АС ОЛӦМ ЙЫЛЫСЬ
Ме чужлі Сыктывкарын 1930 вося февраль 28 лунӧ. Бӧрас тӧдмалі, мый мам тайӧ жӧ луннас чужлӧма Койтыбӧжын.
Батьӧлӧн семьяыс, коді овлӧма Сыктывкарын, вӧлӧма гӧль. Менам пӧль кувсьӧма водз. И пӧчӧ ӧтнас быдтӧма нёль пиӧс да кык нылӧс. Сы вӧсна абу вермӧма челядьсӧ велӧдны. Весиг бать вӧлӧм кырымасьӧ «МАЛ» — «Малыгин» ов пыдди.
А мамӧ Койтыбӧжын велӧдчӧма ӧти класс. Сэсся шуӧмаӧсь, мый тырмас велӧдчыны, шыпасъяссӧ да лыдсӧ пӧ тӧдан. Кутан ичӧт чойтӧ потанын качайтны да сюр нёньысь някӧдны.
— Дерт, — шуӧ вӧлі мамӧ, — бӧрді эськӧ да.
Ми быдмим чоя-вока. Батьтӧг колим, кор меным вӧлі сизим арӧс, а воклы ӧкмыс эз на вӧв.
Батьӧс да сылысь воксӧ 1937 воын лыйлісны.
Сыктывкарыд менам быдмигӧн вӧлі ыджыд деревня кодь.
Ме зэв тшӧкыда паракодӧн кывтлі Зеленечӧдз, сэсся бӧр подӧн куим верст Койтыбӧжӧдз волі. Сэні овліс мамлӧн рӧдвуж. Сэні ми вежанькӧд да мамкӧд вӧрын вотчывлім: чӧдлач, чӧд, тшак да пув. А ӧтчыд ми вежанькӧд ветлім Парчӧгӧ праздник вылӧ. Мунім видзьяс пыр. Анькытш воӧма нин вӧлі. Ид да сю шепталӧма, джуджыд тшӧтя, менсьым юрӧс малалӧны-зуалӧны.
Кынӧм пӧттӧдз анькытштӧ сёйим Парчӧгӧ вотӧдз. Парчӧгын быд керкаын пӧжасьӧмаӧсь-пражитчӧмаӧсь. Чери няньяс, выя шаньгаяс, пирӧгъяс. А кымын пӧлӧс кисельыд, лязйыд..? Сёй эн юась, мый колӧ. А миян рушкуӧй тырӧма анькытшӧн да нинӧм оз тӧр. Кӧть бӧрд.
Войнаыд миянӧс суис, кор мамӧ уджаліс «Швейник» артельын. Вурисны армиялы шынель улӧ купайкаяс, гачьяс, шынель да мукӧд паськӧм.
Ме велӧдчи да гортса уджсӧ ставсӧ вӧчи. Роч пач ломті, пуси. Уна и чугун пӧрӧдлі. Укватнад ог судз да. чугуныд пӧрӧ, а сукыс сэтысь оз киссьы. Васӧ содта, солышта да бара пуа.
Тӧдлі и тшыгъялӧм. Лёк паськӧм. Кокын нямӧда колоши. Купайкаыс кӧ выльджык, сійӧн эськӧ ошйыся нин да. Сідз и ветлывлі кино вылӧ, и драмтеатрӧ. И эз вӧв яндзим. Унджыкыс сідз и пасьтасьлывлісны.
Уджавлі магазинын. Сэсся верӧс сайӧ петі да быдті вит пи. Зэв вильышӧсь вӧліны, но мам-батьӧс кывзісны.
Медым найӧс ӧлӧдны, ас дінӧ пуксьӧда да висьтала вӧлі мойдъяс. Сэсся ачым налы, мый юрӧ воас, сійӧс и сӧра.
Пенсия вылӧ петі да куті мойдъяс гижны «Войвыв кодзув» да «Би кинь» журналъясӧ. Ӧні эм нин аслам куим небӧг. Лӧсьӧдам Тонечка-внучкакӧд нёльӧд выль книга. Коми кыв вылын. Коркӧ лыдди да ачым шензи. Сё дас нёль мойд гижсьӧма.
