МУ ШЫР АЙ

Оліс-выліс мужик. Кузь лун пессис аслас неыджыд му-видз вылын: гӧрис-кӧдзис, вундіс-вартіс, ытшкис турун, куйӧд кыскаліс.

Ӧтчыд аддзис: кыдзи Му Шыр вом мешӧк тырыс сю пыртіс аслас му патераӧ.

— «Со ӧд, сё майбырӧй, оз тай ков гӧрны-кӧдзны. Сӧмын кыскав дасьсӧ. Меным кӧ эськӧ Му Шырӧн лоны!» — мӧвпаліс мужик. Сӧмын мӧвпыштіс, кыдз Му Шыр гуранӧ дзумгысис. Видзӧдӧ: Му Шырлӧн вель ыджыд жытник, кӧні быдсяма запассӧ дасьтӧма вель дыр кежлӧ. А кӧзяйкаыс, зэв ёсь ныра, Му Шыр энь и шуӧ:

— Тэ, мужик, кӧсъян кӧ, лоан Му Шыр айӧн, а ме тэнад эньӧн лоа. Вӧчны нинӧм оз ков, сӧмын дасьсӧ ваяв.

— Да, кӧсъя Му Шыр айӧн лоны. Тадзтӧ, овны позьӧ.

— Сідзкӧ, лоан. — Му Шыр энь пӧльыштіс-сьӧлыштіс, лапнитіс, исыштіс, и лои мужик пыдди Му Шыр ай.

Му Шыр ай кутіс ваявны йӧз амбаръясысь запасъяс, а Му Шыр энь лыд-тшӧт нуӧдӧ, жытникъясӧ лӧдӧ. А лишнӧйсӧ, кор некытчӧ пуктынысӧ, мукӧд шыр-крысаяслы вузалӧ.

Дыр-ӧ-недырӧ мысти Му Шыр ай муніс бара йӧз амбарӧ... а сэні нинӧм абу, сӧмын шыр-крысаяс ӧтарӧ-мӧдарӧ кыйкъялӧны. Кушӧн Му Шыр ай энь ордӧ воис.

— Мый нӧ, локтігмозыд мешӧксьыд ньылыштін али мый?! — юалӧмӧн горӧдіс Му Шыр энь.

— Некӧн нинӧм абу, — вочавидзис Му Шыр ай.

— Но, кытчӧ нӧ лоӧма? Кайлы йӧз костӧ, кывзы, кыйӧд, кытчӧ новлӧны сёян запассӧ?

Кайис Му Шыр ай йӧз костӧ, кывзысьӧ, мый сёрнитӧны.

Кык пӧрысь энь сёрнитӧны зэв шога:

— Ок-ок, колисны миянӧс вердысьясыд!.. Муналісны кокни олӧм корсьны. Некодлы гӧрны-кӧдзны. — Аддзисны Му Шыр айӧс. — Видзӧд, со и Му Шырыд тшыгъялӧма, йӧзсьыс оз пов, сёйны корсьӧ.

Локтіс бӧр Му Шыр ай аслас кӧзяйка энь дінӧ и шуӧ:

— Пӧрт менӧ бӧр мужикӧн, муна гӧрны-кӧдзны.

Нинӧм он вӧч, лои Му Шыр эньлы бӧр пӧртны сійӧс мужикӧн: пӧльыштіс, сьӧлыштіс, лапнитіс, исаліс вель ёна, дыркодь мысти артмис бӧр, Му Шыр айыд мужикӧ пӧри. Сӧмын вель нин пӧрысь лоӧма. Локтіс аслас киссьӧм керкаӧ. Паччӧр вылӧ кайис: лысьӧмъясыд юкалӧны, кашкис-кашкис да и куліс.