ШЕВА ЭНЯ-НЫЛА
Олісны-вылісны шева баба Кос Тшак Павла Паладья нылыскӧд. Ӧтчыд Кос Тшак Павла корис дінас нывсӧ и вашнитіс пеляс сылы:
— Мунам, нылӧ, дворечӧ и гусялам Сарлысь пузчужӧм писӧ, и сетам сылы лёк да гора шева.
Вежсисны кага пестуйтчысь паськӧмъясӧн да мунісны дворечӧ.
Стражникъяс юалӧны:
— Коді ті?
— Он кӧ аддзӧ, бугыльястӧ босьтӧ кианыд. Саревичӧс пестуйтчысьяс! — горӧдісны эня-ныла.
Стражникъяслы лои лэдзны, сы мыйта пестуйтчысьяс, мый быдӧнӧс он и тӧд. Пырисны шева эня-ныла джуджыд жырйӧ, кӧні потанын вӧлі узьӧ Сарлӧн кага. А потан гӧгӧр нелямын пестуйтчысь ныргорӧн узьӧны-шкоргӧны, мый потаныс лайкъялӧ ачыс лов шысьыс.
Кос Тшак Павла потанысь босьтіс кага и петісны.
Кильчӧ вылын стражникъяс юалісны:
— Кытчӧ татшӧм водз?
— Он аддзы, Саревич гуляйтны петіс асъя сынӧднас лолыштны. Стражникъяс эз кутны. А шева эня-ныла котӧрӧн асланыс пывсянӧ. Сэні Кос Тшак Павла кутіс ассьыс шевасӧ сетны ичӧтик Сар пилы. Паладья нылыс видзӧдӧ да велӧдчӧ, кыдзи мамыс вӧчӧ: шева мамыс мышсяньыс водзвылас кияссӧ шеналӧ, чуньяссӧ паськӧдлӧ да шуалӧ:
Лёк вир, лёк кыв пыр!
Скӧр кыв, скӧр вир пыр!
Горшась, кватлась — пыр!
Пӧръяч, гусясь — пыр!
Сэсся бӧр саревичсӧ тӧбисны да Сарлы сад йӧрас лабич вылӧ и колисны. Садьмисны саревич пестуйтчысьяс... а кага абу. «Коді нуис?» — Некод оз тӧд. Лыддисны мӧда-мӧднысӧ — ставыс пестуйтчысь эм, сӧмын кага абу. Котӧрӧн разі-пели корсьны мунісны. Сар да сарицалысь юасьны оз лысьтны. Коркӧ и сад йӧрысь аддзисны. Дзоньвидза тай кагаыс-а, мый сэсся колӧ.
Коркӧ-некоркӧ шева Паладья юаліс мамыслысь:
— Кыдзи эськӧ мортсӧ бурӧн вӧчны?
— А кодӧс нӧ кӧсъян бурӧн вӧчны? — юаліс воча мамыс.
— Кӧсъя лавкаысь Матрен тьӧтсӧ бурмӧдны. Ок, и лёк сійӧ, сдача он лысьт корны.
— Сылӧн, нылӧ, шеваыс миянысь на ыджыдджык. Но видлы, гашкӧ и артмас: тэ кулактӧ морӧс вылад топӧд, сэсся чуньястӧ мыш саяд куимысь шенав да шуав:
Дур кыв брыт-брут!
Лёк кыв шыть-шуть!
Бур кыв лок-лок!
Мелі сьӧлӧм ло-ло!
Котӧртіс шева Паладья лавкаӧ, чайтӧ, мый Матрен тьӧтӧс вӧчас бурӧн, оз кут быдӧн вылӧ равзыны да пӧръясьны. Сӧмын на кутіс бур шева сины, кыдзи Матрен тьӧт равӧстіс сы вылӧ:
— Мый нӧ, кӧсъян менӧ бурмӧдны!? А этайӧ тэд оз ков? — Мыччӧ пига. — Ме тэнӧ асьтӧ бурӧн вӧча, мамтӧ вунӧдан! — Юрсисӧ нетшыштіс, чунь гӧгӧрыс гаровтіс, мый Паладья сӧмын дивуйтчӧ: «Менам мамлы тайӧс колӧ на велӧдчыны». И лои Паладья зэв бур нывкаӧн, но мамыслы эз петкӧдлы, мый сьӧлӧмыс лои бур.
Коркӧ-некоркӧ Сар пи быдмис, лои зэв лёкӧн, скӧрӧн да горшӧн. Пестуйтчысьястӧ ставнысӧ нӧйтіс да вӧтліс. А мам-батьыслы горӧдіс:
— Сарствуйтыштінныд и тырмас! Ачым кута сарствуйтны! Коронаяссӧ мырддис да шуис:
— Коді медозыр невеста, сійӧс и босьта гӧтыр вылӧ.
Шева Кос Тшак Павла ассьыс нывсӧ Паладьясӧ зарни платтьӧӧ пасьтӧдіс, юрвывсянь кокулӧдзыс, ӧшліс пӧрйӧдлан бриллиантъясӧн и вайӧдіс том Саревич водзӧ, шуис:
— Тэ лоан медозыр Сарӧн вӧльнӧй свет вылас.
Войнас шева Кос Тшак Павла кӧлдуйтіс Тӧлысь вылӧ:
Тӧлысь, Тӧлысь, зарни моль,
Гылав Сар йӧрӧ гиль-голь,
Вичко крест весьтӧдз зиль-зёль.
Тӧлысь тіравны кутіс: гиля-голя Сарлы йӧрас сявкйыны кутіс зарни сьӧмӧн, сы мында, мый вичко крестыс эз кут тыдавны. Сизим во чӧж сё слуга да лыддьысьысьяс идралісны зарни сьӧмсӧ казнаӧ. Лои том Сар медозырӧн свет вылас. А шева Паладья олӧ том Саркӧд, но некутшӧм бур кыв верӧс Сарсянь эз кывлы. Весиг зэв гежӧда аддзысьлывлӧны.
«Видла ме сійӧс бӧр бурӧн вӧчны», — мӧвпалӧ Паладья. И войнас кутіс кӧлдуйтны:
Бур кыв брыт-брут!
Лёк кыв шыть-шуть!
Бур кыв лок-лок!
Мелі сьӧлӧм ло-ло!
Асывнас Сар верӧс садьмис и шуӧ:
— Талун, гӧтырӧй, тай мичаджык лоӧмыд. Вай ме тэнӧ окышта. — Сэсся содтіс: — Луныс талун бур. Ог кӧсйы лоны Сарӧн. Кӧсъя, медым енэжас Тӧлысьыс лоӧ. Зарни сьӧмыс мен оз ков. Корӧй бӧр бать-мамӧс сарствуйтны. Сетӧй налы коронаяссӧ. А ми, том гозъя, мунам вӧльнӧй свет видзӧдлыны. Мӧда-мӧднымӧс радейтны кутам.
