ЮСЬ ГӦН

Оліс-выліс Агни. Ичинь дорын быдмис ичӧтдырсянь, мамтӧг колис да. Ичинь вӧсни прӧшви кыӧ да вузалӧ озыр модничаяслы. Агниӧс сійӧ велӧдіс вӧсниа печкыны, прӧшви сунис путшкыны. Агни эськӧ зільӧ вӧсниа печкыны, да оз на быд раз артмы. Ичинь пинясьӧ:

— Тадзтӧ печкан кӧ, модничаяс прӧшвитӧ оз ньӧбны. Сӧмын нырагез вылӧ и туйис. Мый сэсь мынтасны.

— Ог вермы, Ичиньӧ, вӧсниджыкасӧ, шабді кудельыс таво лёка быдмис, вывті зумыд.

— Шабді кудельыс кӧ зумыд, мун ветлы нюрӧ, ӧкты сэсь юсь гӧн, сэсь вӧсни сунис артмас, черань вез кодь, кокньыд, лолыштны он лысьт, лэбзяс.

Муніс Агни нюрӧ кӧмтӧгыс, ӧти вутш вывсянь мӧд вылӧ восьлалӧ, кӧнсюрӧ дзумгысьлас пидзӧс вылӧдзыс. Ӧктӧ вӧсни турун вылысь юсь гӧн. Еджыд, кокни. Багуль дуксьыс юрыс висьӧ. Зэв дзоляник мешӧк лунтырӧн вотіс. Колӧ нин гортӧ мӧдӧдчыны, пуксис шойччыны, да кыськӧ пуксис воча кузь голяа еджыд юсь да юалӧ морт гӧлӧсӧн:

— Тэ мый вылӧ менсьым гӧнсӧ вотан?

Шай-паймуні Агни, но эз повзьы.

— Прӧшви вылӧ колӧ печкыны. Ме печка, а Ичинь кыӧ, сэсся и вузалам. Миян ичӧтик нажӧтка. А тэд кӧ жаль, Юсь, ме бӧр сета.

— Абу жаль, ме тэд уна сета, ме сайӧ кӧ, мича нылӧй, верӧс сайӧ мунан.

Зэв ёна повзис Агни да и шуӧ:

— Ме кӧть эськӧ муна, да ӧд Ичинь оз сет. Молодеч кӧ эськӧ вӧлін, гашкӧ, и сетіс.

— Ну тайӧ гӧнсӧ, печкы. Кор гӧныс помасяс, шу:

Юсь гӧн помасис.

Ныв кадӧй помасис.

Жӧник волас.

Венеч улӧ нуас.

Муніс Агни гортас. Зэв вӧсниа печкис уна тупыль. Сэсся и шуӧ:

Юсь гӧн помасис.

Ныв кадӧй помасис.

Жӧник волас.

Венеч улӧ нуас.

Сӧмын сідз шуис, пырис еджыд Юсь, куимысь шуис:

— Тайӧ менам невеста.

Агни тшӧтш шуис куимысь:

— Тайӧ менам жӧник.

Ичинь чуймис, нем шуны эз вермы. Юсь борднас швуч-швач... и лои том молодечӧн. Ичинь сӧмын сэк и юаліс:

— Висьтась, коді тэ, да мыйла юсьӧн вӧлін?

— Куим во ме новлі юсь гӧн. Шуӧны менӧ Максимӧн. Ӧтчыд батьӧ муніс вӧравны да веськаліс зыбуч нюрӧ, тӧкӧтьӧ эз пӧд. Кыскис сэсь Ёма, да шуис:

— Мездӧм пыдди ковмас тэд гӧтравны питӧ менам ныв вылӧ.

Кор меным батьӧ висьталіс, ме муні нюрӧ да ӧткажиті Ёмалы. Ог кӧсйы Ёма нывкӧд овны, бурджык кувны. Сы вӧсна Ёма менӧ пӧртіс юсьӧн, да и шуис: — Сэтчӧдз юсьӧн лоан, кытчӧдз нюр вылысь оз сюр невеста.

Лэбалі ме нюр пасьтала, нетшки ассьым гӧнӧс, мездӧдчи, и эг мездмы, выль пыр быдмис. Ёнджыка сукмис. Быд нюр турун йылӧ гӧнӧй ӧшйӧ. А мортӧн ӧнӧдз эг вермы лоны. Сӧмын мича Агни эз повзьы менам ӧбликысь.

Сэсся венчайтчисны, свадьба ворсісны. Дыр Агни да Максим радейтчисны, шуд эз коль найӧс.