ДЫШ ЧОЙЯС

Олісны ӧти позйын Петук Петрӧван да кык чипан чойяс. Петук зарни бордъя, сера гӧна, гӧрд сапӧга. Ӧти чипан чой гӧрд гӧна, сьӧд туплиа, мӧд чипан чой сьӧд гӧна, виж туплиа. Кыкнаныс тшапӧсь, кокъяснысӧ оз кӧсйыны лякӧсьтны. Петук чипанъясӧс радейтӧ, нидзувъясӧн чӧсмӧдлӧ.

— Локтӧй, локтӧй, нидзув сюрис, кокыштӧй!

Чепӧсъясны чойяс, тышкасьӧны-мырддьысьӧны, бус лыбӧ.

Гӧрд чипан Петрӧванлы вашкӧдӧ:

— Петрӧван-мусукан, сьӧд чойӧс эн радейт, эн чӧсмӧдлы!

Петрӧван сӧмын бордъяснас шлопкӧдлӧ, бара ёг чукӧрын лукйысьӧ, нидзув корсялӧ.

— Локтӧй, локтӧй, нидзув сюри, кокыштӧй!

Сьӧд чипан тайӧс и виччысьӧ. Сылы ӧні удайтчис кокыштны. Петрӧванлы вашкӧдӧ:

— Петрӧван-зӧлӧтан, гӧрд чойӧс эн радейт, мед ачыс корсьысьӧ.

Петрӧван нинӧм оз шу, сӧмын бордъяснас шлопкӧдлӧ, бӧжсӧ сявкйӧдлӧ. Бара ёг чукӧр парсалӧ. Ачыс оз кокышт, кӧть и кынӧмыс сюмалӧ.

— Локтӧй, локтӧй, госа нидзув кокыштӧй!

Бара сьӧд чипан кокыштіс, гӧрд чипан эз удит. Кык чой косьӧ воисны, ӧта-мӧдныслысь сорснысӧ кокалӧны, гӧгӧр гӧн лэбалӧ.

— Эн косясьӧй, шӧриасьӧй! — ӧлӧдӧ Петрӧван.

Чойяс нинӧм оз кывзыны, Петрӧванӧс на тойыштісны, муртса кок йывсьыс эз уськӧдны. Скӧрмис петук, потшӧс вомӧн орчча йӧрӧ лэбис.

Сэні рам чипанъяс кокасьӧны. Петрӧван нидзув аддзис да горӧдіс:

— Локтӧй, локтӧй, нидзув кокыштӧй!

Котӧрӧн чипанъяс локтісны. Сьӧрсьӧн-бӧрсьӧн сувталісны. Шум ни зык абу, Петрӧван нидзувъяс корсялӧ:

— Тайӧ тэн, а тайӧ тэн, а тэныд корся жӧ. Ставныдлы тырмас.

А горш чипан чойяслы аслыныс сэсся ковмис корсьны кынӧмпӧтсӧ.