УШИМ-ЛАШИМ

Оліс-выліс Ушим-Лашим: юрыс вӧвлӧн, кокыс лопысь, рушку-пушкун, нитшка-гӧна. Олӧ, да быдӧн сыысь полӧ.

Аддзан кӧ, и тэ повзян.

Ӧтчыд корис сійӧс Сир, неыджыд тыын вӧлі олӧ:

— Вай мунам чери кыйны.

— А кыдзи кутан кыйны? — юаліс Ушим-Лашим.

— Ме ӧтарын тыас кыйӧдча, а тэ мӧдарсяньыс черияссӧ повзьӧдлы.

— Но, инӧсь, сідзтӧ кӧ, кужа. — Кутіс черияссӧ Сирлань повзьӧдлыны. Сир дугдывтӧг черияссӧ шлапкӧ-ньылалӧ.

— Ӧні тэ черияссӧ мелань вӧтлы, — шуӧ Ушим-Лашим.

Сир кутіс повзьӧдлыны, бӧжнас швачкӧ, но нинӧм эз артмы. Сӧмын черияс разі-пели, сюв-сяв пышъялісны-тювкъялісны.

— Мый нӧ, ачыд пӧтін, а меладорӧ черияссӧ он кӧсйы вӧтлыны! — скӧрмис Ушим-Лашим.

— Ог куж да, — шуис Сир.

— Лок ме дінӧ, велӧдчы, — шуӧ Ушим-Лашим. Сир матыстчис Ушим-Лашим дінӧ, а сійӧ сиртӧ шняпкис. Вот кыдз пӧ колӧ. Пуксис Ушим-Лашим берег вылӧ, юрсӧ копыртіс, ва пыдӧссьыс кӧсйис видзӧдлыны черияссӧ, да сьӧкыд вӧв юрыд сылӧн ори, бызмуні ваӧ. Коли Ушим-Лашимлӧн куш рушку-пушкун, нитшка-гӧна. Коді берег вылысь сійӧс аддзас, оз тӧд, мый юртӧм Ушим-Лашим, тувччас, либӧ пуксяс сы вылӧ, сэсь ва пычмунӧ, да нӧшта рукӧстас.

Эн пуксьы, эн тувччы, повзян.