АЙ МУ ШЫР

Оліс-выліс Мужик. Гӧрис-кӧдзис, вундіс-вартіс, турун ытшкис. Тадзи кынӧмпӧт перйис. Ӧтчыд аддзис Мужик, кыдзи му шыр аслас патераӧ сю да ид шепъяс пыртлӧ.

— Со ӧд, сё майбыр, оз ков гӧрны ни кӧдзны, дасьсӧ сӧмын кыскав. Меным эськӧ му шырӧн лоны...

Тадзи мӧвпыштіс Мужик и му шыр гуранӧ дзумгысис-усис. Видзӧдӧ, му шырлӧн вель ыджыд жытник, а сёянсӧ сэні заптӧма сы мында, мыйта сылӧн арнас оз овлы, а му шыр кӧзяйкаыс и шуӧ:

— Кӧсъян лоны му шырӧн?

— Кӧсъя, — шуӧ Мужик, — окота кокниа овны, бура сёйны.

Энь му шыр пӧльыштіс, сьӧлыштіс, тапнитіс, исыштіс и лои Мужик ай му шырӧн. И кутіс ваявны аслас жытникӧ сю да ид быдса мешӧкъясӧн, а энь му шыр сӧмын тшӧт нуӧдӧ да лишаланасӧ мукӧд шыръяслы вузавлӧ. Олӧны-вылӧны, шог оз тӧдны. Колис кад да сэсся ӧтчыд ай му шыр куш нопйӧн гортас воис.

— Некысь нинӧм эз сюр, шуӧ ай му шыр.

— Ветлы йӧз дорас, кывзышт, кытчӧ-мый ставыс лоӧма?

Муніс ай му шыр йӧз дорӧ, а сиктас некод абу. Сӧмын кык пӧрысь пӧч шогсьӧны:

— Ок, ок, ок, колисны миянӧс вердысьясным. Му-видз вӧдитны некодлы. Муяс вылын сӧмын йӧн да тӧрича быдмӧ. Весиг шыръяслы нуръясьнысӧ нинӧмӧн.

Локтіс ай му шыр гӧтыр дорас да шуӧ:

— Пӧрт менӧ бӧр Мужикӧ, кута гӧрны-кӧдзны. Тадзтӧ ставным тшыгла кулам.

Энь му шыр пӧльыштіс, сьӧлыштіс, малыштіс, исыштіс и ай му шыр бӧр пӧри Мужикӧ. Сӧмын вель нин пӧрысь лоӧма. Сиктӧ муніс. Пӧчьяс видзӧдлісны сы вылӧ да муртса и тӧдісны. Пырис Мужик аслас важ керкаӧ. Лы сьӧмыс гӧгӧр ёнтӧ-висьӧ. Кайис паччӧр вылас, куйліс-куйліс да сэсся ас кокнас сэтысь эз нин лэччы.