ПОЖ ТЫР БӦЖ

Пукалӧ Сӧлӧ баб кильчӧ помын, мыйкӧ шогсьӧ.

Матыстчӧ сы дорӧ порсь:

— Рук-рук! Мый нӧ, Сӧлӧ баб, вошӧмыд нисьӧ сюрӧмыд?

Сӧлӧ баб:

— Ой, польӧ, польӧ. Менам ӧд талун нимлун. А менӧ некод эз нимӧд, нинӧм некод эз козьнав.

— Ме тэныд козьнала ассьым бӧжӧс, со чикыль керӧма, — шуӧ порсьыд.

Сэсся босьтіс да нетшыштіс бӧжсӧ:

— На, Сӧлӧ баб!

Сӧлӧ бабыд сой гӧгӧрыс гартыштіс крукыля бӧжсӧ:

— Ой, молодеч! Бӧжыд менам сой вылын быттьӧ браслет! Аттьӧ тэныд, полюкӧй, татшӧм мича козинсьыд!

Сэсся локтіс кань Малань:

— Сӧлӧ баб, ме тэныд тшӧтш жӧ козьнала ассьым бӧжӧс. Менам сійӧ гӧна да дона!

Сӧлӧ баб рад лоис, босьтіс бӧжсӧ.

Сэсся пон Сирпинь воис:

— И ме тэныд, Сӧлӧ баб, козьнала бӧжӧс!

Орӧдіс бӧжсӧ:

— На, Сӧлӧ баб, эн шогсьы!

— Ай да, пасибӧ! Ӧні ме гажми нин!

Сэсся ур локтіс:

— Сӧлӧ баб, ме тэныд ассьым пашкыр бӧжӧс козьнала жӧ!

И ассьыс пашкыр бӧжсӧ козьналіс.

Пон Макс локтіс сэтчӧ. Ачыс гӧрд гӧна, а бӧжыс еджыд. Та вӧсна и баквалитчӧ быдӧн водзын, нырсӧ лэпталӧ, вышшитчӧ:

— На тэныд, Сӧлӧ баб, менсьым медмича бӧжӧс!

Воис Ош, киняулас мыйкӧ вайӧ. Мыччис Сӧлӧ баблы пож:

— Ме тэныд, Сӧлӧ бабӧ, пож козьнала. Кыклаті сӧмын и розялӧма, туяс на.

— А мый вылӧ нӧ туяс? — юалӧ Сӧлӧ баб.

— А пожъяс тэ лӧд став бӧжтӧ, мича и букет артмас.

Босьтіс Сӧлӧ бабыд пожтӧ, сюяліс сэтчӧ бӧжъястӧ. Найӧ чурвидзӧны, быттьӧ дзоридзьяс. Пуктіс пожтӧ лабич вылӧ.

— Аттьӧ-пасибӧ ставныдлы. А ӧні, вайӧ, ставӧн пырам ме ордӧ чай юны кӧлачӧн, шаньгаӧн да сакарӧн.

Пырисны ставӧн Сӧлӧ баб ордӧ, пуксялісны самӧвар гӧгӧрыс. А Сӧлӧ баб ыджыд сакар кусӧксӧ быдӧнлы юклӧ-поткӧдӧ щипцыӧн да шуалӧ:

— Ті сакарсӧ энӧ курччалӧй, а тшӧка саяд пуктӧй, сідзсӧ чӧскыдджык чайыд.

Пукалӧны гӧсьтъяс, чай чурскӧны блюдйысь, кӧлач колскӧны, сакар нёнялӧны.

Чай юӧм бӧртиыд Сӧлӧ баб мойдыштіс налы, а сэсся ставныслы бӧр сеталіс ассьыныс жӧ бӧжъяссӧ да ӧтчукӧр мӧдӧдчисны гуляйтны.