ВӦЛІ ДЫШ — ЛОИ ЧОЖ

Ӧти сиктын гусясьысьяс лоисны. Кир Ӧньӧ Дарьялысь жытниксӧ ректісны. Руч Ӧльӧ Машӧлӧн кос воль керкасьыс воши. А Кӧч Васьлӧн — выль сийӧс-завод. Коді гусясьӧ — некод оз тӧд.

Сӧмын Кланьӧ зэв дыш. Лун и вой енлы юрбитӧ да кудель печкӧ. Весиг няньсӧ дыш пӧжавны. Шомӧсысь няня рок сёйӧны.

Печкӧ да печкӧ Кланьӧ, а дӧра кыны бара жӧ дыш. Керка шӧрын сулалысь стан вылын сӧмын чераньяс зіля кысьӧны.

Давыд и шуӧ:

— Тэ кӧть дӧрӧм тыр дӧра кыышт. Пасьтавны нинӧм. Дӧрӧмӧй пельпом вылын ветьӧк кодь лоис нин.

— Туяс на, — вочавидзӧ Кланьӧ. — А пельпом вылад сунис табсӧ пукты, шоныдджык лоас.

— Но и гӧтыр менам, — шогсьӧ Давыд. — Кула кӧ, мыйӧн и пасьтӧдас. А мый, вода вот лабич вылӧ, быттьӧкӧ кулі. Мый эськӧ сійӧ кутас вӧчны?

Кланьӧ вала петіс. А Давыд сэк вомсӧ саӧн мавтіс, водіс лабич вылӧ, кресталіс кияссӧ, весиг оз лолав.

Пырис гӧтыр, аддзӧ: верӧс кулӧма.

— Ок-ок-ок... Давыд! Кулӧмыд тай?!

Сэсся босьтіс пельпом вывсьыс табсӧ да мӧвпалӧ: дӧрӧм вылӧ дӧра кыны пӧ зэв дыр. Кор на сійӧс кыан да вуран. Нинӧм вӧчны, сунис табнад и ковмас гартлыны.

Босьтіс Кланьӧ табйысь сунис пом, кӧрталіс кок чуняс. Сэсся нырӧдзыс вайӧдіс, кӧрталіс да бара кок чуньясӧдз лэччӧдіс. Сідз табсьыд и став сунисыд быри.

Та бӧрын Кланьӧ молитва сьыліс да кутіс бӧрдны-лыддьӧдлыны:

— Мыйла нӧ, Давыд-батюшко, кулін? Мыйла нӧ мӧдар светас мунін? Код вылӧ менӧ вежин?

Давыд кывзӧ да тӧкӧтьӧ оз горӧд:

— Сигудӧк вылӧ.

Но чӧв олӧ, кутчысьӧ. Виччысьӧ, мый водзӧ лоас.

А Кланьӧ сулалӧ да мӧвпалӧ: колӧ эськӧ гортла ветлыны. Но мӧд сиктӧдзыд коді нӧ вӧвтӧ сетас... Попӧс бара жӧ корны ковмас. Бара вит верст сайӧ мун. «Чӧвлы», — виччысьтӧг шуыштіс аслыс. Сундук тай дзик горт кодь. И нинӧм абу сэні, сунис табъяс кындзи. Сэсся перйис найӧс да матыстіс сундуксӧ покойник весьтӧ. Давыдтӧ сэтчӧ и путкыльтіс. Мӧдыс тӧкӧтьӧ эз ойӧст. Муртса кутчысис.

А Кланьӧлы и гуасьнытӧ дыш. Томлаліс сундуктӧ да кыскис сійӧс вугъясӧдыс жытникӧ. Мед на пӧ тані куйлыштас, бӧрынджык попла ветла.

Буретш сэк, кор Кланьӧ сундуктӧ кыскӧма, аддзылӧма сійӧс сусед Еропей.

— Со ӧд, — мӧвпыштіс Еропей. — Буракӧ, эмбурсӧ гозъя гусьӧн видзӧны. Со тай Кланьӧыд сундуксӧ ӧдва кыскӧ.

Сусед, Кланьӧлӧн гортас пырӧм бӧрын жӧ, жугӧдіс томантӧ. Жытниксьыд сундуктӧ гортас кыскис. Шуӧ гӧтырыслы:

— Со сундукас тырыс, буракӧ, эмбур. Тэныд ставсӧ козьнала. Сӧмын мыйӧн восьтам-а?

Еропей гӧтыр вочавидзӧ:

— Ноко, укват сюрӧн видла.

Сюйис укват сюр томан розьӧ, томан жиньмуніс, да сундукыс и воссис. Петӧ сэтысь Давыд. Сунис табъясыд усьӧмаӧсь да, дзик пасьтӧм.

— О, енмӧй! Свят! Свят! — повзисны Еропей гозъя. А Давыд и шуӧ:

— Ӧні ме тӧда, коді сиктын гусясьӧ. Урадниклы висьтала. Катаргаын сісьманныд.

— Криста ради! — шуӧ Еропей. — Некор сэсся гусясьны ог кутӧй. Сӧмын некодлы эн висьтав. Мый тэныд колӧ — сійӧс и сетам.

— Ковмас менӧ кӧмӧдны, пасьтӧдны да сундуксӧ бӧр местаас инавны... Еропей гозъя сідз и вӧчисны. А Давыд, молодеч кодь, гортас пырис.

— Давыд! Эн ӧмӧй тэ кув? — повзис Кланьӧ.

— Кыдз нӧ, ветлі мӧдар югыдас, да енмыс эз на примит. Бӧр ыстіс гортӧ. Тэ дорӧ. Тӧда пӧ Кланьӧ послушничатӧ. Локтам пӧ гӧститны коркӧ сё апостолкӧд. Медым сэк кежлӧ тэ дасьтысян, сё дӧрӧм да гач тыр дӧра кыан да вуран.

Ок и заводитіс Кланьӧ кысьыны, лун ни вой абу. И пачын мый сӧмын оз пусьы. Ӧшиньӧ видзӧдлывлӧ, оз-ӧ апостолъяс локны.