкысь лыддян), а синмыд чашкалӧма — думъяс ӧдӧлитӧны.

Вой шӧрӧдз эз узь Витя. Зато асъявывнас унмовсис да узис сідзи, мый весиг эз кывлы, кыдзи мамыс мунӧма видз вылӧ, а бабыс колльӧдӧма мӧснысӧ.

Садьмӧдіс сійӧс талун Маша Модянова. Маша здук-мӧд тракйис Витяӧс, бергӧдліс ӧтарӧ-мӧдарӧ, горӧдліс пель водзас, а сійӧ быттьӧ кулӧма. Сӧмын сэки, кор Маша чепӧльтіс сылысь пельсӧ, детинка восьтіс синъяссӧ. А кор восьтіс синъяссӧ да аддзис, мый сійӧс садьмӧдіс эз бабыс, а Маша Модянова, сійӧ чардби моз чеччыштіс вольпась вывсьыс.

— Мый лоис?

— Мый, мый... Узян, быттьӧ кулӧма. И кыдзи тэнад узьсьӧ..., — тэрыба, медым Витя эз удит лӧгасьны, сяркӧдіс-висьталіс Маша. — Сиктын мый вӧчсьӧ, а сійӧ стынитӧ...

— Мый вӧчӧны, коді? — синъяссӧ тілигтыр юасис Витя.

— Войнас мужикъяс нюр сайысь петкӧдӧмаӧсь пӧчсӧ, вайӧдӧмаӧсь сиктӧ. Менам мамӧ сёрнитіс тэнад бабкӧд, ме ставсӧ кывлі, мый сёрнитісны. И тӧдан мый? Тэ, Витя, кывзы, кывзы... Ме ӧні на аддзылі тӧндзия пӧчтӧ...

— Вешйы, эн сӧр!..

Збыльысь аддзылі. Лэччи ме сёнӧ ключ вала, а сійӧ, пӧчыс, Пельтӧм Селько пывсян дорын сулалӧ.

Кор казяліс менӧ, сійӧ пыр жӧ тювкнитіс пывсянас... Мый сэні сійӧ вӧчӧ?

— Мунам тэрыбджыка Серёжа дінӧ! — збоя шуис Витя.

Витялӧн вирдыштіс юрас: мый кӧть эз ло, а колӧ кутны старукасӧ. Милиционер Наган Наганыч сідзи и шуис, мый колӧ кутны сійӧс. А ӧтнад ӧмӧй кутан? Колӧ нуӧдны Серёжаӧс. Сійӧ смел, сыкӧд позьӧ. Но Маша друг сэки шуис:

— Серёжаыс абу. Ме ветлі на ордӧ. Кильчӧ ӧдзӧсныс томана. Кайлі сарайӧ, сэні абу жӧ. Тыдалӧ, мамыс видз вылӧ нуӧдӧма...

Витя падмыштіс. Сійӧ эз тӧд, мый вӧчны. Серёжа кӧ муніс видз вылӧ, тӧдтӧм пӧчтӧ он и кут... Эк!

— Тэ, Витя, думыштлы, думыштлы. Колӧ мыйкӧ вӧчны. Ӧні ӧд сиктын некод абу. Ми пыдди некод оз кут думайтны...

Витя думайтіс, думайтіс, сэсся вӧлисти шуис:

— Мунам пывсян дорас... Колӧ следитны.

Кыдзи шуис Маша, талун сиктын некод эз вӧв. Кӧть шондіыс муртса орӧдчӧма вӧртас весьтысь, нывбабаяс мунӧмаӧсь видз вылӧ, а мужикъяс вӧрын кыйӧдчӧны. Весиг пӧрысь пӧчьяс гортаныс абуӧсь. Найӧ ассьыныс мӧсъяснысӧ вӧтлӧмаӧсь пӧскӧтина вылӧ да абу локтӧмаӧсь гортаныс: полӧны кольны видзтӧг, мед эськӧ Пельтӧм Селько скӧр йывсьыс эз вӧч нинӧм лёксӧ.

Маша да Витя чожа котӧртісны сён дорӧ, полігтыр видзӧдісны Сельколӧн пӧлыньтчӧм пывсян вылӧ. Пӧчыс некӧн эз вӧв.

— Кытчӧкӧ, кӧнкӧ, пышйис...

— Код тӧдас? Гашкӧ и пышйис, — воча шыасис Маша. — Сійӧ, кор аддзис менӧ, зэв тэрыба тювкнитіс пывсян пытшкас.

Кок чуньяс йыланыс найӧ кыкнанныс локтісны пывсян дорӧ, кывзысисны. Ныраныс чамгис сісь корӧсь дук да уль тшак дук. Нинӧм оз кыв.

И сэки Витя ньӧжйӧник пырис пывсян водзас. Мыйӧн пырис, пыр жӧ казяліс, мый Селько пывсянсӧ игнавлӧ томанӧн. Ӧдзӧс кӧсяк бердас тувъялӧма крепыд пробой, а ӧдзӧсас — плавкӧс кольча. Талун ӧдзӧсыс томантӧм. Пывсян водзыс тырӧма лӧптӧн, ӧти пельӧсӧ тэчӧма пес. Сэні жӧ сулаліс кыз кыдз пу бедь — ӧдзӧс пыкӧд, тыдалӧ. Витя босьтіс бедьсӧ. Недыр мыйкӧ мӧвпалыштіс, сэсся бедьнас тэрыба пыкис ӧдзӧссӧ. Пӧчыс кӧ пытшкас, то ӧні пукав сэні, кытчӧдз милиционер оз лок!

Пӧчыс, збыльысь, вӧлӧма пывсян пытшкас.

Да, сійӧ сэні вӧлӧма!

Кор кыліс пывсян водзсьыс ноксьӧм, старука чирӧстіс: оть-оть-оть, — сэсся юаліс:

— Ӧлексеюшко, тайӧ тэ?

Витя эз шыась, уйкнитіс-петіс ортсӧ да шуис Машалы:

— Ӧні оз пышйы! Ме пыки ӧдзӧссӧ...

— Бура пыкин?

— Шуи тэд — оз пышйы!

Витялӧн синъясыс югъялісны, ачыс шпынняліс. Сійӧ вӧлі рад. Кыдзи нӧ оз радлы! Маша дырйи татшӧмтор вӧчис. Мед ӧні видлас шуны трусӧн, мед видлас. Жаль, мый Серёжа эз аддзыв. Эк, мыйла сійӧс талун мамыс видз вылас нуӧдӧма? Кыкӧннад кутшӧм лӧсьыд эськӧ вӧлі.

— Витя, кутшӧм тэ смел вӧлӧмыд! Ме эг чайтлы! — ошкис Маша.

Детинка сӧмын ӧвтыштіс кинас.

— Ланьт нин тэ! Тэ лучшӧ со мый... Тэ, Маша, лучшӧ видз пывсянсӧ, пукав тані... А ме чожа котӧртла мельнича дорӧ, кора кодӧскӧ...

Маша кинас и кокнас мӧдіс пыксьыны:

— Витя, тэ нӧ мый? Витя, тадзи оз ков. Ме ӧтнам ог лысьт кольччыны... Вай кыкӧн... Регыд, кӧнкӧ, локтасны...

— Ме тэныд шуи — олышт тані!.. И ставыс, — чорыда шуис Витя.

Но Машалы и тайӧ эз мӧрччы.

Мый вӧчны?

Вӧчны вӧлі нинӧм. Он жӧ кут тышкасьны нывкакӧд. Пышъяс ещӧ гортас. Сэки ов тані ӧтнад.

— Тэ, Витя, думайт. Гашкӧ и мыйкӧ юрад воас, — кевмысис Маша.

— Э-э, думайт! Думайт кӧть эн — немтор он думышт. Мый вермас пырны юрад?..

И збыль, сылы юрас нинӧм эськӧ эз и во, эз кӧ кыв движоклысь трачкӧдчӧмсӧ. Буретш сійӧ движокыслысь, коді колхоз град йӧрӧ парникъясӧ качайтӧ ва. Тайӧ движокыс друг заводитіс гораа буткӧдчыны, сэки и юрас кучкис: сэні ӧд дежуритӧ кок пӧла Ӧльӧксан.

— Маша, друг горӧдіс Витя. — Чожа котӧрт парникъяс дорӧ, кор татчӧ Ӧльӧксан дядьӧс. Сійӧ отсалас миянлы.

Маша тӧвнырӧн уськӧдчис котӧртны.

И, гашкӧ, дас минут эз коль, кыдзи сійӧ локтіс бӧр. И эз ӧтнасӧн, а Ӧльӧксан дядькӧд.

— Йӧртід? Пывсянӧ йӧртід? — юасис сійӧ. Айда молодечьяс... А тэ, Витя, обязательнӧ геройӧн лоан... Тэ, другӧ, настӧящӧй разведчикӧн лоан... Гӧгӧрвоин? И тэ, Машук, геройӧн лоан...

Челядьӧс ошкыштӧм бӧрын Ӧльӧксан пырис пывсян водзӧ, босьтіс пыкӧдсӧ, восьтіс ӧдзӧссӧ да пырис пытшкас. Пырисны тшӧтш и челядь.

Пӧчыс гатшӧн куйліс пывсян джоджас. Кияссӧ пуктӧма кынӧм вылас, синъясыс кылалӧмаӧсь, вомсьыс петіс быг.

— Кулӧма али мый? — повзьыштіскодь Ӧльӧксан.

Сійӧ копыртчис пӧчыс весьтӧ, босьтіс кисӧ.

— Абу, ловъя. Сьӧлӧмыс йирксьӧ. Став тушанас тіралӧ, тыдалӧ, лихорадка. Но мед, менам гортын эм лекарство. Ловзьӧдам.

Пывсянас вӧлі пемыд, но Витялӧн лэчыд синъясыс век жӧ казялісны полка вылысь ыджыд пестер.

— Интереснӧ, мый сэні?

Ӧльӧксан петкӧдіс пестерсӧ ывлаӧ, пыркӧдіс. Пестерсьыс муас усялісны... ӧбразъяс. Вӧлі уна — и пу и кӧрт, сьӧд и лӧз, ыджыдкодь и ичӧтикъяс. Сэсся гылалісны пернаяс, кутшӧмкӧ чунькытшъяс.

— Тьпу! Быдсяма срамсӧ мыйта ӧктӧма! — шензис Ӧльӧксан. — Тыдалӧ, манастырлысь эмбурсӧ кытчӧкӧ кыскалӧ. Ті вот мый, другъяс... Ӧні жӧ чожа мунӧй важ мельнича дорӧ, висьталӧй мужикъяслы, кодӧс кутім. Сӧмын ӧдйӧджык! А ме сійӧс садяс вайӧда да йӧрта кытчӧ колӧ... Энӧ полӧ, менам киысь сійӧ оз мын.

Челядь тайӧс тӧдісны. Коді нин шедас Ӧльӧксан киӧ, сійӧ оз пышйы. Да, челядь тӧдісны тайӧс.

Маша да Витя уськӧдчисны котӧртны важ мельнича дорӧ.

Вӧрын, кыдзи и век овлӧ гожся асылӧ, ставыс кышакыліс, ыргӧн морӧса пожӧмъяс шувгисны, пуяс костӧд писькӧдчысь шонді югӧр улын дзирдаліс лысва. Гажа гожся асыв. И друг...

2

И друг сійӧ кадас, кор челядь локтісны пӧскӧтина дорӧ, Пыдӧстӧм нюр сайын кодкӧ кылӧ ковгис-лыйис пищальысь. Лыйӧм шыыслӧн йӧлӧгаыс увкйӧдлігтыр локтіс татчӧдз, сэсся пу йывъяс вывті уйис водзӧ. Маша мый вынсьыс горӧдіс: «Дед!» Найӧ ещӧ на чожджыка мӧдісны котӧртны, котӧртісны туйтӧг, веськыда.

Восьса ӧдзӧса банька дорын сулаліс Петрӧван дед. Сійӧ вӧлі лёзь юрсиа, гынмӧм тошка. Дед сідзи видзӧдіс нюр сайӧ, мый весиг эз кывлы челядьлысь локтӧмсӧ.

— Мый сэні, дедӧ?

— Коді лыйсьӧ?

И сӧмын сэки челядь казялісны, мый Петрӧван дед тані абу ӧтнасӧн. Нюр дорын сулалісны кык мужик. Синъяссӧ вештывтӧг найӧ видзӧдісны нюрлань. Кыкнанныслӧн паськӧмыс вӧлі няйт, чашйысьӧм-косясьлӧма, и Витялы дыр ковмис видзӧдны на вылӧ, мед тӧдны изыскательясӧс.

— Маша, тайӧ ӧд найӧ, изыскательяс... Видзӧд, локтӧмаӧсь, — горӧдіс детинка.

Да, тайӧ вӧліны найӧ.

Сергей Петрович да Владимир Васильевич казялісны Витяӧс, нюмъёвтісны сылы, кыдзи бур тӧдсалы.

— А-а, тайӧ нӧ тэ? Но, кыдзи мый олан-вылан? — юаліс Сергей Петрович.

Кыдзи пӧ олан-вылан? Да найӧ, тыдалӧ, немтор на оз тӧдны!

Витялы тайӧ, буракӧ, эз кажитчы. Но Сергей Петрович локтіс сы дінӧ, топыда, кыдзи ыджыд мортлысь, кутліс кисӧ.

— Но, но, герой! Кывлі, кывлі, бура кадсӧ коллялӧмныд! А ми... да мый сёрнитнысӧ... яндзим весиг. Ылӧдліс миянӧс пӧрысь чӧртыс, ичӧтик кагаясӧс моз... Ачыс вӧзйысис проводникӧн, туй кӧсйис петкӧдлыны, а сідзи и ылӧдліс. Куим лун кытшлалім пармаӧдыс, век кӧсйим вуджны нюр саяс, но быд пӧрйӧ зурасьлім зыбунӧ, весиг муртса эгӧ вӧйӧ...

Сергей Петровичлӧн чужӧмыс вӧлі скӧр. Сійӧ сьӧласис да видіс Пельтӧм Селькоӧс кык кока кӧинӧн, сюра лешакӧн, а асьсӧ янӧдіс пуз чужӧм кагаӧн.

— Колӧ жӧ! Пыртіс миянӧс сэтшӧм чащаӧ, и ни водзӧ ни бӧрӧ. Коркӧ прӧйдитлӧма сэті бушколӧн тӧвныр, ставсӧ пӧрлӧдлӧма, тэчӧма сідз и тадз — беда. Тӧдлытӧг пырим сэтчӧ, пыр мунім, а сэсся — кӧть кытчӧ вошсьы — муртса эгӧ пропадитӧй. Быдса лун воштім, кӧмкот-паськӧмӧс сӧмын чашйим.

— Да ещӧ нопъястӧг колим, — жугыля нюммуніс Владимир Васильевич.

— Да, и нопъястӧг колим. Кор петім сэтысь, вӧлі рыт нин. Локтім шор дорӧ да лӧсьӧдчим узьмӧдчыны. Би пестім, чай юыштім да водім. А войнас Селько друг грымӧбтӧ-лыйӧ пищальысь, ми чеччыштім кок йылӧ. «Мый лоис?» — юалам. «Ош, — шуӧ сійӧ. — Восьті синъясӧс, а тані ош тапикасьӧ... Со эстчӧ муніс, нюр саяс!..»

Ош кӧ и ош! Сылысь кок туйсӧ луннас эг этшаысь аддзылӧ... Муніс и мед. Бӧр водім... А кор асывнас чеччим, видзӧдам, ӧти ноп абу. Нуӧма ошкыс.

Сергей Петрович бара сьӧвзис кок улас, видіс Селькоӧс быдсяма кывъяснас.

— Куим лун сёянтӧг олім, сӧмын сэтӧр да гум сёйим. Лыйлім кымынкӧ сьӧла — да мый сыысь — совтӧгыд ӧмӧй сёян? Со тадзи и нинӧмӧн петім татчӧ. Аттьӧ дедныдлы, сійӧ вердіс. И сӧмын сійӧ висьталіс, кутшӧм ош вермис нопъяссӧ дзебны, — дерт жӧ, ачыс Селькоыс, сюри кӧ сійӧ меным войнас, сювсӧ эськӧ лэдзи.

— А мыйла сійӧ дзебис?

— Мед эськӧ эгӧ мунӧ сэсся нюр саяс, а бӧр бергӧдчим.

Маша матыстчис дедыс дорӧ и мыйлакӧ видзӧдліс банькаас. Видзӧдліс — и синъясыс чашкалісны. Сэні нар вылын узис... Серёжа.

— Дед, а мыйла сійӧ тані?

— Войнас локтіс. Меным, шуӧ, подвиг колӧ вӧчны, а не гортын узьны. Смел, срамыд. Абу и повзьӧма, ӧтнасӧн локтӧма. И аддзан, кыдзи подвигсӧ вӧчӧ. Сы ни садь узьӧ. Эн вӧрӧд, мед узьӧ.

Но Маша эз кывзы дедыслысь. Сійӧ пырис банькаас да садьмӧдіс Серёжаӧс.

— Чеччы, Серёжа, эн узь... Подвиг вӧчны кӧ локтін, оз ков узьны... Кылан? Ми Витякӧд вӧчим нин подвигсӧ. Ми сиктын тӧндзия пӧчтӧ кутім, йӧртім баняӧ да пыким, сэсся Ӧлексан дядьӧс корим...

— Кутшӧм нин пӧчӧс кутінныд? — юаліс Петрӧван дед.

— Тӧндзиясӧ, коді Селько дорӧ воліс.

Серёжа нинӧм эз шу ни юав.

Эк, Маша, Маша! Мый тэ вӧчин? Мыйла нӧ сэтшӧмторсӧ висьталін Серёжалы! Со, аддзан, мый сыкӧд вӧчсьӧ?

Мый лоис Серёжакӧд? Нинӧм он гӧгӧрво.

Первой чужӧмыс сылӧн гӧрдӧдліс, сэсся бледӧдіс, сэсся лоис код тӧдас кутшӧм: ни гӧрд ни еджыд.

Первойсӧ вом доръясыс сылӧн топалісны, сэсся кыдзкӧ пӧлыньтчисны, сэсся кутісны паськавны, паськавны да лоисны дзик «О» буква кодь.

Мый и сыкӧд лоис: Серёжа друг кутіс шпыннявны. Збыль, веритӧй кӧть энӧй, а Серёжа кутіс шпыннявны.

— Маша! — сӧмын сэки шуис Серёжа. — Да тэ кутшӧм смел вӧлӧмыд! Маша, тэ ӧд герой!

— Серёжа, тэ мыйла менӧ сідз ошкан? Эн ошкы менӧ, — яндысьӧмӧн вочавидзис Маша. — Тэ Витяӧс ошкы... Вот сійӧ смел! Ӧдзӧссӧ пыкис... А тэ мыйла ӧнӧдз узян? Тэ, Серёжа, эн узь... Вӧрас ӧд лыйсьӧны. Сэні бой мунӧ.

— Лыйсьӧны? Бой?!

Серёжа друг чеччыштіс кок йылас, локтіс Петрӧван дед дорӧ, сэсся мыжапырысь видзӧдліс изыскательяс вылӧ, и сэки вӧлись Витя вылӧ.

— Мый сэні лоис? — юаліс сійӧ.

Тайӧ здукас нюр сайын бара шковгисны-лыйисны, йӧлӧгаыс бара лэбачьясӧс повзьӧдлігтыр локтіс талань. Витя да Серёжа дрӧгмуніны, полігтыр видзӧдлісны то изыскательяс вылӧ, то Петрӧван дед вылӧ. Маша топӧдчис дедыс бердӧ.

— Кодъяс сэтӧн, дед?

— Колхозникъяс, Наган Наганыч сэні... Найӧ кыйӧдӧны сэні... Войнас петкӧдісны пӧчсӧ, нуисны сиктӧ, а асьныс бӧр вӧрас пырисны, мед кыйӧдны Селькоӧс. А сійӧ неважӧн на локтіс.

— Да, неважӧн локтім. Вайӧдіс Селькоыс миянӧс эстчӧ кушинас да шуис: «Мунӧй тайӧ туй кузяыс, сиктӧ петанныд, а ме зорӧд видзӧдлыны кежала... Эстӧн вӧрас пӧ ытшки турунтор, «мед оз талявны». Сэні кутшӧмкӧ детинка паныдасис. Селькоыс юаліс сылысь: «Кыдзи здоровьеыд?» А детинкаыс вочавидзис: «Кыдзи ен шуис». И кольччисны сэтчӧ.

— Коді нӧ детинкаыс вӧлі?

— Да, Ӧльӧш, — шуис дед. — Налӧн сійӧ пароль вӧлӧма.

— Но вот, найӧ кольччисны, а ми нинӧм ог и думайтӧ, локтім дедныд дорӧ. Сӧмын ӧні сійӧ висьталіс миянлы ставсӧ, — шуис Владимир Васильевич. И друг сійӧ киас босьтіс пищаль да бергӧдчис Петрӧванлань.

— Дед, вай нуӧд миянӧс сэтчӧ нюр саяс, петкӧдлы туйсӧ. Сэні, гашкӧ, ми колам, а ми тані сулалам.

— Мунам вай, дед, — корис тшӧтш и Владимир Васильевич.

— Вот ті кутшӧмӧсь!.. — Дӧзмискодь дед. — Ме ӧд шулі нин тіянлы: эз тшӧкты милиционерыс сэтчӧ некодӧс лэдзны. Сідз пӧ нин йӧзыс уна. Гашкӧ и кутісны нин сійӧс.

Серёжа да Витя жӧдзисны места вылас. Налы зэв окота вӧлі изыскательяскӧд тшӧтш мунны нюр саяс, асланыс синъясӧн видзӧдлыны, кыдзи кутасны Селькоӧс. Но дед чорыда ӧлӧдіс, мый некодӧс некытчӧ оз лэдз.

А нюр сайысь нинӧм оз кыв. Ӧні эз нин лыйсьыны. А Витялы друг чуткис сьӧлӧмас, детинка бледӧдіс. А друг да Селько сэні кодӧскӧ виис? Ӧд мужикъяскӧд сэні тшӧтш и сылӧн батьыс.

— Мунам кӧть кушинӧдзыс, — корисны челядь.

Дед и ачыс поліс, дзӧрис места вылас, инас эз ӧшйы. И кыдзи пӧ он пов, он тӧждысь! Кӧин — мортлӧн лёк враг. Кутігас ранитчӧм ош моз вермас водзсасьны, зверыд.

— Мунам, — сӧгласитчис сійӧ. — Мужикъясыслы паныд мунам.

3

Мунігас Сергей Петрович юаліс Серёжалысь:

— Бура узин, герой?

Серёжа видзӧдліс сылы синъясас, быттьӧ кӧсйис тӧдмавны, шутитӧ оз изыскательыс, и серьёзнӧя шуис:

— Зэв бура, дядь. Сӧмын ме — абу герой!

— Кыдзи нӧ абу герой?! Эн ӧмӧй тэ ветлы Пыдӧстӧм нюр саяс. Эн ӧмӧй тэ татчӧ войнас ӧтнадӧн лок!

— Ме. Но всё равно ме абу герой.

— М-м. Нинӧм ог гӧгӧрво. Морт вӧчис геройскӧй подвиг и друг — абу герой!.. Абу кӧ герой, код нӧ сэки?

— Ачым ог тӧд. Васька Порсев менӧ кыкысь нин баквалӧн шуліс. Тыдалӧ, баквал и эм...

— О-о! Кыдз нӧ сідз! — шензис Сергей Петрович. — Тэ нӧ мый, любитан ошйысьны, асьтӧ ошкыны? Збыль? О, тайӧ лёк, другӧ. Тэ, другӧ, тьӧзка, асьтӧ некор эн ошкы. Мед лучшӧ тэнӧ йӧзыс ошкасны... Сэки ставыс лоӧ бур. Гӧгӧрвоин?

— Гӧгӧрвои, дядя...

Верст джынсӧ найӧ мунісны ӧдйӧ. И локтісны буретш ас кадӧ.

Серёжа, коді ӧти синнас видзӧдіс изыскатель вылӧ, а мӧднас нюрӧ, друг горӧдіс:

— Кутӧмаӧсь нин! Со, со!

Збыль ӧд кутӧмаӧсь. Ты сайысь найӧ аддзисны мужикъясӧс.

Медводзын восьлаліс Селько. Тасянь нин тыдаліс, мый сійӧс кӧртавлӧмаӧсь гезйӧн. Селько эз ӧвтчы кияснас, восьлаліс дженьыдик воськовъясӧн. Селько бӧрын локтіс милиционер, сы бӧрын сьӧрсьӧн-бӧрсьӧн мукӧдыс. «А кӧні нӧ батьӧй? Кӧні сійӧ?» — повзис Витя. А кор аддзис, нимкодьысла гораа горӧдіс:

— Бать! Ми танӧсь!..

Кыліс-ӧ сійӧс батьыс, висьтавны он вермы. Век жӧ ылынкодь вӧлі.

Радліс не сӧмын Витя. Радлісны ставӧн — и Маша, и Серёжа, и изыскательяс, и Петрӧван дед.

И вот Пельтӧм Селько петіс васьыс. Милиционер Наган Наганыч шуис сылы: «Восьлав, восьлав, кӧин!» Мужикъяс нюмъялігтыр сувтісны чорыд му вылӧ.

— Куим лун да вой гӧгралім ягӧдыс, век корсим нюрӧд вуджан туй, а со сійӧ тані и вӧлӧма, — сёрнитіс Владимир Васильевич.

— Прӧста новлӧдліс, кӧиныд, — шыасис Петрӧван дед.

А Селько и збыльысь вӧлі кӧин кодь. Сылӧн синъясыс гӧгралісны-бытшласисны. Веськав паныд татшӧмыслы векни туй вылын ӧтнадӧн, чашъяс морттӧ, сы мында и тӧдлан. Враг — враг и эм.

Витя и Серёжа мыйсюрӧ унатор нин тӧдісны. Найӧ лыддисны не ӧти книга пограничникъяс йылысь, шпионъяс йылысь, сы йылысь, кутшӧм подвигъяс вӧчалісны миян салдатъяс фронтъяс вылын. Найӧ тӧдісны, мый враг — сійӧ мудер да лёк зверь. Но ӧтитор, кор тэ лыддян книга, дзик мӧд делӧ, кор врагыс сулалӧ тэнад син водзын, ловъя.

Витя гӧгӧрвоис сідз жӧ, мый ловъя враг, кор сійӧс абу на кутӧма, абу на кӧрталӧма гезйӧн, кор сійӧ йӧзыслы петкӧдчӧ другӧн, ас мортӧн, — зэв ӧпаснӧй да страшнӧй.

Враг — враг и эм. Тадзи думайтіс ӧні Витя.

Тадзи жӧ думайтіс и Серёжа.

Сійӧ видзӧдіс Селько вылӧ да думайтіс: «Верми-ӧ ме сійӧс ӧтнамӧн кутны? Некор, буракӧ, эг вермы. Печиктіс кӧ кынӧмӧ, и — пом. А милиционеръяс да колхозникъяс кутісны. А верми ӧмӧй эськӧ ме ӧтнамӧн мунны нюр саяс? Некыдз эськӧ эг вермы. Медводдза гӧптас эськӧ и вӧйи. Сідзкӧ нӧ мыйла ме ышняся Витя водзын? А калляныс? Тьпу! Кытчӧдз верман воны... Весиг чӧртлы веритны понді...»

Думыс вӧлі тӧлка. Сійӧ ачыс эз тӧдлы, кыдзи юрыс ӧшйис морӧс вылас.

Витя дорӧ матыстчис батьыс, кисӧ пуктіс пиыс пельпом вылӧ...

— Но вот. Кутім проклятӧйӧс, гартлім гезйӧн, кыдзи ичӧтик кагаӧс гартлӧны рузумӧн.

Витя казяліс, мый батьыс малалӧ сылысь юрсӧ шуйга кинас, а веськыд кисӧ топӧдӧма морӧс бердас; кисӧ кӧртыштӧма носовикӧн, весиг тӧдчыштіс вир.

— Бать, мый нӧ тайӧ? Киыд вирӧсь.

— Батьыс серӧктіс:

— Нинӧм! Бурдас... Эсійӧ, кӧиныс, удитіс варскыны курччыны. А пиньыс сылӧн ёсь, гадлӧн! Лыӧдзыс пырис.

Сэки и мукӧдъяс серӧктісны.

— Тэныд, Митрей, ковмас больничаӧ ветлыны, уколъяс примитны...

— А мыйла?

— А кӧиныс кӧ бешеннӧй, пиньясыс ядӧвитӧйӧсь...

А нюр саяс вӧлӧма со мый.

Кор Пельтӧм Селько внукыскӧд локтасны засада дорӧдзыс, Ӧльӧш гажаа горӧдас: «Ставыс сідз, кыдзи ен шуис!» да чеччыштас кустъяс пиӧ. Сэки керка-чом сайсяньыс петас Наган Наганыч да кыдз тай горӧдас: «Сувт! Киястӧ лэпты, кӧин!»

Пельтӧм Селько век жӧ удитӧма чеччыштны вӧрас, сайӧдчӧма понӧльяс сайӧ да лыйӧма милиционерыслы пищальысь. Но киясыс, тыдалӧ, ёна тіралӧмаӧсь да абу инмӧма. Лӧсьӧдчӧма мӧдысь лыйны, но сійӧ здукас Витялӧн батьыс бӧрвывсяньыс чеччыштас Селько вылӧ, уськӧдас кок йывсьыс. Усигас Селько ещӧ лыяс. Милиционер воча лыяс, но лыяс вылӧ, мед ӧлӧдны бандитӧс.

Но Селько и сэки абу повзьӧма. Сійӧ вермӧма шыбитны ас вывсьыс Витялысь батьсӧ да курччыны кисӧ. Но сэки удитасны локны сэтчӧ мукӧдыс, Селькоӧс личкасны. Бандит чорыда водзсасьӧма. Пессьӧма сэтчӧдз, кытчӧдз кияссӧ да кокъяссӧ абу гартлӧмаӧсь гезйӧн.

Ӧльӧш сулаліс йӧз саяс, гусьӧник нюмъяліс, кӧть и поліс видзӧдлыны дедыслы синъясас. Но Селько ачыс бергӧдчис, корсис синъяснас да сӧмын пинь пырыс сӧдзӧдыштіс:

— У-у, пеж лов! Жаль, мый эг удит юрсӧ песовтны... Шедан на меным...

— Киясыд дженьыдӧсь, — ньӧжйӧник шуис Ӧльӧш да сьӧвзис кок улас.

Селько йирыштіс пиньнас, паськӧдіс морӧссӧ, быттьӧкӧ кӧсйис орӧдны гезъяссӧ:

— У-у, сволоч чукӧр... Ненавидита ставнытӧ... Ог вермы видзӧдны... Регыд, регыд смерть лоас! Гымӧбтас атомнӧй бомба, всё равно пом тіянлы. И кыдзи ме терпиті тіянӧс, мыйла ӧнӧдз сиктнытӧ эг сот тікӧд ӧтлаын! У-у, сволочьяс!..

— Но, но, тырмас! Кырныш моз кутіс кравзыны, — ӧлӧдіс Наган Наганыч. Сэсся бергӧдчис бригадирлань да шуис сылы:

— Мун сиктас да вӧв доддяв. Нуӧдам сійӧс, кытчӧ колӧ.

Тайӧ здукас Серёжа гусьӧник вешйис кустъяс сайӧ, мыйкӧ перйис зепсьыс да мый вынсьыс шыбитіс нюрас. Маша аддзыліс, мый сійӧ шыбитіс. Тайӧ вӧлі каллян...

— Тэ мыйла сійӧс шыбитін? Эз ков шыбитны, Серёжа. Сэтшӧм мича чӧртыс вӧлі... Ловъя кодь...

— Тадзи колӧ, Маша, — жугыля шуис Серёжа. — Кутшӧм кӧть мича эз вӧв, а век жӧ чӧрт. А сійӧ кӧ чӧрт, то мед куйлӧ нюр пыдӧсын.

Шуис тайӧс Серёжа и гажаа нюммуніс. Да сэтшӧм меліа да гажаа, быттьӧкӧ тувсов шонді.

Сійӧ ӧні вӧлі рад, сьӧлӧмыслы долыд...

А мыйла?

Да сы вӧсна, мый сійӧ вермис сьӧлӧмсӧ йирысь гагсӧ! Вермис!

* * *

Со и ставыс. Со мый вӧлі кольӧм во Перкоягын.

Кыдзи ме та йылысь тӧдмалі?

Зэв прӧстӧя.

Сиктъясті ветлӧдлігӧн ӧтчыд ме веськалі Перкоягӧ. Вӧлі гожся жар лун. Енэжас — ни ӧти кымӧр чир, ывлаыс — лӧнь. Ме сэтшӧма мудзи, пӧсялі, мый ӧдва верми локны сикт шӧрӧдзыс, кӧні сулалісны сус пуяс, да пукси ыркыдінӧ лабичӧ.

Сэні, пуысь вӧчӧм памятник дорын, кодъяскӧ ноксисны. Видзӧдлі на вылӧ, — уджалісны куимӧн: косіник чужӧма, ичӧтик тушаа дед да кык детинка. Дедыс вӧчис гу гӧгӧрыс пу ӧграда, а детинкаясыс гӧрд краскаӧн мавтісны памятниксӧ.

— Витя, котӧртлы гортад да вай кӧдзыд сур, — шуис дедыс. — Аддзан, мудзӧма мортыс...

— Час вая, Петрӧван дед, — шуис беринӧсь чужӧма визув детинка, кодӧс шуисны Витяӧн, да котӧртіс гортас.

— А тэ, Серёжа, лок чукӧрт чагсӧ, — тшӧктіс дед мӧд детинкаыслы.

Локтіс Витя, туисӧн вайис быгъя кӧдзыд сур, гӧститӧдіс менӧ.

— Кодлӧн тайӧ гуыс? — юалі ме.

— Миян колхозын первойя председатель вӧлі. Зэв шань да бур морт вӧлі. Виисны колхозъяс котырталігӧн. Комын вит во нин колис, а сӧмын ӧні тӧдмалім, коді сійӧс виис. Пельтӧм Сельколӧн уджыс вӧлӧма... Не кӧ тайӧ геройясыс, гашкӧ, ӧнӧдз эгӧ тӧдмалӧй...

Витя да Серёжа яндысьӧмӧн дзебисны синъяссӧ, гӧрдӧдыштісны. А Петрӧван дед тэрмасьтӧг висьталіс меным ставсӧ, мый неважӧн вӧлӧма Перкоягын. Ме кывзі да ставсӧ гижи аслам тетрадьӧ.