БЫЗГУН ОШ
Оліс-выліс ош Бызгун. Сылӧн вӧліны тӧдсаяс: дзодзӧг Шмоткысь, кузь кока тури Шляпкысь да рака Шняпкысь. Ӧтчыд ош Бызгун юалӧ:
— Эй!!! Дзодзӧг Шмоткысь, кӧні нин кыйсян-вийсян?
— Ме га-гагъясӧс, нидзувъясӧс вутшъяс костысь корсяла. Зэв уна сюрӧ. Лунтыр кӧть шмоткы-сёй, он и мудзлы, — вочавидзис дзодзӧг Шмоткысь.
Юалӧ ош Бызгун турилысь:
— Эй!!! Тури Шляпкысь, тэ нӧ кӧні мый прӧмышляйтан?
— Ме ветлывла зыбуч нюрӧ, лягуша-зьмейясӧс кутала да ньылала. Сувта да видзӧда, а найӧ асьныс ме дорӧ локтӧны. Сӧмын шняпкы-сёй. Котравны оз ков.
— Тэ тай сё майбыр вӧлӧмыд, — веж петіс ош Бызгунлӧн. — Час, ракалысь юала.
— Эй!!! Рака Шняпкысь, тэ нӧ кӧн лэбалан, кысь да мыйӧн чӧсмасян?
— Ме увтасінъясын, нюйта местаясын быдсяма номыръясӧн, ракпань шойясӧн чӧсмася, зобйӧс тырта.
— Сійӧ жӧ тай, видзӧда да, — дивитӧ ош Бызгун ракаӧс, — кокыд да нырыд век няйт.
— А тэ нӧ ӧні кытчӧ мунан? — юалӧ рака Шняпкысь.
— Меным лоӧ юӧ пыравны, оз-ӧ гоз-мӧд чери шед. Кынӧмӧй нюкыртчӧма.
Ош Бызгун бызмуні ю шӧрӧ. Бызйӧдчис, бызйӧдчис, чери бӧрся вӧтлысис, кыйӧдчис. Ӧти чери эз шед.
Рыкӧстіс ош Бызгун, дӧсаднӧ лои, кынӧмыд сюмалӧ.
— Муна, — шуӧ ош Бызгун, — вутш костысь дзодзӧглысь сёянсӧ сёйышта, зэв пӧ тай кокниа кынӧмпӧт шедӧдӧ.
Сюйис нырсӧ вутш костӧ, няйт сімӧм ваас, да кутшӧмкӧ пежгаг нырас и самасис.
Ырыштчис ош Бызгун, зыртны кутіс нырсӧ эжӧр турунӧ, ӧдва гагсьыд мынтӧдчис:
— Вот срамыс, тӧді кӧ эськӧ, эг жӧ сюй нырӧс срам пиас. Лоӧ ветлыны Шляпкысь турилысь сёянсӧ видлыны...
Кӧсйис пырны зыбучӧ, да пыр и бӧрыньтчис, тӧкӧтьӧ зыбучыд сійӧс эз кыскы.
— Но, трасича... Ветла ракалысь номыръяссӧ нюйтсьыс видла сёйыштны.
Локтіс ош Бызгун нюйтӧ, пыдӧ вӧйласьӧ, ӧдва кокъяснас восьлалӧ. Нюйтыс шузьӧ. Номырыд эськӧ и сюри. Вом тырыс лои нюйта номыр. Да лои пырысь-пыр и сьӧлыштны — няйтыс! Лёк дука!
— Тьпу... Пежалі вомӧс, — сьӧласис да сьӧласис. — Рака сёяныд абу ме серти.
Да сэк жӧ и аддзис: лыа берег пӧлӧн кӧч чеччалӧ.
Вӧтчис, вӧтчис... Кӧч ӧтарӧ-мӧдарӧ шыбласьӧ-чеччыштӧ. Ош Бызгунлӧн кывйыс нюжаліс, ачыс кашкӧ. Кӧчыд эз шед. Лои эновтчыны. Абу кокни Бызгун ошлы кынӧмпӧт корсьны. Турун йирыштіс да шойччыны водіс.
Шойччыштіс да тыӧ пырис гыч кыйны. Гычьясыд ӧкурат петӧмаӧсь ва пыдӧссьыд кульмыны. Бызгун ошлы вель уна шедіс, пӧттӧдзыс чӧсмасис. Гычыд абу лёкгагъясыд, кӧть и кыйны абу кокни, сы пуд чӧскыд.
