ОКТЯБРЛӦН ТУЙСьӧкыда овлісны Гӧль йӧзыд войдӧр, Биысь моз повлісны Озырысь нэм. Гӧльястӧ личкаліс Нартитысь войтыр: Быд ногӧн пычкыліс На пытшкысь вем. Рабочӧй шырзьыліс Кӧртъяс и пуяс, — Заводын мырсьыліс, Кодлы — оз тӧд. Помещик кабырын Вӧліны муяс, — Кыдзи нӧ та бӧрын Лоан тэ пӧт? Гӧгӧрбок жӧдзисны Быдсяма врагъяс, Пемыдлун кӧдзисны — Мойдісны «грек». Гӧльясӧс йирисны Нидзув кодь гагъяс, Ӧтарӧ зырисны Топӧдны век. Скӧтӧс моз нулісны Войнаяс вылӧ, «Пукты пӧ, шулісны, Сар понда юр». Асьныс тай кольччисны Пыдӧджык «тылӧ», Небось тай польтчисны — Кӧвтісны бур. Миллёнӧн усины Кось вылӧ вокъяс... Кутіс сэк пузьыны Ловъялӧн вир. Тшыг йӧзлӧн мудзисны Кияс и кокъяс, Подувъяс судзисны: Колӧ нин мир. Гӧгӧрбок корсисны, Коді тан мыжа, — Сьӧлӧмъяс чорзисны, Паськалі син: Вӧлӧмкӧ власьтъясыс Пырӧны тышӧ — Корсьӧны дасьясӧс, Ыджыдджык чин... Февральын «пыртісны» Столица карӧс, — Шойясӧн тыртісны Ветлӧдлан туй... Эз и дыр бӧрйыны — Чужйисны сарӧс, Кӧсйисны перйыны Олӧмлы туй... Бара на дзугсисны — Сувтісны джынъяс: Сар пыдди пуксисны Озыр да князь. Керенскӧй вӧчаліс Ас ногыс чинъяс, — Бара на лӧсяліс Озырлы мазь. Война эз дугӧдны, Олӧм эз вежсьы, Каръясӧс жугӧдны Эз на ло шань; Крестьяна колины Кӧсйысьӧм кежсьыс: Во джынсӧ колльыны Оз тырмы нянь... Йӧз пӧвстысь петісны Вежӧра войтыр, Йӧзыслы сетісны Сьӧлӧм да вын: — Кодъяс зэв лышкыда Овлісны войдӧр, Найӧӧс «чышкытӧг» Некыдз он мын. Октябрын вермисны Вунӧдны полӧм, — Враг вылӧ скӧрмисны Пӧрысь и том... Путкыльтчис, пазалі Важся лок олӧм, — Сьӧд кымӧр разалі, Разьсис кӧрт дом... Водзиыс югдӧма — Веськыда мунам. Олӧмӧ пуктӧма Стрӧитчан из. Сӧ-Сӧ-Рӧ пасьтала Дорам Коммуна — Быдмӧ да паськалӧ Социализм.
