КЫВЗЫСЬТӦМ ӦБЕЗЬЯНАЯС
Ӧти вӧрын, джунгли шӧрын, Гималайскӧй Ош восьтіс зверьяслы школа, медым найӧс велӧдны быдсяма зверь законӧ: кытӧн кодлы позьӧ кыйсьыны; кутшӧм юысь-тыысь позьӧ юны, уявны, варччыны; кодлы кутшӧм сёян позьӧ сёйны; кодысь повны, кодкӧд позьӧ косясьны, кодкӧд позьӧ вермасьны да кыдзи. Да нӧшта унатор на колӧ тӧдны.
Став зверь-пӧтка зэв бура кывзӧны, сӧмын ӧбезьянаяс оз зільны велӧдчыны: урок вылын чирзӧны, увлань юрӧн ветлӧдлӧны, пу вылын лайкъялӧны. Ошлысь пельсӧ чеплялӧны, нырсӧ чапалӧны...
Матайтчис велӧдысь Ош, муніс Бегемот ордӧ норасьны. Сійӧ и шуӧ:
— Он кӧ ӧні жӧ ӧлӧд, голя вылад пуксясны.
— А кыдз нӧ найӧс ӧлӧдны? — юаліс Ош.
— Босьт винёв ньӧр да пукалан местасӧ обезьянаяслысь ньӧръяв.
Локтіс Ош школаӧ, сьӧрас винёв ньӧр вайис. Муртса ӧбезьянаяс кутісны вильшасьны, кватитіс Ош ӧтиӧс, кык кок вож костас топӧдіс бӧрвыв юрӧн, сэтчӧдз швинькйӧдліс пукалан местасӧ, мый обезьяналӧн сэсь став гӧныс уси, гӧрд сітана коли. Ланьтіс ӧбезьяна, сітан бексӧ малалӧ. Ланьтісны и мукӧдъяс. Полӧны. А сійӧ ӧбезьянаыд ӧнӧдз на гӧрд сітана ветлӧдлӧ. Он кӧ веритӧй, ветлӧй зоопаркӧ. Сэні сійӧ. «
