ЧУД-ЧУДИЛӦ
Коркӧ-некоркӧ ӧти грездын олісны-вылісны кык вок. Ӧтиыс Матвей, озыра олысь, мӧдыс — Опонь, гӧльсьыс-гӧль. Челядьыс — киясад чуньясыд оз тырмыны, гӧтырыслӧн паськӧмыс — сӧмын киссьӧм сарапан. Ачыс, Опоньыс, дӧмаса дукӧс новлӧ. Нӧшта вӧлі Опоньлӧн омӧлик пегӧй вӧв. Став ордлысӧ позьӧ лыддьыны. Пӧттӧдзыс некор турунсӧ абу сёйлӧма. Ӧдва кокъяс вылас сулалӧ.
Ӧтчыд, тӧвнас, Опонь доддяліс Пегушӧс да песла вӧрӧ мӧдӧдчис. Гожӧмнас на дасьтыліс пес чипас.
Шогсьӧ Опонь... Уна-ӧ пӧ Пегушлы доддяс пестӧ сӧвтан, гашкӧ, куимысь ломтымӧн?
Коркӧ и воис пес чипас дорӧ, аддзӧ: чипасыд киссьӧма, а пес улас кодкӧ ымзӧ-бӧрдӧ.
Опонь повзис да кутіс пессӧ ӧтарӧ-мӧдарӧ шыблавны. Видзӧдӧ: морт нисьӧ абу, кутшӧмкӧ зверь тыдовтчис. Плешкас ӧти син, да ӧд и сійӧ тыртӧм — сӧмын гуран тӧдчӧ. Юрас — сюръяс.
— Ок! — ыджыда лолыштіс тӧдтӧм зверь. Аттьӧ тэныд, Опонь, менӧ мездӧмысь. Котӧрта вӧлі да пес чипасад зураси, сійӧ ме вылӧ киссис. Да ӧд кытчӧкӧ и син бугыльӧс вошті. Он-ӧ корсьышт менсьым синмӧс?
— Корся, — шуӧ Опонь.
Бара босьтчис пессӧ шыблавны. Шыблаліс, шыблаліс, да ӧд коркӧ и сюри синмыд. Дзик чипан кольк ыджта, виж бугыль.
— Тайӧ али мый? — юаліс Опонь да мыччис синсӧ.
Морт нисьӧ зверыд синсӧ сэсся тай кыдзи швачнитіс аслас плешкас лапанас — бугыльыд бӧр места вылас лои.
— Аттьӧ тэд, Опонь. Менӧ Чуд-Чудилӧӧн шуӧны. Бур вӧчӧмсьыд висьтала ме тэныд бур кыв. Кор мыйкӧ ковмас, сӧмын шу:
— Чуд-Чудилӧ,
Нач ӧти бугыльӧ,
Шмака юра,
Укват сюра, мый мен колӧ, сійӧ мед и лоӧ.
И воши Опонь син улысь Чуд-Чудилӧ.
Чуймис Опонь, но мӧвпыштіс:
«Часлы, видла, гашкӧ, Пегуньлӧн вын-эбӧсыс содас?»
— Чуд-Чудилӧ,
Нач ӧти бугыльӧ,
Шмака юра,
Укват сюра.
Мый мен колӧ, сійӧ мед и лоӧ.
Сӧмын на удитіс кӧсйӧмторсӧ шуны — Пегуньӧс кодкӧ быттьӧ вежис. Бӧжнас швачкӧ, кокъяснас лымсӧ гурйӧ. Опонь муртса удитіс пессӧ доддьӧ тэчны, кыдзи Пегунь гӧнеч кутіс котӧртны гортланьыс.
Челядьыс петісны кильчӧ помӧ да дивуйтчӧны, мый Пегунь сы мында пес вайис. Ӧдйӧ додьсӧ и ректісны.
Опонь разяліс Пегуньӧс, ясли дінӧ пыртӧдіс да шуӧ:
— Чуд-Чудилӧ,
Нач ӧти бугыльӧ,
Шмака юра,
Укват сюра.
Мый мен колӧ, сійӧ мед и лоӧ.
Верд пӧттӧдзыс менсьым Пегуньӧс, гӧтырӧс да челядьӧс, медым быдсяма сёяныс вӧлі.
Видзӧдӧ: вӧв ясли тырыс лои мича веж турун, мешӧк зӧр да ведра тыр сӧстӧм ва.
Гортас пырис, а пызан сайын челядьыс пукалӧны, пызаныс сёян-юанӧн тырӧма, гӧтырыс пачысь кыскалӧ сёян тыра гырнич бӧрся гырнич, пирӧг да шаньгаяс да шензьӧ:
— Ме тай та мыйтасӧ эг пу, ни эг пӧжав, а пачыс сёянсӧ сетӧ и сетӧ.
Пуксис Опонь пызан сайӧ, сёйис-юис да и шуӧ:
— Ветлӧй, челядь. Став грездса йӧзсӧ гӧститны корӧ, Матвей вокӧс гӧтырыскӧд энӧ жӧ вунӧдӧй.
Став грездса йӧзӧс гӧститӧдісны-юктӧдісны.
Матвей вокыс и юалӧ:
— Кысь нӧ тэныд, Опонь вокӧ, та мында сёян-рокыс? Тэнад няньыд рӧштвоӧдз некор эз тырмывлы.
Опонь ставсӧ висьталіс, кыдзи мый да и бур кывъяссӧ петкӧдіс.
Котӧртісны Матвей гозъя гортаныс, игнасисны да ӧттшӧтш горӧдісны:
— Чуд-чудилӧ,
Нач ӧти бугыльӧ,
Шмака юра,
Укват сюра,
Мый мен колӧ, сійӧ мед и лоӧ.
Мед лоӧ миян мешӧк тыр зарни сьӧм, амбар тыр сю-шобді. Керкаын быдсяма эмбурыс, вина-сурыс сизим тшан.
Виччысисны, виччысисны гозъя, но нинӧм эз ло.
— Колӧ Опоньӧс асьсӧ корлыны. Сытӧг чудлӧн кывъясыс оз мӧрччыны. Ветлы, гӧтыр, да кор сійӧс гӧститны.
Локтіс Опонь, гозъя кватитісны сійӧс шошаӧдыс да топӧдісны.
— Кор Чудилӧыдлысь миянлы мешӧк тыр зарни сьӧм, амбар тыр сю-шобді, керка тыр эмбур да вина-сур сизим тшан.
— Ог ме кор дзик нинӧм. Оз ков горшасьны.
— Ок! Ми тэнӧ кӧзӧдын кынтам! Небось сэк ӧдйӧ рамман!
И тойыштісны Опоньӧс кӧзӧд гуӧ. Опоньлы дум вылас воис Чудлӧн кывъясыс:
— Чуд-Чудилӧ,
Нач ӧти бугыльӧ,
Шмака юра,
Укват сюра,
Мый мен колӧ, сійӧ мед и лоӧ.
Велӧдышт менсьым вокӧс да гӧтырсӧ, мед некор оз горшасьны,
Сӧмын тайӧс шуис, Матвейлӧн горнича тырыс лои веж петшӧр корӧсьяс, и босьтчисны найӧ корӧсявны гозъяӧс.
— Ой! Ой! — бӧрдӧны Матвей гозъя, — Опонь, мезды миянӧс! Ой! Ой! Оз нинӧм ков! Сӧмын идрав петшӧрсӧ.
Опонь шуис Чудлысь кывъяссӧ и петшӧр корӧсьяс бырины. Сӧмын Матвей гозъялӧн чужӧмныс и киясныс ставнас поркъялӧмаӧсь.
Локтіс Опонь гортас. Олӧны-вылӧны ладӧн. Озырлун вылӧ оз ыштыны. Мый колӧ, ставыс эм. Асланыс зіль уджӧн олӧмнысӧ лӧсьӧдӧны.
