ЗАРНИ СЬӦМА ЁДІ

Оліс-выліс коркӧ гӧль чери кыйысь Мӧсей. Став олӧм чӧжыс сӧмын и мӧвпаліс, кыдзи эськӧ озырмыны.

Кор уна чери шедас, базарын вузалас, да сӧмын тыв дӧман сунис вылӧ и вичмас.

А ӧтчыд суис сійӧс ю вылын лёк гыма-чарда зэр. Тывйыд тӧняын, вермас пропадитны. Кыскис тыв пыжӧ, а чард-гым кыдз тай гымовтас... Тӧкӧтьӧ ваас оз усь. Аддзис: тывйын шедӧма зарни сьӧма Ёді. Гаровтіс Мӧсей Ёдісӧ тывъяс — да берегӧ. А берегын Ёді морт моз кевмыны Мӧсейӧс мӧдіс:

— Лэдз менӧ юӧ, Мӧсей. Зарни сьӧм сета.

Эз лэдз Мӧсей ёдісӧ юӧ. Ёнджыка на топӧдіс да сьӧмйыштіс-килльыштіс кымынкӧ сьӧм Ёділысь. Ёділӧн сьӧм увсьыс быдӧн вир чепӧсйис.

— Ой, доймӧ! Лэдз менӧ юӧ, тайӧ сьӧм вылас унатор нин позьӧ ньӧбны.

— Лэдза, — шуӧ Мӧсей. — Вот нӧшта кымынкӧ сьӧм килльышта и лэдза. А ачыс мӧвпалӧ: «Йӧйӧс али мый аддзӧма. Ог жӧ нин эськӧ лэдз!..» Нӧшта килльыштіс кымынкӧ сьӧм. Ёдіӧс ва тыра ведраӧ пуктіс, кӧрталіс да мӧдіс лавкаӧ. Сэтысь став тӧварсӧ, мый вӧлі, ньӧбис. Сэсся поплысь вӧла-доддя ньӧбис. Гортас вайӧдіс.

Гортас воис да бара на ёдітӧ сьӧмйыштіс.

— Лэдз менӧ, Мӧсей, бӧж дорын нин сӧмын коли сьӧмӧй. Сійӧс кӧ киллян и, кула.

— Ыджыд тай, кулан кӧ — жарита.

И ӧстатки сьӧмсӧ киллис ёділысь Мӧсей. Ёді кулі. Сӧмын кӧсйис Мӧсей жаритны ёдіӧс, кыдз тай бара заводитчис гыма-чарда зэр. Пырис труба пырыс биа мач, лёк гӧлӧсӧн гымовтіс.

— Мыйла менсьым Ёді-царевнаӧс виин?! Та понда некод таладорын некутшӧм чери оз аддзыв! А тэ небесаӧ каян!

Сяркнитіс биа мач лёк биӧн. Мӧсей небесаӧ кайис, лои ичӧтик кодзулӧн. Некодлы сыысь ни абу шоныд, ни абу югыд.