ГОРАДЗУЛЬ

Кызвын гырысь быдмӧгыс ӧти нима. Татшӧм кывъяс, кыдзи коз, пипу, пожӧм, льӧм пу да с. в., тӧдсаӧсь быд коми мортлы, быдлаын юргӧны ӧткодя. Посньыд быдмӧгъясӧс — турунъясӧс либӧ тшакъясӧс шуӧны уна ногӧн, налӧн нимъясыс овлӧны кык либӧ унджык вежӧртасаӧсь да индӧны некымын быдмӧг вылӧ. Сідз, купальничаӧн, коді пырӧма роч кывйысь, шуӧны кык пӧлӧс турун. Ӧтикыс (рочӧн — лютик едкий) петӧ видзьяс вылын, боръясын, муяс бокын, та вӧсна кӧнсюрӧ сійӧс шуӧны му выв купальничаӧн. Тайӧ быдмӧгыс аслас кизь кодь кольквиж дзоридзьяснас ёна мичмӧдӧ ывла вывсӧ гожӧм шӧрнас — Иван лун праздник дыръясӧ, кодӧс важӧн пасйывлӧмаӧсь июль сизимӧд лунӧ. Уналаын нимтӧны сійӧс тшӧтш пывсян купальничаӧн, сы вӧсна мый праздник рытъясӧ пывсьӧм водзын нетшыштӧны борйысь дзордзалысь турунсӧ да пуктӧны корӧсь пиӧ. Татшӧм корӧсьнас пывсьӧмыс пӧ ёнмӧдӧ дзоньвидзалун, содтӧ эбӧс.

Мӧд сикас купальничаыс (рочӧн — купальница европейская) паныдасьлӧ вӧраинъясын да васӧд видзьяс вылын, дзоридзавны заводитӧ водзджык пывсян купальнича дорысь, лым сылӧм бӧрын. Дзоридзьясыс кольквижӧсь, но гырысьӧсь да гӧгрӧс тупыль (дзуль) кодьӧсь. Тайӧ аслыспӧлӧслунсӧ тӧдчӧдӧны юра купальнича да горадзуль нимъяс. Важӧн дзоридзнас Сыктыв вожса сиктъясын краситлӧмаӧсь чипан колькъяс, а турунсӧ шулӧмаӧсь кольк турунӧн. Горадзуль кывйыс паськыда жӧ бергалӧ коми-пермякъяслӧн сёрниын. Сідзкӧ, купальничалӧн тайӧ — медся важ нимыс, кодӧс пӧч-пӧльясным лӧсьӧдлӧмаӧсь уна нэм сайын, зыряна да пермякъяс вылӧ юксьытӧдз на.