КОЛХОЗ

Сиктъясын выль олӧм
Зэв ӧдйӧ быдмӧ.
Колхозъяс гӧль йӧзлӧн
Лунысь-лун лыдмӧ.

Быдлаын паськалӧ
Ӧтувъя олӧм.
Морӧсыд личалӧ,
Радлӧ сэк сьӧлӧм.

Колхозса муяслӧн
Оз тыдав помыс.
Сы вӧсна кулаклӧн
Вежыньтчӧ вомыс.

Пӧрысьяс шензьӧны,
Оз узьны войсӧ.
Мукӧдъяс вензьӧны,
Кодкӧ сэн ойзӧ.

Митрӧпан озыр морт
Ветлӧдлӧ-шӧйтӧ.
Колхозса шленъясӧс
Быд ногыс вӧйпӧ.

«Коньӧрлӧн» шогсьӧмла
Юрыс нин дурмӧ.
Колхозлӧн ньӧжйӧник
Уджыс пыр бурмӧ.

Колхозын бырины
Межаяс, боръяс.
Видз-мулӧн эз лоны
Посньыдик торъяс.

Ӧтувнад уджавны
Ёна жӧ лӧсьыд.
Важ мозыд весьшӧрӧ
Оз киссьы пӧсьыд.

Став уджсӧ лэдзӧны
Машина вылӧ.
Трактор со колхозӧ
Воӧ нин кылӧ.