АР ПОМ

Лэчыд тӧв чишкыльтӧ войвывсянь лунвылӧ.
Кынмӧма небыд му. Сувтӧма йи.
Пӧткаяс важӧн нин лэбисны ылӧ...
Кӧдзыдыс найӧӧс медым оз ви.

Бадь пулӧн киссьӧма веж, мича коръяс,
Пасьтӧмӧсь колины — кынтас, дерт, тӧв.
Дугдісны дзольгыны, визувтны шоръяс,
Видз вылысь он аддзы мӧсъяс ни вӧв.

Лунъясыс гудырӧсь, пемдӧма быттьӧ:
Енэжсянь му вылӧ лым киссьӧ тыр.
Зверъяс да пӧткаяс пырисны позйӧ,
Кӧдзыд тӧв найӧӧс оз видз зэв дыр.

Челядьяс велӧдчӧ школаын уна,
Синнысӧ восьтӧны, — палялӧ юр.
Лэптӧны, дорӧны выль олӧм найӧ.
Эм сыла кияс да сюсьлуныс бур.

Сиктъясын важӧн нин мунісны вӧрӧ
Пӧрӧдны, кыскавны сортовка кер.
Коми морт оз йӧрмы — парма вӧр гӧрӧ.
Вына сой кутӧ зэв зумыда чер.

Зверъяслысь, пӧткалысь, мортъяслысь, пулысь
Олӧмсӧ-вылӧмсӧ дзик вежис ар.
Вежсис и сиктъяслӧн, грездъяслӧн чужӧмыс,
Вежсис тшӧтш столица — Сыктывдінкар.