ВАРОВ ЛЯГЕЙ

Ты дорын олісны лягушаяс. Нинӧм вӧчны да, лунтыр больгӧны да сералӧны. Ӧтчыд пуксис сэтчӧ тури. Ӧти лягушаӧс кокыштіс, да пӧт на вӧлі, да эз ньылышт, а шуис:

— Кӧсъян кӧ овны, висьтав меным сэтшӧм нӧдкыв, медым ме тӧдмавны ог вермы, а тӧдмалала кӧ, сёя тэнӧ.

«Сӧмын больгыны и кужа, ӧти нӧдкыв ог тӧд», — думыштіс лягуша.

— Но! — грӧза шуис тури. — Дыр-ӧ думайтан?

— Кык чӧрс вылын еджыд кымӧр, количаяс улын ножич, — дум вылас воис лягушалы.

— Тьпу! — сьӧлыштіс лягушаӧс тури. — Ог тӧд.

Лягуша турун улӧ дзебсис, корсь — он аддзы.

Пуксис ты вылӧ дзодзӧг. Ӧти лягушаӧс кокыштіс. Эз на удит ньылыштны, а лягуша и кевмӧ:

— Энлы сёй, нӧдкыв тӧдмав!

— Но висьтав ӧдйӧджык, кынӧм сюмалӧ, — тэрмӧдлӧ дзодзӧг.

— Кодъяс, кор да кодарӧ лэбӧны пельӧс визьӧн, чукӧрӧн, и кодъяс ӧта-мӧд бӧрысь?

— Ог тӧд, висьтав, — вом паськӧдіс дзодзӧг.

А лягуша — быз! — ва пыдӧсӧ. Он корсь.

Пуксис ты дорӧ рака. Кокыштіс лягушаӧс, а сійӧ юалӧ:

— Энлы сёй, нӧрӧвитлы. Висьтав: мыйла тэнад пӧчлӧн юрыс абу лючки?

Ӧти синмыс бӧж улас,

Кок пыддиыс —

масьтан паличьяс,

Зобйыс сюмӧдысь,

Абу ныр, а мегыр,

Абу бӧж, а корӧсь рос.

— Но морӧ, — шензьӧ рака, — а ме ӧд ог и тӧд, мый менам пӧчӧ татшӧм.

Пока рака шензис, лягуша — люс-ляс и пышйис тась.

Вутш улӧ пырис да пӧттӧдзыс ваксис. Ракаӧс пӧ ылӧдлі, а сійӧ на и эскис.