МАБАТЬ

Миша куйлӧ паччӧр вылын ыджыд мам ордас. Ыджыд мамыс шензьӧ:

— Миша, Миша, мый бара куйлан паччӧр вылын, дыштӧ пӧжан!? Мун кӧть чипанъясӧс ид тусьӧн вердышт-кокӧдышт.

— Ой, ыджыд мам, кутшӧм лӧсьыд тэнад паччӧрыд, карад ӧд паччӧрыд абу. Ещӧ неуна куйлышта.

— Аттӧ, дивӧ! — бара шензьӧ ыджыд мам. Гашкӧ, збыль тэныд сетны чипан кольк пӧжны. Инкубаторскӧй чипанъясыд оз кужны кольктӧ пӧжны.

— Вай, вай, пӧжа, артмас кӧ! — зэв радпырысь окотитіс Миша. — Дыр-ӧ колӧ пӧжны?

— Абу дыр, сӧмын куим вежады и ставыс.

— Абу тай дыр, вай пӧжа, — корис Миша.

Ыджыд мамыс босьтіс важ кумли, пыдӧсас вольсаліс чипан гӧн, сы вылӧ лӧдіс чипан колькъяс, мыйта тӧрис, сэсся мыччис Мишалы паччӧрас:

— На, вод кумли вылас кокниа, медым колькъясыс оз лязавны. Корсюрӧ ловнад пӧляв, медым колькъясыс оз косьмыны, да корсюрӧ чипан моз котсы: «Квот-квот». Чипанпияныс кольк кыш пырыс кылӧны, а кор петасны кыш письыс, тэнӧ пыдди пуктасны.

— Ыджыд мам, ме ӧд детинка, сідзкӧ, ме лоа налы батьӧн.

— Чипанпияныдлы бать-петукыс веськодь.

Недыр мысти колькъяс кутісны быдмыны. Кумлиад эз кутны тӧрны, да паччӧр пасьтаыс быгыльтчисны. Миша кияссӧ бордъяс моз паськӧдіс, колькъяссӧ ӧтчукӧрӧ чукӧртіс, да котсӧ:

Квот-квот, энӧ быглясьӧй.

Кынӧм улын шонтысьӧй.

Ӧдйӧджыка быдмӧй, быдмӧй.

Кольк кыш пиысь письтӧй-петӧй!

А колькъясыд и быдмисны, футбол мач гырсяӧсь нин лоины. Да кыдз тай кутісны гымӧдчыны-писькӧдчыны: ӧтпырйӧ мыччысисны дас сизим петук юр: тошкаӧсь, сорса-бордъясаӧсь. Ӧта-мӧдыслысь зиллисны-пазйисны, ӧшинь стеклӧ моз, кольк кышъяссӧ да ыджыд гӧлӧсӧн ставӧн лэбисны Мишалы юр вылас да пельпом сой вылас, юалӧны ӧтпырысь, тӧкӧтьӧ эз чунав пельясыс.

— Тэ коді?

— Ме тіянлы лоа батьӧн.

— А мамным кӧні?

— Ме и мам пыдди лоа, — вочавидзис Миша.

— Сідзкӧ, тэ лоан миянлы Мабатьӧн, — горӧдісны петукъяс.

— Но инӧсь, лоа ме тіянлы Мабатьӧн, — шуис Миша, и ставӧн, дас сизим петук, окыштісны-кокыштісны Мишаӧс ныр-вомас. Ок, и доймис Мишалӧн ныр-вомыс... ёнджыкасӧ, дерт, нырыс. Миша кулак пиас нырсӧ кутӧ, медым кӧть дзоньнас нырсӧ оз ротйыны Мишалӧн быдмӧм петукъясыс.

Петукъяс ставӧн горзӧны-чирзӧны: «Ку-ка-ре-ку, Мабать! Вердышт миянӧс!»

Миша чайнӧй паньӧн рокӧн найӧс вердӧ.

— Ыджыд мам! — горӧдіс Миша, — мыйла нӧ ставӧн лоины петукӧн, ни ӧти чипан эз артмы.

Ыджыд мамыс шогпырысь и шуӧ:

— Буракӧ, тэ зонка, да мужичӧй рӧдыс тэысь налы вуджӧма. Мӧдысь кежлӧ пӧжны пукта тэнсьыд дыш чойтӧ. Сэк, дерт, чипанъяс лоӧны.

Сідз, Миша и лои петукъяслы Мабатьӧн: вердӧ, юкталӧ да дӧзьӧритӧ кырныш-варышысь.

Ӧтчыд, кыськӧ-мыйкӧ, енэжас кывтӧ-лажмӧдчӧ кырныш-варыш. Ӧти петук Мишалӧн саймовтчис, кырныш-варышыд сійӧс аддзӧма да, ноп моз, енэжсянь веськыда усис петук вылад, кватитіс коньӧрӧс, петуктӧ, да кыпӧдіс. Петук горзӧ:

— Мабать! Мабать!

Варыш менӧ кватитіс!

Енэжас кыпӧдіс!

Кок гыжъяснас шамыртіс!

Сювъясӧй петӧ, вирӧй виялӧ!

Миша босьтіс рогатка да лыйис кырныш-варышлы веськыда плешкас... Кырныш-варыш садьтӧгыс уси-шмоткысис му вылӧ, петукӧс лэдзис.

Петук шуӧ:

— Мабать, тэ тай зэв вӧлӧм бур... — да окыштіс-кокыштіс Мишалысь нырсӧ.