ВЕЛӦДЫСЬ КӦЧ — БЕРИНӦСЬ НЫР

Коркӧ-некоркӧ, важӧн-неважӧн

Кыдз вылын мойд ӧшаліс, ӧшаліс,

Лёк турӧб тӧв босьтіс,

Мойд усис, пусь-пась жугаліс,

Видз вылӧ сявкмуніс.

Виддзыс — вутш вылын.

Вутшкыс — шорын.

Шорыс — вӧрын.

Вӧрыс — пачын.

Пачыс — мачын.

Мачыс — качысь.

Качыс — гыжа.

А ме лэбын вожӧн гижа.

Тайӧ абу мойд, а тайӧ мойд пельӧстор.

А мойдыс — со.

Видз вылын, вӧр костын, олісны кӧчьяс. Ӧти кӧч Беринӧсь Ныр горӧдіс кӧчьяслы:

— Вайӧ, ёртъяс, вӧчам чом тӧв кежлӧ!

— А тэ ӧмӧй кужан? — юалісны кӧчьяс.

— Ме?! Быдтор кужа вӧчны, тіянӧс, колӧкӧ, велӧда, — зэв тшапа ошйысис кӧч Беринӧсь Ныр.

— Велӧд, велӧд! — шызисны кӧчьяс.

— Сідзкӧ, ветлӧй потшъясла.

Котӧртісны кӧчьяс вӧрӧ. Быдӧн ваялісны потшъяс, кутшӧм сюрис.

— Вайинныд? Ӧні тэчӧй крестӧн-крестӧн, ӧтчукӧрӧ. Медым шӧрыс коста вӧлі.

Потшъяс тэчӧм бӧрын шуӧ кӧч Беринӧсь Ныр:

— Котӧртӧй коз лапъясла, медым вевт увсӧ вӧчны.

Котӧртісны кӧчьяс вӧрӧ, вайисны коз лапъяс, тэчисны вевт ув.

— Но вот, — шуис кӧч Беринӧсь Ныр, — ӧні ваялӧй турун вевт вылӧ лӧдны.

Зіля кӧчьяс котӧртісны да нетшкисны видз вылысь турун. Лӧдісны коз лапъяс вылӧ. Быттьӧкӧ кутшӧмкӧ чом кодь и артмис.

Медводз чомйӧ пырис кӧч Беринӧсь Ныр. Сы бӧрын мукӧд кӧчьяс. Зэв дзескыд лои. Кӧч Беринӧсь Ныр пинялӧ:

— Эн кужӧй чом вӧчны, зэв дзескыд лои, весиг ставӧн ог тӧрӧй. Кодлӧн бӧжыс чомйын, кодлӧн нырыс сӧмын тӧрис. Бӧръя кокӧн весиг гыжйыштчыны некыдз.

Сідзи и олӧны чомйын. Зэр дырйи чом виялӧ, тӧв чом пыр шутьлялӧ.

Коркӧ лым уси, сэк и шоныдджык лои. Вель джуджыда лым пуксис. Весиг кӧч чом лым улын оз и тӧдчы, муртса мылькъя.

Кыськӧ йӧра сэні мунны слӧймис. Нырсӧ лэптіс, турун дук кыліс мыльк улысь. Кокнас лым гурйыштіс. Аддзис турун. Ставсӧ сёйис. Сэсся мунігас чом вылӧ тальыштіс да потшъясас тӧкӧтьӧ коксӧ эз лямӧд. Кӧчьяс муртса пышйыны удитісны.

Ӧти кӧч коз пу улӧ дзебсис, мӧд — пӧрӧм пожӧм улӧ, кодкӧ лым гуранӧ пырис, кодкӧ — сісь пу пытшкӧ. Сӧмын кӧч Беринӧсь Ныр некытчӧ эз дзебсьы, а котралӧ да быдӧнӧс велӧдӧ:

— Тэ мыйла коз пу увлӧн таладорас пырин? Мӧдарас колӧ пырны.

Мӧдӧс бара пинялӧ:

— Тэ мыйла лым гуранас вывлань кокӧн пырин? Колӧ ӧд увлань нырӧн!

Коймӧдӧс бара:

— Ок тэ и йӧй! Пырӧма сісь пу пытшкас. Да ӧд бӧжыд и тыдалӧ. Колӧ ӧд, мед сӧмын нырыд ортсыысь тыдалӧ.

Нёльӧдӧс бара:

— Тэ мыйла пӧрӧм пожӧм улас пырин? Мый, тэд сувтса пожӧмыс эз сюр али мый? Но и кӧчьяс! Велӧд тіянӧс кӧть эн!

А ӧти томиник Кӧчильӧй и юалӧ:

— А ме ог тӧд, кытчӧ дзебсьыны.

— А тэ ӧмӧй дзебсьыны кӧсъян? Серам босьтіс, кодысь нӧ эськӧ?

— А гашкӧ, кӧин локтас, — вочавидзис Кӧчильӧй.

— Вак-вак, — серӧктіс кӧч Беринӧсь Ныр, — ме думысь, Кӧин татчӧ оз лок, а локтас кӧ — колӧ пышйыны.

— А кыдзи пышйыны? — юаліс Кӧчильӧй.

— Нёль кокӧн, дона Кӧчильӧй, нёль кокӧн, а оз ков кык кокӧн. Ноко, петкӧдлы, кыдзи эськӧ тэ Кӧинысь пышъян?

Кӧчильӧй кутіс чеччавны коз пу гӧгӧр.

— Ме жӧ тэд шуи: нёль кокӧн котӧрт, а тэ чеччалан, быттьӧ тэнад куим кок, а абу нёль.

Горзыны кутіс кӧч Беринӧсь Ныр Кӧчильӧй вылӧ. Кӧчильӧй быдӧн бӧрдны нин заводитіс.

А Кӧиныд неылын вӧлі узьӧ. Садьмис.

— Но, — шуӧ, — сё мокасьт, коді бара вӧрас горзӧ? Лоӧ ветлыны, ӧлӧдыштны.

Локтіс вӧр кост вылӧ, а сэні кӧч Беринӧсь Ныр Кӧчильӧйӧс пинялӧ.

— Мый нӧ тані равзанныд? — гораа юаліс Кӧин.

Кӧчильӧй кытчӧкӧ пуля моз югнитіс. А кӧч Беринӧсь Ныр шай-паймуніс чуймӧмысла да местаас и мыр моз сувтіс. Сӧмын мекӧстіс:

— А ме-э-э-э...

— А мый тэ? Ыж али мый, мексан?! — горӧдіс Кӧин.

— А мэ-э-э-э... — тірӧм босьтіс кӧч Беринӧсь Нырӧс. — Ме Кӧчильӧйӧс велӧда, кыдзи колӧ кӧинысь пышйыны.

— Ноко, петкӧдлы! — равӧстіс Кӧин. — Видзӧдла, кыдзи кутан пышйыны!

Кӧч Беринӧсь Ныр местасьыс оз вермы вӧрзьыны. Водіс лым вылӧ вывлань кокӧн. Тіралӧ.

— А-а, сетчан тыштӧг?!

Уськӧдчис Кӧин кӧч Беринӧсь Ныр вылӧ.

А сійӧ повзьӧмысла бӧръя кок гыжъяснас сідз чапыштіс кӧинлысь нырсӧ, мый быг-вир кутіс сявкйыны.

— Ы-а, мамӧ! — равӧстіс Кӧин. — Ме ӧд чайті, тэ кутан пышйыны, а мыйла Кӧчильӧйӧс мӧд ног велӧдан?

— А ме ӧд тайӧс велӧднысӧ эг на удит. Нӧшта на велӧда, кыдзи колӧ бугыльяс кӧинлысь пешкылявны. Кыдзи колӧ кучик кульны, кыдзи...

— Ой-ой-ой, — думыштіс Кӧин, — колӧ ӧдйӧджык татысь усйысьны. Код тӧдас, мыйӧ нӧшта велӧдас кӧч Беринӧсь Ныр.