МОЙДЧЫСЬ ПӦЧӦ, ВНУЧКАЯС ДА ЁМА

Ӧти пӧрысь пӧч зэв ёна радейтіс пывсянын корӧсясьны. Быд лун кӧть пывсяс. Пывсян бӧрын сьӧлӧмыс бурмӧ. Внучкаясыслы, Тонялы да Сонялы, мойдӧ уна мойд. Сы вӧсна Соня да Тоня и радейтісны пӧчсӧ да кывзысисны. А маті нюрын, аслас чомйын, оліс Ёма бабӧ Проньӧ да Прокӧ внукъясыскӧд. Оз кывзыны найӧ Ёма баблысь нинӧм да сӧмын нерӧны ӧтарӧ:

Ёма, Ёма, пиньтӧм вома,

Куйӧд дука, кокыд клюка,

Нянь шомӧсын пусин.

Юрыд нянясис,

Ныр увсьыд панясин,

Асьтӧ пон моз нюлін,

Сэсся и кулін.

— Трасичаяс, дугдӧ менӧ нерны! — горзӧ Ёма, а ачыс мӧвпалӧ: кыдзи эськӧ вӧчны, медым дугдісны внукъясыс нерсьыны. Кывліс сійӧ, мый маті грездын олӧ мойдысь пӧчӧ. Внучкаясыс сійӧс кывзӧны.

«Вайӧда чомйӧ, медым Проньлы да Проклы мойдчӧ», — мӧвпыштіс Ёма, пуксис рос вылӧ да лэбис грездӧ ӧкурат сэк, кор пӧчӧ вӧлі корӧсясьӧ пывсянас. Пырис, кватитіс пӧчлысь кисьыс корӧсьсӧ да горӧдіс:

— Пӧрысь пӧчӧс корӧсьӧн вӧча!

Пӧрысь пӧч пырысь-пыр, быттьӧ пӧсь вый бекарын сылі, корӧсь пиӧ пырис, корӧсьӧ пӧртсис.

— Вот сідз! — серӧктіс Ёма. — Кутан менам внукъяслы мойдны, оз-ӧ нерсьыны дугдыны.

Шамыртіс корӧсьсӧ киняулас, пуксис рос вылӧ, аслас чомйӧ лэбис. Воис да шыбитіс корӧсьсӧ внукъясыслы пӧлатяс:

— Тайӧ корӧсьыс кутас тіянлы мойдны, сӧмын дугдӧй менӧ нерны.

— Ладнӧ... — шуисны Пронь да Прокӧ, — ноко, корӧсь, мойд!

А корӧсь чӧв олӧ. Сэки Ёма босьтіс корӧсьсӧ да кыдз швачнитас доналӧм пач пӧдан бердӧ. «Чиш-ш!» — корӧсьыд шуис да мойдны кутіс. Сӧмын дугдас мойдны, Проньӧ да Прокӧ тешитчӧны-тракӧдӧны корӧсьсӧ да нӧшта на тшӧктӧны мойдны, шойччыштны оз сетны.

— Пӧчӧ-корӧсь, мойд водзӧ! — горзӧны.

Асылын садьмисны Тоня да Соня, пӧчыд абу. «Век на ӧмӧй пывсьӧ?» Котӧртісны пывсянӧ — сӧмын паськӧмыс сэні. «Паськӧмтӧгыс али мый кытчӧкӧ муніс?» — чуймисны челядь.

Суседъяслысь юалісны — некод абу аддзылӧмны. Кыськӧ-мыйкӧ кӧч-молодеч котӧртӧ.

— Кӧч-молодеч, эн аддзыв миянлысь пӧчӧс? — юалісны Тоня да Соня.

— Эг аддзыв, а гӧлӧссӧ кывлі Ёма чомйысь, — вочавидзис кӧч-молодеч.

Котӧртісны нюрӧ, Ёма чом дорӧ, кывзыштісны — збыль пӧчлӧн гӧлӧсыс кылӧ.

Таркӧдчисны да пырисны.

— Ёма баб, ті ордын миян пӧчным?

— Абу!

— Гӧлӧссӧ ми кывлім да, — оз эскыны Тоня да Соня.

— Тіянлы, буракӧ, кажитчис, — вочавидзис Ёма, а сэсся кватитіс корӧсьсӧ пӧлатьысь да морӧс бердас топӧдіс.

Корӧсь письыд ышлов кывліс, но эз казявны нывъяс.

— Он кӧ веритӧй, корсьӧй! — бара на содтіс Ёмаыд.

Тоня да Соня быдлаысь корсисны А Ёма, Пронь да Прокӧ ваксьӧны-гигзьӧны.

Сэки корӧсь вуг-занас кыдз тай зургис Ёмалы вомас, Ёма уси веськыда мыш саяс сулалысь нянь шомӧсӧ. Корӧсьыд мыні Ёма киысь да горӧдіс:

— Ме тані, корӧсь пиын!

Тоня гӧгӧрвоис, кватитіс корӧсьтӧ, Соня Ёмалысь россӧ босьтіс. Нывъяс сюр-сярӧн пуксисны рос вылӧ да гортланьыс лэбисны.

— Сувтлӧй, сувтлӧй! Мыйла Ёма бабӧлысь вошӧмторсӧ, миянлы сетӧм козинсӧ пышйӧданныд? — горзӧны Пронь да Прокӧ, Тоня да Соня бӧрысь нюрӧдыс котӧртӧны. Вот-вот суӧдасны.

Кыськӧ кӧч-молодеч воис, налы кок улас скон вӧчис. Пронь да Прокӧ нюрӧ увлань юрӧн усисны да вӧйисны. А Ёма ӧдва чеччис нянь шомӧссьыс. Весь няньзьӧма, джодж вылын вильсъялӧ, кокъяс вылас сувтнысӧ оз вермы.

Воисны Тоня да Соня гортаныс, игнасисны, пӧчӧ-корӧсьсӧ вольпасьӧ водтӧдісны. Пӧчӧ ружтӧ корӧсь пиын. Сэк кості и Ёма воис, кильчӧ вылӧ кайис, таркӧдчӧ.

— Вайӧ меным кӧть нин роскӧс! — бӧрдӧ Ёма.

— Сетам, — игана ӧдзӧс сайсянь шуӧны Ёмалы Соня да Тоня. — Пӧрт бӧр дзоньвидза мортӧ миянлысь пӧчӧс дай сэки и сетам, а он кӧ — ростӧ биын сотам.

Ёма ёна и повзис да пыр жӧ ӧдзӧс сайсянь и горӧдіс:

— Корӧсьысь вӧча дзоньвидза пӧчӧс!

Сӧмын шуис тайӧс, пӧчӧ бӧр лоис мортӧн. Та бӧрын сійӧ нӧшта на мичаджыка да дырджык: лунтыр и рытывбыд кутіс мойдчыны, а челядь сійӧс сюся кывзӧны, вежӧраӧсь быдмӧны.