БӦБЫЛЬ

Оліс ӧти сиктын Бӧбыль. Рӧд ни вуж, керка ни карта сылӧн эз вӧв. Гожӧмнас морттӧ пыдди пуктылісны: кодсюрӧлы медасьліс турун пуктыны да сю вартны. Кынӧмыс кӧ пӧт и — ставыс. А тӧвнас некодлы оз ков. Пась ни кӧм, тшыгысла кынӧмас гӧгйыс путкылясьӧ.

Ӧтчыд Бӧбыль нямӧдшой вылӧ лаптиасис, юрас чуман пуктіс, морӧссӧ тывшойӧн гартіс да мӧдӧдчис туй кузя, кытчӧ синъясыс видзӧдӧны, кытчӧ кокъясыс нуӧны.

Быд сиктын сыысь повзьылісны: кутшӧм пӧ тайӧ лешак мунӧ? Быд керкаын пӧдласьлісны. Кутшӧм нин вӧзйысьӧм, кӧть кыдзи оз зильӧдчы, некод оз лэдз. Лои Бӧбыльлы водзӧ мунны. Гӧгӧр вӧр. Паськыд коз улӧ Бӧбыль водіс шойччыны. Аддзӧ, локтӧны шышъяс, мыйкӧ мешӧкын вайӧны. Бӧбыль повзис да, быттьӧ кань, коз вылӧ кавшасис, кыз ув вылӧ пуксис да ланьтіс. Куим шыш локтісны да коз улас пуксисны.

— Вот, — шуӧны, — татчӧ бипур ӧзтам да яя шыд пуам.

Коз улӧ бипур ӧзтісны. Вожа пу вылӧ ӧшӧдісны пӧрт, ва да яй, ид шыдӧс да сов лӧдісны. Асьныс гӧгӧр водалісны да, буракӧ, ойбыртісны. А Бӧбыльлӧн дульваыс яя шыд дуксьыс тёпкӧ, гӧгйыс нетшкыны мыш яйсӧ кутіс. Сэтчӧ жӧ и лаптиыс разьсис, шмоткысис веськыда пӧртйӧ. Пӧртсьыд пӧсь шыдыд шышъяс вылад резыштіс. Видзӧдӧны: шыд пиын лапти пусьӧ.

— Но! Ерӧмакань! Коді лаптисӧ шыдас пуктіс?

Сэтчӧ куимнаныс и косьӧ воисны, турун-нитш вылын быглясьӧны да мӧда-мӧдсӧ тувйӧны. А Бӧбыль серамсӧ кутны оз вермы, и друг увйыд чегис, Бӧбыль шмоткысис шышъяс вылӧ. Найӧ аддзисны, мый тайӧ Лешак уськӧдчис, сэтшӧма повзисны, руз-раз пышйисны.

Бӧбыль пуксис би дорӧ, лаптинас шыдсӧ паняліс, сэсся видзӧдліс, мый мешӧкас кольӧмаӧсь. А сэні паськӧм да уна деньга. Пасьтасис-кӧмасис, деньга зептас да питшӧгас лӧдіс. Сэсся прамӧй морт моз туй кузя мӧдӧдчис.