КУЧИК САПӦГ

Митрейлы батьыс ньӧбис выль кучик сапӧг. Сійӧ пыр и кӧмаліс выль сапӧгтӧ да петіс ывлаӧ. Воча вокыслы, Саньӧлы, ошйысьӧ:

— Со, — коксӧ лэптіс Митрей. — Аддзан, батьӧ меным ньӧбис кучик сапӧг, югъялӧ весиг.

— Эн ошйысь. Татшӧм сапӧгнад ва гӧптӧ он пыр, кӧтасяс. А менам резинаысь, кӧть кыті ризъяв.

— Мыйла менам сапӧгӧн оз позь ваӧ пырны!? — шензьӧ Митрей. — Со, пыра, оз бара кӧтась.

Пырисны кыкнанныс гӧптӧ. Дурӧны, резсьӧны ваӧн. Гигзьӧны, горзӧны! Коскӧдзыс кӧтасисны.

Митрей гортас пырис да выль кӧмсӧ пӧрччис. Чуймис: сапӧг нырыс сёйны корӧ, пыдӧсыс воссьӧма, кӧрт тувъясыс чурвидзӧны.

Катӧдіс Митрей кыкнан сапӧгсӧ паччӧр вылӧ косьтыны. Сапӧгъяслӧн дуль ваыс виялӧ. Сёйны корӧны.

— Вай сёйны! Вай сёйны!

— Но, — шензьӧ Митрей. — Сёйны корӧны.

Сюйис кыкнан сапӧг пиня вомас нянь. Сапӧгъясыд шняпкӧны няньтӧ, кытчӧкӧ ньылыштісны...

Кузь кывнас вом доръяссӧ пон моз чышкисны, но эз пӧтны. Бара корӧны сёйны.

Митрей вердіс найӧс жаритӧм картупельӧн. Ставсӧ сёйисны да бара на эз пӧтны. Но неуна быдмыштісны. Ӧтарӧ сёйны корӧны.

Вайис Митрей турун. Сюйис сапӧг нырас... Турунтӧ вартісны быттьӧ вӧвъяс. Сапӧгъяс быдмисны, вӧв ыджда лоины.

Сэк кості локтіс воча вокыс Саньӧ. Аддзӧ вӧв ыджда сапӧгъяс пач чӧрын гигзьӧны.

— И-и-о-о-о!!! Сӧлӧй, гӧнитӧдам кытчӧкӧ! — горӧдісны.

Митрей сӧліс ӧти сапӧг вылас, Саньӧ мӧд вылас кавшасис. Ньӧрйӧн вӧтлӧны, рӧдтӧны-гӧнитӧны. Пӧчӧ-пӧльӧ ордас воисны. Найӧ шензьӧны. Сапӧг вӧвъясӧн пӧ челядьыд ми ордӧ воисны.

Пӧчӧ найӧс шаньгаӧн вердіс.

Пӧльӧ найӧс ньӧрйӧн нӧйтіс.

Мыйысь нӧ эськӧ?