ГӦСЬТ

Ӧтчыд Витя мунӧ туй кузя, паныд сылы Ош Миш:

— Кытчӧ нӧ, Витя, мунан? — юаліс Ош Миш.

— Ыджыд мам ордӧ гӧститны, талун ыджыд праздник, — вочавидзис Витя.

— Ме тэкӧд тшӧтш муна, — вӧзйысьӧ Ош Миш.

— Но инӧсь мунам.

Пырисны ыджыд мам ордӧ,

Витя и шуӧ:

— Ыджыд мам, ме ӧд абу ӧтнам, Ош Мишкӧд локті.

— Но медым, пуксьӧй пызан сайӧ, праздник кузя гӧсьтъясӧн лоанныд.

А пызан вылын мыйыс сӧмын абу: пирӧг-шаньгаыд, чериняньыд, кампет, печенньӧ, весиг сакара суктӧм йӧв. Витя ӧти шаньга эз на удит сёйны, а Ош Миш ставсӧ пызан вылысь ректіс аслас паськыд рушкуӧ, чеччис да шуӧ:

— Ставсӧ, бабӧ, сёйи, аски бара гӧсьти вола.

— Эн, — шуӧ бабӧ, — аски ӧд абу нин праздник, тэ мӧд праздник дырйи волы.

Аскомысьсӧ бара Ош Миш локтіс Витя ыджыд мам ордӧ.

— Талун праздник? — юаліс Ош Миш.

— Абу, талун прӧстӧй лун, — вочавидзис бабӧ.

Водзӧ бара локтіс, да бабсӧ эз су. Сэсся кор оз лок, век абу праздник.

— Кор бара праздникыс лоӧ-а? Менам ӧд кынӧм сюмалӧ, — юалӧ Ош.

— Ош Миш, праздникыс лоӧ да, сэк тэнӧ корам. А прӧстӧй лунӧ сёян-кӧрымтӧ ачыд судзӧд.