ВУРДЫСЬ-ЖУРДЫСЬ

Оліс-выліс вӧрын пасьяс вурысь Вурдысь аслас пиыскӧд Журдыськӧд. Ӧтчыд Вурдысь мам ыстіс Журдысь писӧ пӧрысь Ёж дорӧ.

— Ветлы, пиӧ, сусед ордӧ да кор ӧти ем.

Котӧртіс Журдысь сусед ордӧ. Тур-тар! — таркӧдчис ӧдзӧсӧ.

— Коді сэні? Пырӧй!

— Тайӧ ме, Журдысь. Мамӧ ыстіс емла.

Пырис Журдысь Ёжлӧн йӧрӧ да чуймис. Сэтшӧм гажа сад пӧльӧ Ёжлӧн! Ӧмидзыд да озйыд гӧрд ӧзйӧма.

— Мый нӧ видзӧдан? Колӧ ӧмидзыс? Гӧститӧда, — Ёж вотіс ӧмидз да оз, вердіс Журдысьӧс да ещӧ на лапа тырыс сетіс, — ну да мамтӧ гӧститӧд. А со тэн и ем, — нетшыштіс мыш вывсьыс ӧтиӧс.

Котӧртіс Журдысь гортас, сетіс мамыслы ӧмидз, оз да ем.

— Кысь нӧ ӧмидзыс? — юаліс мамыс.

— Ёж пӧль сетіс.

— Аттьӧсӧ нӧ шуин эн?

— Аски шуа, нӧшта емыдла ветла да.

Аскинас Журдысь бара котӧртіс Ёж пӧль ордӧ. Таркӧдчис йӧр ӧдзӧсӧ... Некод эз шыась. Восьтіс ӧдзӧс да горӧдіс:

— Ёж пӧльӧ!

Некод эз шыась.

— Буракӧ, абу гортын. Ачым ӧмидзсӧ сёйышта.

Пӧттӧдз сёйис ӧмидз-оз, вотіс мый тӧрис лапаас, котӧртіс гортас.

— На, мамӧ, ӧмидз-оз. Ёж пӧль сетіс.

— Аттьӧсӧ шуин нин талун?

— Шуи.

— А емыд нӧ кӧні?

— Эз сет.

— Но, мый нӧ лоӧма? Век на сетліс да. Гашкӧ, Ёжыс висьмис? Лоӧ аслым котӧртлыны.

Котӧртіс Вурдысь Ёж пӧльӧ дорӧ. Таркӧдчис да пырис.

— Пыр, пыр, — радпырысь паныдаліс Ёж пӧльӧ Вурдысьӧс.

— Видза олан, Ёж пӧльӧ, эз-ӧ висьмыны емъясыд? — повзьӧмӧн юаліс Вурдысь.

— Эз висьмыны. Вала ю дорӧ ветлі, колӧ ӧд киськавны татшӧм йӧртӧ. Ватӧг ӧмидз-озйыд оз быдмы.

— А менам пиӧй аттьӧсӧ нӧ висьталіс эз ӧмидз-озсьыд?

— Тӧрыт тай воліс да эз и висьтав.

— А талун висьталіс?

— Талун эз на волы.

— Чӧв! Сідзкӧ, ачыс вотӧма ӧмидз-озсӧ? Ме емла ыстылі да. Прӧстит менӧ, Ёж пӧльӧ, муна да чирышта либӧ.

— Эн чирышт. Ыстыв ме ордӧ, медым ва ваявны отсыштас.

Журдысь дзебсьӧма пызан улӧ. Яндзимысла синъяссӧ лапанас тупкӧма. Мамыс локтіс да шуӧ:

— Мун Ёж пӧльӧлы отсышт ва ваявны. Киськасьны колӧ.

Зэв радпырысь котӧртіс Ёж пӧль ордӧ Журдысь.

— Ёж пӧльӧ, сэсся менӧ он нин пиняв?

— Ог, — шуӧ Ёж. — Сӧмын юасьтӧг сэсся некор эн вот ӧмидз-озтӧ.