ЧЕРИ КЫЙЫСЬ КАНЬ ДА ПЕТУК

Олісны-вылісны чери кыйысь кань да петук. Ӧтчыд каньлы зэв уна чери пырис тывъяс. Кыскыны оз вермы.

— Отсыштӧй кодкӧ! — горзӧ кань. Неылын шӧйтіс руч, кыліс, матыстчис.

— Мый нӧ горзан? — юаліс каньлысь.

— Отсышт, зэв уна чери пырис тывъяс, кыскыны ог вермы. Джын черисӧ сета.

Кутчысис руч тывъяс, эз на удит кыскыны, вильдіс, бызмуніс ваӧ. Кань тыв шыбитіс, ковмис ручӧс ваысь кыскыны.

— Со тэ вӧсна кӧтаси. Косьты кыдз кужан!

— Эн шогсьы, неылын ола, шоныд паччӧрын шонтысян и косьтысян, — шуис кань да нуӧдіс аслас гортӧ.

Куйлӧ руч паччӧр шӧрын да и шуӧ:

— Медым петукыд менсьым гӧнӧс шыльӧдас-мольӧдас.

Кайис петук паччӧрӧ, а руч сійӧс кватитіс да кутіс нетшкыны-курччавны.

— Ой! Ой! Кысульӧй, руч менӧ пӧгибӧ воштіс!

— Ак тэ, руч, мыйла менсьым отсасьысьсӧ ӧбидитан? Мун тась, усйысь!

— Ог мун, тэ меным паччӧр сетін. Ме тані кута овны.

— А ми нӧ кӧні кутам овны?

— А ті пач ломтӧй да пач улын олӧй. Такоскӧй!

Кань да петук кутісны пач ломтыны да пач улын овны.

Коркӧ кань бара на чери кыйны муніс. А петук кольччис, пач дорын тыв кыӧ.

— Лок ме ордӧ паччӧр вылӧ, шонтысь, — зэв мудера, меліа шуӧ руч.

— Ог эшты. Ачыд лэччы, — шуӧ петук. Лэччис руч петук дінӧ. А петук кыдз тай шыбитас руч вылӧ тыв. Сэтчӧ сійӧ и гаровтчис.

Сэк кості кань пырӧ. Пестер тыр чери вайӧ.

— Со мыйта, петук другӧй, ме чери кыйи. Ёна и чӧсмасям!

— А ме ручтӧ тывйӧ кыйи, мый кутам вӧчны?

— Нуам вӧрӧ да лэдзам, мед мунӧ кытчӧ гажыс.

— А ме кӧсъя чери сёйыштны, — няргыны заводитіс руч.

— Ми бур войтыртӧ век гӧсьтитӧдам, а тэнӧ бадь беддьӧн колльӧдам. Мун татысь!