МУНАМ...Тӧв нырӧн шургӧ, Гораа юргӧ, Быттьӧкӧ саридзлӧн гы — Тувччалӧм гырысь кок шы: Топыда пырысь, Посни и гырысь, Войтыръяс — сюрс-мӧда лыд Долыда шавкйӧны быд. Ыргӧмӧн ыргӧ, Пӧртмасьӧ, шпыргӧ — Ыштӧдысь косьяс дыр час — Коммуна гӧрд дӧрапас; Чуксалӧ, корӧ Локны сы дорӧ: Мувывса эмбуртӧм, лок!.. Миян ӧд ӧтувъя мог — Артавны гӧгӧр, Коммуна югӧр Ылӧ-ӧ сявкнитіс визь... Вермасьӧм сорӧн, Аддзан со, бӧрын Коли ӧд дас кыкӧд во... Тайӧ кад мыйыс эз ло: Мусерлысь эжсӧ, — (Аддзан выль вежсӧ!..) Бергӧдім выль чужӧм бок. Мый вӧсна? Эмбуртӧм — пан. Ӧзъяна вынӧн, (Эз буржуй кынӧн) Выль олӧм, — Коммуна шуд, — Тэчӧны миллён йӧз — сувт!.. Лӧз тшынӧн ыльгӧ, Паровоз — шыльгӧ, Кӧн вӧлі лыа да степ — Копрасьӧ культура шеп. Вӧрӧдтӧм вӧръяс, Пармалысь шӧръяс Тӧдмалыс мырсьысьлӧн син, — Камгӧны коз-пожӧм дін. Пӧткалысь туйсӧ, (Оз тай пов — сюйсьӧ!..) Ероплан дзажӧдӧ — тар, Увъялӧ карсянь да кар. Ыб вылын гутшкӧ, Выль олӧм путшкӧ Комбайн да тракторъяс сідз, — Оз юав буржуйлысь «вич». Фабрика сьылӧ, Выль шыяс кылӧ: Вичко ни святӧй оз ков, Витлунъя вежон вай ов!.. Чужӧмъяс ӧзйӧ, Вӧзйыны кӧсйӧ: Суас кӧ водзсасян кад, Кось вылӧ быдӧн дзик рад; Коммуна дорны, Важ вужъяс «борны» Мунӧны, ытва моз лӧз, Коммуна дорысь выль йӧз. Октябр лун — шонді, Вын сет да шонты Эмбуртӧм войтырлысь вын! Сывды ставмувывса кын — Югӧртӧ сявкйы!.. Долыда шавкйы, — Ӧтмоза косясигтыр Коммуна олӧмӧ пыр. Лыдтӧм ӧд унан Визувтам, мунам, Кылӧдам колода, лӧп, Весалам нюйтасьӧм гӧп, Жельнӧга ёгсӧ, Нужда да шогсӧ. Ӧтвылысь горӧдам гор: «Ставӧн ми Ленинизм дор!..» Дас коймӧд воӧ Сьӧктӧдъяс лоӧ — Сувтӧдам, корсям ми пом: Техника пуктас кӧрт вом. Ӧзъяна лача Абу ӧд чача, — (Паныд морт, чайта, оз шу) Путкыльтас мӧдарӧ му!.. Кинясян сынӧд Оз нин ӧд тшынӧд, — Удж вӧчны шедӧ ён ӧд, Босьтчасны став мырсьысь рӧд: Коммунизм тэчны, Выль сарство вӧчны, — Кодӧс эз тӧдлы на йӧз — Вок сикас олӧм да мез!.. Долыд, мый тӧрӧ, Сувтас йӧз шӧрӧ: Техника гыпкӧ — тэ видз, — Нимкодясь олӧмлы сідз... Тӧв нырӧн шургӧ, Гораа мургӧ, Быттьӧкӧ саридзлӧн гы, Тувччалӧм гырысь кок шы.
