МЕ КӦ ЭСЬКӦ...
Зэв ыджыд Ош, гашкӧ, зэв пӧрысь нин, пуксис мыр вылӧ шойччыны. Пель сайсӧ гыжъялӧ да олӧмсӧ казьтылӧ. Варгыль кокаыдлысь мӧвпъяссӧ торкисны Кӧин да Руч.
— Чолӧм, Ош пӧль! — матыстчигмозыс веськыд водз коксӧ лэптыштліс Руч да мудерпырысь читкыльтліс синъяссӧ.
— Видза олан, Ош дядь! — горӧдіс Кӧин. — Висьтась, кыдз нин вийсян-кыйсян?
— Кыйся... Тшыгйӧн эг на овлы. Со тай эсійӧ джуджыд керӧс бокас ок уна кӧч йирсьӧ... Жуӧны быдсӧн. Ӧтпырйӧ кӧть дасӧс шамырт да сёй. Но сы мынданас мый вӧчан? Он жӧ ӧд ставсӧ кынӧмад йӧршит. Потан! Со и лоӧ шойччӧм сорӧн кыйсьыны. Дас кӧчтӧ ӧтырышйӧн гумовта. Ӧтиӧс сёя, а мукӧдсӧ бӧр лэдзала.
— Сё дивӧ тай! — чуймис Кӧин. — Ме кӧ эськӧ... Сы мындатӧ кыя, бӧрсӧ ог нин лэдз.
— А мый нӧ эськӧ сы мынданас вӧчан? — синъяссӧ паськӧдіс Ош.
— Ме кӧ эськӧ... — вочавидзис Кӧин. — Ме эськӧ ставныслысь кучиксӧ кули да увлань юрӧн пу вылӧ косьтыны ӧшлі. Кор кынӧмӧй сюммыны кутас, сэки и кос яйӧн чӧсмася.
— А ме кӧ эськӧ... — сюйсис сёрниӧ Руч. — Ме эськӧ сы мындасӧ кӧ кыйи, бӧрсӧ эг жӧ нин лэдз. Ставнысӧ топыд потшӧса йӧрӧ эськӧ йӧрті да баддьӧн-турунӧн верді, мед туасны-сӧвмасны. Кор ковмас, сэки и кӧч яйнас чӧсмасьышта.
— Со кутшӧм тэ, вӧлӧмкӧ, сюсь! — бара чуймис Кӧин. — Вай сідзкӧ ӧтвылысь котӧртам да кӧчьястӧ куталыштам.
— Котӧртӧй, котӧртӧй, — нурбыльтіс Ош да содтіс: — Ме тіянлы паныд пета да отсышта.
Сідзи и вӧчисны. Сюрис ӧд кӧчыд Кӧинлы да Ручлы. Вӧтӧдны босьтчисны. Ош налы воча петіс. Кӧчыд котӧртіс-котӧртіс дай Ош вомӧныд чеччыштіс. Кӧин да Руч ӧдӧбтӧмӧн Ош кымӧсӧ зургысисны. Синъяссьыс чардби сявкнитіс. Ӧти кӧчсьыд сё кӧч ӧтарӧ-мӧдарӧ ризӧбтіс.
— Сё мокасьт! Мыйта кӧч вӧлі... — горӧдіс Кӧин. — Тэ Ош ставнысӧ повзьӧдін, медым миянлы найӧ эз сюрны. Ӧтнад кӧсъян кыйны-сёйны.
— А тэ, гынмӧм гӧна Руч, сӧмын тявзыны кужан, — уськӧдчис Ошкӧс видӧм бӧрын Руч вылӧ Кӧин. — Синмыд тэнад бӧж улад...
— Бӧж улын? — шемӧсмис Руч.
— А тэ кӧні вӧлін Пеж лов, дука кучик!!! — жергӧдіс пиньяссӧ Кӧин да кыдз тай уськӧдчис Руч вылӧ.
Бур, мый пашкыр бӧжаыд Кӧинсьыд збыльысь мудерджык вӧлӧма. Ӧдйӧ и шутёвтіс-пышйис. Сэки Кӧиныд ассьыс скӧрлунсӧ шуис вештыны Ош вылын. Но эз тай артмы. Варгыль кокаыд мый вынсьыс швачкис Кӧиныдлы пель вужъяс. Мӧдыс ылӧдз-ылӧдз тутіс.
Сэксянь Ошкыд, Кӧиныд да Ручыд ӧтлаын некор нин сэсся эз кыйсьывны.
