РАКА ДА САКАР

Коркӧ ӧтчыд аддзӧ рака —

Туй вылын туплясьӧ сакар.

Прамӧй сакар, рафинад.

Рака лоис ок и рад:

— Талун юа юмов тшай

Куим стӧкан, кружка да-й.

Бытьӧн пета кильчӧ вылӧ,

Чурскӧмӧн мед кылас ылӧ.

Кырныш-суседлӧн, кор аддзас,

Завидьысла потас гачыс.

Катша локтас юигкості,

Ме пӧ сакар торсӧ вошті.

Мый он аддзы, ставыс сылӧн.

Быттьӧ ӧтнас олӧ-вылӧ.

Тадзи рака сакар дорын

Ачыс аслыс кравзіс гора.

Шуасигад эз и казяв,

Кыдзи муыс гӧгӧр вазис.

Кымӧр локтіс, зэрӧн койис.

Рака дорын гуран лоис.

Гашкӧ, ӧнӧдз ассьыс сакар

Корсьӧ гуран пиысь рака.