КОМИ ГИЖЫСЬЯСЛЫ

Миян коми литература дзоньнас на улын мунӧ. Улын на и пролетариат нога литература, кӧть эськӧ сійӧ бӧръя каднас и ӧдйӧджык содӧ да. Мед эськӧ водзӧ мунӧмсӧ литературалысь идеология боксяньыс дай форма боксяньыс ӧддзӧдны, миянлы ёна колӧ критика паськӧдӧм. Критикаавны художествоа литература, дерт, медбура вермасны не асьныс гижысьясыс, а наросьнӧ критикъяс. Таысь кындзи, ён отсӧг вермасны сетны мӧда-мӧдныслы и асьныс поэтъясыс, творчество йылысь печать пыр сёрнитӧмӧн да творчествосӧ критикаалӧмӧн.

Сэсся ми омӧля гижлывлам асланым творчество йылысь: кыдзи уджалам, мый оз тырмы миянлы, мыйӧ босьтчам гижны, сідзи водзӧ. Тайӧ ёна колӧ быд гижысьлы мӧда-мӧдныслы, дай колӧ тӧдны тшӧтш лыддьысьяслы.

Сы вӧсна ми кутам лэдзавны «Ордымын» быд гижысьлысь мӧвпъяссӧ художествоа литератураын уджалӧм йылысь, коді эськӧ сетіс чуйдӧдъяс водзӧ литература сӧвмӧмыслы.

Тайӧ юкӧдас тшӧтш кутам лэдзны лыддьысьяслысь отзывъяссӧ торъя художествоа произведенньӧяс вылӧ.

Тайӧ нумерын лэдзам письмӧ Тима Веньлысь. Сійӧ гижлӧма вӧлі Жугыльлы таво тулыснас (апрельын). Ӧнӧдз эз ло лэдзӧма сы вӧсна, мый Тима Вень эз гиж лэдзӧм вылӧ, а ӧти мортлы (личное письмо). Ӧні Тима Вень корис лэдзны «Ордымын». Ӧткымынлаті сійӧс и лэдзам.

Ми корам быд коми гижысьӧс гижны тайӧ юкӧдӧ ас удж йывсьыс.

Корам тшӧтш лыддьысьясӧс ыставны рецензияяс лыддьӧм гижӧдъяс вылӧ. Ми кутам лэдзны «Ордымын».

Редакция.