ЧУДЛӦН КЫВ
Важӧн, а гашкӧ и неважӧн, оліс-выліс Опонь гӧтырыскӧд да челядьыскӧд. И вӧлі налӧн омӧлик Пегынь нима кӧбыла — мерлина кодь, лыыс чурвидзӧ. А челядьыс сы мында — чуньясыд оз тырмыны. Потаныс некор оз тыртӧммыв. Дерт, сэсся эз лышкыда сёйлыны-юлыны.
Ӧтчыд Опонь доддяліс Пегыньсӧ, мӧдіс вӧрӧ гожӧмнас на дасьтӧм песла.
Тыртӧгыс Пегынь ӧдва восьлалӧ, а уна-ӧ пес доддьӧ лӧдан? Куимысь ломтымӧн. Кор вӧрас воис чипас дінӧ, аддзӧ Опонь — чипас киссьӧма, а пес чукӧр улас кодкӧ бӧрдӧ. Опонь зэв ӧдйӧ пес чукӧр ӧтарӧ-мӧдарӧ шыблаліс да медувсьыс аддзис пласьтвидзысь чудӧс. Сьӧд гӧна, кузь бӧжа, ош лапаяса, син пӧла.
— Юр, — шыӧдчис чуд. — Аттьӧ тэныд менӧ мездӧмысь. Дерт жӧ, эськӧ ачым верми петны чипас увсьыд да, кытчӧкӧ пес костас син пӧлӧй воши. Сытӧг ме нинӧм вӧчны ог вермы, отсышт меным нӧшта син пӧлӧс корсьны. Шогыд бырӧ.
— Корсьла, — шуӧ Опонь.
Пес кутіс доддяс тэчны, быд пес кост видзӧдӧ.
И збыль, сюри чудлӧн бугыльыс, дзик виж кольк моль кодь. Сетіс чудлы.
— Но, нӧшта на аттьӧ, — зэв ышловзьӧмӧн шуис чуд. — Сета тэныд вына «чуд» кывъяс, сӧмын шу:
Чуд-чудилӧ,
Ӧти синма зудилӧ,
Шмака юра,
Укват сюра,
Мый мед тшӧкта,
Сійӧс и ӧкта!
Тайӧ кывъяс бӧрас, мый колӧ, сійӧс и кор. А матӧ кӧ воан, бара шу, тӧкӧтьӧ мӧд ногӧн:
Чуд-чудилӧ,
Ӧта синма зудилӧ,
Шмака юра,
Укват сюра,
Кодӧс тшӧкта,
Сійӧс и нӧйта!
— Та бӧрын майшасьны он нин кут.
— Ноко, — шуӧ Опонь, видла татшӧм кывъяссӧ, збыль абу:
Чуд-чудилӧ,
Ӧти синма зудилӧ,
Шмака юра,
Укват сюра,
Мый мед тшӧкта,
Сійӧс и ӧкта!
— Вай менам Пегыньлы вын, медым пес гортӧдз мудзтӧг кыскас. Сӧмын сідз шуис, Пегынь быттьӧ мӧд лои. Ён, кӧрыма, бӧжӧн швачкӧ. Опонь муртса пессӧ кӧртыштны удитіс. Пегынь гортлань мӧдіс, сӧмын додь сюв дзуртӧ, тӧкӧтьӧ оз вальмун. Гортӧдзыс тай воис жӧ-а.
Гӧтырыс, челядьыс петісны гортысь, дивуйтчӧны: сы мында пес Пегыньыд кыскыны вермис.
— Батьӧ, кыдз нӧ та мында пес Пегыньыд кыскыны вермис? — юалӧны челядьыс.
— Вермис тай, — вочавидзис Опонь, — чуд отсӧгӧн.
Опонь Пегыньӧс лэдзаліс, картаӧ сувтӧдіс да шуис:
Чуд-чудилӧ,
Ӧти синма зудилӧ,
Шмака юра,
Укват сюра,
Мый мед тшӧкта,
Сійӧс и ӧкта!
— Вӧлӧс верд, юктӧд, да челядь-гӧтырӧс тшӧтш.
Сӧмын шуны удитіс, лясни тыр мича турун кыськӧ лоис да тыр зӧр. Шомӧс тыр ныаса дэбыд ва. Гортас пырис да видзӧдӧ, челядьыс и гӧтырыс пукалӧны пызан сайын да сёйӧны. Пызаныс сёян-юансьыс чегӧ. Мыйыс сӧмын абу! Пуксис Опонь тшӧтш сёйны. А челядьыс бара на юалӧны:
— Батьӧ, кытысь нӧ та мында сёян-юансӧ вайин?
Опонь и висьтасис, кыдзи да мый вӧлі.
— Ӧні и позьӧ гӧстьясӧс коравны. Ыджыд вокӧс абу яндзим корны. Ветлӧй, челядь, корӧй, медым гӧститны волас.
Гӧстьяс гӧститісны, ыджыд вокыс и юалӧ, кытысь татшӧм озыр пызаныс. Опонь босьтіс да и висьтасис, да и чудлысь кывъяссӧ тшӧтш. Локтіс гортас Опоньлӧн ыджыд вокыс да чудлысь кывъястӧ зэв гораа горӧдіс:
Чуд-чудилӧ,
Ӧти синма зудилӧ,
Шмака юра,
Укват сюра,
Мый мед тшӧкта,
Сійӧс и ӧкта!
— «Вай меным уна деньга, сёян-юан, кӧм-паськӧм».
Но нинӧм эз ло.
— «Сідзкӧ, — думыштіс Опоньлӧн вок, — менам кыв вылӧ нинӧм оз ло. Колӧ Опоньӧс корны. Ме вылӧ медым чудлысь тшӧтш корас».
И Опоньӧс быттьӧ гӧститны водзӧс корис ас гортас.
А кор Опонь локтіс, сійӧс вокыс пӧдлаліс горничаас да тшӧктіс чудлысь корны сылы эмбур. Медым пӧ горнича тырыс вӧлі.
Опонь и корис. Ӧти здукӧн горничаыс тыри быдсяма эмбурнас. Мый колӧ и оз ков. Сэсся ыджыд вокыс тшӧктіс корны зарни деньга. А Опонь зарни деньга корны эз кут.
— Он кӧ кор, ме тэнӧ кӧзӧдӧ пӧдлала, сэтӧн кынман, — горзӧ вокыс. Сідзи и вӧчис. Опоньӧс вокыс мырдӧн кӧзӧдӧ сюйис да тойліс.
— Кытчӧдз он кӧзӧд тырыс зарни деньга кор, сэтчӧдз тэнӧ кӧзӧдысь ог лэдз.
А Опонь сэки мӧд ногӧн чуд кыв шуис:
Чуд-чудилӧ,
Ӧти синма зудилӧ,
Шмака юра,
Укват сюра,
Кодӧс тшӧкта,
Сійӧс и нӧйта!
— «Менӧ мезды, а горш вокӧс велӧд».
Сӧмын шуны удитіс, кӧзӧд тыр кыськӧ лои веж петшӧр.
Опонь воксӧ горӧдіс:
— Пыр кӧзӧдад, тыр нин лои.
Пырис горш вок кӧзӧдӧ, а сэні гӧгӧр веж петшӧр, и вай сійӧс пывсьӧдны. Ок и ойзіс да ойзіс вокыс. Кутіс кевмысьны.
Опонь бара шуис чуд кыв:
Чуд-чудилӧ,
Ӧти синма зудилӧ,
Шмака юра,
Укват сюра,
Мый мед тшӧкта,
Сійӧс и ӧкта!
— «Дугды петшӧрасьны».
Петіс кӧзӧдысь Опоньлӧн вокыс. Син и ныр пыкӧса, петшӧр болльӧсьӧсь. А Опоньлы чуд пыр отсаліс челядь быдтыны. Вын-сям ставныслы сетіс. Челядь горшӧн эз быдмыны, зарни деньга вылӧ эз ышмыны.
