ПОВЗЬӦДЧЫСЬ ШЫР
Неылын, видз вылын, олісны-вылісны шыръяс. Ӧтиыс, Пик нима, ёна радейтіс повзьӧдчыны. Дзебсяс паськыд кор улӧ да лёкгоршӧн равзӧ, быттьӧ зверь.
Сун-сан, тӧрӧкан,
Сюра-беддя ӧшлӧпан.
Коді оз сёй рок,
Сылысь курчча кок,
Коді оз ю йӧв,
Сійӧс сёяс вӧв.
Гызь-гузь лэбӧ сюзь.
Палич — кокас,
Сюръяс — бокас,
Юрыс — гырйысь,
Нырыс — мырйысь.
Он кӧ пышйӧй,
Шумар-шамар кватитас.
Шыръяс, коді кытчӧ, руз-раз пышъяласны-дзебсяласны. Коді му розьӧ, коді турун улӧ, тіралӧны, чӧв олӧны. А шыр Пик петас дзебсянінысь, лапасӧ кынӧм вылас кресталас да и сералӧ:
— Повзинныд?
— Ёна жӧ тэ миянӧс повзьӧдін, — му розьясысь петӧм бӧрын шуӧны шыръяс. — Вот эськӧ тадзи жӧ кӧ Каньӧс вермин повзьӧдны. Вывті нин тшӧкыда кутіс сійӧ волывлыны видзьяс вылӧ.
— А мый, видла и Каньӧс повзьӧдны, — вочавидзис Пик.
Кавшасис сійӧ лапкор вылӧ, видзӧдліс гӧгӧр, кодар бокын кань. Лэччис, ньӧжйӧник матыстчис Кань дорӧ бӧж дорсяньыс. Му розьӧ пырис да заводитіс лёкгоршӧн горзыны:
Зыр-зор, ме — зверь!
Дынь-дань, кузь пинь.
Тун-тан, коді тан?
Кульӧмӧн сёя, Кань!
Бӧжтӧ ньылышта,
Ныртӧ сьӧлышта.
Он кӧ дугды кыйны шыр,
Курчча тэнсьыд уска ныр!
Петіс му розьысь, Каньлысь курччис бӧжсӧ да бӧр тювкнитіс му розьӧ. А Кань бергӧдчыліс да сідз эз и гӧгӧрво, коді бӧжсӧ сылысь курччис. Аддзис муысь розь, думыштіс да муровтіс:
— Коді лысьтіс курччыны менӧ?
А Пик му улысь бара равӧстіс мый вынсьыс:
Зыр-зор, ме — зверь!
Дынь-дань, кузь пинь.
Тун-тан, коді тан?
Кульӧмӧн сёя, Кань!
Бӧжтӧ ньылышта,
Ныртӧ сьӧлышта.
Он кӧ дугды кыйны шыр,
Курчча тэнсьыд уска ныр!
Кань юалӧ:
— Коді нӧ кӧсйӧ менсьым ныр сьӧлыштны?
Сэсся му розьӧ лапасӧ сюйис. А Пик и курччис сійӧс. Кань эськӧ удитіс гыжъяссӧ шамыртны, да кватитны эз вермы. Сӧмын му кӧмӧк лапаас и колис. Скӧрмис Кань, исыштіс му розьсӧ да шуӧ:
— Вӧлӧмкӧ тай, шыр курччасьӧ!
Бара нырсӧ сюйис му розьӧ, а Пик кыдз тай курччас сылысь нырсӧ...
— Ой, збыль тай кутшӧмкӧ зверь сёйны менӧ кӧсйӧ! Пышйыны ковмас, буракӧ...
И котӧртіс. Петісны шыръяс ортсыӧ, ошкыны заводитісны Пикӧс.
— Тэ тай збыль повзьӧдчысь. Вай нӧшта Ручӧс повзьӧд.
— Видла и сійӧс повзьӧдны.
Ачыс эськӧ полӧ Ручсьыд. Но мукӧд шыръяс эскӧны сылы, да бытьӧн ковмас мунны.
Бара сійӧ кавшасис лапкор вылӧ, видзӧдліс, кӧні Руч. А Ручыд, вӧлӧмкӧ, паськыд мыр вылын куйлӧ, шонді водзын пӧжсьӧ. Пик чеччыштіс мырлань да сылӧн вуж улӧ тювкнитіс. Сэсянь и равзыны лёкгоршӧн кутіс да нӧшта на паличӧн мыр вуж кузяыс клёнӧдны.
Ме зыр-зор зверь!
Коді водіс татчӧ!
Сійӧс сёя рачӧн.
Бӧжсӧ — ӧтарӧ,
Пельсӧ — мӧдарӧ.
Кокъяссӧ — рынышӧ.
Вомас — зор.
Нырас — зыр.
Руч, мун тась дзик пыр!
А Ручыд кывзіс да думыштчис. Мырйыскӧд, буракӧ, абу ставыс лючки. Кодкӧ равзӧ-клёнӧдчӧ бӧжнас.
Нырсӧ мыр вуж улӧ сюйис, а Пик кыдз тай курччас ёсь пиньнас сылысь нырсӧ, вирӧдз косяліс. Повзис Руч да пышйис. Нырсӧ лапанас кутӧ да бӧрдӧ. Паныд Ош.
— Мый нӧ, нылӧй, бӧрдан? — юалӧ Ош.
— Кыдзи нӧ он бӧрд! Куйлі мыр вылын, кодкӧ мыр улас кутіс равзыны да нӧшта на курччасьны. Рачӧн пӧ сёя. Но кыдзкӧ тай пышйыны удайтчис. Тӧкӧтьӧ ныртӧм эг коль.
— Ветла видзӧдла, кутшӧм зверь ручьясӧс сёйӧ. Гашкӧ, Кӧин, сысянь быдсяма пакӧсть позьӧ виччысьны.
Мунӧ, а Кӧиныд — паныд.
— Мыйла нӧ, Кӧин сват, Ручӧс, авъя нылӧс, ӧбӧдитан?
— Ме талун эг на сійӧс аддзыв.
— Но кодкӧ тай мыр увсянь курччӧма сійӧс да садь быртӧдзыс повзьӧдӧма.
— Вай ветлам, видзӧдлам, — вӧзйис Кӧин.
Матыстчисны мыр дорӧ. Збыль, кодкӧ равзӧ.
— Коді нӧ тані равзӧ? — ӧттшӧтш юалісны Кӧин да Ош.
Пик ланьтіс. Повзис весиг.
«Ог шыась», — думайтӧ сійӧ.
А Кӧин да Ош босьтчисны да и пӧрӧдісны мыртӧ. Аддзисны сэтысь Пикӧс. Повзьӧмысла сійӧ зэлӧдчӧма мыр вуж бердӧ. Тіралӧ.
— Тэ али мый повзьӧдчан да курччасян?
— Ме-е, — вӧсньыдик гӧлӧсӧн вочавидзис Пик.
Ош да Кӧин кыдз тай кутісны серавны, турун вылын быглясьны. Шыр кытчӧкӧ тювкнитіс.
А кор Руч воис да тӧдмаліс, коді сэні вӧлӧма, тшӧтш кутіс гигзьыны. Дыр на шыръяс ваксисны, кытчӧдз кынӧмныс эз висьмы.
