УЗЬЫСЬ ОШ

Ӧтчыд Ош Миш петіс вӧрысь видз дорӧ. Сэні Опонь дядь зӧр видз ытшкӧ. Гӧтырыс, Марья кольта кӧртавлӧ, доддьӧ сӧвтӧ.

— Мый нин Опонь дядь да Марья тьӧт вӧчанныд?

— Зӧр вундам, таво зэв тугъя быдмӧма. Тӧвбыд зӧр шыдӧса рок сёйны кутам. Аски вартам, аскомысь пу гырйын кышсӧ торйӧдам да весалам. Сэсся и пӧтӧса рок кутам сёйны. Волы миянӧ Ош Миш, чӧсмасьыштан.

— Локта, локта. Унджык пу.

— Волы, волы, уна пуа. Нӧшта азя шыдӧн верда.

Арыс вель нин кӧдзыд вӧлі... Регыд лым кутіс усьны. Ош Миш аслыс и шуӧ:

— Узьышта, сэсся и ветла Опонь дядь ордӧ рок сёйны. Пӧттӧдз сёя.

Вӧчис-лӧсьӧдіс Ош Миш гу да водіс. И унмовсис. Вӧтасьӧ сійӧ быттьӧ рок Опонь дядь ордын сёйӧ. Сёйӧ... оз и пӧтлы.

Коркӧ и садьмис. Нюжмӧдчис да шуӧ:

— Шоныд тай талун, ветла Опонь дядь ордӧ зӧр шыдӧса рок сёйны.

Воис, ӧдзӧсӧ таркӧдчӧ. Паныд Опонь дядь петіс.

— Опонь дядь! — мурӧстіс Ош Миш. — Рок сёйны локті. Ок и кынӧм сюмалӧ, быттьӧ сё во нинӧм эг сёйлы...

— Тэ нӧ мый Ош Миш, йӧй кӧ-а? Ме тэнӧ виччыси-виччыси, а тэ эн и волы. Ӧні нин зӧр шыдӧсӧй быри. Ставсӧ сёйим. Сӧмын зӧр тусьыс кӧйдыс вылӧ коли. Тэ вай арнас волы, кор выльысь быдта.

Скӧрмис Ош Миш, равӧстіс:

— Ёна жӧ тэ мудер вӧлӧмыд. Ачыд гӧститны корин, ачыд и менам узигкості ставсӧ сёйӧмыд! Яндысьтӧм син!

— А мед эн узь сы дыра дай! Коді мыжа? — Вочавидзис Опонь дядь.

А дыр-ӧ нӧ узис Ош Мишыд? Коді тӧдӧ?