ЧЕЛЯДЬ СЁРНИӦН

Быд кывйын эм уна сикас сёрни. Торъялӧны и сёрнисикасъяс. Торъялӧ быд кывйын и челядь сёрни. Татшӧм сёрнисикасас эмӧсь зэв торъялана кывъяс, тайӧ ичӧт челядьӧн да налӧн ай-мамӧн челядьлы шуана кывъяс. Шуам, ичӧт кага сёрнитны заводитігӧн медводдза кывъяссӧ шуӧ зэв торъялана ногӧн, ВАВА ва пыдди, ЛЬӦЛЬ йӧв пыдди, БУ баб пыдди. Ичӧт мортлы кокниджык лоӧ шуны КЕКӦ ки пыдди, КОКО кок пыдди, БИБИ би пыдди. Унаысь кыв помас юргӧ шыасяна-ӧ кывйыв: КӦКӦ (кӧк), НЯВӦ, КЫСІЛЬӦ (кань), ЖОНЬӦ (жонь), ПАЧӦ (пач), ЛЬӦЛЬӦ (йӧв). Челядь кывъяс юргӧны зэв аслыссикаса, шуам, машина йылысь ичӧт кагалы шулӧны “Со ӧд ДІДІТ локтӧ”. Янсӧдчигӧн челядьыд шуасны “ДАННЕ!”. Эмӧсь тшӧтш и аслыспӧлӧс кадакывъяс. Сёйны вежӧртасын бергалӧны АМНЫ, НЯМНЫ кывъяс, водны вежӧртасын — БАБНЫ.

Зэв уна аслыспӧлӧс кыв бергалӧ челядь фольклорын, лыддьысянкывъясын, пудъясянкывъясын, ворсігӧн горӧдӧмъясын. Ӧти лыддьысянкывйын став кывйыс торъялана:

Ати, кути,

Корма, лия,

Дзия, вита,

Солом, пита...

Быдӧнлы тӧдса тшӧтш со татшӧм лыддьысянкыв:

Ӧтик — мотик,

Кык — мык,

Куим — муим,

Нёль — моль,

Вит — мит,

Квайт — майт,

Сизим — мизим да с.в.

МУИМ, МӦТИК, МИЗИМ да уна мукӧд кыв верстьӧ йӧзлӧн быд лунъя сёрниын ӧд оз юргы, тайӧ челядь сёрниысь кывъяс. Коми муысь быд районын, весигтӧ орчча сиктъясын, челядь сёрниыс мыйӧнкӧ да торъялӧ. Ичӧт лыддьысьысьяс, юӧртӧй, кутшӧм аслыспӧлӧс челядь кывъяс ті тӧданныд, кутшӧм торъялана лыддьысянкывъяс юргӧны тіян пӧвстын. Гижӧй та йылысь “Би киньлы”.