БЕРИНӦСЬ НЫРА КӦЧ
Коркӧ-некоркӧ,
Важӧн-неважӧн,
Кыдз вылын мойд ӧшаліс,
Ён тӧв пӧльыштіс,
Мойдыд видз вылӧ усис,
Пусь-пась жугаліс.
Тайӧ абу на мойд, а мойд пельӧс,
А мойдыс со:
Вӧръяс костын, видзьяс бокын олісны кӧчьяс. Ӧти кӧч вӧлі беринӧсь ныра. Сійӧ ӧтчыд горӧдіс:
— Ёртъяс-кӧчьяс, вайӧ тӧв кежлӧ чом вӧчамӧй!
— А тэ ӧмӧй кужан? — юалісны кӧчьяс.
— Ме?! Быдтор кужа, колӧкӧ велӧда?! — тшапа вочавидзис беринӧсь ныр.
— Велӧд! — шызисны кӧчьяс.
— Ветлӧй потшъясла!
Котӧртісны кӧчьяс вӧрӧ. Быдӧн вайисны потшъяс, кодлы кутшӧм сюрис.
— Ӧні крестӧн тэчӧй, медым шӧрас колас вӧлі.
Тэчисны, кыдзи кужисны.
— Ӧні коз лапъяс ваялӧй!
Котӧртлісны кӧчьяс коз лапъясла, тэчисны потшъяс вылӧ.
— Ӧні ваялӧй турун да лапъяс вылӧ лӧдӧй!
Кӧчьяс нетшкисны видз вылысь турун, ставсӧ сідзи вӧчисны, кыдзи тӧлка кӧч шуис. Чом модаа артмис. Медводз чомйӧ пырис беринӧсь ныр. Сы бӧрся мукӧдъяс. Дзескыд лоӧма, оз тӧрны. Беринӧсь ныр ставнысӧ пинялӧ:
— Он кужӧй чом вӧчны! Весиг бӧр кокӧн гыжйыштчыны некыдз. Тадзи и ковмас овны.
Коркӧ и лымъяліс. Шоныдджык лои. Вель джуджыд лым пуксис. Кӧч чом лым улысь оз тыдав, сӧмын мылькйыс тӧдчыштӧ.
Йӧра дядь маті мунны слӧймис. Нырнас кыскыштіс — турун дук кыліс. Кокъяснас лым мыльк гурйыштіс. Чӧскыд турунӧн чӧсмасис. Мунігмозыс чом вылӧ тальыштіс, потшъясыс рутшка-ратшкакылісны. Тӧкӧтьӧ кӧчьясӧс эз лямӧд. Муртса пышйыны слӧймисны.
Ӧти кӧч коз улӧ дзебсис, мӧд пӧрӧм пу улӧ пырис, коймӧд лым гуранӧ лажыньтчис, нёльӧд сісь пу тӧщӧ пытшкӧ тӧрӧдчис. Сӧмын беринӧсь нырлы места эз сюр — котралӧ да быдӧнӧс велӧдӧ:
— Тэ мыйла коз таладорас пырин? Мӧдарас колӧ.
Мӧдӧс пинялӧ:
— Мыйла тэ лым гуранас вывлань кокӧн пырин?
Коймӧдӧс дӧжналӧ:
— Тэ нӧ йӧй али прӧсуж? Пырӧмыд пу тӧщӧӧ, а бӧжыд ортсыын? Колӧ, мед нырыд эрдын вӧлі.
Нёльӧдӧс укӧрайтӧ:
— Мыйла пӧрӧм пу улас пырин? Тэн нӧ сувтса пожӧмыс эз сюр? Но и кӧчьяс! Велӧд кӧть эн тіянӧс! Некутшӧм тӧлк абу!
Ӧти томиник кӧчилей и юалӧ:
— А ме ог тӧд, кытчӧ дзебсьыны?
— Мыйла нӧ дзебсьынысӧ? Кодысь?
— Гашкӧ, кӧин локтас, — шуӧ кӧчилей.
— Ме думысь, кӧин татчӧ оз лок, локтас кӧ — пышъян дай.
— А кыдзи пышйыны?
— Нёль кокӧн, дзоля кӧчилей. Нолы, петкӧдлы, кужан он?
Кӧчилей босьтчис чеччавны коз пу гӧгӧр.
— Ме жӧ шуи: нёль кокӧн, а тэ чеччалан, быттьӧ тэнад куим кок.
Кӧчилей водзӧ кутіс чеччавны коз гӧгӧр.
— Коді нӧ тадз пышйӧ кӧинысь?
Беринӧсь ныр сэтшӧма горӧдіс, мый кӧчилей весиг бӧрддзис.
Матын и кӧиныд вӧлӧма. Садьмис.
— Но, сё мокасьт, коді бара сэні риксӧ? Лоӧ видзӧдлыны.
Мыччысис, аддзӧ: кӧч беринӧсь ныр кӧчилейӧс чурмӧшитӧ.
— Мый нин лои? — эрӧстліс кӧин.
Кӧчилей пуля моз шутёвтіс-вошис, а Беринӧсь ныр шай-паймуніс, да местаас мыр моз сувтіс.
— А мэ-э-э-э...
— А мый тэ? Ыж али мый?
— Мэ-э-э-э... — тірзьыны кутіс беринӧсь ныр. — Ме кӧчилейӧс велӧді, кыдзи колӧ тэысь пышйыны.
— Нолы, петкӧдлы! Кыдзи кужан пышйыны?
Беринӧсь ныр непӧштӧ пышйыны, места вывсьыс чеччыны оз вермы. Уси лым вылӧ вывлань кокъясӧн. Тіралӧ.
— Тышкасьтӧг и сетчан? — гӧрдлӧ кӧин, да матыстчӧ беринӧсь ныр дорӧ. Здук — и курччас. Беринӧсь ныр повзис да бӧръя кокъяснас сэтшӧма чапыштіс кӧинлысь нырсӧ, мый мӧдыслӧн синсьыс би сявкнитіс.
— Ой, ой, ой! — равӧстіс кӧин. — Ме ӧд чайті, тэ пышъян, а тэ вӧлӧм чужъясян. Мыйла кӧчилейсӧ мӧд ногӧн велӧдан?
— Ме унаторйӧ на верма велӧдны. Кӧсъян, приём петкӧдла? — збоймис беринӧсь ныр. — Кучиктӧ лэдза?
— Ой-ой! Ог кӧсйы, меным некор...
Нырсӧ малалігмоз кӧин надзӧникӧн усйысис вӧрӧ.
