ПЕЧКАН ДА ЧӦРС

Важӧн-неважӧн ӧти сиктын оліс-выліс Дарья нима нывка. Ыджыд мам ордас быдмис сирӧтаӧн.

Ӧтчыд ыджыд мамыс корис Дарьяӧс дінас да шуис:

— Кула регыд, буракӧ, Дарьюшка, а тэд некутшӧм эмбур ог коль ас бӧрысь. Сӧмын печкан да чӧрс. Асывнас восьты ӧшинь, пуксьы печкан вылас шуйгаладорсяньыс, а чӧрссӧ веськыд киад босьт, медым шондісяньыс лоӧ. Жбыркнитас-пуксяс печкан вылӧ Гулю, велӧдас тэнӧ вӧсньыда, черань вез кыза, печкыны. Зарни да эзысь шӧртӧн серпасавны дӧраяс, кутшӧмӧс сӧмын царицаяс новлӧны. А кор пуксян печкан вылас веськыдладорсяньыс рытнас, чӧрссӧ шуйга киад босьт, медым шондіыс печкан вылас видзӧдӧ. Жбыркнитас-лэбас печкан вылад Джыдж кай, велӧдас тэнӧ кысьыны да вурны сэтшӧм вӧччан паськӧм, мый царица эз новлывлы.

Копыртчис Дарья ыджыд мамлы, окыштіс да регыд коли ӧтнас. Пуксис восьса ӧшинь дорӧ. Босьтіс Дарья печкан да чӧрс, пуксис шуйгаладорсяньыс, а чӧрссӧ босьтіс веськыд киас, кыськӧ жбыркмуніс-пуксис Гулю и велӧдіс Дарьяӧс ӧти лунӧн печкыны шонді шӧрт, зарни да эзысь сунисъяс. Рытнас босьтіс печкансӧ веськыдладорас, чӧрс — шуйга киас, шонді паныд. Жбырк лэбис Джыдж кай, велӧдіс ӧти войӧн Дарьяӧс кысьыны, вурсьыны. Лун да вой, лун да вой, а регыд и тӧдмалісны, мый Дарья кужӧ печкыны да вурсьыны сідз, кыдз саридз сайысь сэтшӧм печкысь-вурсьысь оз сюр. Кыліс и Царица. Тшӧктіс вайӧдны нылӧс. Вайӧдісны Дарьяӧс дворечӧ гардеробнӧйӧ. Тшӧктісны вурны Царицалы вӧччан паськӧм. Кажитчас кӧ пӧ Царицалы — кольччан дворечын уджавны. Мӧд луннас локтіс Царица, пасьталіс Дарьялысь вурӧм платтьӧ да сэтшӧма кажитчис, мый тшӧктіс быд лун кежлӧ выль вӧччан платтьӧ вурны. Лун и вой Дарья вурсис да кысис. А мукӧд царскӧй вурсьысьяс завидьтӧны сылы, лӧгалӧны.

Ӧтчыд, кор Дарья муніс шойччыштны, босьтісны вурсьысьяс сылысь печкансӧ да чӧрссӧ, жугӧдісны да пачын сотісны.

Локтіс Дарья — ни печкан, ни чӧрс абу. Эз кутны артмыны вӧсньыд шӧртъяс да зарни сунисъяс. Скӧрмис Царица да Дарьяӧс дворечысь вӧтліс.

Мунӧ туй кузя Дарья, паныд сылы гӧрба пӧрысь пӧчӧ локтӧ. Эз тӧд Дарья, мый тайӧ вӧлі Ёма.

— Лок ме ордӧ, Дарья. Меным кутан вурны мича, дона вӧччан платтьӧяс.

— А тіянлы ӧмӧй мича, дона платтьӧыс колӧ?

— Колӧ, колӧ, лок, — шуис Ёма и нуӧдіс Дарьяӧс сук вӧр шӧрӧ, пыртӧдіс пемыд ыджыд картаӧ. Быд пельӧсын пукалӧны сьӧд каньяс, бугыльясыс югъялӧны да картасӧ югзьӧдӧны. А пӧтӧлӧк бердас, кӧрт позйын, пукалісны Дарьялӧн велӧдысьяс Гулю да Джыдж кай.

— Тані и кутан вурсьыны. Вуран меным сэтшӧм паськӧм, медым войнас биӧн ырнялісны, а луннас тшынӧн тшыналісны, — шуис Ёма да кытчӧкӧ вошис.

— Дона Гулю да Джыдж кай, кыдз татысь пышйыны?

— Ок, ӧдвакӧ тась пышъян. Луннас варышъяс дӧзьӧритӧны, кокаласны лестукӧдз, а войнас сюзьяс кыйӧдчӧны.

Вӧчны нинӧм. Пуксис Дарья биа шӧрт печкыны. Локтіс Ёма, юалӧ:

— Но, заводитін эн?

— Печка нин эськӧ да, чуньясӧй сотчӧны.

Воис Ёма да кӧрт чуньлыс быд чунь вылӧ вайис, медым оз сотчыны. Кад мысти бара юаліс:

— Но мый нин вӧчан?

— Кыа, кыа, сӧмын юрӧй сотчӧ.

Вайис Ёма кӧрт шапка.

— Но мый нин вӧчан? — бара юасьӧ.

— Шӧрала нин да сарапанӧй сотчӧ.

Вайис Ёма кӧрт кольчуга. Пасьталіс сійӧс Дарья да шуис:

— Вура нин, аски дась лоӧ, сӧмын кокӧй сотчӧ.

Вайис Ёма кӧрт сапӧг. А ныв юасьӧ:

— Кытчӧ нӧ пукта биа платтьӧтӧ, керкаыд вед сотчас?

Вайис Ёма кӧрт чемодан. Сӧмын муніс Ёма, пуксьӧдіс Дарья сэтчӧ Гулюӧс да Джыдж кайӧс да котӧрӧн Ёма картаысь. Каньяс мышсяньыс чапалӧны, кӧртас гыжъяссӧ жугӧдлӧны. Луннас варышъяс кокалӧны, ныръяссӧ кӧртас жугӧдлӧны. А Дарья мый вынсьыс, кӧть эськӧ корт паськӧмнас сьӧкыд, а котӧртӧ. Вой воис, уськӧдчисны сюзьяс — гыжъяссӧ чегъявлісны.

Котӧртіс Дарья, ыджыд мам керкаас воис да игнасис. Пӧрччис кӧрт паськӧм, восьтіс кӧрт чемодан. Лэдзис вӧля вылӧ Гулюӧс да Джыдж кайӧс. Ачыс кутіс вурсьыны, сиктса став нывъясӧс вӧччӧдіс.