КОММУНА ПАС УЛЫН...

Миянӧс оз жугӧд шог,
Оз вермы гӧрбыльтны мог,
Ышмана судьбалӧн оз имит власьт, — 
Нартитчӧм, лым мозӧн, сылі, — 
Озырлы оз нин сюр нартитчан масьт — 
Ог лоӧ казакӧн сылы.

Нималӧ — рӧд миян гӧрд,
Мездмӧм йӧз ловъя, — оз бӧрд.
Коммуна пас улын нужда оз шырд.
Эй, ёртъяс! вӧрӧгыд матын,
Ӧтвылысь тӧвныра свинечӧн тырт!..
Быд вермысь, сувтӧй ӧт радӧн!..

Вынйӧра враг абу шог,
Колӧкӧ, медым оз лок,
Ог сетчӧй вермыны вермасьтӧг ми — 
На ногӧн некор оз лолы:
Вына на, вермӧ на уджалан ки — 
Вермасьны, буржуй, вай волы!..

Салдатъяс оз тырмы, сэк — 
Пӧрысьлысь веськӧдам кос,
Челядь да гӧтыр сувтасны рад, — 
Лыйсьыны босьтчасны найӧ;
Шочманін тыртасны быд колан кад,
Некод оз дзебсьы мӧд сайӧ.

Миянӧс оз жугӧд шог,
Оз вермы гӧрбыльтны мог,
Ышмана судьбалӧн оз имит власьт — 
Нартитчӧм, лым мозӧн, сылі, — 
Озырлы оз нин сюр нартитчан масьт,
Ог лоӧ казакӧн сылы.