УКШАЛЬ ОШ

Ёртасисны Мой да Ош. Ӧта-мӧдныслы отсасисны. Сёян-юанӧн юксьывлісны. Ытва бӧрын Ош Мойлы чом отсавліс дзоньтавны. Мукӧддырйиыс и выльӧс ӧтвылысь вӧчлісны.

Ӧтчыд на дорӧ локтіс Руч да ёна и сераліс Ошкӧс.

— Мой! Тэнад ёртыд тай сэтшӧм укшаль вӧлӧма. Ас бӧрсяыс ньӧти оз видзӧд, — вашъялігтыр шуаліс пасяыд. — Аддзан, кутшӧм гӧныс сылӧн... Нэмнас абу шызьӧдлӧма. Дзикӧдз гынмӧма. Юр яндзим дай сӧмын. Ме бара-й Ошкыдкӧд орччӧн некытчӧ ог мун.

— Тьпу! — сьӧлыштіс пельпом вомӧныс Руч да водзӧ лӧвтіс ассьыс. — Тэ, Мой, молодеч! Гӧныд шыльыд-мольыд. Шонді водзын лӧсталӧ. Мекӧд кӧ ёртасьны кутан, оз ло яндзим некодысь. Юрыд оз усь.

Ош татшӧм кывъястӧ кылӧм бӧрын нинӧм эз шу. Муніс на дорысь. А Мой Ручкӧд овмӧдчис. Асыв-рытсӧ чери кыйис да пашкыр бӧжаыдкӧд юксис.

Руч Мой дінысь некытчӧ оз и ветлы. Дась вӧлӧгатӧ зэв зіля да азыма сёйӧ.

Мӧд тулыснас ытваыд Мойлысь чомсӧ бара кылӧдіс. Руч кыр йылӧ пышйис. Мой пессис-пессис ӧтнасӧн да пӧрӧм вужля вылӧ кавшасис. Вель дыр сэні пукаліс.

Кор ваыс ямис, Мой босьтчис выль чом вӧчны. Ручӧс корис отсасьны, а сійӧ весиг кивыль эз керлы. Мойлы быть Ош дорӧ ковмис шыӧдчыны:

— Ошкӧй-ошкӧй, менам важся ёртӧй, волы. Отсышт меным выль чом лӧсьӧдны.

— А Ручыд нӧ мый вылӧ? — юаліс Ош.

— Сійӧ гӧнсӧ оз лысьт кӧтӧдны. Гынмас пӧ, шуӧ, — вочавидзис Мой. — Нинӧм Ручыд оз сяммы вӧчны, сӧмын суклясьны кужӧ. А тэ, кӧть и укшаль, юрыд вежӧра дай выныд эм.

Гоз-мӧд лун и ковмис Ошкыдлы, медым вӧчны Мойлы выль чом. Чужисны сійӧ чомъяс нёль мойпи. Ок и гажаа коли гожӧмыс вӧрса ёль бокын.